1 Crónicas

11 Tiemponmantaj tukuy israelitas Davidwan Hebronpi+ tantakorqanku, nerqankutaj: “Ñaupaqeykipi kashayku, noqaykoqa yawar masisniyki kayku.*+ 2 Qanqa unaymantaña israelitasta guerraspi pusaykachaj kanki,* rey Saúl kamachishajtillanraj.+ Jehová Diosniykitaj nisorqa: ‘Qanmin Israel nacionniytaqa ovejitasta jina michinki, qanmin Israel nacionniytaqa kamachinki’,+ nispa”. 3 Ajinata Israelmanta tukuy kurajkuna Hebronman jamorqanku rey Davidwan parlaj. Davidtaj Hebronpi paykunawan uj tratota ruwarqa Jehová Diospa ñaupaqenpi. Paykunataj Davidta churarqanku* Israelta rey jina kamachinanpaj,+ Samuelnejta Jehová Dios nisqanman jina.+

4 Aswan qhepamantaj Davidwan tukuy israelitaswan khuska Jerusalenman rerqanku, nisunman Jebús+ llajtaman, jebuseos+ tiyakusharqanku chay jallpʼasman. 5 Jebús llajtayoj runastaj burlakuspa Davidta nerqanku: “Ni jaykʼaj kaymanqa yaykumunkichu”,+ nispa. Jinapis Davidqa chay sumaj perqasniyoj Sion+ llajtata atipaspa japʼikaporqa, chaytaj kunanqa Davidpa Llajtan.+ 6 Davidqa nerqa: “Pichus ñaupajta jebuseoswan maqanakoj rejqa, soldadospa comandanten kanqa”, nispa. Zeruyaj wawan Joabtaj+ ñaupajta maqanakoj rerqa, ajinamanta pay comandante karqa. 7 Chantá Davidqa chay sumaj perqasniyoj llajtapi tiyakaporqa, chayrayku runasqa chay llajtata Davidpa Llajtan nispa suticharqanku. 8 Davidqa watejmanta wasista ruwaracherqa tukuynin llajtapi, Lomapi,* jinallataj muyuynintinpi. Joabtaj llajtapi ruwanaraj karqa chay wasista ruwayta tukuchaykorqa. 9 Ajinata Davidqa astawan astawan atiyniyojman tukorqa,+ angelesta kamachej Jehová Diostaj paywan kasharqa.

10 Davidpa wapu soldadosninpa kurajkunasninkoqa kaykuna karqanku. Paykunaqa tukuy israelitaswan khuska Davidman sayasqa karqanku rey jina kamachishajtin, paykunallataj yanaparqanku rey kananpaj, Jehová Dios Israelman nisqanman jina.+ 11 Davidpa wapu soldadosnenqa kaykuna kanku: hacmonitaj wawan Jasobeam,+ payqa kinsa aswan wapu soldadospa kamachejninku karqa.+ Jasobeamqa uj pacha tʼojsina lanzallanwan 300 runasta wañucherqa.+ 12 Paypa qhepantataj ahohíta+ Dodoj wawan Eleazar+ karqa. Payqa chay kinsa wapu soldadosmanta ujnin karqa. 13 Eleazarqa Davidwan karqa Pas-Damimpi,+ maypichus filisteos guerrapi tinkunankupaj tantakorqanku chaypi. Chaypeqa cebada chajra karqa, soldadostaj filisteosmanta ayqekorqanku. 14 Eleazartaj pachanpi sayaykorqa, chay jallpʼasta jarkʼakuspataj maqanakuspa filisteosta wañuracherqa. Ajinamanta Jehová Diosqa tʼukunata atiparqa.*+

15 Soldadospa kinsa chunka kurajkunasninkumanta kinsalla uraykorqanku chhankaman, Adulam cuevapi+ Davidwan tinkunankupaj. Filisteospa soldadosninkutaj Refaím ura pampaspi jarakusharqanku.+ 16 Davidqa cueva ukhupi kasharqa, filisteospa uj tropa soldadosninkutaj Belenpi kasharqanku. 17 Davidtaj kay jinata parlarikorqa: “Belén+ punkupi kashan chay estanquemanta uj chhikan yakitullatapis tomarikuyman”, nispa. 18 Chayta uyarispataj chay kinsa wapu soldadosnenqa a la fuerza filisteospa campamentonkuman* yaykorqanku. Belén punkupi estanquemanta yakuta orqhospataj Davidpaj apamorqanku. Davidtaj mana chay yakuta tomayta munarqachu, pampaman jichʼarqa Jehová Diospa ñaupaqenpi. 19 Nerqataj: “Noqaqa Diosta manchachikuni, ni imarayku kay yakutaqa tomaykuymanchu. Kay runasqa kausayninkuta wañuy pataman churanku, ¿imaynatataj yawarninkuta tomaykuymanri?+ Kay runasqa yakuta apamuspa kausayninkuta wañuy pataman churanku”, nispa. Chayrayku Davidqa mana chay yakuta tomayta munarqachu. Chay imasta ruwarqanku chay kinsa wapu soldadosnin.

20 Joabpa+ hermanon Abisaiqa+ waj kinsa wapu soldadospa kamachejninku karqa. Payqa 300 runasta tʼojsina lanzanwan wañucherqa, chay kinsa wapu soldados jinallataj rejsisqa karqa.+ 21 Gruponpeqa kinsa karqanku, Abisaitaj chay iskay compañerosninmanta aswan wapu karqa, kamachejninkutaj karqa. Chaywanpis mana chay ñaupaj kinsa wapu soldados jinapunichu karqa.

22 Jehoiadaj wawan Benayaqa+ wapu soldado karqa, Cabzeelpitaj+ manchay tʼukuna imasta ruwarqa. Payqa Moabmanta Arielpa iskay wawasninta wañucherqa, uj pʼunchaytaj ritʼimushajtin estanqueman yaykorqa, chaypitaj uj leonta wañucherqa.+ 23 Payqa wañuchillarqataj uj jatun egipcio runata, chay runaqa sayayninman iskay metros 20 centimetrosniyoj karqa.*+ Benayaqa kʼaspillawan chimpaykorqa, egipcio runataj uj tʼojsina lanzata makinpi japʼisharqa, chay tʼojsina lanzanqa awana kʼaspi jinapuni karqa.+ Ajinapis Benayaqa chay egipcio runawan maqanakorqa, tʼojsina lanzanta qhechuspataj chayllawantaj wañucherqa.+ 24 Chay imasta ruwarqa Jehoiadaj wawan Benaya, payqa chay kinsa wapu soldados jinallataj sumaj rejsisqa karqa. 25 Benayaqa chay kinsa chunka soldadosmanta aswan wapu kaspapis, mana chay kinsa wapu soldados jinapunichu karqa.+ Ajinapis Davidqa guardiasninta kamachinanpaj churarqa.

26 Ejércitos ukhupi aswan wapu soldadosqa kaykuna karqanku: Joabpa hermanon Asahel,+ Belenmanta Dodoj wawan Elhanán,+ 27 harorita Samot, pelonita Hélez, 28 tecoíta Iquespa wawan Irá,+ anatotita Abí-Ézer,+ 29 husatita Sibecái,+ ahohíta Ilái, 30 netofatita Maharái,+ netofatita Baanaj wawan Héled,+ 31 benjaminitas+ ukhumanta Guibeamanta Ribaijpa wawan Itái, piratonita Benaya, 32 Gaas+ mayusmanta* Hurái, arbatita Abiel, 33 baharumita Azmávet, saalbonita Eliahbá, 34 guizonita Hasempa wawasnin, hararita Saguejpa wawan Jonatán, 35 hararita Sacarpa wawan Ahiam, Urpa wawan Elifal, 36 mekeratita Héfer, pelonita Ahíya, 37 carmelita Hezró, Ezbaijpa wawan Naarái, 38 Natanpa hermanon Joel, Hagrijpa wawan Mibhar, 39 ammonita Zélec, berotita Naharái, Zeruyajpa wawan Joabpa escudonta apaykachaj soldado, 40 itrita Irá, itrita Gareb, 41 hitita Urías,+ Ahlaijpa wawan Zabad, 42 rubenita Sizajpa wawan Adiná, payqa rubenitaspa ujnin kamachejninku karqa, paywantaj kinsa chunka runas karqanku, 43 chantá Maacajpa wawan Hanán, mitnita Josafat, 44 asteratita Uzía, aroerita Hotampa wawasnin Samawan Jeielwan, 45 Simrijpa wawan Jediael, tizita hermanon Johá, 46 mahavita Eliel, Elnaampa wawasnin Jeribaiwan Josaviaswan, moabita Itmá, 47 Eliel, Obed, mezobaíta Jaasiel ima.