¿Yuyarikunkichu?

¿Kay killasmanta Torremanta Qhawaq revistasta ñawirirqankichu? ¿Kay tapuykunaman kutichiyta atiwaqchu?

• ¿Edén huerta karqapunichu?

Génesis librop nisqanqa, Edén huerta chiqamantapuni kasqanta yachachiwanchik. Ima chiqapichus kasqantapis willawanchik. Iskay mayusmanta parlasqanqa kunankama kachkallankupuni. Cuentosqa, mana sutʼitachu, nitaq tukuyninmanta chiqatapunichu willanku. Jesusqa, Adanmanta Evamantawan parlachkaspa, kawsasqankutapuni reparachirqa (1/4, 4-6 paginaspi).

• Adán, Eva juchallikunankuta, ¿Dios yacharqañachu?

Mana. Jehovaqa Adanta, Evata ima, mana juchayuqta, kawsayninkupi akllayta atinankupaq ruwarqa. Chaywanpis Jehovaqa, imachus qhipaman kananta yachayta atin (1/4, 13-15 paginaspi).

• ¿Imaraykutaq ñawpaq kaq Corintios lantisman jaywasqa aychamanta parlan?

Griegospa, romanospa templosninkupiqa, uywasta jaywaq kanku. Kayta ruwakuchkaspa mana mikhusqanku aychataqa, qhatuspi ranqhaq kanku. Cristianosqa ni jaykʼaq lantisman jaywanaspi chhapukuspapis, puchuq aychastaqa mikhullaq kanku (1 Cor. 10:25) (1/1, 15 paginapi).

• ¿Imaynatá Satanasmanta jarkʼakusunman?

Jesusqa, discipulosninpi yuyaspa Tatanmanta mañakurqa: “Mañakuni paykunata sajra kajmanta waqaychanaykita. Paykunaqa mana kay pachajtachu kanku; noqapis manallataj kay pachajtachu kani. Paykunata qampaj tʼaqay cheqa kajnejta; nisqasniykeqa cheqapuni kanku” (Juan 17:15-17). Satanás kay pachata kamachisqanrayku jarkʼakunanchikpaqqa, Diospa Palabranta riqsinanchik tiyan (1/1, 17 paginapi).

• Diospa sutin imaspipis rikhurin chay, ¿jarkʼawasunmanchu?

Wakin runasqa, wakin imas saqramanta jarkʼananta yuyanku. Cristianosrí imaspichus Diospa sutin rikhurin chaykunata mana jarkʼanawanchikpaqjinachu qhawanchik. Astawanpis Paypi iñinchik, munayninta ruwanapaqtaq kallpachakunchik, ajinamanta sutinpi jarkʼakunchik (Sof. 3:12, 13) (15/1, 5, 6 paginaspi).

• ¿Imaraykú Jehová rey Saulta qhisacharqa?

Saulqa, Diospa profetanta uywa wañuchisqa qʼulachinasta jaywananpaq suyanan karqa, chaywanpis mana kasukuspa pay kikin jaywarqa. Wak kutipitaq Jehová amalecitasta chinkachinanta kamachiptin mana kasurqachu (15/2, 22, 23 paginaspi).

• ¿Imaynatá saqra kaqta chiqnisqanchikta rikuchisunman?

Machachiq ukyanasta mana machaykunakama ukyaspa, layqiriyusta qhisachaspa, Jesús khuchichakuymanta yuyaychasqanmanta kasukuspa ima. Sutʼincharinapaq qʼala runasta qhawayta, millay ruwaykunapi tʼukuriyta ima qhisachananchik tiyan, imaraykuchus chayqa sunqunchikpi qhipakunman (Mat. 5:27, 28). Chantapis qutuchakuymanta qharquchikuqkunawan mana masichakunanchikchu tiyan (15/2, 29-32 paginaspi).

• ¿Imaynamantá Jeremías “mayu patapi sachʼa jina [...] mayunejman sapichakoj” karqa? (Jer. 17:7, 8.)

Jeremiasqa, juk sachʼajina puqullarqapuni, runas asipayaptinkupis mana kasurqachu. Astawanpis Jehovaman qayllaykurqa, tukuy ima nisqantataq kasukurqa (15/3, 14 paginapi).

• Yachayta quq sachʼa, kawsayta quq sachʼapis, ¿kankumanchu karqa?

Allin kaqta mana allin kaqta yachanamanta sachʼaqa, Dioslla, imachus allin imataqchus mana allin kasqanta niyta atisqanwan ninakurqa (Jer. 10:23). Chayrayku chay sachʼap puquyninta mikhuyqa, Jehovap ñawpaqinpi jatun jucha karqa. Kawsaymanta sachʼaqa, wiñay kawsaywan ninakurqa, kawsaytaqa Dioslla quyta atinman (Rom. 6:23) (1/4, 7 paginapi).