Jueves 9 de abril
Juchasapaspaj Diosmanta mañaporqa (Isa. 53:12).
Jehovaqa Abrahanta nerqa wawanta payman jaywananta. Abrahanqa maytachá llakikorqa Dios chayta ruwananta nejtin. Jinapis kasukunanpaj wakichisqa kasharqa. Wawanta jaywananpajña kashajtintaj, Jehovaqa nerqa amaña chayta ruwananta. Abrahanpa ruwasqanqa sutʼita rikucherqa Jehová runasta munakusqanrayku, aswan qhepaman munasqa Wawanta runasrayku qonanta (Gén. 22:1-18). Aswan qhepamantaj Jehovaqa israelitasman Leyta qorqa. Chay Leypitaj paykunaman nerqa, uywasta jaywanankuta juchasninku perdonasqa kananpaj (Lev. 4:27-29; 17:11). Chay jaywanastaj rikucherqa Jehová aswan qhepaman aswan sumaj jaywanata qonanta, chaytaj runasta juchamanta kacharichinanta. Diosqa profetaswan uj Miraymanta qhelqacherqa, chaytaj Diospa Wawan karqa. Payqa sufrichisqa, wañuchisqataj kanan karqa tukuy runasta juchamanta, wañuymantawan kacharichinanpaj, qantapis kacharichisunanpaj (Isa. 53:1-12). w24.08 pág. 4 párrs. 7, 8
Viernes 10 de abril
Leyniykitaqa anchata munakuni, tuta pʼunchay leyniykipi tʼukurini (Sal. 119:97).
Bibliata leejtinchej tʼukurinanchejpuni tiyan imaynatachus leesqanchejman jina ruwanata. Bibliata leeshaspa kayta tapurikuna: “¿Imaynatá kay leesqayman jina ruwayman, kunan chayri aswan qhepaman?”, nispa. 1 Tesalonicenses 5:17, 18 versiculosta leesqanchejpi tʼukurina. Leeytawanqa tumpata piensarina mañakuykunasninchejpi. ¿Tukuy sonqochu Diosmanta mañakunchej? ¿Mashkha kutitataj Jehovamanta mañakunchej? ¿Imasmantataj Jehovaman agradecekuyta munanchej? Piensarispa ichapis kinsa imasmanta agradecekuyta munasunman. Chay imaspi uj chhikanta tʼukurisunchej chayqa, uj mashkha minutitosllapis kachun, mana Diospa Palabranta uyarishallanchejchu, manachayqa chayman jina ruwayta qallarishanchej. Chaytachus Bibliata leesqanchejwan sapa día ruwasun chayqa, pisimanta pisi aswan sumaj cristianosman tukusun. w24.09 págs. 4, 5 párrs. 9, 10
Sábado 11 de abril
Allinta qhawarikuychej ama chinkachinaykichejpaj, imastachus mayta llankʼaspa tarerqayku chaykunata, ajinamanta tʼinkaykichejta tukuyninta japʼinaykichejpaj (2 Juan 8).
Jehovaqa ruwawarqanchej wajkunaman qorispa aswan kusisqa kanapaj, qorichikunamanta nisqaqa. Hermanosninchejta yanaparispa mayta kusikunchej, agradecekunawanchejtataj munanchej. Jinapis agradecekuwajtinchejpis manapis kusisqas kanchej, allinta ruwasqanchejrayku. Wajkunaman imata qojtinchejpis, Jehovaqa chaymanta nisqa ‘astawanraj qowasunman’ (2 Cró. 25:9). Ni pi Jehová jina qoyta atisunmanchu. Jehovaj bendicionnin jinataj ni ima kusichiwasunmanchu. Chayrayku kallpachakunallapuni Tatanchej Jehová jina qorikuyta yachanapaj. w24.09 pág. 31 párrs. 20, 21