¿Yuyananchejchu tiyan Jatun Para kashajtin imaschus pasarqa chay imas jamoj imaswan ninakusqanta? Mana, imaraykuchus Bibliaqa mana chaytachu nin. Jesús nerqa imaynachus Noejpa tiemponpi karqa, ajinallataj kutimunan tiempopis kananta. Jinapis chaywanqa mana nisharqachu imaschus Jatun Para tiempopi karqa, chay imas tukuynin aswan qhepaman juntʼakunanta. Jesusqa mana nerqachu Jehová arcaj punkunta wisqʼaykusqan imawanpis ninakusqanta (Mat. 24:37-39). ¿Imatá Noé ruwarqa Jehová Jatun Parata apamunanta yachaytawan? Payqa Jehovapi creesqanta rikucherqa uj arcata ruwaspa (Heb. 11:7; 1 Ped. 3:20). Diospa Gobiernonmanta sumaj willaykunata uyarejkunapis, Noé jinallataj ruwasqasninkuwan rikuchinanku tiyan chaypi creesqankuta (Hech. 3:17-20). Pedroqa nerqa Noeqa “cheqan kajta willaj” kasqanta. Noqanchejpis jallpʼa enteropi willashanchej, maytataj kallpachakunchej chayta ruwanapaj. Ajinata kallpachakojtinchejpis, manapuni atisunmanchu tukuy runasman willayta manaraj tukukuy chayamushajtin. w24.05 págs. 9, 10 párrs. 3-5

Jehovaj amigosninwan kʼachas kananchej tiyan, jatunpajtaj qhawananchej tiyan (Rom. 12:10). Salmo 15:4 versiculoqa Jehovaj toldonpi invitadomanta nin: “Ruwasaj nisqantaqa juntʼanpuni, mana allinninpaj kajtinpis”, nispa. Nisqanchejta mana juntʼaspaqa wajkunaj sonqonkuta nanachisunman (Mat. 5:37). Jehovaqa munan casados casarakushaspa imatachus nisqankuta juntʼanankuta. Chantapis Jehovaqa munallantaj tatas wawasninkuman imatachus nisqankuta juntʼanankuta. Diosta, runa masinchejtapis munakusqanchejrayku kallpachakusun nisqanchejta juntʼanapajpuni. Jehovaj amigosninta jatunpaj qhawallasunmantaj paykunata wajyarikuspa, qorikuytataj yachaspa (Rom. 12:13). Hermanosninchejwan khuska karikunapaj tiempochakusun chayqa, paykunawan astawan masichakusun, Jehovamanpis astawan qayllaykusun. Chantapis wajkunata wajyarikuspaqa Jehová jina ruwashanchej. w24.06 pág. 12 párrs. 15, 16

Jehovaqa kʼumuykukoj sonqo kajkunaman cheqa kajta sutʼinchan (Mat. 11:25). Cheqa kajta yachakushaspaqa kʼumuykukoj sonqos karqanchej, wajkuna yanaparinawanchejtataj saqekorqanchej (Hech. 8:30, 31). Chaywanpis allinta qhawarikunanchej tiyan mana umata oqhariyta qallarinapaj. Jatunchakusunman chayqa, yuyayta qallarisunman yuyasqanchejqa Bibliaj yuyaychaykunasnin jinallataj, Jehovaj llajtanpa kamachiykunasnin jinallataj sumaj kasqanta. ¿Imataj yanapawasunman kʼumuykukoj sonqosllapuni kanapaj? Amapuni qonqakunachu Jehovaj ñaupaqenpeqa mana imapischu kasqanchejta (Sal. 8:3, 4). Chantapis Jehovamanta yanapata mañakuna kʼumuykukoj sonqo kanapaj, wajkuna yachachinawanchejtataj saqekunapaj. Jehovaqa Palabrannejta, llajtannejta ima yuyaychawanchej. Paytaj yanapawasun chay yuyaychawasqanchejta jatunpaj qhawanapaj, manataj yuyasqanchejtachu. Bibliata leeshaspa sumajta reparana Jehovaqa kʼumuykukoj sonqo runasta munakusqanta, jatunchakojkunata, runaykachajkunata, may kasqankuta yuyakojkunatataj mana allinpajchu qhawasqanta. Sichus Diospa llajtanpi jatuchaj ruwaykunata japʼinchej chayqa, sumajta qhawarikuna ama umata oqharinapaj. w24.07 pág. 10 párrs. 8, 9