Levítico libropi yachakunchej imaynatachus wajkunata qhawanata

1, 2. 1) ¿Imatá ñaupaj yachaqanapi yachakorqanchej? 2) ¿Imatá kay yachaqanapi yachakusun?

ÑAUPAJ yachaqanapi yachakorqanchej Levítico 19 capitulomanta wakin sumaj yuyaychaykunata. Levítico 19:3 versiculopeqa Jehová israelitasta kamacherqa, tatasninkuta jatunpaj qhawanankuta. Chaymantataj yachakorqanchej tatasninchejta necesitasqankupi yanapananchejta, Diosman astawan qayllaykunankupaj yanapananchejta, kallpacharinanchejta ima. Chay versiculollapitaj Diosqa llajtanman yuyaricherqa samarikuna pʼunchayta ruwanankutapuni. Noqanchejqa manaña chay leyman jinachu kausakojtinchejpis, yachakorqanchej tiempochakunanchej kasqanta Diospa ruwanasninchejta ñaupajman churananchejpaj. Ajinamanta Levítico 19:2 chantá 1 Pedro 1:15 nisqanman jina, llimphus kanapaj mayta kallpachakushasqanchejta rikuchisun.

² Kay yachaqanapeqa Levítico 19 capitulomanta astawan yachakusun. Kay capituloqa yanapawasun mana sano runasta allinpaj qhawanapaj, negociosta ruwaspa maychus kajta ruwanapaj chayri honrados kanapaj, runa masinchejta munakunapajtaj. ¿Imastawantaj ruwasunman Dios jina llimphus kanapaj?

3, 4. Levítico 19:14 nisqanman jina, ¿imaynatá israelitas joqʼara runasta, cieguitosta ima qhawananku karqa?

³ (Levítico 19:14 leey). Jehovaqa munarqa kamachisnin mana sano runasta allinpaj qhawanankuta. Jehovaqa israelitasman nerqa ama uj joqʼara runata maldecinankuta imapis pasarpananpaj chayri mana allin rinanpaj. Chayta ruwaspaqa nipuni allintachu ruwankuman karqa. Imajtinchus joqʼara runaqa, imatachus nisqankuta mana uyarispa mana kutichikuyta atinmanchu karqa.

⁴ Chantapis Levítico 19:14 versiculopi, Diosqa israelitasman nerqa ama uj ciego runaj ñaupaqenman imatapis urmananpaj churanankuta. Uj libropi mana sano runasmanta parlaspa nin: “Israel kasharqa chay lugarpi runasqa, mana sano runasmanta aprovechakoj kanku, sufrichejtaj kanku”, nispa. Ichapis uj runaqa uj ciego runaj ñaupaqenman imatapis churanman urmachinanpaj chayri asikunanpaj. ¡Chayta ruwaj runaqa manchay sajrapuni! Jehovaqa 14 versiculopi nisqanwan llajtanta yanaparqa, mana sano runasta khuyakuyta yachanankupaj.

 5. ¿Imaynatá mana sano runasta khuyakusunman?

⁵ Jesusqa mana sano runasta khuyakorqa. Payqa Juan Bautistaman ajinata willacherqa: “Ciegos rikunku, suchus puririnku, lepra onqoyniyojkuna sanoyachisqa kanku, joqʼaras uyarinku, wañusqas kausarimunku”, nispa. Jesusta milagrosta ruwasqanta rikuspataj tukuy runas Diosta jatuncharqanku (Luc. 7:20-22; 18:43). Cristianosqa Jesús jina, mana sano runaswan kʼachas kanchej, paykunata khuyakunchej, pacienciakunchejtaj. Jehovaqa mana atiyta qowanchejchu Jesús jina milagrosta ruwanapaj. Jinapis tukuy runasman, cieguitosman, Diosta mana rejsejkunaman ima willayta atinchej uj kʼacha paraíso kananmanta. Chaypeqa niña pipis onqonqachu, tukuytaj Jehovaj amigosnin kanqanku (Luc. 4:18). Chay willayta uyarispa ashkha runasña Diosta jatunchashanku.

 6. ¿Imaynatá Levítico 19 Chunka Kamachiykunata aswan allinta entiendenapaj yanapawanchej?

⁶ Levítico 19 capitulomanta wakin versiculosqa, waj imastawan sutʼinchan. Chaytaj yanapawanchej Chunka Kamachiykunata astawan entiendenapaj. Pusaj kaj kamacheyqa “ama suwakunkichu” nillan (Éxo. 20:15). Chayrayku uj runaqa ichá yuyanman chay kamachiyta kasukunanpaj, mana wajkunaj imasninta oqharikunan kasqanta. Jinapis waj imasta ruwaspa suwakushanman.

 7. ¿Imata ruwaspataj uj ranqhero pusaj kaj kamachiyta mana juntʼashanmanchu karqa?

⁷ Ichapis uj ranqheroqa nej: “Noqaqa mana suwakunichu. Imajtinchus ni jaykʼaj ni pejpa imantapis oqharikunichu”, nispa. Jinapis negocionpi, ¿maychus kajtapunichu ruwaj? Jehová Diosqa Levítico 19:35, 36 versiculospi nerqa: “Maychus kajta ruwankichej imallatapis midishaspa chayri pesashaspa. Balanzasniykichejqa cabal kanan tiyan, jinallataj pesasniykichejpis cabal kanan tiyan. Chʼaki mikhuy midinasniykichejpis cabal kanan tiyan, jinallataj yaku midinasniykichejpis cabal kanan tiyan”, nispa. Uj comerciante chayri uj ranqhero runasta engañananpaj mana cabal balanzapi chayri mana cabal midinapi vendespaqa suwakusharqaña. Levítico 19 capituloj waj versiculosninta estudiaspa, chayta aswan sutʼita entiendenchej.

 8. 1) ¿Imaynatá Levítico 19:11-13 nisqan judiosta yanaparqa pusaj kaj kamachiyman jina ruwanankupaj? 2) ¿Imaynatá Levítico 19:11-13 noqanchejtapis yanapawanchej?

⁸ (Levítico 19:11-13 leey). Levítico 19:11 “ama suwakunkichejchu” nispa qallarin. 13 versiculotaj nin: “Ama runa masiykita chʼaukiyankichu”, nispa. Chayrayku uj ranqheroqa mana maychus kajta ruwaspa suwakushanña. Pusaj kaj kamachiypeqa nerqa mana suwakunata. Jinapis Levítico libro waj imastawan sutʼinchasqanqa, judiosta yanaparqa chay yuyaychayman jina tukuy imata ruwananku kasqanta entiendenankupaj. Jehovaqa suwakuyta, mana maychus kajta ruwaytapis mana allinpajchu qhawan. Chaypi piensareyqa mayta yanapawasunman. Levítico 19:11-13 nisqanman jina, negocionchejpi chayri trabajonchejpi, ¿imaspitaj cambiananchej kanman?

 9. Levítico 19:13 versiculopi imatachus nisqan, ¿imaynatataj Israelpi peonesta yanaparqa?

⁹ Negocioyoj cristianosqa waj imaspipis maychus kajllatataj ruwananku tiyan, chayri honrados kananku tiyan. Levítico 19:13 versiculoqa “ama peonniykej pagonta qʼayantinkama japʼikapunkichu” nispa tukuchan. Israelpeqa casi tukuy runas astawan chajrapi trabajaj kanku. Peonesmantaj chay diapacha niraj inti yaykupushajtin pagapuna kaj. Imaraykuchus peonesqa, chay día trabajasqankuwan familiankuta mikhuchej kanku. Chayrayku mana pagonkuta japʼispaqa, ni imawan familiankuta mikhuchiyta atejchu kanku. Jehovaqa sutʼita nerqa: “Payqa llakiypi kashan, chay qolqetataj suyashan kausakunanpaj”, nispa (Deu. 24:14, 15; Mat. 20:8).

10. ¿Imatá yachakunchej Levítico 19:13 versiculomanta?

¹⁰ Kay tiempopi ashkha runasqa, mana sapa diachu sueldonkuta cobranku. Manaqa killapi ujta chayri iskayta cobranku. Jinapis imatachus Levítico 19:13 yuyaychasqanqa yanapallawanchejpuni. Ashkha runasqa peonesninkuman chayri empleadosninkuman, mana mashkhatachus pagananku kasqantachu pagapunku. Imaraykuchus paykunaqa yachanku pisisituta pagajtinkupis, necesitasqankurayku paykunapaj trabajanallankutapuni. Chay runasqa chayta ruwaspa, empleadosninkoj chayri peonesninkoj sueldonkuta qʼayantinkamapis japʼikapushankuman jina ruwashanku. Uj cristiano negocionpi empleadosniyoj chayqa, allinta qhawarikunan tiyan empleadosninman imaynatachus pagapushasqanta. Astawan qhawarinallapuni imastawanchus Levítico 19 capitulomanta yachakuyta atisqanchejta.

11, 12. Levítico 19:17, 18 versiculosta oqharispa, ¿imatataj Jesús sutʼita rikucherqa?

¹¹ Jehovaqa sutʼita niwanchej runa masinchejta ama sufrichinata. Chaytataj sutʼita reparanchej Levítico 19:17, 18 (leey) versiculospi. Chaypeqa nin: “Runa masiykitaqa munakunki qan kikiykita jina”, nispa. Uj cristiano Diosta kusichiyta munan chayqa, chayta ruwananpuni tiyan.

¹² Jesusqa uj fariseoman imatachus kutichisqanpi, sutʼita rikucherqa Levítico 19:18 versiculopi kamachiyta kasukunanchejpuni kasqanta. Uj pacha uj fariseo Jesusta taporqa: “¿Mayqen kamachiytaj Leymanta aswan kurajri?”, nispa. Jesustaj kuticherqa: “‘Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj’. Chaymin aswan kuraj, ñaupaj kaj kamachiytaj”, nispa. Chaymantataj Levítico 19:18 versiculota oqharispa nerqa: “Iskay kajtaj ñaupaj kajman rijchʼakullantaj: ‘Runa masiykita munakunayki tiyan qan kikiykita jina’”, nispa (Mat. 22:35-40). Runa masinchejtaqa ashkha imaynasmanta munakusunman. Levítico 19 capitulopitaj chaymanta wakinta qhawarisun.

13. ¿Imaynatá Josej kausaynin yanapawanchej Levítico 19:18 nisqanta astawan sutʼita entiendenapaj?

¹³ Runa masinchejtaqa munakunchej, Levítico 19:18 versiculoj nisqanta kasukuspa. Chaypi nin: “Ama runa masiykimanta vengakunkichu, nitaj chejnikunkichu”, nispa. Ichá pillatapis rejsinchej trabajonmanta chayri escuelanmanta compañeronpaj, manachayrí mayqen familiarninpajpis phiñasqallapuni kashasqanta. Wakenqa watasta ajina phiñasqallapuni purinku. Josemanta parlarina. Paytaqa chunka hermanosnin chejnikusqankurayku mayta sufricherqanku (Gén. 37:2-8, 25-28). Jinapis payqa mana hermanosninmanta vengakorqachu. Payqa atiyniyojña kaspa atinman karqa hermanosninmanta vengakuyta. Jinapis mana chayta ruwarqachu, astawanpis paykunamanta khuyakorqa. Paykunapaj phiñasqa kananmanta chayri chejnikunanmantaqa, imatachus Levítico 19:18 ruwananchejta niwanchej chayta ruwarqa (Gén. 50:19-21).

14. ¿Imajtintaj kasukunallanchejpuni tiyan Levítico 19:18 versiculoj nisqanta?

¹⁴ Diosta kusichiyta munaj cristianosqa, José jina ruwananchej tiyan. Vengakunamanta chayri wajkunapaj phiñakunamantaqa perdonananchej tiyan. Jesusqa chaytapuni nerqa discipulosninman orakuyta yachachishaspa. Payqa nerqa contranchejpi juchallikojkunata perdonananchejta (Mat. 6:9, 12). Apóstol Pablopis cristianosman yuyaychallarqataj: “Munasqa hermanosníy, ama ima sajramantapis pagachikuychejchu”, nispa (Rom. 12:19). Chantá nillarqataj: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej”, nispa (Col. 3:13). Jehová Diospa yuyaychaykunasnenqa mana cambianchu. Levítico 19:18 versiculopi rikhurej leyqa, Jehovaj yuyaychaykunasninman jina sayarichisqa karqa. Kay tiempopitaj chay yuyaychaykunasninta kasukunallanchejpuni tiyan.

15. ¿Ima kikinchaytaj yanapawanchej imaraykuchus wajkunata perdonananchejpuni kasqanta entiendenapaj?

¹⁵ Pillapis sonqonchejta nanachiwasqanchejqa, uj herida jina. Wakin kutisqa tumpalla kanman, wakin kutistaj sinchʼi kanman. Kaypi piensarina. Ichapis waykʼushaspa makinchejta tumpata khuchurpakusunman. Qallariypeqa ichá mayta nanawasunman. Jinapis uj mashkha dianmanqa sanoyapunman. Niñataj reparasunmanchu maynejtachus khuchuykukusqanchejta. Ajinallatataj mayqen amigonchej mana allinta piensaspalla imata nispa chayri ruwaspa phiñachiwasunman, chayri sonqonchejta nanachiwasunman. Jinapis mana anchachu kasqanrayku payta perdonayta atillasunman. Jinapis jatunta khuchuykukuspa chayri jatun heridata ruwaykukuspaqa, doctorman rispa jampichikunchej. Chay heridata tʼojpillasunmanpuni chayqa, astawan infectaykuchisunman. Ajinallatataj noqanchejpis phiñasqallapuni kaspaqa, heridanchejtapis tʼojpishasunman jina kanman. Pillapis sonqonchejta nanachiwasqallanchejpi chayri imatapis ruwawasqallanchejpi piensaspaqa, sonqollanchejta astawan nanachikusunman. Chayrayku may sumajpuni Levítico 19:18 nisqanta kasukunanchej.

16. Levítico 19:33, 34 nisqanman jina, ¿imaynatataj israelitas forasterosta qhawananku karqa, imatá chaymanta yachakunchej?

¹⁶ Jehová israelitasman runa masinkuta munakunankuta nispaqa, mana israelitaspuralla munanakunankutachu nisharqa. Paykunamanqa nisharqa paykunawan tiyakoj forasterostapis munakunallankutataj. Chaytaqa Levítico 19:33, 34 (leey) sutʼita nin. Israelitasqa ‘forasterosta llajta masinkuta jina qhawananku karqa, paykuna kikinkuta jinataj munakunanku karqa’. Paykunaqa chajrankuta mana tukuynintachu ruthunanku karqa, tʼakasqankutapis mana oqharinankuchu karqa. Ajinamanta wajcha runaswan forasteroswan pallakunankupaj (Lev. 19:9, 10). Kay tiempopipis cristianosqa forasterosta munakunallanchejtaj tiyan (Luc. 10:30-37). Mundontinpi may chhika runasqa tukuy ladoman tiyakoj ripunku. Paykunamanta wakintaj ichapis wasinchej chaynejman jampunku. Paykunataqa munakunanchejpuni tiyan, respetananchejpunitaj tiyan.

17, 18. 1) ¿Imatá yuyaychawanchej Levítico 19:2 chanta 1 Pedro 1:15? 2) ¿Ima sumaj llankʼaymantataj apóstol Pedro parlarqa?

¹⁷ Bibliapeqa Levítico 19:2 chantá 1 Pedro 1:15 yuyaychawanchej Jehovata sirvejkunaqa llimphus kananchejta. Levítico 19 capitulomanta waj versiculospis rikuchillawanchejtaj imastachus Jehová Diosta kusichinapaj ruwananchej kasqanta. Kaykamaqa chay capitulomanta wakin versiculosllata ukhuncharinchej. Chaypitaj yachakunchej imastachus ruwananchej kasqanta, imastatajchus mana ruwananchejchu kasqanta.b Griego Qhelqasqastaj sutʼita rikuchiwanchej, imastachus Jehová Levítico 19 capitulopi yuyaychasqanta kasukunallanchejpuni kasqanta. Jinapis apóstol Pedroqa waj imamantawan parlarqa.

¹⁸ Cristianosqa Jehovata tukuy imaymanamanta sirvinapaj, wajkunata yanaparinapaj ima mayta kallpachakunchej. Jinapis Pedroqa uj imamantawan parlarqa. Payqa cristianosman llimphus kanankuta niraj nishaspa, kayta nerqa: “Yuyayniykichejta ruwanapaj wakichiychej”, nispa (1 Ped. 1:13, 15). ¿Ima ruwaymantataj parlasharqa? Payllataj nerqa ajllasqa cristianosqa, Diospa kʼacha kayninmanta tukuynejpi willanankuta (1 Ped. 2:9). Kay tiempopitaj tukuyninchej yanapakuyta atinchej chay sumaj llankʼaypi. Chaytaj tukuy imamanta nisqa runasta astawan yanapan. Jehová Diospa llimphu llajtanpi predicaspa, runasman yachachispa ima tukuy atisqanchejta kusiywan yanapakoyqa, may sumajpuni (Mar. 13:10). Chayrayku tukuy atisqanchejta kallpachakuna Levítico 19 capitulopi yuyaychaykunata kasukunapaj. Ajinamanta rikuchisun Jehová Diosninchejta, runa masinchejtapis munakusqanchejta, tukuy ima ruwasqanchejpitaj llimphus kayta munasqanchejta.