Ñawiriqkuna yachayta munanku

¿Kuraq Supay kanpunichu?

Bibliaqa, Kuraq Supay kasqantapuni yachachin. Chaywanpis wakinqa, Bibliap nisqanta mana creenkuchu, Kuraq Supay runap sunqunpi saqra kaqlla kasqanta yuyasqankurayku.

Achkha runas Kuraq Supay kasqanta mana creesqankuqa, mana tʼukunapaqchu. ¿Imarayku? Sutʼincharinapaq: juk suwaqa, suwakuchkasqanta runas mana yachanankupaq, tukuy imata ruwan, ¿icharí? Jinallatataq Kuraq Supaypis, pichus pay kasqanta runas mana yachanankupaq tukuy imata ruwan jinamanta runasta chʼawkiyanallanpaqpuni. Chaywanpis Jesusqa, Kuraq Supay ‘kay pachamanta kamachiq’ kasqanta nirqa, jinamanta Kuraq Supay runas llakiypi kachkasqankumanta juchayuq kasqanta rikuchirqa (Juan 12:31).

¿Imaynamantá Kuraq Supay rikhurirqa? Qallariypiqa mana juchayuq ángel karqa. Chaywanpis, runaswan yupaychachikuypi tʼukurirqa, runas Diosta yupaychanankupi tʼukurinanmantaqa. Chayllapipuni tʼukurisqanraykutaq Diospa contranta uqharikurqa. Ajinamanta Kuraq Supayman tukurqa. Biblia nisqanmanjina juk kuti Kuraq Supayqa, payman qunqurikuspa yupaychananta Jesusta nirqa, jinamantataq runaswan yupaychachikuyta munapayasqanta rikuchirqa (Mateo 4:8, 9).

Job libro nisqanmanjina Kuraq Supayqa, iskay kutita Dioswan parlarqa, parlasqanpitaq yupaychachikuyta munasqan sutʼi rikukurqa. Chantá, runasta Diosmanta karunchananpaq, paykunawan yupaychachikunanpaq ima, tukuy imata ruwayta munasqan sutʼi rikukullarqataq (Job 1:13-19; 2:7, 8).

Kaypi tʼukuriy: Kuraq Supay, Jehovawan, Jesuswan ima parlarqa chayqa, ¿yuyasunmanchu Kuraq Supay sunqunchikpi saqra kaqlla kasqanta? ¿Diospa chayri Jesuspa sunqunpi, ima saqra kaqllapis kanmanchu? Mana, ¿icharí? Chayrayku Kuraq Supay kasqanqa sutʼi rikukun. Payqa juk saqra espíritu, mana pimantapis khuyakunchu nitaq Jehovata, Jesusta ima jatunpaqchu qhawan.

Kay pachapi imaymana llakiykuna kasqan, Kuraq Supay kasqantapuni sutʼita rikuchin. Wakin suyuspi runasqa, yarqhaymanta wañuchkanku, wakin suyuspitaqrí runasqa mikhunata usuchichkanku, jatuchaq maqanakuspi puraqmanta wañuchinakunankupaqtaq armasta waqaychachkanku. Chantá runaqa, ni jaykʼaqjina, yakuta, Jallpʼata, samayta ima chʼichichachkallanpuni. Chaywanpis yaqha tukuy runasqa, mana reparankuchu imaraykuchus chayjinata ruwachkasqankuta. ¿Imaraykutaq mana reparankuchu?

Imaraykuchus Biblia sutʼinchasqanmanjina Kuraq Supayqa, “mana creejkunaj yuyayninkuta laqhayachi[chkan]” (2 Corintios 4:3, 4). ¿Pikunaniqta chayta ruwachkan? Supaykunaniqta. Bibliaqa, Kuraq Supay “curaj supaykunaj curajnincu” kasqanta nin (Mateo 12:24, Dios Parlapawanchej). Kuraq Supayqa, juk qutu wañuchiqkunap kamachiqninkujina, pichus kasqanta mana reparachikuspalla supaykunaniqta runasta chʼawkiyachkan.

Kuraq Supay, supaykuna ima pikunachus kasqankuta Biblia sutʼinchasqanqa, paykunawan mana chʼawkiyachikunanchikpaq yanapawanchik. Chantá Bibliaqa, imatawanchus ruwana kasqanta sutʼinchallawanchiktaq, nintaq: “Chayrayku Diosman kʼumuykukuychej. Kuraj Supaypa contranta sinchʼita sayaychej, paytaj qankunamanta ayqenqa” (Santiago 4:7).