Números

15 Jehová Diosqa Moisesman nillarqataj: 2 “Israelitasman kay jinata niy: ‘Tiyakunaykichejpaj qosqaykichej chay jallpʼaman yaykuspañaqa,+ 3 Jehová Diosman apamuyta atinkichej wakasniykichejmanta, ovejasniykichejmanta, chayri cabrasniykichejmanta ninapi qʼolachina* ofrenda kananpaj, ima munayta qʼaparispa Jehová Diospa sonqonta tiyaykuchinanpaj,+ qʼolachina ofrendapis+ kachun chayri waj ofrendapis kachun, kanman ruwasaj nisqaykichejta juntʼanaykichejpaj, chayri aparimusqaykichej ofrenda,+ chayri fiestasniykichejpi+ qosqaykichej ofrenda. 4 Pichus ofrendanta apamojqa, Jehová Diosman apamullachuntaj sumaj ñutʼu jakʼuta+ uj kilota jina,* casi uj litro* aceitewan chajrusqata, chʼaki mikhuy ofrendapaj. 5 Qʼolachina ofrendapaj+ chayri cordero* ofrendapajpis apamunkichej casi uj litro* vino ofrendata. 6 Uj carnerota* apamunkichej chayqa, chaypaj apamunkichej sumaj ñutʼu jakʼuta iskay kilosta jina,* uj litro kuraj* aceitewan chajrusqata, chʼaki mikhuy ofrendapaj. 7 Chantá apamullankichejtaj uj litro kuraj* vino ofrendata, ima munayta qʼaparispa Jehová Diospa sonqonta tiyaykuchinanpaj.

8 ”’Sichus Jehová Diosman uj torota apamunkichej qʼolachina ofrendapaj,+ chayri ruwasaj nisqaykichejta juntʼanaykichejpaj ofrendapaj,+ chayri khuska mikhurikuy ofrendapaj+ chayqa, 9 chay torotawan khuska apamunkichej sumaj ñutʼu jakʼuta kinsa kilos khuskanniyojta jina,* casi iskay litros* aceitewan chajrusqata, chʼaki mikhuy ofrendapaj.+ 10 Chantá apamullankichejtaj casi iskay litros* vino ofrendata,+ ninapi qʼolachina ofrendata jina, ima munayta qʼaparispa Jehová Diospa sonqonta tiyaykuchinanpaj. 11 Ajinata ruwankichej sapa torowan, sapa carnerowan, sapa corderowan, sapa chivowanpis. 12 Mashkha uywasta jaywawajtiykichejpis, ajinata ruwankichej sapa uywawan. 13 Ajinata tukuy israelitasqa apamunanku tiyan ninapi qʼolachina ofrendata, ima munayta qʼaparispa Jehová Diospa sonqonta tiyaykuchinanpaj.

14 ”’Sichus qankunawan tiyakoj forastero chayri qankuna ukhupi unaytaña tiyakoj forasteropis, ninapi qʼolachina ofrendata apamonqa, ima munayta qʼaparispa Jehová Diospa sonqonta tiyaykuchinanpaj chayqa, paypis qankuna jinallataj ruwachun.+ 15 Qankuna israelitaspaj, jinallataj qankunawan tiyakoj forasterospajpis uj leylla kanqa. Chay leytaj unay wataspaj kanqa qankunapaj mirayniykichejpajwan. Jehová Diospa ñaupaqenpeqa forasterospis, qankunapis uj rejlla kankichej.+ 16 Uj leylla, uj kamachiyllataj kanqa qankunapaj, jinallataj qankunawan tiyakoj forasterospajpis’”.

17 Jehová Diosqa Moisesman nillarqataj: 18 “Israelitasman kay jinata niy: ‘Ima jallpʼamanchus pusashaykichej chayman yaykuspaqa, 19 chay jallpʼapi poqojta* mikhunkichej.+ Chaywanpis chay poqoymantaqa Jehová Diosman ofrendata qonkichej. 20 Ñaupaj kaj chhama chhamalla kutasqa jakʼumanta+ ofrendata apamunkichej muyu tʼantasta* ruwaspa. Chaytaqa Diosman jaywankichej imaynatachus eraykichejmanta* ofrendata jaywankichej ajinata. 21 Ñaupaj kaj chhama chhamalla kutasqa jakʼumantaqa Jehová Diosman ofrendata qonkichejpuni, mirayniykichejpis kikillantataj ruwanqanku.

22 ”’Ichapis nacionnintin pantaspa, mana juntʼawajchejchu kay kamachiykunata mayqenkunatachus Jehová Dios Moisesman kamacherqa chayta, 23 nisunman imatachus Jehová Moisesnejta kamachisorqachej chayta. Chay kamachiykunaqa kashan qankunapis mirayniykichejpis juntʼanaykichejpaj, Jehová Dios chay kamachiykunata qosorqachej chay pʼunchaymantapacha. 24 Sichus mana reparakuspalla nacionnintin pantawajchej chayqa, tukuy nacionnintin uj torillota apamunkichej qʼolachina ofrendapaj, ima munayta qʼaparispa Jehová Diospa sonqonta tiyaykuchinanpaj. Chay torillotawan apamullankichejtaj chʼaki mikhuy ofrendata, vino ofrendatawan, imaynatachus ruwana kasqanman jina.+ Chantá apamullankichejtaj uj chivitota jucharayku ofrendapaj.+ 25 Sacerdotetaj chay ofrendasta jaywanqa tukuynin israelitas juchaykichejmanta perdonta tarinaykichejpaj, juchaykichejtaj perdonasqa kanqa.+ Qankunaqa mana reparakuspalla pantarqankichej, pantasqaykichejmantataj ofrendata Jehová Diospa ñaupaqenman apamorqankichej, Jehová Diospaj ninapi qʼolachina ofrendata, jucharayku ofrendatawan. 26 Ajinamanta tukuynin israelitas perdonasqa kankichej, jinallataj qankuna ukhupi tiyakoj forasterospis, tukuyniykichej mana reparakuspalla pantasqaykichejrayku.

27 ”’Sichus uj runa mana cuentata qokuspalla juchallikun chayqa, uj watayoj cabritata apamuchun jucharayku ofrendapaj.+ 28 Sacerdotetaj chay cabritata jaywanqa chay runa juchanmanta perdonta tarinanpaj. Payqa pantaspa, mana cuentata qokuspalla Jehová Diospa ñaupaqenpi juchallikorqa. Perdonta tarinanpajqa sacerdote chay cabritata jaywanqa, juchantaj perdonasqa kanqa.+ 29 Chay kikin leyllapuni kanqa israelitaspaj, paykuna ukhupi tiyakoj forasterospajpis, mana cuentata qokuspalla juchallikojtinku.+

30 ”’Sichus uj runa juchallikun jucha kasqanta yachashaspa chayqa,+ israelitapis kachun chayri forasteropis kachun, Jehová Diospa contranta rimashan. Chayrayku chay runaqa wañuchisqa kanqa. 31 Chay runaqa Jehová Diospa nisqanta pisipaj qhawan, kamachisqantataj pʼakin. Chayrayku chay runaqa wañuchisqapuni kanqa,+ juchanmantataj paganqa’”.+

32 Chʼin jallpʼapi kashaspa israelitasqa, uj runata tarerqanku samarikuna pʼunchaypi llantʼata pallashajta.+ 33 Pikunachus llantʼata pallashajta tarerqanku chaykunaqa, chay runata pusarqanku Moisesman, Aaronman, tukuy israelitasmanwan. 34 Paykunataj chay runata wisqʼaykorqanku,+ imaraykuchus manaraj leypi sutʼita nikorqachu imatachus chay runata ruwanankuta.

35 Jehová Diostaj Moisesman nerqa: “Chay runaqa wañuchisqapuni kanan tiyan.+ Tukuynin israelitas campamentomanta* jawaman orqhospa rumiswan chʼanqaykuchunku”,+ nispa. 36 Jinapi tukuynin israelitasqa chay runata campamentomanta jawaman orqhospa, chaypi rumiswan chʼanqaykuspa wañucherqanku, Jehová Dios Moisesman kamachisqanman jina.

37 Jehová Diosqa Moisesman kayta nillarqataj: 38 “Israelitasman niy ropasninkoj ura kantusninman waychʼasta* churanankuta, mirayninkupis kikillantataj ruwanankuta. Ropasninkoj ura kantusninpa patitanmantaj azul qʼaytuta siraykuchunku muyurisqata.+ 39 Paykunaman niy: ‘Ropasniykichejpa kantusninman chay waychʼasta churankichej, chayta qhawarispa Jehová Diospa tukuy kamachiykunasninta yuyarikunaykichejpaj, jinamanta chaykunata juntʼanaykichejpaj.+ Ama sonqoykichejpa munasqallantaqa ruwankichejchu, nitaj ñawiykichejpa rikusqallantaqa, chayqa waj dioseswan qhenchachakuyman apashasunkichej.*+ 40 Chay waychʼasqa tukuy kamachiykunasniyta yuyarichisonqachej, ajinamanta chaykunata juntʼankichej, Diosniykichejpa ñaupaqenpitaj llimphus kankichej.+ 41 Noqamin Jehová Diosniykichej kani. Noqa Egiptomanta orqhomorqaykichej Diosniykichej kanaypaj.+ Noqamin Jehová Diosniykichejqa kani’”.+