Barava Redi Gud for Teach
1. Why nao iumi mas trae hard for mekem Bible study tinghae long wanem hem lanem?
1 Taem iumi duim wanfala Bible study, iumi mas barava redi gud sapos iumi laek for helpem Bible study for worshipim Jehovah. Diswan bae helpem datfala Bible study. (Deut. 6:5; Prov. 4:23; 1 Cor. 9:26) So hao nao iumi savve duim diswan?
2. Hao nao prea savve helpem iumi for prepare gud?
2 Prea Taem Iumi Prepare: From Jehovah nao bae mekem Bible study for savve long olketa trufala teaching, taem iumi prepare hem fitim iumi for prea for datfala Bible study and wanem hem needim. (1 Cor. 3:6; Jas. 1:5) Wei for prea olsem bae helpem iumi for luksavve hao for helpem Bible study for kasem “stretfala savve” abaotem evri plan bilong Jehovah.—Col. 1:9, 10.
3. Taem iumi prepare, hao nao iumi savve tingim Bible study?
3 Tingim Bible Study: Jesus savve, for teach gud hem mas tingim pipol wea hem story long olketa. Tufala taem nao olketa askem Jesus disfala kwestin: “Wanem nao mi mas duim for kasem laef olowe?” And Jesus iusim tufala difren wei for ansarem datfala kwestin. (Luke 10:25-28; 18:18-20) Taem iumi prepare, ting raonem wanem nao Bible study need for lanem. Olketa wanem scripture nao bae iumi iusim? Haomas paragraf nao bae iumi trae for studyim? Olketa wanem point nao maet hem hard for Bible study minim or bilivim? Sapos iumi tingim firstaem samfala kwestin wea Bible study maet askem, iumi bae redi gud for ansarem.
4. Wanem nao iumi mas duim for prepare gud?
4 Lukluk Moa Long Buk: Nomata sapos iumi studyim wanfala buk staka taem finis, hem bae firstaem for iumi studyim witim datfala Bible study. So sapos iumi laekem Bible study for tinghae long wanem hem lanem, iumi mas barava prepare gud. Diswan minim iumi mas duim wanem iumi strongim Bible study for duim. Ting raonem Bible study taem iu lukluk moa long olketa paragraf, olketa scripture, and andalaenem olketa main point.—Rom. 2:21, 22.
5. Long wanem wei nao iumi savve olsem Jehovah?
5 Jehovah barava interest long hao evri Bible study gohed. (2 Pet. 3:9) Iumi showimaot iumi garem tingting olsem Jehovah for evri Bible study taem iumi prepare gud.