Enne Schreft lia wie, daut Jehowa sikj uk fa soone Menschen intressieet, om dee aundre veleicht nuscht om romjäwen. Soo wia daut biejlikj, aus Jehowa dän Profeet Samuel no Isai schekjt. Hee sull eent von dän siene Säns aus dän näakjsten Kjennich von Israel saulwen. Isai brocht säwen von siene acht Säns ver Samuel, oba hee docht nich aun sienen jinjsten Sän David. Oba Jehowa wäld sikj tolatst krakjt dän (1. Sam. 16:​6-7, 10-12). Wuarom? Wiels hee no David sien Hoat kjikjt un sach, daut et een junga Mensch wia, waut daut Jeistelje sea väl räakjend. Denkj doch mol doaräwa no, woo Jehowa die aul jewäsen haft, daut hee sikj fa die intressieet. Hee jeft die Rot, waut krakjt fa diene Loag paust (Psa. 32:8). Denkj mol han: Woo wudd hee die soonen Rot jäwen kjennen, wan hee die nich goot kjand? (Psa. 139:1). Wan du daut nokjemst, waut Jehowa die toorot, woascht du beläwen, woo goot daut utkjemt. Un du woascht die dan secha sennen, daut hee väl om die romjeft (1. Chr. 28:​9, JHF; Apj. 17:​26-27). Jehowa sitt, woo sea du die aunstrenjst, un hee räakjent diene goode Ieejenschoften sea väl. Doawäajen well hee dien Frint sennen (Jer. 17:10). w24.10 25-26 V. 7-9

Gaunz secha leefst du Jehowa un west waut fa aundre doonen. Woo kaust du noch eenen jratren Wunsch kjrieen, waut fa aundre to doonen? Denkj mol han, woo väl Freid daut jeft! Jesus säd: “Daut jeft mea Freid, wan eena jeft, aus wan eena nemt” (Apj. 20:35). Jesus selfst kjeem disen Gruntsauz no. Hee haud werkjlich Freid doabie, waut fa aundre to doonen. See wie mol, woo hee daut en Markus 6:​31-34 wees. Opp dee Sauz wieren hee un siene Apostel gaunz meed. Dee wieren oppem Wajch no eene ruje Städ, wua see sikj vereiwen kunnen. Oba eene Häad Menschen wia doa aul ea, un dochten, daut Jesus äant lieren wudd. Hee wudd haben kunt nä sajen, wiels “see hauden nich mol soo väl Tiet toom noch äten.” Ooda Jesus wudd dee haben kunt eent ooda twee Sachen lieren un dan dee fuatschekjen. Oba wiels hee dee soo sea leewd, “funk hee aun, dee välet to lieren”, bat “daut aul lot jeworden” wia (Mar. 6:35). w24.11 16 V. 9-10

Elren, rot june Kjinja too, no Jeläajenheiten to sieekjen, aundre de Woarheit ut de Schreft to vetalen (Reem. 10:10). Jie kjennen dee wiesen, daut aundre von äaren Gloowen to vetalen een bät soo es, aus wan eena lieet, een Instrument to spälen. Aum Aunfank eeft eena bloos eene eefache Mellodie, oba met de Tiet woat eenem daut leichta, Musikj to moaken. Krakjt soo woat een Jugentlicha aum Aunfank veleicht opp eene leichte Wajch aundre von sienen Gloowen vetalen. Veleicht frajcht dee eenen Schoolpoatna: “Hast du daut jewist, daut de Forscha foaken waut ut de Natua nomoaken? Kaun ekj die doatoo mol een sea intressauntet Video wiesen?” Nodäm daut dee dän eent von de Videos Wort daut jemoakt? jewäsen haft, kaun dee dän froagen: “Wan de Forscha aul doafäa jeloft woaren, daut dee waut ut de Natua nomoaken, wäa saul dan fa daut jeloft woaren, waut en de Natua es?” Veleicht rieekjt dit aul too, om dän Schoolpoatna noch nieschieeja to moaken un daut dee mea doaräwa lieren well. w24.12 19 V. 17-18