October

Kitail kin kalapw alehdi kaweid sang sapwellimen Siohwa pwihn, sohte lipilipil—ma e kohsang elder kan nan atail mwomwohdiso, sounapwalih me kin seiloako, ohpis en Sounkadehdehn Siohwa kan, de Pwihn me Kin Apwalih Mwomwohdiso nan Sampah Pwon—me kin kaweid kitail nan atail kaudok. Ahpw ele ekei pak, kitail sohte kin wehwehki dahme kahrehda brother kan kin kihong kitail kaweid. Ele kitail kin peikasalki ma kaweido mwahu. Kitail pil kakete tepida tehk soh unsek en brother ko me kihda kaweido. Kitail pwoson me Siohwa kin ketin kaukaweid sapwellime pwihn oh me e ketin mwahngih atail irair kan. Imwilahn met, kitail kin mwadang en peik, oh ahneki madamadau pwung ni atail wia met. (Ipru 13:17) Kitail ese me ni atail kin idawehn kaweid, kitail kin sewese atail mwomwohdisou en ehupene. (Ep. 4:​2, 3) Kitail pil likih me mendahki brother kan me kin tiengla mwowe soh unsek, Siohwa pahn ketin kapaia kitail ni atail kin peik. (1 Sam. 15:22) Kitail pil pwoson me mehnda ma kaweido anahne wekila, Siohwa pahn ketin kapwungala soahng koaros me anahne kapwungpwungla. w25.03 23-24 ¶13-14

Kitail kin mihmi ni ahnsou kesempwal kei! Ehuehu rahn, kitail kin kilang kokohp kan en Paipel ar pweida. Karasepe, kitail kilang “nanmwarkien paliepeng” oh “nanmwarkien palieir” ara kin siaipene pwehki ira men kaunda sampah. (Dan. 11:​40, NW) Kitail kilang rongamwahu en Wehin Koht eh kalohkseli nan sampah pwon, oh aramas rar rar kei piladahr en papah Siohwa. (Ais. 60:22; Mad. 24:14) Oh kitail kin pil aliale padahk tohto sang nan Paipel me rasehng mwenge “ni ahnsou me konehng.” (Mad. 24:​45-47) Siohwa kin ketin pousehlahte sewese kitail en wehwehkihla mwahu duwen mwekid kesempwal kan me pahn wiawi ahnsou keren. (Lep. Pad. 4:18) Kitail kak kamehlele me ni ahnsou me kahn kamakam kowahlap pahn tepida, kitail pahn ese soahng koaros me kitail anahne ese pwehn dadaur ni lelepek oh pil miniminpenehte erein ahnsou apwalo. Ahpw, kitail anahne pohnese me mie soahng kan me kitail sohte ese duwen ahnsou kohkohdo. w24.05 8 ¶1-2

Sounmelkahkao koasoia duwen karaunlikamw. Dahkot karaunlikamw? E kin wehwehki koasoi likamw me kak kauwehla ahn emen adamwahu. Melkahka 15:3 pil katamankihong kitail me irail kan me lukodohng nan sapwellimen Siohwa impwal, sohte kin wiahiong kompoakparail kan mehkot suwed oh kahdsuwedih kompoakparail kan. (Mel. 15:1) Ia duwen atail kak kahdsuwedih kompoakepatail kan? Kitail kakete kahdsuwedihala emen sang ni atail ndaseli soahng suwed kan me pid ih. Karasepe: (1) sister men sohla pioneer. (2) pwopwoud ehu sohla papah nan Pedel, de (3) brother men sohla wia elder de sounsawas. E pahn sapwung en padahkihong meteikan me brother oh sister pwukat ele wiahda mehkot sapwung ihme kahrehda arail irairo wekila. Ele mie kahrepe tohto me irairo wengkihla me kitail sehse. Patehng met, emen me lukodohng nan sapwellimen Siohwa impwal “sohte kin karaunmwahlih meteikan. E sohte kin wia mehkot sapwung ong kompoakepah kan.” w24.06 11-12 ¶11-13

Pwehn kakehlakahla atail lemmwiki Siohwa, kitail anahne medemedewehte dahme pahn kaperenda ih ahnsou koaros ma kitail kin wiahda pilipil ehu. Ni omw kin wadek koasoipen Paipel kan, pein idek rehmw, ‘Ma I mi nan soangen irairo, pilipil dahieu me I pahn wiahda?’ Karasepe, medewehla me ke wie rongorong ni lipoahrok ehk ko ar nda me mehn Israel ko sohte kak kalowehdi mehn Kenan kan mwurin ar lipoahroke sahpwo me Siohwa ketin inoukihda me e pahn ketikihong mehn Israel. Ke pahn kamehlele dahme re nda oh dukula pahn masak aramas, de omw poakohng Siohwa oh ineng en kaperenda ih pahn kehlail sang omw masak aramas? Dih en Israel ehu pwon sohte pohnese me dahme Sosua oh Kalep nda mehlel. Pwehki met, irail sohte iang pedolong nan Sapwen Inowo.—Nemp. 14:​10, 22, 23. w24.07 10 ¶7

Komer, en soukohp Oseia eh pwoudo, kohkohsang Oseia pwehki ohl teikan. Dahme Siohwa ketin wia? Siohwa, me ketin mwahngih soahng koaros duwen aramas emen, ketin mahsanihong Oseia: “Kohwei oh kasalehiong omw limpoak ong lih emen me wiewia dipen kamwahl ong eh kerir. Ke pahn poakohng duwehte ei wie poakepoakehte mehn Israel kan, mendahte ar sohpeiongehr koht teikan.” (Os. 3:1; Lep. Pad. 16:2) Tehk me ahn Oseia pwoudo kin wiewiahte dihp laud. Ahpw Siohwa ketin mahsanihong Oseia en mahkohng oh kapwurehdo pwehn pwoudikihte. Sang karasaras wet, Siohwa ketin kupwurki padahkih aramas akan en ese duwen sapwellime pepehm ong irail. Mendahki irail kin wiewiahte soahng suwed kan, e ketin poakepoakehte irail. E ketin pwurupwurehng kadarala sapwellime soukohp ako pwehn sewese irail en koluhla oh wiahda wekidekla kan nan arail mour. Karasaras wet padahkihong kitail me Siohwa ketin mwahngih soahng koaros duwen aramas emen, oh pahn ketin song sewese me kin wiewiahte dihp laud en koluhla. w24.08 10 ¶7

Mehn Suhs kan me wiahla Kristian kei nin tapio anahne wiahda wekidekla laud kan, oh met sohte mengei. Erein ahnsou ehu, mehn Suhs kan kin wia sapwellimen Siohwa aramas pilipilda kei. Erein sounpar tohto, Serusalem wia wasa ehu me keieu kesempwal. Nanmwarki me wia wiliepen Siohwa kin kakaun sang wasao. Oh aramas akan me kin men kaudokiong Siohwa kin wia met ni tehnpas sarawio. Mehn Suhs lelepek kan koaros kin idawehn Kosonned en Moseso oh kosonned kan me arail kaunen pelien lamalam ko kin padahngki. Mie kosonned kan me pid duwen mwenge, sirkumsais,oh mwomwen arail wiewia ong irail kan me kaidehn mehn Suhs. Ahpw mwurin Sises eh pwoula, Siohwa sohla ketin kupwurki meirong kan me kin wiawi nan tehnpas sarawio. Eri met apwal ong mehn Suhs kan me wiahla Kristian pwehki irail ahnlahr idawehn Kosonnedo. (Ipru 10:​1, 4, 10) Kristian koahiek kan, duwehte wahnpoaron Piter, pil apwalki wiahda wekidekla pwukat. (Wiewia 10:​9-14; Kal. 2:​11-14) Pwehki soangen wekidekla kapw pwukat, kaunen pelien lamalam en mehn Suhs kin kaloke laud Kristian ko. w24.09 9 ¶4

Ahnsou koaros me Siohwa kin ketikihong sapwellime aramas akan pwukoa ehu, e ketin kasik me re pahn kapwaiada ni ahl me soandi mwahu. (1 Kor. 14:33) Karasepe, kupwuren Koht iei me rongamwahwo en lohkseli nan sampah pwon. (Mad. 24:14) Siohwa ketikihong Sises pwukoahn kaweid doadoahko. Oh Sises ketin tehk mwahu me met wiawi ni ahl me soandi mwahu. Ni mwehin tepin Kristian ko, ni mwomwohdiso kan ar kin wiawihda nan soangsoangen wasa kan, elder kan kin idihdda pwehn kihda kaweid oh tiengla mwowe. (Wiewia 14:23) Nan Serusalem, pwihn en elder kan me wiawihkihda wahnpoaron oh ohl mah kan kin wiahda pilipil kan me mwomwohdiso kan koaros pahn idawehn. (Wiewia 15:2; 16:4) Pwehki Kristian ko kin peikiong kaweid kan me re alehdi, “mwomwohdiso kan eri kin kehlailla nan pwoson oh towe kan wie tohtohla rahn koaros.”—Wiewia 16:5. w24.04 8 ¶1

Ni menseng en Nisan 16, ekei lih kohla ni sousou en Siseso. (Luk 24:​1, 10) Emen lih ako iei Mery Makdala. Ni ahnsou me Mery lella ni sousowo, paliweren Siseso sohte mi mwo. Eri e kohla ndaiong Piter oh Sohn. Ohl riemen pwukat tangala ni sousowo oh Mery pwakih ira. Ohl ako kilangada me paliweren Siseso sohte mi nan sousowo oh pwurala ni imwara ko. Ahpw Mery mihmihte mwo oh wie sengiseng. E sohte ese me Sises ketiket wasao. E mahsanihada liho eh wie sengisengki ih oh e men kansenamwahwihala. Eri e ketin pwarohng Mery oh wia mehkot me tikitik me uhdahn kangoange ih. E mahsanihong liho en kohla rehn rie ko oh kihong irail rohng kesempwal ehu. E anahne ndaiong irail me Sises pwurehng mourda.—Sohn 20:​17, 18. w24.10 13 ¶7

Moses wia soukohp, sounkopwung, soun kihda kaweid, oh soupoad men. E kahluwa mehn Israel ko me wia lidu kei sang Isip oh pein kilang sapwellimen Siohwa manaman tohto. Siohwa ketin doadoahngki pwehn ntingihada keieun pwuhk limau ko nan Paipel, Melkahka 90, oh pil kakete Melkahka 91. E pil kakete ntingihada pwuhken Sohp. Ni ahnsou kis mwohn eh mehla, ni eh sounpar 120, Moses ekerpene mehn Israel ko pwon pwehn katamankihong irail soahng kan me re kilangehr Siohwa ketin wiahiong irail. Re kilang ekei manaman kan me Siohwa ketin wia oh ia duwen eh ketin kaloke mehn Isip ko. (Eks. 7:4) Irail kilang Siohwa eh ketin pwalangpeseng Sehd Weitahtao oh irail keid loale. Oh irail pil kilang Siohwa eh ketin kasohrehla Parao oh nah sounpei ko. (Eks. 14:​29-31) Siohwa ketin pere oh apwalih irail nan sapwtehno. (Deud. 8:​3, 4) Met irail kereniong pedolong nan Sapwen Inowo. Eri mwohn eh mehla, Moses men kangoange aramas ako. w24.11 8-9 ¶3-4

Dahme Sises mahsanihong sapwellime wahnpoaron ko ni Sak en Soutik en Kauno weksang dahme e mahsanihong pokono nan Kalili. Pali laud en aramas akan me Sises mahseniong nan Kalili men alehte kanarail mwenge sang ih. Ahpw, e ketin song en sewese irail en wehwehki me mie mehkot me kesempwal sang mwenge. Mehkotet iei me pahn kahrehiong irail en kak ahneki mour soutuk. Sises pil mahsanih me aramas akan me melahr kak iasada ni imwin rahn oh mour kohkohlahte. E sohte mahmahsanih duwen pai kaselel ehu me ekeite aramas pahn alehdi, duwehte me e ketin wia mwuhr ni Sak en Soutik en Kauno. Ahpw nan Kalili, e mahmahsanih duwen mehkot kaselel me aramas koaros kak ahneki. w24.12 11 ¶10-11

Siohwa kin ketin “kalahdeki kowahlap me kin perenki tiahk lemei.” (Mel. 11:​5, NW) Siohwa kin ketin keieu kalahdeki ni ohl pwopwoud men eh wiakauwe eh pwoud. (Mal. 2:16)Ma ohl pwopwoud men sohte kin mwahu ong eh pwoud, met pahn kauwehla eh nanpwungmwahu rehn Koht. Ele Siohwa sohte pahn pil karonge eh kapakap kan. (1 Pit. 3:7) Ekei ohl pwopwoud kan kin wiakauwe arail pwoud sang ni arail koasoi lemeiong irail. Siohwa kin ketin kalahdeki “lingeringer koaros, mwehl koaros, weriwer koaros, oh lokaia kamedek koaros.” (Ep. 4:​31, 32) Ohl pwopwoud men me kin koasoi lemeiong eh pwoudo sohte kin kauwehlahte eh mouren pwopwoud ahpw pil eh nanpwungmwahu rehn Koht. (Seims 1:26) Met pil duwehte ohl pwopwoud men me kin kilang kilel de kasdo suwed. E kin kauwehla eh nanpwungmwahu rehn Siohwa. E pil kin kihsang wahupen eh pwoudo. Siohwa ketin kasik ohl pwopwoud men en loalopwoatohngete eh pwoud kaidehn sang ni wiewiahte ahpw pil sang ni madamadau. Sises mahsanih me ohl emen me kin kangkakil lih emen oh inangihada, wiadahr dipen kamwahl “nan eh mohngiong.”—Mad. 5:​28, 29. w25.01 9 ¶6-8

Paipel mahsanih me sapwellimen Siohwa ladu kan pwunglahr reh. Met wehwehki me Siohwa sohte ketin kasik kitail en pwainla dipatail kan. Ni eh ketin wia met, e sohte ketin kauwehla sapwellime koasoandi en pwung pahrek. E ketin wiahkin kitail aramas pwung kei, kaidehn pwehki kitail me koadoahkihada. Pil ehu, Siohwa sohte ketin kupwurperenki dipatail kan. Ahpw Siohwa ketin kupwurki mahkohng dipatail kan pwehki kitail pwoson dahme ih oh Sises ketin wiahda pwehn ketikihda pweinen pweipwei sapahlo. (Rom 3:24) Ia wehwehn met ong emenemen kitail? Irail kan me pilipildahr en iang Sises kaunda nanleng pwunglahr rehn Koht nin duwen sapwellime seri. (Taitus 3:7; 1 Sohn 3:1) Irail aleier mahkpen diparail kan. E mwomwen me irail sohte mwahn wiahda dihp, eri irail warohng mi nan Wehin Koht. (Rom 8:​1, 2, 30) Irail teikan me pil pwunglahr rehn Koht pahn mour kohkohlahte nin sampah. Siohwa ketin mahkohngehr diparail kan oh re wialahr kompoakepah.—Seims 2:​21-23. w25.02 5 ¶17-18

Tehk ehu ahnsowo ni wahnpoaron Piter eh sohte kasalehda sapwellimen Siohwa elen madamadau ong irair kan. Sises mahsanihong sapwellime wahnpoaron ko me e pahn ketila Serusalem, wasa me kaunen pelien lamalam kan pahn salihedi, kaloke, oh kemehla. (Mad. 16:21) Piter ese me Sises iei Mesaiao me inoudahr me pahn komourala sapwellimen Koht aramas kan. Eri ele e apwal ong Piter en kamehlele me Siohwa pahn ketin mweidala Sises en kamakamala. (Mad. 16:16) Piter eri kelehpwkihla Sises oh patohwanohng: “Maing Kaun, komw ketin kadek ong pein komwi, mepwukat sohte mwahn pahn lelohng komwi.” (Mad. 16:22) Pwehki Piter sohte kasalehda sapwellimen Siohwa elen madamadau nan irairo, e sohte ahneki madamadau me Sises sapwellimanki. Sises mwahngih me en wia kupwuren Siohwa, e anahne lokolok oh mehla. Eri Sises ketin soikala ahn Piter kaweido mendahki Piter songosong en sewese ih. Sang met, Piter esehda me e anahne ahneki madamadau me duwehte sapwellimen Koht elen madamadau. Met wia mehn kasukuhl kesempwal ehu me kitail pil anahne sukuhlki. w25.03 9 ¶5-6

Ke kin medekla ni emen me ke likih eh sohla lelepek ong uhk? Sohte lipilipil dahme emen wiahiong uhk, Semomwo nanleng kin ketin poakohng uhk. Ma emen sohla lelepek ong uhk, dahme Depit koasoia nan iren rahn en rahnwet kak kansenamwahwihiukala. “Irail kan me kin sohla ar koapworopwor” ele kin pehm me sohte mehkot mwahu ren kasikasik. Ia duwen Siohwa eh kin ketin sewese irail me ahneki soangen pepehm wet? Duwehte pahpa nohno limpoak me kin koledi oh kansenamwahwih seri men, Siohwa ‘kin ketiket mpatail’—ketin poakeikitailla oh kin mwadang en sewese kitail ma emen sohla lelepek ong kitail de keseikitailla. E kin kupwurki kansenamwahwih kitail ma kitail nan kapehd tikitikla oh medewe me sohte katepatail. Oh e kin ketikihong kitail soahng tohto me kitail en kasikasik me kak sewese kitail dadaurete pahn atail kahpwal kan en ahnsou wet.—Ais. 65:17. w24.12 23 ¶13-14

Rahnwet, elder kan kak kamehlele me Siohwa kin ketin mwahngih oh kesempwalki arail doadoahk mwahu kan. Patehng arail kin mwemweitla oh kangoange riarail Kristian kan, wia padahk, oh kalohk, elder tohto kin iang sewese kauwada wasahn kaudok kan de wasa kan me lelohng kahpwal laud duwehte rerrer en sahpw de melimel ape. Ekei kin iang Pwihn kan me Kin Mwamwaitih me Soumwahu oh Pwihn me Kin Ehuiong Imwen Wini kan. Elder kan ese me Siohwa iei me sapwellimanki mwomwohdiso. Irail kin doadoahk laud nan mwomwohdiso oh uhdahn kamehlele me Koht pahn ketin katingihkin irail dahme re kin wia. (Kol. 3:​23, 24) Kaidehn koaros kak wia elder. Ahpw mie soahng kei me kitail kak wiahiong Siohwa. Atail Koht kin ketin kupwurperenki ni atail wia uwen atail kak koaros en papah ih. E ketin mwahngih ni atail kihda sawas en mwohni ong doadoahk en kalohk sampah pwon, sohte lipilipil ma tikitik de laud. Oh e kin kupwurperenkihda atail kin pohnsehsehla sapwung en meteikan oh mahkohng irail. Likih me E kin ketin kesempwalki dahme ke kak wia. E kin ketin poakohng uhk pwehki omw wia met, oh pahn ketin katingihiuk.—Luk 21:​1-4. w24.06 23 ¶12-13

Karasaras en Paipel wet kasalehda dahme kak wiawihong sapwellimen Siohwa tohnkaudok men. E kakete wiahda dihp laud oh mwuhr medewe me soahng pwukat wiawi ni soh kasikpe. Ahpw ma e medewe dahme uhdahn wiawi, e pahn esehda me e wiadahr pilipil sapwung kan mwohn eh wiahda dihp laudo. Ele e pilada kompoakepah kan me sohte poakohng Siohwa. De mwein ekei mehn kamweit kan me e pilada, website kan me e kin kilang, de wasa kan me e kin kohla ie sohte mwahu ong Kristian men. Mwein e pil sohla kin kapakap, wadawad Paipel, iang towehda mihting kan, de kalohk. Duwehte mwahnakapwo nan Lepin Padahk, pwehki eh wiahda pilipil suwed tohto, ihme kahrehda e wiahda dihp laud. Ia mehn kasukuhl ong kitail? Kitail en soikala dihp oh pil soahng kan me kin kahrehiong kitail en wiahda dihp. Ih met me Solomon kawehwehda mwurin eh koasoia dahme wiawihong mwahnakapwo.—Mad. 5:​29, 30. w24.07 16 ¶10-11

Pai kesempwal dahieu met? Met iei doadoahk en kalohki rongamwahu en Wehio me kin kamourala aramas akan. (2 Kor. 4:1) Soangen sah pwehl dah kei me? E kin karasaraskihong sapwellimen Koht ladu kan me kin padahkihong meteikan rongamwahwo. Ni mwehin Pohl, soun pesines kan kin doadoahngki sah pwehl pwehn audehiong kepwe kesempwal kan duwehte mwenge, wain oh mwohni, oh kadarpeseng. Duwehte met, Siohwa ketikihong kitail pwukoahn kihpeseng rongamwahwo. Pwehki sapwellimen Siohwa sawas, kitail kak ahneki kehl me anahn pwehn pousehlahte kalohk. Ele ekei pak kitail kin masak aramas. Ia duwen atail kak powehdi met? Medewehla kapakap en wahnpoaron ko ni ahnsou me me lapalap ako ruwese irail en dehr kalohk. Irail sohte masepwehkada oh uhdihsang kalohk ahpw irail peki Siohwa en ketin sewese irail en eimah oh usehlahte kalohk. Siohwa ketin sapengala arail kapakapo ni ahnsowo. (Wiewia 4:​18, 29, 31) Ma masak aramas kin kahrehiong uhk en saloh nan kalohk ekei pak, eri peki Siohwa en ketin kalaudehla omw limpoak ong aramas akan pwehn powehdi omw masak aramas pwe ken kak padahkihong irail duwen rongamwahwo. w24.04 16 ¶8-9

Atail poakohng Siohwa kin kamwakid kitail en kasarawihala mwareo. Met wehwehki me kitail men padahkihong meteikan me soahng suwed kan me Sehdan ndahki duwen Siohwa sohte mehlel. (Sen. 3:​1-5; Sohp 2:4; Sohn 8:44) Ni atail kin kalohk, kitail kin inengieng padahkihong koaros me men rong duwen Siohwa. Kitail men koaros en ese me sapwellime irair keieu kaselel iei limpoak, me sapwellime elen kaunda kin pwung pahrek, oh me sapwellime Wehio pahn kereniong katokehdi lokolok koaros oh wahdo popohl oh peren ong aramas akan. (Mel. 37:​10, 11, 29; 1 Sohn 4:8) Ni atail kin padahkihong aramas akan soahng pwukat, kitail kin kasarawihala mwareo. Kitail pil kin peren pwehki kitail kin wiewia dahme kitail konehng wia nin duwen Sounkadehdehn Siohwa kan. w24.05 18 ¶12

Brother kan, ke kin kasalehda me ke “perenki kasamwo” meteikan ni omw kin wiahiong irail soahng mwahu kan, iangahki irail kan me kaidehn kompoakepahmw keren. (1 Pit. 4:9) Ehu dikseneri en Paipel koasoia me ohl emen me kin perenki kasamwo meteikan, pil kin kadek ong aramas akan me e sohte ese, oh pil kin perenki kasamwo irail nan imweo. Pein idek rehmw, “I wia aramas emen me kin kasalehda kadek ong irail kan me mwemweitdo nan ei mwomwohdiso?” (Ipru 13:​2, 16) Ohl emen me kin perenki kasamwo meteikan kin kadek ong soangsoangen aramas akan, iangahki irail kan me semwehmwe, oh irail kan me kin doadoahk laud, duwehte sounapwalih me kin seiloak oh me kin mwemweitdo pwehn wia padahk kan.—Sen. 18:​2-8; Lep. Pad. 3:27; Wiewia 16:15; Rom 12:13. w24.11 21 ¶6

Nan karasaras en meipwon ko, Sises mahsanih duwen meipwon ehk me kohieila pwehn tuhwong ohl kamwohd men. (Mad. 25:​1-4) Irail koaros kasikasik en iang ohl kamwohdo kohla ni eh kamadipw en kapwopwoudo. Sises mahsanih me meh limmen rehrail “loalokong” ah meh limmen teiko “loalopwon.” Meipwon loalokong ko kaunopada pwe ren awih ohl kamwohdo sohte lipilipil ia uwen werei, mehnda ma e pwarodo ni lukepen pwong. Eri, re wahda neirail lamp kan pwehn kamarainih irail. Re pil wahda ekis leh nan pwoatol pwe ohl kamwohdo de pwand en leledo. Irail kaunopada mwahu pwe neirail lamp ko en wie lullulte. (Mad. 25:​6-10) Ni ahnsou me ohl kamwohdo leledo, meipwon loalokong ko iangih pedolongala ni kamadipw en kapwopwoudo. Duwehte met, Kristian keidi kan me kasalehda me re onopada sang ni arail kin tetehk mwahu oh lelepek lao ketidohn Krais pahn ale ketingparail en iang Ohl Kamwohdo, Sises, nan sapwellime Wehin nanleng.—Kaud. 7:​1-3. w24.09 21 ¶6

Ni atail kin medewehla ia duwen doadoahk en kalohko eh sewese aramas tohto nan sampah, met kin kangoange kitail en pousehlahte kalohk. Sounpar koaros, aramas rar rar kei me kin perenki rong rongamwahwo kin iang towehda Katamano oh onopki Paipel rehtail. Aramas lopw kei kin papidaisla oh iang kitail kalohk. Kitail sehse ia uwen tohtohn aramas akan me pahn mwuhr mwekidki atail doadoahk en kalohk, ahpw kitail ese me Siohwa kin ketin kapokapokonepene pokon kalaimwun ehu me pahn pitsang kahn kamakam kohwahlapo. (Kaud. 7:​9, 14) Siohwa iei Soumas en rahko oh e ketin kamehlele me miehte aramas tohto me pahn mwekidki rongamwahwo, eri kitail pahn pousehlahte kalohk. (Luk 10:2) Sapwellimen Sises tohnpadahk mehlel kan kin ahnsou koaros kalohki rongamwahwo ni ngoang. Karasepe, wahnpoaron ko uhdahn kalohk ni eimah oh ngoang me kahrehda aramas ako “esehda me ira kin iang Sises.” (Wiewia 4:13) Kitail pil men kalohk ni eimah oh ngoang oh imwilahn met, aramas akan en kilang me kitail pil kin kahlemengih Sises. w25.03 18 ¶15; 19 ¶17-18

Paipel padahkihong kitail me Siohwa kin ketin tehk irail kan me kin mwomwen sohte kesempwal ong meteikan. Karasepe, Siohwa ketin kadarala soukohp Samuel ni imwen Sehsio pwehn pilada emen nah pwutak ko en wiahla nanmwarki en Israel. Sehsi ekerpene nah pwutak isimeno, Depit me tikitiko me sohte iang. Ahpw, Depit me Siohwa ketin pilada. (1 Sam. 16:​6, 7, 10-12) Siohwa ketin mwahngih loalen Depit. Oh e ketin ese me Depit uhdahn poakohng ih. Medewehla ia duwen Siohwa eh ketin kasaledahr me e kin ketin tehk uhk. E kin ketikihda kaweid me keieu mwahu ong ahmw irair. (Mel. 32:8) Met kasalehda me e ketin mwahngih dahme ke uhdahn anahne. (Mel. 139:1) Ni ahnsou me ke kin doadoahngki sapwellimen Siohwa kaweid oh kilang ia duwen eh kin seweseiuk, ke pahn kamehlelehla me Siohwa ketin nsenohkin uhk. (1 Kron. 28:9; Wiewia 17:​26, 27) Siohwa mwahngih omw kin nannanti. E pil ketin mwahngih omw irair mwahu kan oh men wiahla kompoakepahmw.—Ser. 17:10. w24.10 25-26 ¶7-9

Ei mehlel, ke poakohng Siohwa oh men papah meteikan. Ia duwen omw kak kalaudehla ineng en papah? Medewehla uwen peren me ke pahn ahneki sang omw kin papah riomw kan. Sises mahsanih: “Kihwei kin kaperen sang ale.” (Wiewia 20:35) Pein Sises ketin kapwaiada kaweid wet. E sapwellimanki peren laud pwehki eh kin ketin papah meteikan. Medewehla ehu karasepe me dierek nan Mark 6:​31-34. Ahnsou wet, Sises oh sapwellime wahnpoaron ko uhdahn pwangada. Irail eri kolahng wasa kis me tohrohrala pwe ren kommoal. Ahpw pokon en aramas ehu lella wasao mwohn irail, oh kasikasik me Sises en ketin padahkih irail. Sises kakete mahsanih soh, pwehki ih oh ienge ko “solahr arail ahnsoun kommoal de pil mwenge.” De Sises kakete ketin kadarpeseng pokono mwurin eh padahkihong irail soahng keite. Ahpw pwehki limpoak, e “ketin padahkihong irail” lao “wasa pwongier.”—Mark 6:35. w24.11 16 ¶9-10

Pahpa oh nohno kan, kangoange noumw serio en doadoahngki ahnsou mwahu pwehn padahkihong meteikan duwen Paipel. (Rom 10:10) Ke kak kapahrekiong kasukuhlih meteikan duwen Paipel en sukuhlki mehn keseng ehu. Keieu, tohnsukuhlo pahn sukuhlki koul kan me mengei en kesengki. Kedekedeo, e pahn mengeila. Duwehte met, Kristian pwulopwul men kak tepida kalohk ni ahl mengei ehu. Karasepe, e kakete idek rehn ienge tohnsukuhl men: “Ke ese me saintis kan kin kalapw alasang dahme re kilang nan kepikipik? I pahn kasalehwei kisin kasdo ehu.” Mwurin omw kasalehiong kisin kasdo ehu sang oaralapo Was It Designed?, e kakete nda: “Ma saintis kan kin ale kaping sang arail alasang kepikipik kan, ihs me konehng ale kapingpen kepikipik koaros?” Mwein ienge tohnsukuhlo pahn men kalaudehla eh sukuhlki duwen Siohwa. w24.12 19 ¶17-18

Pwehn kasaledekkitailsang dihp oh mehla, Siohwa ketin poaronehdo Sises pwehn kihda pweinen pweipwei sapahlo. Ahpw ia duwen meirong en ohl unsek tehmen eh kak kasaledekihala aramas tohto sang dihp oh mehla? Wahnpoaron Pohl kawehwehda: “Pwe nin duwen sapeik en aramas tehmen [Adam] eh imwikihla aramas tohto ar wiahla aramas dipan kei, ih pil duwen peik en aramas tehmen [Sises] eh imwikihla aramas tohto ar pahn wiahla aramas pwung kei.” (Rom 5:19; 1 Tim. 2:6) Pohl kin koasoakoasoia me pwehki ohl unsek tehmen sapeikiong Koht, aramas koaros dipan oh anahne mehla. Eri, pwe kitail en saledeksang dihp oh mehla, ohl unsek tehmen anahne peikiong Koht. Dahme kahrehda Siohwa sohte ketin mweidohng kadaudok en Adam kan me kin peikiong Ih ren mour kohkohlahte? Ong aramas soh unsek kan, mwein met pahn wia elen kadek oh toupahrek. Ahpw ong Siohwa, e sohte pahn pwung en wia met. Pwehki e pahn mwomwen me Adam sohte wiahda dihp laud oh kadaudoke kan sohte dipan. Met sohte mehlel. w25.01 20-21 ¶3-4

Wahnpoaron Pohl ese me e pahn kereniong kamakamala, ahpw ni eh kin medewehla dahme e wiadahr nan eh mour, e kin uhdahn peren. E koasoia: “I kanekehla weirentango, I kin kolokolete pwoson.” (2 Tim. 4:​6-8) Pohl wiahda pilipil mwahu en doadoahngki eh mour pwehn papah Siohwa, oh e kamehlele me Siohwa pil ketin kupwurperenki met. Kitail pil men wiahda pilipil mwahu kan oh alehdi sapwellimen Koht kupwuramwahu. Ia duwen atail kak wia met? Pohl ndahki pein ih oh Kristian lelepek teikan: “Kitail kin weweidki pwoson, kaidehn dahme kitail kilang.” Nan Paipel, “weweidki” kin ekei pak dokedoke mwomwen emen eh pilada mwomwen eh mour. Aramas emen me kin pwoson Siohwa kin medewe dahme E ketin kupwurki ni eh wiahda pilipil kan. Eh wiewia kan kasalehda me e kamehlele me Koht pahn ketin katingih, oh me e pahn paiekihda ni eh idawehn sapwellimen Siohwa kaweid me dierek nan sapwellime Mahsen.—Mel. 119:66; Ipru 11:6. w25.03 20 ¶1-2

Pwehki sawas sang sapwellimen Koht manaman, me tohto me mahso kin uhdahn lemei oh likamw wiadahr wekidekla laud kan nan arail mour. (Ais. 65:25) Irail kin doadoahk laud pwehn kihsang irair suwed kan me re ahneki. (Ep. 4:​22-24) Ei mehlel, sapwellimen Koht aramas akan sohte unsek, eri kitail pahn pwurupwurehng wiahda sapwung kan. Ahpw Siohwa ketikipenehier “soangen aramas koaros” me kin poakohng ih oh pil emenemen, oh pwehki met, irail kin ahneki popohl oh minimin mehlel. (Taitus 2:11) Koht me keieu manaman me kak kelehpw ketin wiahda soahng kapwuriamwei wet! Sapwellime mahsen kan kin ahnsou koaros pweida. (Ais. 55:​10, 11) Paradaiso ni karasaras miehier ahnsou wet. Siohwa ketin wiahda peneinei ehu me uhdahn tohrohr me kin kaudokiong ih. Pwehki kitail wia kisehn peneinei wet, kitail kin ahneki meleilei laud ahnsou wet oh sohte perki mehkot nan sampah lemei ehu. (Mel. 72:7) Pwehki kahrepe pwukat, kitail men sewese aramas tohto en pil wiahla kisehn peneinei wet. Kitail kak wia met sang ni atail kin wiewiahte atail doadoahk en katohnpadahk.—Mad. 28:​19, 20. w24.04 23 ¶13, 15

Sises ketin poakohng Siohwa sang eh lamalam unsek. Sises mwahngih dahme Koht ketin kupwurki en wia oh e koasoanehdi teng en wia met mendahki eh pahn imwikihla lokolok. Pwehki Sises kin medemedewehte en kaperenda Semeo, e sohte mweidohng mehkot en kesempwalsang met. Piter oh wahnpoaron teiko ahneki ahnsou mwahu en iang Sises oh skuhlki duwen sapwellime elen madamadau. Ni Piter eh ntingihdi nah tepin kisinlikowo, e kangoange Kristian kan en kakehlailihrailkihda elen madamadauohte me Krais sapwellimanki. (1 Piter 4:1) Ni Piter eh ntingihdi “kakehlailihkumwailda,” e doadoahngki lepin lokaiahn Krihs ehu me kawehwehda duwen sounpei kan ar kin kaunopada kepwehn mahwen kan ong mahwen. Eri ma Kristian kan sukuhlki en ahneki sapwellimen Sises elen madamadau, re pahn ahneki dahme re anahne pwehn pelianda ineng sapwung koaros oh pil sampah me mi pahn manaman en Sehdan.—2 Kor. 10:​3-5; Ep. 6:12. w25.03 8 ¶1-3

Dahme ke anahne esehla duwen aramaso erein amwa date? Mwohn amwa pepehm ong emenemen eh laudla, ele kumwa anahne koasoiapene ekei soahng kesempwal kan, me duwehte ahn meteio mehn akadei. Ia duwen omw kak esehla mwahu emen? Ke kak wia met sang ni omw idek peidek kan oh rong mwahu emenemen. Kumwa koaros anahne kasalehda ia uhdahn amwa pepehm oh en kin sapeng ni mehlel. (Seims 1:19) Mwein kumwa kak pilada en ehupene wia soahng kan me kak kahrehda en mengei ong kumwa en koasoipene, me duwehte en mwengepene, kohla alu, oh kalohk. Kumwa pil kak esehla emenemen ni amwa patehng kompoakpamwah kan oh amwa peneinei. Patehng met, koasoanehdi en wia soahng kan me pahn kasalehiong uhk mwomwen ahn aramaso mwekid nan soangsoangen irair kan oh rehn aramas teikan. w24.05 28 ¶6-7

Ahnsou keren kitail pahn lelohng kahpwal kan me uhdahn apwal oh kitail pahn anahne likih Siohwa laudsang mahs. Ire kan duwen sapwellimen Siohwa ladu kan nan Paipel oh pil nan atail ahnsou pahn sewese kitail en tehk ia duwen Koht eh ketin sewese sapwellime ladu kan. Doudouloale duwen irail pwukat. Omw wia met kak seweseiuk en wiahki Siohwa omw Paip. Oh pil, ke pahn kak kakehlaka riatail Kristian kan. Karasepe, Sises kamwarenki Saimon Kepas (ni lokaiahn Krihs “Piter”), me wehwehki “Paip.” (Sohn 1:42) Sises mahmahsanih me Piter pahn kansenamwahwih meteikan nan mwomwohdiso oh kakehlaka arail pwoson. Paipel kin kahdaneki elder kan “mwetehn paipalap ehu.” Met wehwehki me irail kin pere irail kan nan mwomwohdiso. (Ais. 32:2) Ahpw kitail koaros kak kangoange emenemen ma kitail alasang sapwellimen Siohwa irair kaselel kan. w24.06 28 ¶10-11

Nanmwarkien Israel kan me Siohwa ketin wiahki me lelepek kei kin kaudokiong ni ahl me e ketin kupwurki. Pali moron en nanmwarki ko me Siohwa ketin kadeikada me sohte lelepek kin uhdihsang peikiong sapwellime Kosonnedo oh tepida kaudokiong koht likamw kan. (1 Nan. 21:​25, 26; 2 Kron. 12:1) Dahme kahrehda kaudokiong Siohwa uhdahn kesempwal ong ih? Ehu kahrepe iei me nanmwarki ko pwukoahki sewese aramas ako en kaudokiong Siohwa ni pwung. Pil ehu, ni aramas akan ar kin kaudokiong koht likamw kan, met kin kahrehiong irail en wiahda dihp teikan oh pil mwersuwedih meteikan. (Os. 4:​1, 2) Patehng met, nanmwarki ko oh mehn Israel ko wia aramas kei me inoudahr ong Siohwa. Kahrehda, Paipel kin karasahiong ar kin wia kaudok likamw ong kamwahl. (Ser. 3:​8, 9) Emen me kamwahl kin salelepek ong eh pwoudo oh uhdahn kamedekihala. Ni mwohmwohte, emen me inoudahr ong Siohwa ahpw kin iang kaudok likamw sohte kin lelepek ong Ih oh kin uhdahn kamedekihala kupwure.—Deud. 4:​23, 24. w24.07 22-23 ¶12-15