Maykʼajchus parlanata yachana

 1. ¿Imatá Eclesiastés 3:7 yachachiwanchej?

WAKENQA ashkhata parlakunchej, wakintajrí pisillata. Kay yachaqanapaj ajllasqa versículo nisqanman jina, uj tiempo tiyan parlanapaj, uj tiempotaj chʼinlla kanapaj (Eclesiastés 3:7 leey). Ichá wakin kutis ninchej: “Kay hermanoqa anchata parlan, uj ratollatapis chʼinyanman”, nispa. Chayrí ninchej: “Munayman kay hermano astawan parlarinanta”, nispa.

 2. ¿Pitaj yachachiwasunman maykʼajchus, imaynatatajchus parlanata?

² Parlayta atisqanchejqa Jehová Diospa regalon (Éxo. 4:10, 11; Apo. 4:11). Chayrayku allinta parlananchejpaj Palabrannejta yachachiwanchej. Kay yachaqanapi yachakusun, maykʼajchus parlana kasqanta, maykʼajtajchus chʼinlla kakuna kasqanta. Chaypajtaj Bibliapi wakin runasmanta parlarisun. Chantá yachakullasuntaj, wajkunawan parlasqanchejta Jehová Dios qhawamusqantachus manachus, chayta. Ñaupajtaqa maykʼajchus parlanata yachakuna.

 3. Romanos 10:14 nisqanman jina, ¿maykʼajtaj Jehová Diosmanta, Gobiernonmantawan parlana kasqa?

³ Jehová Diosmanta, Gobiernonmantawan, ima ratollapis parlarina tiyan (Mat. 24:14; Romanos 10:14 leey). Chayta ruwaspaqa, Jesús jina ruwasunchej. Payqa nerqa Tatanmanta cheqa kajta parlaj jamusqanta (Juan 18:37). Jinapis imaynatachus wajkunawan parlasqanchejta qhawarikunanchej tiyan. Pillamanpis Jehová Diosmanta willarishaspaqa, “llampʼu sonqowan”, ‘chay runata sonqomantapacha jatunpaj qhawaspataj’ parlana. Chantapis imatachus yuyasqanta, creesqantapis respetana (1 Ped. 3:15). Ajinata predicaspaqa, mana qhasitachu parlasun. Astawanpis runasta yachachisun, ichá sonqonkumanpis chayasun.

 4. Proverbios 9:9 nisqanman jina, ¿parlasqanchej wajkunata yanapanmanchu?

⁴ Uj hermana chayri uj hermano yuyaycharinata necesitan chayqa, ancianosqa yuyaycharinanku tiyan. Jinapis sumajta qhawarikunanku tiyan, ima ratochus yuyaychanankuta. Ajinamanta chay hermanota chayri hermanata mana pʼenqaypi rikhurichinankupaj. Chaypajtaj ichá sapallanpi yuyaycharinanku kanqa. Ancianosqa pitapis yuyaychashaspa, allin kajta ruwananpaj Bibliaj nisqanta rikuchinanku tiyan. Jinapis mana kʼumuykachachispalla yuyaychananku tiyan (Proverbios 9:9 leey). Wakin kutisqa, noqanchejpis mana manchachikuspa parlananchej tiyan. ¿Maykʼajtaj ajinata parlananchej tiyan? Chayta yachanapaj, ñaupa tiempopi iskay runasmanta parlarisun. Ujnenqa wawasninpa sajra ruwasqasninkuta qhawakullarqa. Ujnintajrí rey kananpaj ajllasqa runawan, mana manchachikuspa parlarqa.

 5. 1) ¿Imastataj Elij wawasnin ruwaj kanku? 2) ¿Imatataj Elí ruwanan karqa?

⁵ Kuraj kaj sacerdote Eliqa, iskay qhari wawasninta mayta munakorqa. Chay wawasnintaj, Jehová Diosta mana jatunpajchu qhawarqanku. Paykunaqa Diosta yupaychana toldopi sacerdotes karqanku. Cargonkuman atienekuspataj, Jehová “Diosman qosqa qʼolachinasta mana jatumpajchu qhawaj kanku”. Chantapis mana pʼenqakuspa warmiswan khuchichakorqanku (1 Sam. 2:12-17, 22). Moisespa Leynin nisqanman jina, Elij wawasnenqa wañuchisqa kananku karqa. Jinapis Eliqa wawasninta tumpallata kʼamerqa, sacerdotes kanankutataj saqellarqa (Deu. 21:18-21). Jehová Dios, ¿Elij ruwasqanta allinpajchu qhawarqa? Mana. Payqa Eliman nerqa: “Imaraykutaj churisniykita noqamanta nisqaqa aswan jatumpaj qhawanki”, nispa. Chantapis Jehová Diosqa, chay wawasnin wañunankuta nerqa (1 Sam. 2:29, 34).

 6. ¿Imatá ruwasunman mana Elí jina kanapaj?

⁶ ¿Imatá ruwasunman mana Elí jina kanapaj? Amigonchej chayri familiarninchej Diospa contranpi juchallin chayqa, paywan parlarinanchej tiyan. Paywan parlashaspaqa, Jehová Diospa sonqonta nanachisqanta reparachina. Chantá ancianospa yanapanta mañakunanta nina. Mana ancianoswan parlaj rejtintaj, noqanchej ancianoswan parlamuna (Sant. 5:14). Ni jaykʼaj Elí jina kayta munasunmanchu. Chayrayku ama amigonchejta chayri familiarninchejta, Jehová Diosmanta nisqa aswan jatunpaj qhawanachu. Pillapis pantashan chayqa, mana manchachikuspa paywan parlarina. Chayta ruwaspaqa, payta yanapasun. Qhepan parrafospi, Abigailmanta yachakusun. Payqa mana Elí jinachu karqa.

 7. ¿Imaraykutaj Abigail Davidwan parlaj rerqa?

⁷ Abigailqa Nabalpa warmin karqa. Qosanqa may qhapaj, ashkha jallpʼasniyojtaj karqa. David runasninwan rey Saulmanta ayqekushajtin, Nabalpa ovejasninta, ovejerosnintawan suwasmanta jarkʼarqa. Nabaltaj mana chaymanta Davidman agradecekorqachu. ¿Imaynatá chayta yachanchej? Uj pacha, Davidqa wakin runasninta Nabalman kacharqa, yakuta mikhunatawan qorichikunankupaj. Nabaltajrí chay runasta qhapariykorqa, phiña simiwantaj kuticherqa (1 Sam. 25:5-8, 10-12, 14). Chayrayku Davidqa Nabalpa ayllunmanta tukuy qharista wañuchinanta nerqa (1 Sam. 25:13, 22). Jinapis Nabalpa warmin Abigailqa, chay runasta wañuymanta salvarqa. Payqa mana chʼinllachu kanan kasqanta yacharqa. Chayrayku mana manchachikuspa, Davidwan 400 runasninwan ima parlaj rerqa. Chay runasqa armasqas, rabiasqas, yarqhasqastaj kasharqanku.

 8. ¿Imatataj Abigail ruwasqanmanta yachakusunman?

⁸ Abigailqa mana manchachikuspa Davidwan parlarqa. Chantapis respetowan, kasuchikunanpaj jinataj kʼacha simiwan parlarqa. Abigailqa Nabalpa ruwasqanmanta mana juchayoj kajtinpis, Davidmanta perdonta mañakorqa. Chantá Davidta nerqa kʼacha runa kasqanta, cheqan kajtapunitaj ruwasqanta. Chantapis Jehová Dios yanapananpi atienekorqa (1 Sam. 25:24, 26, 28, 33, 34). ¿Imatá Abigailmanta yachakusunman? Pitapis juchapi urmananpaj jinaña kashasqanta rikunchej chayqa, mana manchachikuspa paywan parlarina (Sal. 141:5). Chantá sutʼita, respetowantaj parlana. Hermanonchejta munakuywan yuyaychaspaqa, sumaj amigon kasqanchejta rikuchisun (Pro. 27:17).  

9, 10. ¿Imaynatataj ancianos hermanosta yuyaycharinanku kasqa?

⁹ Uj hermano juchaman urmananpaj jinaña kashan chayqa, ancianosqa mana qhawakunallankuchu tiyan (Gál. 6:1). Ancianosqa kʼumuykukoj sonqo kasqankurayku, paykunapis pantaj runas kasqankuta yachanku. Chayrayku yachanku, maykʼajllapis pantaspa yuyaychanata necesitanankuta. Jinapis mayqen hermanollatapis juchanta reparachina kajtenqa, reparachinkupuni (2 Tim. 4:2; Tito 1:9). Ancianosqa hermanosta pacienciawan, sumajta yachachispataj yuyaycharinankupaj kallpachakunku. Tukuy hermanosta munakusqankurayku, paykunata yanapayta munanku (Pro. 13:24). Jinapis astawanqa, Jehová Diosta jatunchayta munanku. Chayrayku Jehovaj kamachiykunasninta respetachinku, congregaciontataj sajra kajmanta jarkʼanku (Hech. 20:28).

¹⁰ Kaykama yachanchejña maykʼajchus parlana kasqanta. Jinapis wakin kuteqa chʼinlla kakuna tiyan. Qhepan parrafospi yachakusun, ima kutispichus chʼinlla kana kasqanta.

11. 1) ¿Ima kikinchaytataj Santiago churarqa? 2) ¿Imaynatá yanapawanchej Santiagoj kikinchaynin?

¹¹ Wakin kutisqa, parlashaspa pantanchejpuni. Santiago librota qhelqajqa, chayta uj kikinchaywan sutʼincharqa. Pay nerqa: “Pillapis parlasqanpi mana pantanchu chayqa, chaymá mana juchayoj runaqa, tukuy cuerponwantaj kasuchikuyta atin. Sichus caballoswan kasuchikunapaj siminkuman frenota churanchej chayqa, tukuynin cuerponkutapis apaykachayta atinchej”, nispa (Sant. 3:2, 3). Caballopi purejkunaqa, caballoj siminman uj frenota churanku. Chaymanta japʼispataj, maymanchá munanku chayman caballota purichinku chayri sayachinku. Caballopi purej, frenota kacharpanman chayqa, caballoqa correyta qallarispa imatapis ruwakunman, chayri payta choqarpanman. Ajinallataj kanman parlasqanchejwanpis. Mana yuyaychakuspalla parlarparisunman chayqa, ashkha problemasta rikhurichisunman. Chayrayku yachakusun, maykʼajchus ‘siminchejman frenota churana’ kasqanta.

12. ¿Maykʼajtaj ‘siminchejman frenota churana’?

¹² Ichá uj hermano chayri uj hermana imallatapis yachan, chay yachasqantataj sonqollanpi waqaychanan tiyan. Imatachus chay kutispi ruwanata yachakuna. Ichapis uj hermanoqa, maypichus autoridades niña predicajta, nitaj tantakojta saqenkuchu, chay lugarpi tiyakun. Chay jina hermanota rejsispa, ¿allinchu kanman tapurinanchej, imaynatachus chay lugarmanta hermanos Diosta yupaychashasqankuta? Ichapis chayta tapuriyta munasunman, hermanosninchejmanta llakikusqanchejrayku. Imaraykuchus hermanosninchejta munakunchej. Chantapis paykunapaj mañapuyta munanchej. Chaywanpis chay kutispeqa, ‘siminchejman frenota churana’ tiyan. Uj hermanomanta imatachus yachasqanta orqhoytapuni munasunman chayqa, mana chay hermanota munakushasunmanchu. Nillataj munakushasunmanchu, pikunachus chay hermanopi atienekunku chaykunata. Jehovaj testigosninta prohibinku chay lugarespi tiyakoj hermanosqa, ashkha llakiykunasniyojña kanku. Noqanchejtaj mana paykunaman astawan llakiyta yapayta munasunmanchu. Chay lugarespi tiyakoj hermanospis, imaynatachus predicasqankuta chayri Jehová Diosta yupaychasqankuta, manallataj pimanpis willanankuchu tiyan.

13. Proverbios 11:13 nisqanman jina, ¿imatataj ancianos ruwananku kasqa, chanta imaraykutaj?

¹³ Ancianosqa Proverbios 11:13 (leey) nisqanta kasukunanku tiyan. Chaytataj ruwanku, mana wajkuna yachanankuchu tiyan chay imasta sonqollankupi waqaychaspa. Jinapis señorayoj kajkunapajqa, ichá mana atikullanchu. Casarasqa kajkunaqa, imatachus yuyasqankuta, imaynachus kashasqankuta, llakiyninkutapis willarinakuytapuni yachanku. Jinapis ancianosqa, imastachus hermanoswan parlasqankuta, mana pimanpis willarparinallankuchu tiyan. Chayta ruwankuman chayqa, hermanosqa niña paykunaman imatapis willankumanchu. Chantapis niña allinpajchu qhawasqa kankuman. Ancianosqa atienekunapaj jina kananku tiyan. Chayrayku “mana puraj uyaschu” kananku tiyan, nisunman “mana parlayninkuwan chʼaukiyajkunachu” kananku tiyan (1 Tim. 3:8, sutʼinchaynin). Chayrayku paykunaqa mana pitapis engañankuchu, nitaj cuento qʼepischu kanku. Señoranta munakoj ancianoqa, mana payman willanchu imastachus mana yachananchu tiyan chayta.

14. ¿Imatá uj ancianoj señoran ruwanman qosan allinpaj qhawasqa kanallanpajpuni?

¹⁴ Uj ancianoj señoranqa, qosanta yanapanman allinpaj qhawasqa kanallanpajpuni. Chaytataj ruwanman, imatachus qosan mana pimanpis willananchu tiyan, chayta mana willachikuspa. Ajinamanta qosanta yanapanqa, qosanpi atienekoj hermanostapis respetanqa. Chantapis congregacionpi hermanosta yanapanqa allinta kausakunankupaj, ujchasqataj kanankupaj. Chaytaj Jehová Diosta mayta kusichin (Rom. 14:19).

15. ¿Imaynatá Jehová Dios qhawarqa Elifaz, Bildad, Zofar ima ruwasqankuta?

¹⁵ Job libropeqa, maykʼajchus parlanata, imatachus ninatapis yachakusunman. Jobtaqa ashkha llakiykuna qhatirerqa. Chayraykutaj Elifaz, Bildad, Zofar, Elihú ima, Jobta sonqocharej, yuyaycharejtaj rerqanku. Ashkha diasta chʼinlla kaytawan, Elifaz, Bildad, Zofar ima, Jobta parlapayarqanku. Wakin imasta maychus kajllata nispapis, Jehovamanta, Jobmantapis mana cheqantachu parlarqanku. Nitaj Jobta munakusqankuta rikucherqankuchu. Astawanpis mana khuyarikuspa juchacharqanku. Paykunaqa chʼinlla kashaspa Jobta yanapaypi piensanankumantaqa, juchachayllapi piensasqanku (Job 32:1-3). ¿Imaynatá Jehová Dios chay ruwasqankuta qhawarqa? Payqa chay runaspaj mayta phiñakorqa, sonso runas kasqankutataj nerqa. Chantá paykunaman nerqa: “Kamachiy Jobqa qankunarayku noqamanta mañapusonqachej”, nispa (Job 42:7-9).

16. Elifaz, Bildad, Zofarwan imatachus ruwasqankumanta, ¿imastá yachakunchej?

¹⁶ Elifaz, Bildad, Zofarwan imatachus ruwasqankumanta, kinsa imasta yachakunchej. Ñaupaj kaj, ama hermanosninchejta juzganachu (Mat. 7:1-5). Astawanpis niraj parlashaspa, hermanonchejta allinta uyarina. Chayta ruwaspaqa imaynachus kashasqanta yachasun (1 Ped. 3:8). Iskay kaj, hermanonchejwan parlashaspaqa, kʼacha simiwan, cheqa kajtataj parlana (Efe. 4:25). Kinsa kaj, Jehová Diosqa imaynatachus wajkunawan parlasqanchejta qhawamushan.

17. ¿Imatá Elihumanta yachakunchej?

¹⁷ Jobta waturikoj rejkunamanta ujqa, Elihú karqa. Payqa Abrahanpa mirayninmanta karqa. Job, Elifaz, Bildad, Zofar ima parlashajtinku, Elihuqa chʼinsitumanta uyarerqa. Tawantinkuta sumajta uyarisqanrayku, Jobta khuyakuywan yuyaycharqa, yuyayninmantaj kutiricherqa (Job 33:1, 6, 17). Elihuqa Jehová Dios jatunchasqa kananta munarqa. Chayrayku mana mayqen runatapis jatuncharqachu, nitaj paypis jatunchasqa kayta maskʼarqachu (Job 32:21, 22; 37:23, 24). Elihumanta yachakunchej, uj tiempo kasqanta chʼinlla uyarinapaj (Sant. 1:19). Chantá yachakullanchejtaj, pitapis yuyaychashaspaqa Jehová Diosta jatunchananchej kasqanta, manataj noqanchejtachu.

18. ¿Imaynatá Jehová Diosman agradecekusunman parlayta atisqanchejmanta?

¹⁸ Yachanchej jina, parlayta atisqanchejqa Jehová Diospa regalon. Paytaj Palabranpi yachachiwanchej, maykʼajchus imaynatatajchus parlanata. Chayta kasukuspaqa, chay regalomanta agradecekusunchej. Yachayniyoj rey Salomonqa, Dios yuyaychasqanrayku ajinata qhelqarqa: “Maychus tiempompi uj palabrata nisqaqa qolqewan tʼikanchasqa qori manzana jina”, nispa (Pro. 25:11). Sichus wajkunata sumajta uyarisun, niraj parlashaspataj allinta piensarisun chayqa, parlasqanchejqa qori manzana jina kanqa, manchay kʼachitu, may valorniyojtaj. Ajinamantataj anchata chayri pisillata parlaspapis, wajkunata kallpachanapaj jina parlasun, Jehová Diostataj kusichisun (Pro. 23:15; Efe. 4:29). Chantapis parlayta atisqanchejmanta Jehová Diosman agradecekusun.