Bibliata leespa gustachikuna

Kaypi piensariy, uj jatun jallpʼata barbechanayki kashan. Qhawarispaqa mana yachankichu maymantachus qallarinaykita. Chantapis mana tukuyta atinaykipaj jina qhawanki. Jinapis pisimanta pisi ruwanki chayqa, tukuyta atiwaj. Bibliata leeywanpis kikillantaj. Ichapis Bibliata qhawarispa ninki: “¿Maykʼajtaj leeyta tukuymanri? ¿Maymantá qallariymanri?”, nispa. Kay leccionqa yanapawasun Bibliata leespa, estudiaspa ima gustachikunapaj.

1. ¿Imaraykutaj sapa día Bibliata leenanchej tiyan?

“Jehová Diospa leyninta”, nisunman Bibliata sapa día leespaqa, kusisqa kasun, allintaj riwasun (Salmo 1:1-3 leey). Qallarinapajqa sapa día uj chhikanta leerisunman. Diospa Palabranta astawan rejsispaqa, Bibliata astawan leeriyta munasun.

2. ¿Imatá ruwasunman Bibliata leesqanchej yanapanawanchejpaj?

Bibliata leesqanchej sumajta yanapanawanchejpajqa, mana leenallanchejchu tiyan, manaqa chay ‘leesqanchejpi tʼukurinanchej’ tiyan (Josué 1:8). Bibliata leeshaspaqa, kay tapuykunapi piensariy: “¿Imatá kay versículos Jehová Diosmanta yachachiwan? ¿Imaynatá kausayniypi yanapawanman? ¿Imaynatá kay versiculoswan wajkunata yanapariyman?”.

3. ¿Imatá ruwasunman Bibliata sapa día leenapaj?

Ashkha runasqa Bibliata leenankupaj mana tiempochakuyta atillankuchu. Jinapis Bibliaqa nin: “Tiempota rantikuychej”, nispa (Efesios 5:16, sutʼinchaynin). Chayqa niyta munan Bibliata sapa día leenapaj tiempota orqhokuna kasqanta. Wakenqa tutamanta rijchʼariytawan Bibliata leerinku. Wakintajrí pʼunchay leerinku ichapis mikhunankupaj samarishaspa. Wakintajrí chʼisisnin Bibliata leerinku niraj puñukapushaspa. Qanpis ima ratochus Bibliata leerinaykipi piensariwaj.

ASTAWAN YACHAKUNA

4. Bibliata leespa gustachikuna

Ichapis wakin mikhunastaqa ñaupajta mana munajchu kanchej. Jinapis kunanqa gustawanchej. Ajinallataj Bibliata leeywanpis. Bibliata leey mana gustawajtinchejpis, gustachikuyta atisunman. 1 Pedro 2:2 leeriychej, chantá yachakojta tapuriy:

• ¿Sapa día Bibliata leespa gustachikusunmanchu?

Wakin jovenesqa Bibliata leespa gustachikorqanku. Imaynatachus chayta ruwasqankuta yachanapaj VIDEOTA qhawariychej, chantá yachakojta tapuriy.

VIDEO: Diospa Palabranta munakoj jóvenes (5:33)

• Kay videopi rikorqanchej chay jóvenes, ¿imaraykutaj mana Bibliata leeyta atillajchu kasqanku?

• ¿Imatataj paykuna ruwarqanku Bibliata leenankupaj?

• ¿Imatataj paykuna ruwarqanku Bibliata leeywan gustachikunankupaj?

Bibliata leenaykipaj kayta ruway:

• Entiendeyta atinaykipaj jina Bibliata ajllay. Mosoj Jallpʼapi Kausajkunapaj Diospa Palabran Bibliata leeriwaj.

• Gustasusqan cheqasta ñaupajta leeriy. Chaypajqa “Bibliata leeyta qallarinapaj yanapa” nisqawan yanapachikuy. Chaytaj kashan kay libroj qallariyninpi.

• Bibliata leesqaykita anotakuy. Chaytaqa “Maykamañachus Bibliata leesqanchejta marcanapaj” nisqapi anotakuy. Chaytaj kashan kay libroj tukukuyninpi.

• JW Library^® nisqawan yanapachikuy. Kay aplicacionta celularniykiman chayri tabletaykiman uraqachikuwaj. Chaywanqa Bibliata mayllapipis leeriwaj chayri grabasqata uyariwaj.

• Diospa Palabran Bibliapi rikhurej yanapaswan yanapachikuy. Chay Bibliaj tukukuyninpi tiyan mapas, dibujos, uj glosario ima. Chaykunaqa Bibliata astawan leeyta munanaykipaj yanapasonqa.

5. Bibliata estudianapaj sumajta wakichikuy

Salmo 119:34 leeriychej, chantá yachakojta tapuriy:

• Bibliata leenapaj chayri estudianapaj, ¿imatataj ñaupajta ruwana kasqa? ¿Imaraykutaj Diosmanta mañakunapuni kanman?

Sapa leccionta estudianaykipaj kay jinata wakichikuwaj:

1. Sapa leccionpa qallariyninpi kaj parrafosta leeriy.

2. Chay parrafospi rikhurej versiculosta leeriy, chantá imatachus yachakushasqaykiwan igualachiy.

3. Sapa tapuypa kutichiyninta marcakuy. Chayta ruwayqa yachachejniykiwan estudiashajtiyki mayta yanapasonqa.

Astawan yachanaykipaj

Jehovaj testigosnenqa ashkha Bibliasta apaykacharqayku. Jinapis kunanqa Mosoj Jallpʼapi Kausajkunapaj Diospa Palabran Bibliata apaykachayku. Imaraykuchus chay Bibliapeqa Diospa sutin rikhurin, maychus kajta willan, sutʼisitutaj (jw.org nisqapi “Jehovaj testigosninpa Biblianku, ¿wajpunichu?” nisqata leeriy).

¿IMASTÁ YACHAKUNCHEJ?

Kaypi yachakunchej Bibliawan sumajta yanapachikunapajqa, Bibliata leenapaj tiempota orqhokuna kasqanta. Chay leesqanchejta entiendenapajpis Diosman orakuna kasqanta. Sapa kuti estudianapajtaj wakichikuna kasqanta.

Yuyarikunapaj

• ¿Imatá ruwawaj Bibliata leey gustasunanpaj?

• ¿Ima ratostaj Bibliata leeriwaj estudiawaj ima?

• ¿Imajtintaj sapa kuti Bibliata estudianapaj wakichikuna kanman?

ASTAWAN YACHAKUNAYKIPAJ

Bibliata leesqaykiwan yanapachikunaykipaj, ¿imatá ruwawaj? Chaypaj kayta leeriy.

“Bibliata leeyqa yanapasunkiman” (Torremanta Qhawaj, 1 kaj 2017)

¿Ima kinsa imastaj Bibliata leenaykipaj yanapasunkiman? Chayta yachanaykipaj kayta leeriy.

“¿Imaynatá Biblia yanapawanman? 1 kaj: Bibliapi qanpaj jina yachachiykunata maskʼay” (Chaytaqa Internetpi jw.org nisqapi tarinki)

¿Imatá ruwawaj Bibliata leey gustasunanpaj? Chayta yachanaykipaj kayta leeriy.

“¿Imaynatá Biblia yanapawanman? 2 kaj: Bibliata leespa gustachikuy” (Chaytaqa Internetpi jw.org nisqapi tarinki)

Bibliata unaytaña leejkuna, imaynatachus Bibliata leeywan gustachikusqankuta yachanaykipaj kay videota qhawariy.

Bibliata sumajta estudiay (2:06)

4. Jehovawan parlariypuni

Orakuypis, Bibliata estudiaypis Jehovaj amigon kanaykipaj yanapasorqa. Kunanpis, aswan qhepamanpis chay imasta ruwayqa Jehovaman astawan qayllaykunaykipaj yanapallasonqapuni.

Salmo 62:8 leeriychej, chantá yachakojta tapuriy:

• Jehovaman astawan qayllaykunaykipaj, ¿imastataj payman willakuwaj?

Salmo 1:2 leeriychej, chantá yachakojta tapuriy:

• Jehovaman astawan qayllaykunaykipaj, ¿Bibliata leey yanapasunkimanchu?

Bibliata sapallaykipi estudiayqa, Jehovaman qayllaykunaykipaj yanapasonqa. VIDEOTA qhawariychej, chantá yachakojta tapuriy.

VIDEO: Bibliata aswan sumajta estudiana (5:22)

• Videopi rikusqanchejman jina, ¿Bibliata estudiashaspa imastataj ruwasunman?

• Bibliata estudiashaspa, ¿imasmantataj astawan yachakuyta munawaj?