Diosqa saykʼusqa kajta astawan kallpachan

 1. 1) ¿Imá llakiykunapitaj rikukunchej? (Patapi kaj fotosta qhawariy). 2) ¿Imamantataj Jehová Dios mayta kusikun?

KAY tiempopi kausayqa mana facilchu. Imaraykuchus noqanchejmanta wakenqa, sinchʼi onqoywan ñakʼarishanchej. Wakintaj kurajña kaspapis, tatanchejta chayri mamanchejta qhawananchej tiyan. Wakintaj familianchej imatachus necesitasqankuta, mana qoyta atillanchejchu. Wakinrí ashkha llakiykunapi rikukusqanchejrayku, ichá may phutisqa kashanchej. Chantá ichá jampichikunapaj qolqeta mayta gastashanchej, tiempochakushanchejtaj. Jinapis Jehová Dios yanapanawanchejpi atienekuna. Imaraykuchus payqa tukuy chay llakiykunata chinkachinanta nerqa. Jehová Diosqa paypi atienekojtinchej, mayta kusikun.

 2. 1) ¿Imaynatataj Isaías 40:29 versículo kallpachawanchej? 2) Llakiykunapi rikukuspa, ¿imastataj wakin hermanos ruwayta qallarinku?

² Wakin kuteqa, ichapis yuyasunman llakiykunasninchej mana atipanapaj jina kasqanta. Jinapis ama yuyanachu sapanchej kashasqanchejta. Imaraykuchus ñaupa tiempomanta wakin Diospa kamachisninpis, ajinallapitaj rikukorqanku (1 Rey. 19:3, 4; Job 7:7). ¿Imataj paykunata yanaparqa llakiykunasninkuta aguantanankupaj? Paykunaqa Jehová Dios kallpachananpi atienekorqanku. Bibliataj nin, Diosqa “saykʼusqa kajta astawan” kallpachananta (Isa. 40:29). Chaywanpis wakin hermanosqa, yuyanku llakiykunata aguantanankupaj, uj tiempota Diosta sirviyta saqepunanku kasqanta. Imaraykuchus yuyanku Jehová Diosta sirviy uj llasa qʼepi jina kasqanta. Chayrayku Bibliata niña leenkuchu, nitaj tantakuykunaman, predicacionman ima rinkuñachu. Diablotaj chayta ruwanankuta munan.

 3. 1) ¿Imatataj Diablo munan ruwananchejta? 2) ¿Imatataj kay yachaqanapi yachakusunchej?

³ Diabloqa, mana munanchu Diosta yupaychananchejta. Imajtinchus yachan Diosta yupaychanapaj tiemponchejta churajtinchej, aswan sinchʼi sayasqa kananchejta. Chayrayku saykʼusqa chayri llakisqa kashajtinchejqa, ama Jehová Diosmanta karunchakunachu. Astawanqa Jehová Diosman qayllaykunallapuni. Bibliaqa nin: ‘Diosqa sinchʼita sayachisonqachej, kallpachasonqachejtaj’, nispa (1 Ped. 5:10; Sant. 4:8). Kunantaj kay yachaqanapi yachakusunchej, Isaías 40:26 al 31 versiculosmanta. Chay versiculostaj reparachiwasunchej imaynatachus Jehová Dios kallpachayta atiwasqanchejta. Chantapis yachakusunchej ima llakiykunachus Diospaj pisillataña ruwanapaj tanqawasqanchejta. Yachakullasuntaj chay llakiykunata aguantanapaj, imaynatachus Bibliaj yuyaychaykunasnin yanapanawanchejta.

 4. ¿Imatataj yachakusunman Isaías 40:26 versiculomanta?

⁴ (Isaías 40:26 leey). Tukuynin estrellastaqa ni pi runapis yupayta atinchu. Cientificosqa ninku mundonchej qayllallapi 400 mil millones estrellasmanta, astawan kasqanta. Jehová Diostaj sapa estrellata rejsin, sutinmantataj wajyan. Chayta yachaytaj, reparachiwanchej Jehová Diosqa, sumajta rejsiwasqanchejta, munakuwasqanchejtataj. Chayrayku noqanchejqa Diosta mana tanqasqa jinallachu yupaychananchej tiyan, manaqa munakusqanchejrayku (Sal. 19:1, 3, 14). Tatanchej Jehovaqa sumajta rejsiwanchej. Chayrayku Biblia nin: “Umaykichejmanta chujchasniykichejpis, tukuyninku yupasqa kashanku”, nispa (Mat. 10:30). Waj versiculotaj nin: “Mana juchayoj kawsajkunata Tata Diosqa waqaychan”, nispa (Sal. 37:18). Arí, Jehová Diosqa ima llakiykunapichus rikukusqanchejta yachan. Chayrayku payqa yanapawasunchej chay llakiykunata aguantanapaj.

 5. ¿Imajtintaj nisunman Jehová Dios atiyta qonawanchejta llakiykunasninchejta aguantanapaj?

⁵ (Isaías 40:28 leey). Jehová Diosqa may atiyniyoj. Chayta reparanapaj intimanta parlarina. Jehová Diosqa intita tʼukunapaj jina ruwarqa. Intimanta parlaspa, uj yachayniyoj runa David Bodanis, nin: “Inteqa sapa segundo may chhika kʼanchayta, may chhika calorta ima wijchʼun. Chaykunaqa may chhika bombaspa tʼojyasqan jina kanman”, nispa. Waj yachayniyoj runataj nin: “Inti may chhika kʼanchayta sapa segundo wijchʼun. Uj segundo wijchʼusqallanwantaj runasqa 200.000 watasta jina kausakunkuman”, nispa. Kayqa reparachiwanchej Jehová Dios may atiyniyoj kasqanta, intita kʼanchachinallanpajpuni. Chay jina atiyninwantaj Diosqa, sapa ujninchejta yanapawasunchej, ima llakiytapis aguantanapaj.

 6. 1) ¿Allinninchejpajchu kasqa Jesuspa yugonman churakuy? 2) ¿Tantakuykunamanta, predicacionmantapis faltakunachu kanman?

⁶ (Isaías 40:29 leey). Jehová Diosta sirviyqa, mayta kusichiwanchej. Jesusqa yachachisqasninman nerqa: ‘Yugoyman churakuychej, kausayniykichejpajtaj samarikuyta tarinkichej, imaraykuchus yugoyqa llampʼulla, qʼepiypis chhallalla’, nispa (Mat. 11:28-30). Jesuspa yugonman churakunchej tantakuykunaman rispa, predicacionman rispa ima. Chaykunaman wakin kuti saykʼusqa rejtinchejpis, kusisqas, kallpachasqastaj wasinchejman kutipunchej. Jinamanta ima llakiyllatapis aguantanapaj kallpayoj kanchej.

 7. ¿Imaynatataj uj hermanapi Mateo 11:28-30 versículos juntʼakusqa?

⁷ Uj hermanamanta parlarina. Payqa may onqosqa kasharqa. Imajtinchus tukuy cuerpon nanaj, maytataj phutikoj. Payqa tantakuykunaman mana riyta atillajchu. Jinapis uj kuti, mayta kallpachakuspa tantakuyman risqa. Chay tantakuypi imatachus yachakusqanmantataj, jinata nerqa: “Discursoqa mana anchata llakikunamanta parlarqa. Chay discursoqa noqapaj jinapuni karqa. Sonqoyman chayawasqanraykutaj waqarikorqani. Reparakorqanitaj tantakuykunamanta mana faltakunay kasqanta”, nispa. Chay hermananchejqa tantakuyman risqanmanta, may kusisqa kasharqa.

8, 9. ¿Imatataj apóstol Pablo nisharqa “pisi kallpayoj kaspaqa atiyniyoj kani” nispa?

⁸ (Isaías 40:30 leey). Wakin imasta sumajta ruwayta atejtinchejpis, Diospa yanapanta necesitanchejpuni. Chaytaqa amapuni qonqanachu. Apóstol Pablomanta parlarina. Payqa tukuy imata ruwayta munajtinpis, mana atejchu. Chayrayku payqa llakiyninta Diosman willakorqa. Diostaj Pabloman, jinata nerqa: “Atiyneyqa pisi kallpayoj kasqaykipi astawan rikuchikun”, nispa. Chayta Pablo sumajta entienderqa, nerqataj: “Pisi kallpayoj kaspaqa atiyniyoj kani”, nispa (2 Cor. 12:7-10). ¿Imatataj chanta chaywan Pablo niyta munasharqa?

⁹ Pabloqa chaywan nisharqa, Jehová Dios atiyta qonanta, ima llakiytapis aguantananpaj. Nishallarqataj Diospa atiyninwan mana ruway atinasta ruwananta. Arí, Jehová Diosqa noqanchejtapis yanapawasunman ima llakiytapis aguantanapaj.

10. ¿Jehová Dios Davidta yanapasqachu problemasninta atipananpaj?

¹⁰ Davidmantañataj parlarina. Payqa ashkha kutispi repararqa, Jehová Dios atiyninwan yanapasqanta, problemasninta atipananpaj. Chayrayku David nerqa: “Yanapayniykiwan enemigoyta atipasaj, may chhikachaj perqastapis wasaykusaj”, nispa (Sal. 18:29). Noqanchejtapis Jehová Dioslla yanapawasunman llakiyninchejta atipanapaj, llakiykunasninchej jatuchaj perqas jina kajtinkupis.

11. Llakiykunapi rikukuspa, ¿imajtintaj ankasmanta yuyarikunanchej kanman?

¹¹ (Isaías 40:31 leey). Ankasqa mana kallpallankuwanchu karuta phawanku, manaqa qʼoñi wayrawan yanapachikunku. Chay qʼoñi wayraqa ankasta yanapan mana anchata saykʼunankupaj. Chayrayku ima llakiypi rikukuspapis ankasmanta yuyarikunanchej kanman. Noqanchejqa Jehová Dioswan yanapachikusunman. Chaypajqa Jehová Dios atiyninta qonawanchejta mañakusunman, llakiykunasninchejta atipanapaj (Juan 14:26). Diospa atiynintataj ima ratollapis mañakuyta atinchej. Ichapis Diospa atiyninta astawan mañakunanchej kanqa, pi hermanollawanpis phiñanarqokojtinchej. Kunantaj chaymanta astawan parlarina.

12. ¿Imajtintaj hermanosninchejwan phiñanakusunman?

¹² Juchasapa kasqanchejrayku, wakin kuti hermanosninchejwan phiñanarpakunchej. Chayrayku ichá pi hermanollapis sonqonchejta nanachinawanchejpaj jina, imatapis ruwanman chayri imatapis nirpawasunman. Manachayri noqanchej wajkunaj sonqonkuta nanarpachisunman. Pillawanpis phiñanarpakuspaqa, Diospa qayllallanpipuni kana. Jehová Diosqa wakin imas pasananta saqenman, hermanosninchejwan allinta apanakuyta yachakunanchejpaj, ujchasqa trabajayta yachakunanchejpajpis. Imajtinchus Jehová Diosqa tukuy hermanosta munakun, juchasapa kajtinkupis.

13. Josejpa kausayninmanta yachaspa, ¿imatataj Jehová Diosmanta nisunman?

¹³ Jehová Diosqa saqellan kamachisnin llakiykunapi rikukunankuta. Chaytaqa Josejpa kausayninpi reparasunman. Paytaqa joven kashajtin hermanosnin envidiarayku venderparqanku. Jinapi Joseqa Egiptoman apasqa karqa (Gén. 37:28). Jehová Diospa sonqontaj maytachá nanarqa, José ñakʼarichisqa kashajtin. Imajtinchus Joseqa cheqan runa karqa. Jinapis Diosqa, chay pasananta saqellarqa. Aswan qhepamantaj Joseta qhasimanta juchacharqanku, Potifarpa warminta abusayta munasqanta nispa. Chayraykutaj carcelman wisqʼaykorqanku. Chay kutipipis Jehová Diosqa, saqellarqa Joseta wisqʼaykunankuta. Jinapis Jehová Diosqa, Joseta mana saqerparqachu. Imajtinchus Biblia nin: “Tata Dios paywan kasharqa tukuy ima ruwasqasnimpi allin rinampaj”, nispa (Gén. 39:20-23).

14. 1) Phiñakuyta saqepojtinchej, ¿pi jinataj kasunchej? 2) Phiñakuyta saqepojtinchej, ¿imaspitaj mana rikukusunchu?

¹⁴ Davidtapis maytapuni ñakʼaricherqanku. Jinapis Davidqa mana phiñakuyninwan atipachikorqachu. Astawanqa David nerqa: “Phiñasqa kayta saqey, qhesachaytaj; amapuni phiñakuychu, imaraykuchus chaywanqa aswan mana allinman chayanki”, nispa (Sal. 37:8). Noqanchejqa phiñasqa kayta saqepunchej, Jehová Dios jina ruwayta munasqanchejrayku. Imajtinchus Jehová Diosqa “mana sajrata ruwasqanchejman jinachu kutichiwanchej, nitaj sajra kayninchejman jinachu pagawanchej” (Sal. 103:10). Phiñakoyqa onqochiwasunman, imajtinchus mana allinta samayta saqewasunmanchu, wijsanchejpis qʼewiwasunman, jinallataj tukuy ukhunchej nanawasunman. Chantapis phiñakuspaqa imatapis ruwarpallasunman. Mana chayllachu, rabiakuspaqa unayta umphulla kasunman. Mana phiñakojtinchejrí, mana chay imaspi rikukusunchu. Chayrayku Biblia nin: “Kʼacha sonqo kayqa runaj cuerpompaj kawsayta apamun”, nispa (Pro. 14:30). Chayrayku mayqen hermanollawanpis allinyakunapaj kallpachakuna. Chaypajtaj Bibliaj yuyaychaykunasninman jina ruwana.

15, 16. Pi hermanollawanpis allinyakunapaj, ¿imastataj ruwasunman?

¹⁵ (Efesios 4:26 leey). Noqanchejqa yachanchej jawamanta runas ñakʼarichinawanchejta, chaytataj aguantayta atillasunman. Jinapis sonqonchej mayta nanawasunman pi hermanollapis chayri familianchejmanta pillapis ñakʼarichiwajtinchej. Chaytataj ichá mana qonqapuyta atillasunmanchu. Chayrayku allin kanman piensarinanchej, Bibliaj nisqanman jina chay hermanowan allinyakuyta maskʼasqanchejtachus chayri manachus. Imajtinchus mana allinyakuyta maskʼaspaqa, mana atillasunchu aswan qhepaman hermanonchejwan allinyakuyta.

¹⁶ Uj hermano sonqonchejta nanachiwasqanchejpi piensarina. Chay hermanowantaj ichá phiñasqallapuni kasunman. Jinapis, ¿imatataj chay hermanowan allinyakunapaj ruwasunman? Jehová Diospa yanapayninta mañakusunman, chay hermanowan kʼachamanta parlarinapaj. Yuyarikunataj chay hermanopis Diospa kamachillantaj kasqanta. Diostaj payta munakusqanta (Sal. 25:14). Jehová Diosqa kamachisninwan may kʼacha. Munantaj noqanchejpis hermanosninchejwan kʼachas kananchejta (Pro. 15:23; Mat. 7:12; Col. 4:6). Chantapis chay hermanowan parlarinapajqa, sumajtaraj umachakuna. Amataj yuyanachu chay hermano sonqonchejta nanachiytapuni munawasqanchejta. Imajtinchus ichapis noqanchej juchayoj karqanchej phiñanakunapaj. Ichapis chay hermanowan allinyakunapaj, jinata nisunman: “Hermanóy ichapis ancha usqhayllata phiñarpakorqani. Pero qayna parlarishawajtiykeqa sonqoyta nanarpachiwarqanki”, nispa. Jinapis sichus chay hermanowan mana allinyakorqanchejchu chayqa, kallpachakunallapuni chay hermanowan allinyakunapaj. Chantapis piwanchus phiñanakorqanchej chay hermanopaj Diosmanta mañapunallapuni. Mañakunallataj yanapanawanchejta ama chay hermanoj pantasqasnillanta qhawanapaj. Chay hermanowan allinyakunapaj kallpachakuspaqa, Jehová Diosta kusichinchej. Imajtinchus Diosqa, chay hermanotapis munakullantaj.

17. 1) ¿Pikunatataj Jehová Dios churasqa juchapi urmajtinchej yanapanawanchejpaj? 2) ¿Ancianospa yanapayninta maskʼanapunichu kasqa?

¹⁷ Wakin hermanosqa jatun juchapi urmasqankurayku, yuyanku Jehová Dios ni jaykʼaj perdonananta. Sonqonku juchachasqankuraykutaj ichá phutisqas, llakisqastaj kankuman. Rey Davidqa ajina llakiypi tarikuspa, jinata nerqa: “Juchayta manaraj willakushajteyqa, tukuy cuerpoy llawchʼiyarqa pʼunchaynintin waqasqaypi. Tuta pʼunchay makiykeqa astawan astawan ñakʼarichiwarqa”, nispa. Chaywanpis Davidqa Jehová Diosman juchanta willakorqa. Pay nerqa: ‘Mana imatapis pakaspa, tukuy juchayta, sajra ruwasqaytawan willakorqayki. Willakushasojtiytaj Jehová Dios, qan perdonawarqanki’, nispa (Sal. 32:3-5). Jehová Diosqa jatun juchapi urmajtinchejpis perdonanawanchejpaj wakichisqa kashan. Yanapanawanchejpajtaj ancianosta churan (Pro. 24:16; Sant. 5:13-15). Juchapi urmaspaqa, ancianospa yanapayninta maskʼanapacha. Imajtinchus ajinallamanta wiñay kausayta japʼisunchej. Jinapis ichá sonqonchej juchachallawasunmanpuni ancianoswan parlarejtinchejñapis. Ajinapi rikukuspaqa, imatachus ruwananchejta qhawarinachej.

18. ¿Jehová Dios juchanchejta perdonawasunmanchu?

¹⁸ Apóstol Pabloqa wakin kutis mayta llakikoj, ñaupa kausayninmanta yuyarikuspa. Chayrayku pay nerqa: ‘Noqaqa apóstoles ukhupi aswan juchʼuypaj qhawakuni. Manataj apóstol nisqa kanaypaj jinachu kani, imaraykuchus Diospa llajtanta qhatiykacharqani. Chaywanpis kunanqa, Diospa jatun khuyakuyninrayku apóstol kani’, nispa (1 Cor. 15:9, 10). Reparanchej jina Jehová Diosqa, Pablota apostolta jina qhawarqa, ñaupa kausayninpi llajtanta qhatiykachajtinpis. Jehová Diostaj munarqa Pablo reparananta paymanta khuyakusqanta. Noqanchejpis juchanchejmanta pesachikojtinchej Jehová Dios khuyakunawanchejpi atienekuna. Chayrayku Jehová Diosman, ancianosmanpis juchanchejta willakunapuni. Chantapis Jehová Dios perdonanawanchejpi atienekuna (Isa. 55:6, 7).

19. 1) Sajra runas chinkachisqa kanankukama, ¿imaspitaj rikukunanchej kasqa? 2) ¿Imatataj nin kay 2018 watapaj ajllasqa texto?

¹⁹ Yachanchej tukuy laya ñakʼariykunapi rikukunanchejta, kay mundomanta sajra runas chinkachisqa kanankukama. Jinapis Jehová Dios kallpata qonawanchejpi atienekuna, ñaupajllamanpuni rinapaj. Imajtinchus Diosqa “saykʼusqa kajta astawan kallpachan, pisi kallpayojmampis kallpata qon” (Isa. 40:29; Sal. 55:22; 68:19). Jehová Dios kallpata qonawanchejmanta mana qonqapunapajqa, kay 2018 watapaj ajllasqa textoqa nin: ‘Jehová Diospi atienekuspa suyakojkunarí watejmanta kallpata japʼenqanku’, nispa (Isa. 40:31). Chay textotataj sapa Tantakuna Wasipi rikusunchej.