August

Kitail kin kapakapki me aramas tohto pahn rong dahme kitail padahkihong irail oh pilada ren iang kitail papah Siohwa ahnsou wet. Ahpw ia duwen irail kan me sohte men rong kitail ahnsou wet? Ele kupwuren Siohwa iei en ketin doarehla aramas akan me tepida pwosonla ih mwurin arail kilang kasohralahn Papilon Lapalap. Ma ei, e uhdahn kesempwal en pousehlahte padahkihong irail duwen met. Ni ahnsowo, irail kakete tamanda dahme kitail padahkihong irail ahnsou wet. (Pil kilang Esekiel 33:33.) Mwein irail kakete tamanda dahme irail rongasang kitail oh men iang kitail papah Siohwa mwohn eh pwandala. Duwehte silepen imwetengo nan Pilipai eh mwadangete wekidala eh madamadau mwurinte ‘rerrer en sahpw laud ehu eh wiawi,’ ele ekei me sohte mwekidki ahnsou wet pahn wekidala arail madamadau mwurinte kasohralahn Papilon Lapalap.—Wiewia 16:​25-34. w24.05 16-17 ¶9-10

Kitail sukuhlki ehu mehn kasukuhl kesempwal sang dahme wahnpoaron Pohl ntingkilahng Kristian en Ipru ko. Ekei irail sohte kin kekeirda; ni mehlel irail “pwurehng pwurala anahne milik, ahpw kaidehn mwenge kekeluwak [padahk loal kan].” (Ipru 5:12) Irail sohte esehla oh pwungki padahk kapw kan me Siohwa ketin doadoahngki mwomwohdiso pwehn padahkihong irail. (Lep. Pad. 4:18) Karasepe, Kristian en Suhs tohto kin uhki duwen Kosonned en Moseso mendahki sounpar 30 samwa mwohn mwo Kosonnedo imwiseklahr pwehki sapwellimen Sises meirongo. (Taitus 1:10) Eri ahnsowo, Pohl kin songosong en sewese irail en pwungki padahk mehlel loal kan me e padapadahkihong irail. Nah kisinlikowo sewese irail en kilang me elen kaudok kapw me Siohwa ketin koasoanedier ni eh ketin doadoahngki Sises uhdahn mwahusang mwoweo. Met pil kihong irail eimah en pousehlahte kalohk.—Ipru 10:​19-23. w24.04 6 ¶15

Sangete ahnsou me Adam oh Ihp iangala Sehdan oh uhwongada Siohwa Koht, aramas lik lik kei melahr. Dahme pahn wiawihong aramas pwukat koaros? Kisin pwihn tikitik en 144,000 ko koaros, me kin idawehn Krais ni lelepek, pahn iasada pwehn ahneki mour soutuk nanleng. (Kaud. 14:1) Oh pil ohl oh lih lelepek tohto me kin poakohng Siohwa pahn wia kisehn “kaiasada ong me pwung kan,” oh irail pahn mour kohkohlahte nin sampah ma irail lelepekte erein Kaundahn Krais Pahr Kido oh erein kaimwiseklahn kasongosongo. (Dan. 12:13; Ipru 12:1) Oh pil erein Pahr Kido, “me sapwung kan”—iangahki irail kan me sohte kin papah Siohwa de pil “irail me wiewia me suwed”—pahn ahneki ahnsou mwahu en wekidala arail wiewia kan oh wiahla sapwellimen Siohwa ladu lelepek kei. (Sohn 5:29; Luk 23:​42, 43) Ahpw, ekei aramas akan uhdahn suwed me kahrehda e ketin koasoanehdi me irail sohte mwahn pahn iasada.—Luk 12:​4, 5. w24.05 2 ¶3; 6 ¶15, 17

Emen me men iang irail kan me Siohwa ketin kupwurki anahne kin “koasoi mehlel nan eh mohngiong.” (Mel. 15:​2, NW) Met pidada laudsang en dehr likamw. Siohwa ketin kupwurki kitail en kin mehlel ni soahng koaros me kitail nda oh wia. (Ipru 13:18) Met kesempwal pwehki “KAUN-O kin ketin kalahdeki aramas akan me kin wia me suwed, ahpw e kin ketin kompoakepahnki me pwung kan.” (Lep. Pad. 3:32) Irail me kin ‘koasoi mehlel nan arail mohngiong’ sohte kin peikiongete Koht ni meteikan ar kin kilang irail ahpw mwuhr wia soahng suwed kan. Irail sohte men wia aramas widing. Aramas widing men ele kin tepida medewe me sapwellimen Siohwa kosonned kan sohte kin ahnsou koaros mwahu. (Seims 1:​5-8) Ele e sohte kin peikiong Siohwa ni soahng kan me e medewe me sohte nohn kesempwal. Eri ma soahng suwed kan sohte wiawihong ih ni ahnsou me e sapeik, ele e pahn tepida wia soahng kan me pil suwedsang. Mehnda ma e medewe me e kin papah Koht, Siohwa sohte pahn ketin kupwurki eh kaudok. (Ekl. 8:11) Ahpw kitail kin men mehlel ni soahng koaros. w24.06 10 ¶7-8

Sapwellimen Siohwa aramas akan kin poakohng me mehlelo me mi nan Mahsen en Koht. Atail pwoson kin poahsoankihda met. (Rom 10:17) Kitail kamehlelehier me Siohwa ketin koasoanehdi mwomwohdiso en Kristian en wia “poahsoanpen me mehlelo.” (1 Tim. 3:15) Sehdan pahn uhdahn men kitail en uhdihsang likih Paipel de kaweid kan sang sapwellimen Koht pwihn. (Ep. 4:14) Ahnsou keren Tepilo pahn doadoahngki soangen likamw kan me mwomwen mehlel pwehn pitihedi wehi kan koaros en uhwongada Siohwa. (Kaud. 16:​13, 14) Kitail kak pil kasik me Sehdan pahn kalaudehla eh nanti pwehn pitihedi sapwellimen Siohwa aramas akan. (Kaud. 12:9) Ihme kahrehda e kesempwal en kaiahnekitailda pwehn ese wekpeseng en me mehlel oh likamw oh peikiong me mehlelo. (Rom 6:17; 1 Pit. 1:22) Met uhdahn anahn pwe kitail en kak pitsang kahn kamakam kowahlapo! w24.07 8 ¶1-3

Ni Siohwa eh ketikihong mehn Israel ko sapwellime kosonned kan, re inoukihda en peikiong. Ma irail peikiong sapwellime kosonned kan, e pahn ketin pere irail oh kapaiairailda. Ahpw ma irail sohte peikiong sapwellime kosonned kan de ma irail pilada en kaudokiong koht teikan, e solahr pahn ketin pere irail, oh re pahn kin lokolok. Ahpw met sohte wehwehki me Siohwa uhdahn ketin keseirailla. Re kak “sohpeiong KAUN-O oh kapwaiada . . . sapwellime mahsen kan.” (Deud. 30:​1-3, 17-20) Re kak koluhla. Ma irail wia met, Siohwa pahn ketin karanihala irail oh pwurehng kapaia irail. Sapwellimen Siohwa aramas pilipilda kan kin pwurupwurehng uhwongada ih. Imwilahn met, re lelohng lokolok. Ahpw Siohwa ketin pousehlahte song en sewese irail en pwurehng papah ih. E ketin pwurupwurehng kadarala soukohp akan en kangoange sapwellime aramas akan en koluhla oh pwurodo reh.—2 Nan. 17:​13, 14. w24.08 9 ¶4-5

Mwurin Sises pwoula nan pahr 33, Kristian kan nan Serusalem oh Sudia lelohng kahpwal tohto. Mwurinte mwomwohdisohn Kristian wiawihda, irail kin lelohng kalokolok laud. Mpen sounpar 20 mwuri, irail lelohng lokolok laud pwehki duhpek oh semwehmwe. (Wiewia 11:​27-30) Ahpw erein ahnsou ehu mpen pahr 61, Kristian ko sohte lelohng kalokolok duwehte me pahn wiawihong irail mwuhr. Erein ahnsou meleileio, irail alehdi kisinlikou ehu sang wahnpoaron Pohl—kisinlikou ehu me irail uhdahn anahne pwehn kaunopada ong dahme pahn wiawi mwuhr. Kisinlikowo ong mehn Ipru ko uhdahn konehng ahnsowo pwehki popohl me Kristian ko ahneki sohte pahn mihmi werei. Pohl kihda kaweid mwahu me pahn sewese Kristian ko en dadaur pahn kahpwal me re pahn kereniong lelohng. w24.09 8 ¶1-2

Ni atail kin lokolok, riatail Kristian kan iei ehu ahl me Siohwa kin ketin doadoahngki pwehn kasalehiong kitail sapwellime limpoak. Irail kak kansenamwahwih kitail ni arail wiahda ahnsou ong kitail oh rong atail kasalehda atail pepehm. Ele irail kak kangoangehkin kitail iren Paipel ehu de iang kitail kapakap. (Rom 15:4) Ekei pak, riatail men kakete katamankihong kitail sapwellimen Siohwa madamadau oh met kak sewese kitail en pousehlahte dadaur. Irail kin kalapw sewese kitail ni soangen ahl akan me duwehte wahdo kanatail mwenge pwehn kansenamwahwih kitail. Ele ekei pak kitail anahne peki meteikan en sewesei kitail. (Lep. Pad. 17:17) Ele irail sehse ia atail pepehm de dahme kitail anahne. (Lep. Pad. 14:10)Eri, ke kak koasoiong kompoakepahmw mwahu kan oh padahkihong irail omw pepehm. Padahkihong irail dahme pahn seweseiuk. Ke kak pilada en koasoiong emen elder de riemen me ke ahn. Ekei sister kin mengeiki koasoiong sister men me koahiek. w24.10 10 ¶15-16

Aramas tohto kin tehk mwahu dahme re kin kang oh kalapw eksersais pwe ren ahneki roson mwahu. Ahpw irail ese me ahneki roson mwahu oh eksersais sohte pahn ireiraildihsang mahla oh mehla. Ele irail medewe me en mour kohkohlahte sohte kak wiawi. Ahpw Sises mahsanih me aramas kak ahneki “mour soutuk,” duwehte me kileldi nan Sohn 3:16 oh 5:24. Sises ketin wiahda manaman ehu ni eh ketin kamwenge aramas kid kid kei. Met inenen kapwuriamwei, ahpw dahme e mahsanih rahno mwuri pil uhdahn kapwuriamweisang. Pokono idawehnla ih Kapernaum, karanih oaroahr en Kalili, wasa me e mahsanihong irail me aramas kak iasada oh ahneki mour soutuk. (Sohn 6:​39, 40) Mahsen en Sises ko kasalehda me aramas tohto me melahr kak iasada oh kowe oh irail kan me ke poakohng kak ahneki mour soutuk. w24.12 8 ¶1-2

Ehu roporop me me saman kan wia koasoia me ohl pwopwoud tohto kin keme arail pwoud, koasoi lemeiong irail, de wiakauwe irail ni ahl teikan. Ohl pwopwoud men me kin wia met ele kin wauneki eh pwoudo mwohn meteikan ahpw kin wiakauwe ni imweo. Dahme kak kahrehiong ekei ohl pwopwoud kan en lemei? Ele arail pahpao kin lemeiong arail nohnou, eri irail kakete medewe me e sohte sapwung en wiakauwe arail pwoud. Ekei ohl kin lemeiong arail pwoud pwehki ih tiahk en pali laud en ohl akan nan arail wasao. Ele ohl pwukat medewe me re anahne lemeiong arail pwoud pwehn kasalehiong irail ihs me kaun. Ekei ohl akan sohte sukuhlki en kaunda arail pepehm oh pil iangahki arail lingeringer. Ekei ohl kin kaukaule kilang kilel de kasdo suwed me kak kahrehiong ren ahneki madamadau sapwung ong lih akan oh wia nsenen pwopwoud. Patehng met, me saman tohto diarada me erein soumwahu lusulus en COVID-19, ohl pwopwoud tohto tepida wiakauwe arail pwoud kan. Ahpw sohte kahrepen ohl pwopwoud men en wiakauwe eh pwoud. w25.01 8 ¶2-3

Sises ketin kawehwehda dahme keieu kesempwal nan sapwellimen Koht kehkehlik kan ni eh mahsanih: “Ke anahne poakohng Siohwa omw Koht ni omw mohngiong unsek oh omw mour unsek oh omw kehl unsek oh omw lamalam unsek.” (Luk 10:27) Eri kitail kin poakohng Siohwa ni soahng koaros me kitail ahneki oh wia. Met pidada atail ineng kan, pepehm kan, oh atail kehl. E pil pidada mwomwen atail kin doadoahngki atail madamadau. Ei mehlel, kitail sohte kak uhdahn wehwehki sapwellimen Siohwa elen madamadau koaros. Ahpw kitail kak wehwehkihla mwahu sapwellime madamadau sang atail sukuhlki “sapwellimen Krais madamadau” pwehki Sises kin ketin kasalehda ni unsek elen madamadau en Semeo.—1 Kor. 2:16. w25.03 8 ¶1

Sises ketin wia ohl unsek men duwehte Adam, mwohn Adam dipada. (1 Kor. 15:45) Eri pwehki Sises pwoula, e kak ketin pwainla pweipweio me anahn pwehn wiliandi dahme Adam luhssang. (Rom 5:19) Sises ketin wiahla “Adam en keieun mwuhro.” Sohte anahne pil emen tohrohr me unsek en kohdo oh pwainla dahme Adam luhssang. Sises ketin pwoula “pak ehute.” (Ipru 7:27; 10:12) Eri ia wekpeseng en koasoandi en tomwo oh pweinen pweipwei sapahlo? Koasoandi en tomwo iei mwekid ehu me Koht ketin wia pwe aramas akan en kak pwurehng ahneki nanpwungmwahu reh. Pweinen pweipwei sapahlo iei pweipwei ehu me pwainla dipen aramas akan. Pweipwei wet iei sapwellimen Sises nta kesempwal me e ketikihda pwehn pwainla dipatail kan.—Ipru 9:14. w25.02 4-5 ¶12-13

Ni atail kin lelohng kahpwal kan, kitail anahne medemedewe dahme keieu kesempwal. Tepilo kose me dene ni atail kin lelohng kahpwal kan, kitail pahn kesehla Siohwa. Eri, mwomwen atail mwekidki atail kahpwal kan kin kak kaperenda de kansensuwedihala Siohwa. (Sohp 1:​10, 11; Lep. Pad. 27:11) Ni atail kin loalopwoatohngete Siohwa mendahki atail kahpwal kan, kitail kin kasalehda atail poakohng ih oh pil kadehdehda me Tepilo likamw. Ele koperment en omw wasao kin uhwong sapwellimen Siohwa aramas kan, mwein ke ahneki kahpwal en mwohni, de ele aramas akan me ke kin kalohk ong sohte men rong rongamwahwo, de mwein ke kin wie lokolok ni ahl teikan. Ma ei, tamataman me omw irairo kin kihong uhk ahnsou mwahu en kaperenda Siohwa. Pil tamataman me e sohte pahn ketin mweidohng uhk en ale songosong me ke sohte kakohng. E pahn ketikihong uhk kehl me ke anahne pwehn dadaur. w24.06 22 ¶9

Ke ese dahme kin keieu kasongeiuk? E keper en pohnsehsehla atail luwet kan de medewe me kitail uhdahn kehlail oh sohte kak wiahda dihp. (1 Sohn 1:8) Tamataman, Pohl koasoia me pil irail “me kin ale kaweid sang sapwellimen Koht manaman” kakete lelohng kasongosong ma irail sohte mwasamwasahn. (Kal. 6:1) Kitail anahne mehleliong pein kitail oh pohnese wasa kan me kitail kin luwet loale. (2 Kor. 13:5) Ni ahnsou me kitail esehda soahng kan me kin keieu kasonge kitail, dahme kitail anahne wia? Kakehlakahda atail en pelianda kasongosong ko! Karasepe, ni mwehin aramas akan nan Paipel, wasa me kin keieu luwet nan kahnimw ehu iei ni ewen kehl kan. Ihme kahrehda sounpei tohto anahne mi ni ewen kehl ko pwehn pere kahnimwo. Duwehte met, kitail anahne tehk kanahieng wasa kan me kitail ese me kitail kin keieu luwet pah.—1 Kor. 9:27. w24.07 15 ¶5-7

Doadoahk mwahu wet, me iren rahn en rahnwet koasoia, kin pidada kalohki rongamwahwo. Eri ni atail kin wadek Mahsen en Koht oh doudouloale, atail pwoson Siohwa kin kehlailla oh atail wehwehki kesempwalpen rongamwahwo kin laudla. Pwehn paiekihda laud Mahsen en Koht, kitail en dehr karuwaru ni atail kin wadek, onopki, oh doudouloale. Kihong ahnsou. Ma ke wadek iren Paipel ehu me ke apwalki wehwehki, dehr pohnsehsehla. Doadoahngki Sawas ong Wia Roporop en Sounkadehdehn Siohwa kan, de Watch Tower Publications Index pwehn diar wehwehn iren Paipelo. Ma ke sohte kin karuwaru nan omw onop, ke pahn kakehlakahda omw likih mehlelpen Mahsen en Koht. (1 Des. 5:21) Uwen laud en omw kamehlele met, ih uwen laud en omw pahn perenki ehukihong meteikan dahme ke sukuhlki. w24.04 15 ¶4-5

Depit koasoia me Siohwa kin ketin “kupwur mwahu oh diren mahk.” (Mel. 86:5) Maika ntingihedi: “Maing KAUN, sohte emen koht me duwehte komwi; komwi kin ketin mahkikihong dipen sapwellimomwi aramas akan.” (Maika 7:18) Oh Aiseia koasoia: “Aramas suwed kan en sohpeisang ar mour suwed, oh wekidala ar lamalam. Re en sohpeiong KAUN-O, atail Koht; pwe ih me kupwurkalahngan oh kin mwadang mahkikihong kitail dipatail kan.” (Ais. 55:7) Pwehn kahlemengih Siohwa, mwomwohdisou nan Korint ale kaweid en kasamwo ohl me koluhlahro oh kamehlelehiong me irail poakohng ih. Sang arail idawehn kaweido, mwomwohdisou kasalehda arail “kin peik ni mehkoaros.” Mehlel, mendahki mwomwohdisou kihsang ohlo nanpwungarail erein sounpwong keite, e koluhla. Eri sohte anahnepen elder ko en awih mwohn arail mweidohng en pwurodo nan mwomwohdisou. w24.08 17-18 ¶12-13

Kitail kin momour erein ahnsou ehu me wekidekla laud kan kin wiawi! Ahnsou keren, Sises pahn ketin kadeikada aramas koaros nin sampah. Sises ketin padahkihong kitail me kadeik wet kerendohr. E ketikihong sapwellime tohnpadahk kan “kilel” ehu duwen eh ketier oh duwen “imwin koasoandi en mwehi wet.” (Mad. 24:3) Kokohp wet kileldi nan Madiu irelaud 24 oh 25, oh nan Mark irelaud 13 oh Luk irelaud 21. Sises ketin doadoahngki karasaras siluh pwehn sewese kaunopkitailda. Karasaras pwukat kin duwehte kaweid kei ong kitail. Karasaras pwukat iei me pid sihpw oh kuht kan, meipwon loalokong oh loalopwon ko, oh duwen dalend kan. Ehuehu karasaras ko kin sewese kitail en wehwehki me Sises pahn ketin kadeikada aramas emen sang ni eh wiewia kan. w24.09 20 ¶1-2

Mehn kahlemeng keieu mwahu ong kitail iei Sises Krais, me kin ketin mwekidki limpoak—limpoak ong Semeo oh pil aramas akan. Limpoak wet kamwakid ih en ketin doadoahk laud oh pil wiahiong meteikan soahng kan me ekei aramas sohte kin wiahki mehkot. (Mad. 20:28; Sohn 13:​5, 14, 15) Brother kan, ma ke kin mwekidki limpoak, Siohwa pahn ketin kapaiukada oh pahn ketin seweseiuk en lel omw mehn akadei en wiahla sounsawas men. (1 Pit. 5:5) Aramas akan nin sampah kin kalapw wauneki irail kan me kin wiahki pein irail aramas kesempwal kei. Ahpw sapwellimen Siohwa aramas kan sohte duwehte met. Brother men me kin mwekidki limpoak, duwehte Sises, sohte kin inengieng en ahneki manaman laud, kaunda meteikan, de aramas en wiahki ih lapalap emen. Ma emen me men aramas en kesempwalki ih laudsang meteikan idihdida nan mwomwohdiso, ele e sohte pahn wia soangen doadoahk tikitik kan, de wia soahng teikan me anahn pwehn apwalih sapwellimen Siohwa sihpw kan. E kakete medewe me e nohn kesempwal en wia ekei doadoahk kan.—Sohn 10:12. w24.11 15 ¶6-7

Nan sampah pwon, kitail anahne brother tohto pwehn papah nin duwen “kisakis kei.” (Ep. 4:8) Ma kowe emen brother me papidaislahr, ke kak “sewese irail kan me kin anahne sawas”? (Lep. Pad. 3:27) Ke men akadeiong en wiahla sounsawas men? Ma ke wialahr emen sounsawas, ke men akadeiong en wiahla emen elder? Ke kak wiahda wekidekla kan nan omw mour pwe ken iang audehda doaropwehn iang Sukuhl ong Sounkalohki Wehio kan? Sukuhlo pahn kaiahne oh seweseiuk en kalaudehla Sises en ketin doadoahngkin uhk. Ma ke pehm me ke sohte kak wia soahng pwukat, kapakap ong Siohwa. Peki en ketikihong uhk sapwellime manaman pwe ken kak kapwaiada pwukoa me ke alehdi. (Luk 11:13) Brother kan me Sises ketin idihada nin duwen “kisakis kei” wia mehn kadehde me e kin ketin kaukaweid kitail ni imwin rahn pwukat. (Mad. 28:20) Kitail uhdahn kalahnganki me atail Nanmwarkio kin ketin kadek oh limpoak oh mwahngih dahme kitail anahne oh ketikihong kitail brother kan pwehn sewese kitail. w24.10 23 ¶16-17

Dahme pahn wiawihong soahng kan koaros me kin kahrehda medek oh lokolok ong sapwellimen Koht aramas akan? Ehu rahn, soahng pwukat “pahn sohrala oh manokonokla.” (Ais. 65:16) Siohwa pahn ketikihsang atail kahpwal kan, oh kedekedeo kitail sohla pahn douluhl tamanda soahng pwukat. Pil ahnsou wet, kitail kin pehm meleilei ni atail towehda mihting kan, wasa me kitail kak kommoal mwahu oh kihsang kapwunod kan en sampah suwed wet. Kitail pil kin sewese riatail Kristian kan en meleilei ni atail kin kasalehda limpoak, peren, popohl, kadek, oh mpahi, me wia kisehn wahn sapwellimen Koht manaman. (Kal. 5:​22, 23) Ia uwen eh wia pai kaselel ehu en iang kisehn sapwellimen Koht pwihn! Irail kan me kin mi nan soangen paradais wet ni karasaras pahn kilang ahnsowo me Koht pahn ketin kapwaiada ni unsek sapwellime inou en wiahda “sampah kapw ehu oh lahng kapw ehu.” w24.04 22 ¶9-10

Mendahki date kak wia ahnsou kaperen, ohl emen oh lih emen anahne medemedewe uwen kesempwal en met pwehki met kak imwikihla ara pwopwoudida. Ni rahnen ara kapwopwoudo, pwopwoud ehu kin wiahda inou mwohn Siohwa en poakohng oh wauneki emenemen erein ara momour. Mwohn atail wiahda inou ehu, kitail anahne medemedewe kanahieng. Met pil kin wiawi ni pwopwoud ehu kin wiahda inou. Date kin sewese meh riemen en esehla emenemen oh wiahda pilipil mwahu. Ekei pak ira kin pilada en pwopwoudida; oh ekei pak ira kin pilada en sohla date. Ma ira sohla date, met sohte wehwehki me ira wiahda mehkot sapwung. Ahpw ira kin diarada ma ira pahn pwopwoudida de soh. Dahme kahrehda e kesempwal en ahneki madamadau pwung ong date? Pwehki irail me kiripw kan ese me re sohte pahn tepida pehsehiong emen ma re ese me re sohte pahn pwoudiki. w24.05 26-27 ¶3-4

Ekei pak me pwulopwul kan ele kin masak koasoiaiong meteikan duwen dahme re kamehlele. Karasepe, re kakete masak ni arail en kawehwe dahme kahrehda re sohte kin kamehlele padahk me dene aramas kohsang mahn. Dahme kahrehda? Arail sounpadahko kakete nda me padahk me dene aramas kohsang mahn mehlel. Dahme kak sewese noumw serio en uhdahn kamehlele me dahme e kin kamehlele uhdahn mehlel? Kamehlelehiong ih me e sohte anahne namenengki eh kamehlele me mie Sounkapikada men. Saintis tohto pil kamehlele me soahng kan me momour sohte pein miehla. Saintis pwukat kilang mehn kadehde kan me mie emen me uhdahn loalokong me ketin kapikada soahng kapwuriamwei pwukat. Imwilahn met, re sohte kamehlele padahk me dene aramas kohsang mahn. Ehu ahl me ele kak sewese noumw serio en kakehlaka eh pwoson oh eimah iei en diarada dahme kamehlelehiong Kristian teikan me mour kapikipikda. w24.12 18 ¶14-15

Sises ketin kamehlele me miehte aramas akan me pahn mwekidki rongamwahwo. Met sewese ih en pousehlahte kalohk ni ngoang. Karasepe, mpen sounpar ehu mwurin Sises eh ketin tepida kalohk, e mahsanihada me aramas tohto perenki rong rongamwahwo, oh e ketin karasahiong irail mwaht ehu me mahier oh kakehr dondol. (Sohn 4:35) Mpen sounpar ehu mwurin mwo, e mahsanihong sapwellime tohnpadahk ko: “Rahket me laud.” (Mad. 9:​37, 38) Oh mwuhr, e pil pwurehng mahsanih: “Rahket me laud . . . Kumwail peki rehn Soumas en rahket en ketin poaronehdo tohndoadoahk kan ong sapwellime rahk.” (Luk 10:2) Sises ketin kamehlele me miehte aramas akan me pahn mwekidki rongamwahwo, oh e kupwurperenkihda ni arail wia met. Sises ketin sewese sapwellime tohnpadahk ko en ahnekihte ngoang sang ni eh ketin padahkihong irail me rohng me irail kalohki kin imwikihla soahng mwahu kan. w25.03 18-19 ¶15-16

Siohwa iei wasahn ruk ehu. Erein kisinieng laud ehu aramas emen kak diar perepe nan pwoahr ehu. Duwehte met, Siohwa kak ketin pere kitail erein atail kahpwal kan. E kin ketin sewese kitail pere atail nanpwungmwahu reh oh kamehlelehiong kitail me sohte mehkot me kitail kin lokolongki met kak kauweikitailla kohkohlahte. Oh e pil ketin inoukihda me ni ahnsou kohkohdo e pahn ketikihsang soahng koaros me kin kahrehiong kitail en pwunod de lokolok. (Esek. 34:​25, 26) Ehu ahl me kitail kak ale perepatail sang rehn Siohwa iei sang ni atail kapakap ong ih. Ni atail kin kapakap, Siohwa kin ketikihong kitail “sapwellimen Koht popohl” me kin pere atail mohngiong oh madamadau. (Pil. 4:​6, 7) Kitail ese me Siohwa pahn ketin ahnsou koaros sewese kitail. Kitail kak likih pwehki e ketin wia “Paip poatopoat.” (Ais. 26:​3, 4, NW) E kin ketin ahnsou koaros ieias pwehn kapwaiada sapwellime inou kan, karonge atail kapakap kan, oh ketikihong kitail sawas me kitail anahne. Kitail pil kak likih Siohwa pwehki e kin ketin loalopwoat ong irail kan me kin papah ih. (2 Sam. 22:26) E sohte pahn ketin manokehla dahme kitail kin wia, oh pahn ahnsou koaros katingih kitail.—Ipru 6:10; 11:6. w24.06 27 ¶4-6

Kitail anahne kanahieng mehn kamweit kan, oh pil anahne kanahieng oh pilada kompoakepatail mwahu kan pwe kitail en dehr tepida medewe me en kepwehpwehla iei me keieu kesempwal nan mour. Ma kitail tehkada me mie mehkot me tepida kaluwetehla atail poakohng Siohwa, kitail en nantihong kihsang kitail. (Mad. 5:​29, 30) Kitail en dehr mweidohng atail mohngiong en sohla loalopwoat. Kitail kakete medewe me pwehki kitail kin soupisengki atail papah Siohwa, eri soahng suwed kan sohte pahn kauweikitailla. Pwehn karasahda met, medewehla me ke mi likin imwomwo oh rahno uhdahn karakar. Ke pedolongala nan ihmwo oh oahnda aircono. Ahpw ia duwen ma ke sohte ritingedi wenihmwo? Ahng karakaro pahn mwadang kohlong nan ihmwo. Kitail kak kapahrekiong met atail nanpwungmwahu rehn Siohwa. Kitail anahne wia laudsang en wiahte soahng mwahu kan me kin kakerenihkitailla rehn Siohwa. Duwehte atail sohte men ahng karakar en kohlong nan imwatailo, kitail pil men tehk mwahu me soahng koaros nin sampah me kak kaluwetehla atail poakohng Siohwa en dehr kohlong nan atail mohngiong.—Ep. 2:2. w24.07 21 ¶6-7

Sises ketin lelohng tiahk lemei oh weirek laud. Kitail sohte kak uhdahn wehwehki uwen lokolok laud me e ketin lelohng. Ahpw, e sohte ketin mweidohng wiewia sapahrek me e lelohng en kalowehdi ih. E sohte patohwan peki me sounpei kan me pasuradahng ni tuhkehn kalokoloko en ale kalokeparail, ahpw e kapakap oh peki: “Ipa, komw ketin mahkohng irail pwe re sehse dahme re wiewia.” (Luk 23:34) Ni atail kin kapakapki irail me kin wiakauwe kitail, e kak sewese kitail en meleilei oh sohte nohn lingeringer. E kak pil wekidala mwomwen atail kilangwohng irail. Erein atail mi nan sampah suwed wet, ele kitail pahn kin lelohng wiewia sapahrek. Ahpw sohte lipilipil dahme kitail anahne dadaur pah, kitail en dehr uhdihsang kapakapki sawas sang rehn Siohwa. Pil ehu, kitail en kin alasang mwomwen Sises eh ketin mwekidki wiewia sapahrek oh pousehlahte doadoahngki kaweid kan en Paipel. Ma kitail wia met, kitail kak kamehlele me Siohwa pahn ketin kapaikitailda.—1 Pit. 3:​8, 9. w24.11 6 ¶16; 7 ¶17, 19

Siohwa sohte kin ketin kupwurki soangen wiewia koaros. E ketin kalahdeki dihp. (Mel. 5:​4-6) Siohwa ketin kupwurki kitail en peikiong sapwellime kehkehlik kan nan Paipel. Siohwa mwahngih me kitail soh unsek oh kitail sohte kak peikiong ih ni unsek. (Mel. 130:​3, 4) Ni ahnsowohte, e sohte ketin kupwurki ‘aramas dipan kan, me wekidala sapwellime kadek sapan ong ni kahrepen arail kin wia me suwed ni ngidingid.’ (Sud 4) Paipel mahsanih duwen “kasohralahn aramas suwed kan” nan sapwellimen Koht mahwen en Armakedon. (2 Pit. 3:7; Kaud. 16:16) Ahpw, Siohwa sohte ketin kupwurki emen en kasohrala. Paipel kasalehda ni sansal me e ketin “kupwurki aramas koaros en koluhla.” (2 Pit. 3:9) Duwehte Siohwa, elder kan kin kanengamah ni arail song en sewese me dipan men en koluhla oh pwurehng karanihala Siohwa. w24.08 26 ¶1-2

Duwehte Siohwa, kitail kak kihong meteikan dahme re anahne pwehki kitail poakohng irail. Karasepe, mie riomw Kristian men me ke ese me anahne mwenge de likou? Siohwa kak ketin doadoahngkin uhk ken sewese riomw Kristiano. Sapwellimen Siohwa aramas akan pil kin mwadang en sewese meteikan nan ahnsou apwal kan. Karasepe, erein soumwahu lusulus en COVID-19, riatail Kristian kan kin ehukihong meteikan mwenge, likou, oh soahng teikan me re anahne. Me tohto pil kin kihda sawas en mwohni ong doadoahk en sampah pwon. Met kin sewese utung riatail kan nan sampah pwon me anahne sawas pwehki kahpwal laud ehu. Riatail Kristian kadek pwukat kin idawehn Ipru 13:16: “Kumwail dehr manokehla wia me mwahu oh ehukihong meteikan dahme kumwail ahneki, pwe Koht kin ketin kupwurperenki soangen meirong pwukat.” w24.09 27 ¶6-7

Medewehla irair wet. Ke raparapahki doadoahk ehu pwehn apwalih omw peneinei. Mie doadoahk riau. Ke medewe duwen ire mehlel kan, me duwehte soangen doadoahk dahieu mwo, awahn doadoahko, uwen doh en wasahn doadoahko, oh soahng teikan. Doadoahk riau ko koaros sohte uhwong kaweid kan en Paipel. Ele ke pilada ehu pwehki ke mwahuki soangen doadoahko de doadoahko pweimwahu. Ahpw mie kahrepe teikan me ke anahne medewe mwohn omw wiahda pilipil ehu. Karasepe, ehu doadoahk ko sohte pahn kauwehla ahnsoun omw mihting? E pahn kihsang ahnsou me ke anahne pwehn sewese omw peneinei ren nsenamwahu oh karanih Siohwa? Omw idek peidek pwukat pahn seweseiuk en mwohneki “dahme keieu kesempwal” me iei omw kaudok oh en omw peneineio anahn laudsang en wiahda mwohni laud. Eri ke kak wiahda pilipil ehu me Siohwa pahn ketin kapaia. w25.01 17-18 ¶11-13

Mehnda ma meteikan kin wiakauweiuk, ke kak kamehlele me Siohwa kin ketin poakohng oh kesempwalkin uhk. Ma ke pehm me “sohla omw koapworopwor,” tamataman me Siohwa ketin mwahngih soahng mwahu kan rehmw oh kin ketin kakerenihiukala reh. (Sohn 6:44) E kin ketin ahnsou koaros onopada en seweseiuk pwehki ke kesempwal ong ih. Kitail kak sukuhlki sapwellimen Siohwa pepehm sang ni atail koasoiapene mehn kahlemeng en Sises. Ni ahnsou me Sises ketiket nin sampah, e kin uhdahn ketin kadekohng aramas akan me kin pehm me sohte kateparail pwehki dahme meteikan wiahiong irail. (Mad. 9:​9-12) Ni ahnsou me lih emen me ahneki soumwahu suwed ehu doahke sapwellime likowo oh koapworopworki me e pahn mwahula, Sises ketin kansenamwahwihala oh kapingahki eh pwoson. (Mark 5:​25-34) Sises kin kahlemengih Semeo ni unsek. (Sohn 14:9) Eri ke kak kamehlele me Siohwa ketin kesempwalki oh mwahngih omw irair kaselel kan, iangahki omw pwoson oh poakohng ih. w24.10 7 ¶4-5

Erein eh mour, Depit anahne dadaur pahn kahpwal tohto me kahrehiong en kin sengiseng. Mie aramas tohto kin kailongki ih. Pil ekei kompoakepah kan oh eh peneinei kan sohte kin loalopwoatohng ih oh kin kamedekihala ih. (1 Sam. 19:​10, 11; 2 Sam. 15:​10-14, 30) Ehu pako, e ntingihdi: “I weikengkilahr ei nsensuwed laud; nipwong koaros kiei lohs kin wisekesengkihla ei kin sengiseng; ulungei pil kin wisekesengkihla pilen mesei.” (Mel. 6:6) Mendahki kahpwal kan me Depit lelohng, e uhdahn kamehlele me Siohwa ketin poakohng ih. E ntingihdi: “KAUN-O kin ketin karonge ie ni ei kin sengiseng.” (Mel. 6:8) Ni atail wadek iren rahn en rahnwet, kitail kak wehwehki me Siohwa uhdahn ketin poakohng kitail oh nsenohki atail pepehm. Depit koasoia me mwomwen me Siohwa kin ketin kilelehdi uwen tohtohn pilen mese ko nan pwuhk ehu. Depit kamehlele me Siohwa ketin mwahngih oh ketin tamataman eh lokolok ko. Depit ese me Seme limpoako nanleng kin ketin mwahngih eh kahpwal kan oh pil eh pepehm duwen kahpwal pwukat. w24.12 22 ¶11-12