¿Imaynataj Diosninchej?

1, 2. 1) Imallamantapis yachayta munaspa, ¿imatataj ruwanchej? 2) ¿Imastawantaj yachayta munallasunmantaj?

¹ WAWASQA tukuy imata yachayta munanku. Chayrayku imatapis tapuwanchejpuni. Tapuwasqanchejman sumajta kutichejtinchejpis, wajtañataj tapullawanchejtaj.

² Kuraj runaspis chayri jovenespis, imata yachayta munaspapis tapurikunchejpuni. Chantapis ichá yachayta munallasunmantaj, imaraykuchus ajinata sufrishasqanchejta, imaynachus qhepaman kausay kanantapis. Chaykunamanta mana sutʼita yachaspataj, llakisqalla qhepakunchej.

 3. ¿Imatataj wakin runas Bibliamanta ninku?

³ Imasmantachus yachakuyta munasqanchejta, ¿Biblia sutʼinchawasunmanchu? Wakin runasqa “sutʼinchawasunman” ninku. Wakintaj ninku Bibliaqa mana entiendenapaj jinachu kasqanta. Chantapis nillankutaj Bibliataqa yachajkunalla, pastoreslla chayri curaslla entiendesqankuta. Wakintajrí yachayta munaspapis tapukuyta pʼenqakunku.

 4. ¿Imastataj Biblia willawanchej?

⁴ Bibliaqa willawanchej imaynachus kausay qhepaman kananta, wañusqas maymanchus ripusqankuta, imaynachus Diosninchej kasqantapis. Chay imasta sutʼita yachanapajqa kallpachakunallanchejpuni tiyan. Sumaj Yachachejninchej Jesusqa nerqa: “Mañakullaychejpuni qosonqachejtaj, maskʼallaychejpuni tarinkichejtaj, punkutapis takallaychejpuni kicharisonqachejtaj”, nispa (Mateo 7:7).

 5. ¿Imatataj tarisunchej Bibliamanta yachakuspa?

⁵ Jesús nisqanman jina ruwaspaqa, imasmantachus yachakuyta munasqanchejta Bibliapi tarisunchej (Proverbios 2:1-5). Bibliaqa imatapis entiendenanchejpaj jinalla willawanchej. Bibliamanta yachakuspaqa kusisqa kausakusun, aswan qhepamantaj sumaj kausayta tarisun. Qhepan parrafospi yachakusunchej, Diosninchej noqanchejmanta phutikusqantachus manachus.

 6. ¿Ima llakiykunatataj tukuynejpi rikunchej?

⁶ Ashkha runas yuyanku, Diosqa noqanchejmanta mana phutikusqanta. Paykunaqa ninku: “Diosninchej noqanchejmanta phutikunman chayqa, nichá ajinata sufrishasunmanchu”, nispa. Kay tiempopeqa tukuynejpi rikunchej guerrasta, chejninakuyta, imaymana llakiykunata. Tukuypis onqonchej, sufrinchej, wañunchejtaj. Chayrayku wakin runasqa ninku: “Diosninchej noqanchejmanta llakikunman chayqa, nichá kay jina llakiypi kausajta qhawallawasunmanchu”, nispa.

 7. 1) ¿Imatataj pastorespis, curaspis runasman creechinku? 2) ¿Dioschu juchayoj kasqa sajra imas kasqanmanta?

⁷ Pastorespis, curaspis, runasta creechinku Diosninchejqa rumi sonqo kasqanta. Ima llakiy qhatiriwajtinchejpis paykunaqa ninku: “Dios munarqa ajina kananta”, nispa. Chayta nispaqa Dios juchayoj kasqanta nishanku. Bibliatajrí yachachin, Diosninchejqa mana ima sajratapis ruwasqanta. Payqa ni pita sajra imaswan pruebaman churanchu. Bibliaqa niwanchej: “Llakiykunapi kaspaqa, ama pipis nichunchu: ‘Dios pruebaman churashawan’, nispa. Imaraykuchus Diosqa mana sajra imaswan pruebaman churasqa kayta atinchu, nitaj payqa pitapis sajra imaswan pruebaman churanchu”, nispa (Santiago 1:13). Leerinchej jina, Diosqa saqen sajra imas kananta. Jinapis mana paychu juchayoj sajra imas kasqanmantaqa (Job 34:10, 12 leey).

8, 9. 1) Uj joven gustunta ruwaspa problemaspi rikhurisqanmanta, ¿tatanchu juchayoj kanman? 2) ¿Dioschu juchayoj sajra imas kasqanmanta?

⁸ Uj joven tatanwan tiyakusqanpi tʼukurina. Tatanqa wawanta munakusqanrayku allinta kausakuyta yachachin. Wawantajrí gustunta ruwayta munaspa, wasinmanta ripun. Ripuspataj chay jovenqa mana allinta kausasqanrayku imaymana problemaspi rikhurin. Ajina problemaspi rikhurisqanmanta, ¿tatanchu juchayoj kanman? (Lucas 15:11-13). Runaspis chay joven jinallataj Diosta mana kasuspa sajra imasta ruwanku. Diosninchej chay sajra imasta ruwanankuta saqejtinpis, mana paychu juchayoj sajra imas kasqanmantaqa. Chayrayku sajra ruwaykunata rikuspaqa, mana allinchu kanman Diosta juchachananchej.

⁹ Chanta, ¿imaraykú Dios sajra imas kananta saqenri? Imatachus chaymanta Biblia willasqanta, kay libroj 11 capitulonpi yachakusunchej. Jinapis amapuni qonqakunachu Diosninchej mayta munakuwasqanchejta. Payqa mana juchayojchu llakiypi kasqanchejmanta. Astawanpis Dioslla ima llakiytapis chinkachiyta atin (Isaías 33:2).

10. ¿Imaraykutaj Dioslla tukuy sajra ruwaykunata chinkachiyta atin?

¹⁰ Diosqa santo (Isaías 6:3). Tukuy ima ruwasqanqa llimphu, may sumajtaj. Chayrayku payqa ima nisqantapis juntʼanpuni. Runasrí mana jinachu kanku. Paykunaqa wakin kutis sajra imasta ruwanku. Aswan allin kajta ruwayta munaj gobiernospis, sajra ruwaykunataqa mana chinkachiyta atinkuchu. Paykunaqa mana Dios jina atiyniyojchu kanku, Dioslla tukuy atiyniyoj sajra imasta chinkachinanpajqa. Payqa sajra imasta wiñaypaj chinkachenqa (Salmo 37:9-11 leey).

11. ¿Diosninchej sonqonta nanachikunchu llakiykunapi kajtinchej?

¹¹ Diosqa llakiykunapi kajtinchej sonqonta nanachikun. Bibliaqa willawanchej, Diosqa ‘cheqan kajta munakusqanta’ (Salmo 37:28). Payqa allin ruwaykunata, sajra ruwaykunatapis qhawamushan. Runasta sufrejta rikuspataj mayta phutikun. Bibliaqa willawanchej, Diosqa ñaupa tiempopi ashkha sajra ruwaykunata rikuspa, ‘mayta sonqonta nanachikusqanta’ (Génesis 6:5, 6). Kunanpis Payqa kikillanpuni (Malaquías 3:6). Diosqa noqanchejmanta mayta llakikun (1 Pedro 5:7 leey).

12, 13. 1) ¿Imaynatataj Dios ruwawasqanchej? 2) ¿Diosninchej chinkachenqachu llakiykunata, sajra ruwaykunatapis?

¹² Biblia willallawanchejtaj, Diosqa payman rijchʼakojta ruwawasqanchejta (Génesis 1:26). Chayrayku noqanchejpis wajkunata munakunchej, sufrejta rikuspataj sonqonchej nanawanchej. Noqanchejpuni runasta sufrejta rikuspa sonqonchejta nanachikunchej chayqa, ¿nichu Diosqa astawanraj sonqonta nanachikunman?

¹³ Bibliaqa niwanchej “Diosqa munakuymin” kasqanta (1 Juan 4:8). Diosqa munakuywan tukuy imata ruwan. Pay munakuyniyoj kasqanrayku, noqanchejpis munakunchej. Sichus atiyniyoj kasunman chayqa, tukuy llakiykunata, sajra ruwaykunatapis chinkachisunman, ¿icharí? Jinapis Diosnillanchej tukuy atiyniyojqa. Paytaj mayta munakuwasqanchejrayku tukuy llakiykunata, sajra ruwaykunata ima chinkachenqa. Imastachus kay libroj qallariyninpi yachakorqanchej, chaykunatapis Diosqa ruwanqapuni. Chay imasta ruwanantapuni creenapajtaj, payta astawan rejsinanchej tiyan.

14. ¿Imataj Diospa sutin kasqa, chanta imajtintaj Diosninchej sutinta willawanchej?

¹⁴ Pillawanpis sumajta rejsinakunapajqa sutinchejta willanarikunchej. Diosninchejrí, ¿sutiyojchu kanman? Ashkha iglesiaspeqa yachachinku Diospa sutenqa “Tata Dios” chayri “Señor” kasqanta. Chaykunaqa mana sutischu kanku, manachayqa “alcalde” chayri “caballero” niy jinalla. Diosqa willawanchej sutenqa Jehová kasqanta (Romanos 10:13). Quechua de Cuzce nisqa Bibliapi Salmo 83:18 versículo nin: ‘Yachachunku qan, Jehová sutiyoj, qanlla Altísimo kasqaykita tukuy kay pacha patapi’, nispa. Bibliata qhelqajkunaqa, ashkha kutista Diospa sutinta Bibliaman churarqanku. Chayrayku Jehová Diosqa sutinta yachananchejta, oqharinanchejta ima munan. Payqa sutinta willawanchej payta rejsinanchejpaj.

15. ¿Diosninchej nisqanta juntʼanpunichu?

¹⁵ Diospa sutenqa mana mayqen suti jinallachu. Payqa tukuy ima nisqanta juntʼanpuni, imatachus ruwasaj nisqantapis ruwanpuni. Chayrayku paylla Jehová sutiyoj kayta atin.a

16, 17. 1) ¿Imaraykú nisunman Diosnillanchej “Tukuy Atiyniyoj” kasqanta? 2) ¿Imaraykú nisunman Dioslla “wiñaypaj wiñayninkama Rey” kasqanta? 3) ¿Pitaj tukuy imata ruwasqa?

¹⁶ Bibliaqa niwanchej: “Tukuy Atiyniyoj Jehová Dios, ruwasqasniykeqa jatuchaj, tʼukunastaj kanku. Wiñaypaj wiñayninkama Rey, ñankunasniykeqa cheqan kanku, cheqataj”, nispa (Apocalipsis 15:3). Dioslla ‘Tukuy Atiyniyojqa’. Paymanta nisqaqa mana pipis aswan atiyniyoj kanchu. Chantapis Jehová Dioslla ‘wiñaypaj wiñayninkama Reyqa’. Payqa unaymantapachañapuni karqa. Bibliaqa niwanchej Diosqa “wiñaymanta wiñaykama” kasqanta (Salmo 90:2). Chayqa tʼukunapaj jinapuni.

¹⁷ Tukuy imata ruwajpis Jehová Dioslla. Bibliaqa niwanchej: “Atiyniyoj Jehová Diosniyku, qanllamin jatunchanapaj jina, yupaychanapaj jinataj kanki, imaraykuchus qanmin tukuy imata ruwarqanki, munayniykiraykutaj tukuy imapis rikhurerqa, ruwasqataj karqa”, nispa (Apocalipsis 4:11). Diosninchejqa ruwarqa: angelesta, estrellasta, pescadosta, frutasta, tukuy imatapuni.

18. ¿Diosman qayllaykuyta atisunmanchu?

¹⁸ Wakin runasqa imaynachus Jehová Dios kasqanta yachaspa mancharikunku. Ninkutaj: “Diosqa may atiyniyoj, may jina patapitaj kashan, ¿imatá noqanchejmanta yuyarikunmanri?”, nispa. Diosninchejrí mana munanchu ajinata yuyananchejtaqa. Payqa ladonchejpi kayta munan. Bibliaqa niwanchej: “Payqa mana karupichu kashan sapa ujninchejmanta”, nispa (Hechos 17:27). Diosninchejqa munan payman qayllaykunanchejta, niwanchejtaj paypis qayllaykamunawanchejta (Santiago 4:8).

19. 1) ¿Imatá ruwasunman Diosman qayllaykunanchejpaj? 2) ¿Imaynataj Diosninchej kasqa?

¹⁹ ¿Imatá ruwasunman Diosman qayllaykunanchejpaj? Jesús nerqa: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17: 3). Bibliamanta yachakullasunpuni chayqa, Jehová Diostawan Jesustawan rejsisunchej, wiñay kausaytataj japʼisunchej. Ñaupaj parrafospi yachakorqanchej jina, “Diosqa munakuymin” (1 Juan 4:16). Mana chayllachu, Jehová Diosninchejqa “khuyakuyniyoj, kʼacha sonqoyoj, llampʼu sonqo, imamantapis mana usqhayta phiñarparikojlla, manachayqa khuyakuypeqa jatun, jinallataj cheqa kaypipis” (Éxodo 34:6). Chantapis Diosqa ‘kʼacha, perdonanapaj wakichisqa’ (Salmo 86:5), pacienciayoj (2 Pedro 3:9), cheqa sonqotaj (Apocalipsis 15:4). Bibliamanta yachakusqanchejman jinaqa, Diosninchej may kʼacha kasqanta reparasunchej.

20-22. 1) Diosta mana rikuspapis, ¿imaynatá payman qayllaykusunman? 2) ¿Imatá ruwawaj pillapis Bibliamanta manaña yachakunaykita munajtin?

²⁰ Chanta, ¿imaynatá Diosman qayllaykusunman payta mana rikuspari? (Juan 1:18; 4:24; 1 Timoteo 1:17).  Jehová Diosta mana rikuspapis, Bibliapi paymanta yachakullasunpuni chayqa, payta rikushasunmanpis jina kanqa (Salmo 27:4; Romanos 1:20). Diosmanta astawan yachakuspaqa, payta astawan munakusun, astawantaj payman qayllaykusun.

²¹ Chantapis reparasun Jehová Diosqa Tatanchej kasqanta (Mateo 6:9). Paymin kausayta qowarqanchej. Munantaj allinta kausakunanchejta, imaynatachus munakuyniyoj tataqa wawasnin allinta kausakunankuta munan, ajinata (Salmo 36:9). Bibliaqa willawanchej, Jehová Diospa amigosnin kayta atisqanchejta (Santiago 2:23). Tukuy imata ruwaj Diosqa amigosnin kananchejta munan. ¡Chaymá sumajqa!

²² Ichapis wakin runasqa mana munankumanchu iglesiaykimanta llojsipunaykita. Chayraykutaj nisunkuman manaña Bibliamanta yachakunaykita. Jinata nisojtinkupis, Jehová Diospa amigon kanaykipaj kallpachakullaypuni. Diospa amigon kayqa, imamantapis astawan sumaj.

23, 24. 1) Wakin imasta mana sumajta entiendespa, ¿imatataj ruwananchej kasqa? 2) ¿Imatá qhepan capitulopi yachakusunchej?

²³ Bibliata estudiasqanchejman jina, ichá wakin imastaqa mana entiendeyta atillasunchu. Chayrayku mana pʼenqakunanchejchu tiyan tapurikuytaqa. Jesusqa nerqa wawas jina llampʼu sonqoyoj kananchejta (Mateo 18:2-4). Wawasqa imatapis tapukuwanchejpuni. Diosqa imatachus yachayta munanchej chayta, sutʼita yachananchejta munan. Chayrayku Bibliataqa sumajta estudiananchej tiyan. Ajinamanta reparasunchej, yachakusqanchejqa cheqanpuni kasqanta (Hechos 17:11 leey).

²⁴ Jehová Diostaqa Bibliata sumajta estudiaspalla astawan rejsisunchej. Qhepan capitulopitaj yachakusunchej, Bibliaqa mana waj libros jinachu kasqanta.