Isaías

39 Chaypachasllataj Baladanpa wawan, Babiloniamanta rey Merodac-Baladanqa uyarerqa Ezequías+ onqoykusqanta, sanoyapusqantataj. Chayrayku cartasta apacherqa, uj regalotawan.+ 2 Ezequiastaj chunka makiwan japʼikorqa chay imasta apamoj runasta. Paykunamantaj rikucherqa waqaychasninta: qolqe metalta, qorita, bálsamo* aceiteta, waj valesqa aceitesta, guerrapaj tukuynin armasninta, imachus jallchʼana wasisninpi karqa chay tukuy imastawan.+ Tukuy imastapuni rikucherqa, imaschus wasinpi* karqa, imaschus nacionnintinpi karqa chay tukuy imasta.

3 Chaymantataj profeta Isaiasqa rey Ezequiaspaman yaykuspa taporqa: “¿Imatá nisunku chay runas? ¿Maymantá jamusqanku?”, nispa. Ezequiastaj kuticherqa: “Karu llajtamanta jamusqanku, Babiloniamanta jamusqanku”,+ nispa. 4 Isaiastaj taporqa: “¿Imastá wasiykipi rikorqanku?”, nispa. Ezequiastaj kuticherqa: “Wasiypi tukuy imasta rikorqanku. Tukuy valorniyoj imasniyta paykunaman rikucherqani”, nispa.

5 Isaiastaj Ezequiasman nerqa: “Uyariy, angelesta kamachej Jehová Diosqa kayta nin: 6 ‘Uj pʼunchayqa Babiloniaman apakaponqanku wasiykimanta tukuy imata, ñaupa tatasniykej kunankama tukuy ima tantasqankutapis. Chay pʼunchayqa qayllaykamushanña. Ni imata saqenqankuchu’,+ nispa nin Jehová Diosqa.+ 7 Payqa nillantaj: ‘Niraj nacenkuchu chay wawasniykitapis wakinta Babiloniaman apakaponqanku, chaypitaj reypa kamachina wasinpi cargosniyoj kanqanku’,+ nispa”.

8 Chayta uyarispa Ezequiasqa Isaiasta nerqa: “Jehová Diospa nisqanta willawasqaykeqa sumaj kashan”, nispa. Chantá nillarqataj: “Kausashajtiy allin kausay kanqa, nitaj ima chʼajwapis kanqachu. Chayrayku chay niwasqaykeqa allillan”,+ nispa.