LESON 37
Wat Nao Bible Talem Abaotem Waka and Selen?
Hao, enitaem iu wari abaotem waka or selen? Hem wanfala challenge for kasem olketa need blo iumi, and tu for worshipim Jehovah lo full heart blo iumi. Bible givim olketa gud advaes wea savve helpem iumi.
1. Wat nao Bible talem abaotem waka?
God laekem iumi for enjoyim waka blo iumi. Bible sei dat “no eni samting hem beta winim for man . . . enjoyim hard waka blo hem.” (Ecclesiastes 2:24) Jehovah hem waka hard. Taem iumi followim example blo hem for waka hard, iumi mekem hem hapi and iumi tu satisfae lo wat iumi duim.
Waka hem important. Bat iumi shud no letem waka for hem important winim worship blo iumi for Jehovah. (John 6:27) Jehovah promis dat taem iumi mekem worship blo iumi for hem nao most important samting lo laef, hem bae provaedem wat iumi needim.
2. Wat nao Bible talem abaotem selen?
Bible sei “selen hem protectim” iumi. Bat hem sei tu, selen hem no only samting wea savve mekem iumi hapi. (Ecclesiastes 7:12) Dastawe, Bible encouragem iumi for no lovem tumas selen bat for iumi “mas satisfae nomoa lo samting wea [iumi] garem.” (Readim Hebrews 13:5.) Taem iumi satisfae nomoa lo wat iumi garem, bae iumi no feel nogud bikos iumi tingse iumi no garem inaf samting. Bae iumi no garem staka kaon. (Proverbs 22:7) And tu, iumi bae misstim olketa danger from wei for gambol and olketa bisnis scheme wea promisim man for kamap rich kwiktaem.
3. Hao nao iumi savve iusim selen for helpem olketa narawan?
Jehovah hem God wea willing for give and iumi followim example blo hem taem iumi “willing for givim samting and for sharem wanem [iumi] garem.” (1 Timothy 6:18) Iumi savve iusim selen wea iumi garem for sapotim kongregeson and helpem olketa narawan wea needim, especially olketa brata and sista. Jehovah no interest lo haomas iumi givim, bat hem interest lo motive blo iumi for givim samting. Taem iumi willing for give from heart, iumi bae hapi and iumi bae mekem Jehovah hapi.—Readim Acts 20:35.
DIG GO MOA
Bae iumi lanem gud samting wea man savve kasem taem hem garem balance tingting abaotem waka and for satisfae.
4. Hao iumi duim waka shud givim praise lo Jehovah
Frenship blo iumi witim Jehovah shud affectim tingting blo iumi abaotem waka. Pleim VIDEO, then discussim tugeta olketa kwestin hia.
Olsem iumi lukim lo video, wat nao iu tinghae lo Jason abaotem attitude and wei blo hem lo ples wea hem waka?
Wat nao hem duim for garem balance tingting abaotem waka blo hem?
Readim Colossians 3:23, 24, then discussim tugeta kwestin hia:
Why nao hao iumi ting lo waka hem important?
Waka hem important. Bat iumi shud no letem waka for hem important winim worship blo iumi for Jehovah
5. Iumi benefit taem iumi satisfae nomoa witim wat iumi garem
Staka pipol trae for kasem staka selen. Bat advaes wea Bible givim hem difren. Readim 1 Timothy 6:6-8, then discussim tugeta disfala kwestin:
Wat nao Bible encouragem iumi for duim?
Nomata iumi garem lelebet samting nomoa, iumi savve hapi. Pleim VIDEO, then discussim tugeta disfala kwestin.
Nomata olketa famili hia garem lelebet selen nomoa, wat nao mekem olketa hapi?
Bat wat if iumi garem staka samting finis and iumi still laekem staka samting moa? Jesus talem wanfala illustration wea showim kaen tingting olsem savve spoelem man. Readim Luke 12:15-21, then discussim tugeta disfala kwestin:
Wat nao iu lanem from datfala illustration blo Jesus?—Lukim verse 15.
Readim Proverbs 10:22 and 1 Timothy 6:10 and comparem tufala scripture hia. Then discussim tugeta olketa kwestin hia:
Iu ting wat nao hem moa important? Frenship blo iu witim Jehovah or for garem staka selen? Why nao olsem?
Wat nao olketa problem wea man savve kasem taem hem aftarem tumas selen?
6. Jehovah bae provaedem wat iumi needim
Olketa problem saed lo waka and selen savve testim faith blo iumi lo Jehovah. Pleim VIDEO for lukim wat iumi savve duim taem iumi kasem olketa test olsem, then discussim tugeta olketa kwestin hia.
Olsem iumi lukim lo video, wat nao olketa challenge wea datfala brata kasem?
Wat nao hem duim for winim olketa challenge hia?
Readim Matthew 6:25-34, then discussim tugeta disfala kwestin:
Wat nao Jehovah promisim for olketa wea mekem worship blo olketa for hem nao most important samting lo laef?
SAMFALA SAVVE SEI: “Mi mas waka hard for sapotim famili blo mi. Mi no fit for attendim meeting evri week.”
Eni scripture mekem iu sure dat wei wea iu mekem worship blo iu for Jehovah hem most important lo laef, hem best samting for duim?
MAIN POINT
Waka and selen hem important samting, bat hem shud no disturbim worship blo iumi for Jehovah.
Review
Wat nao savve helpem iu for garem balance tingting abaotem waka?
Wat nao gud samting iu kasem taem iu satisfae nomoa witim wat iu garem?
Hao nao iu savve showim iu trustim promis blo Jehovah for provaedem wat pipol blo hem needim?
FAENDAOT MOA
Readim disfala article for faendaot sapos Bible sei selen hem nogud samting.
“Hao, Selen Nao Hem Kosim Evri Nogud Samting?” (Article lo jw.org)
Read abaotem hao iumi savve iusim selen blo iumi for mekem God hapi.
“Wat Nao Bible Talem Abaotem Wei for Give?” (Article lo jw.org)
Hao, for gambol hem no savve spoelem man?
“Wanem Bible Talem Abaotem Wei for Gambol” (Awake!, March 2015)
Read abaotem wat nao mekem wanfala man for stop for gambol and for steal.
“Mi Laekem Tumas Racehorse” (The Watchtower, November 1, 2011)