‘Allin kausayqa manapuni tukukonqachu’

Naciones Unidas organización nerqa: “Runasqa purajmanta yanapanakunanku, respetanakunanku, jallpʼatapis cuidananku tiyan”, nispa. Kay tiempopi kausayqa Maher Nasser sutiyoj runa uj revistapi nisqanman jina kashan. Pay nerqa: “Wakin lugaresllapi anchata paran, suwa mirashan, wakillan qhapajyashanku. Chʼampaykunapis yapakushallanpuni, ashkhas karu lugaresman ayqekushanku, terrorismowan, onqoykunawanpis astawan rikhurishan”, nispa.

Wakin runastaj nerqanku jallpʼapi allinta kausakunapajqa, jallpʼantinta uj gobiernolla kamachinanta. Ajinata Italiamanta Dante sutiyoj runa yuyarqa. Payqa filósofo, poeta, político ima karqa. Chantá Albert Einstein cientificopis ajinallatataj yuyarqa. Dante nerqa, jallpʼanchejpi políticos mana ujchasqa kasqankurayku ni jaykʼaj allinta kausayta atinanchejta. Payqa Jesuspa nisqallantataj nerqa: “Mayqen nacionllapipis runas maqanakuspa tʼaqanakunku chayqa, chay nacionqa chinkaponqa”, nispa (Lucas 11:17).

Iskay kaj Guerra Mundialpeqa, iskay bombasta phatacherqanku. Pisi tiemponmantaj Albertqa Naciones Unidasman tukuy leenankupaj uj cartata qhelqarqa. Chay cartapi pay nerqa: “Naciones Unidasqa uj sumaj gobiernota sayarichinan tiyan jallpʼantinpi allin kausay kananpaj”, nispa.

Jallpʼata uj gobiernolla kamachejtenqa, tukuy runas jinallataj llukʼiykuchikunman, wakin imasta mana chinkachiyta atinmanchu, runastapis munasqanman jina kamachinman. Chayqa yuyarichiwanchej Inglaterramanta lord Acton imatachus nisqanta. Pay nerqa: “Atiyniyoj kaspaqa manapuni cheqan kajta ruwayta atinchejchu”, nispa.

Jinapis kay jallpʼapi allinta kausakunapajqa, tukuy ujchasqa kananchej tiyan. Chaywanpis, ¿imatá ruwasunman ujchasqa kanapaj? ¿Atisunmanchu tukuy ujchasqas kausakuyta? Bibliaqa niwanchej tukuy allinta, ujchasqataj kausayta atinanchejta. Jinapis kay mundomanta gobiernoswanqa mana ajinata kausakuyta atisunchu, manaqa Diospaj Gobiernollanwan. Chay Gobiernoqa, sutʼita rikuchenqa Dioslla sumajta kamachiyta atisqanta. Chay Gobiernoqa Biblia nisqanman jina ‘Diospa Gobiernon’ kashan (Lucas 4:43).

Jesusqa padrenuestro mañakuyta ruwashaspa chay gobiernopi yuyasharqa. Chayrayku nerqa: ‘Gobiernoyki jamuchun. Munayniykitaj ruwasqa kachun kay jallpʼa patapi’, nispa (Mateo 6:9, 10). Diospa Gobiernon kamachishajtenqa kay jallpʼapi Diospa munaynin juntʼakonqa, nitaj runaspa munayninchu. Imajtinchus kay mundomanta runasqa paykunallapaj imatapis munanku, sajrastaj kanku.

Diospa Gobiernontaqa, ‘cielopi kaj Gobierno’ nikullantaj (Mateo 5:3). Imaraykuchus chay Gobiernoqa cielomantapacha gobernamonqa, kamachinanpajtaj mana qolqeta necesitanqachu, chaytaj may allinpuni.

Diospa Gobiernonqa uj reyniyoj, chay reytaj Jesucristo. Diostaj payman atiyta qon kamachinanpaj. Bibliaqa Jesusmanta nin:

• ‘Paywan kanqa jatun atiy kamachinanpaj. Kamachisqan, chantá allin kausayta qosqanpis manapuni tukukonqachu’ (Isaías 9:6, 7).

• “Payman atiy qosqa karqa, jinallataj jatumpaj qhawasqa kay, reinopis, tukuy nacionesmanta kaj runas, tukuy parlaymanta kaj runas ima payta sirvinankupaj” (Daniel 7:14).

• “Diosninchejpata, Cristonpatawan Gobiernonqa runasta kamachishanña, wiñay wiñaynintinpajtaj rey jina kamachenqa” (Apocalipsis 11:15).

Jesús padrenuestropi imatachus mañakusqanqa, Diospa Gobiernon kamachishajtin juntʼakonqa. Chaypitaj Diospa munaynin ruwakonqa. Ajinamantataj kay jallpʼapi kusiy kausay kanqa, runaspis jallpʼata sumajta cuidanqanku.

Chantapis Diospa Gobiernonqa tukuy runasta allinta kausakuyta yachachenqa. Tukuytaj kikin kamachiykunata kasukusun, niña chʼampaykuna kanqachu, ujchasqataj kasunchej. Biblia nin: “Mana ima sajratapis ruwanqankuchu, imaraykuchus tukuy jallpʼaqa Tata Diosta rejsiywan juntʼa kanqa, imaynatachus mama qochaman yaku juntʼaykun, ajinata”, nispa (Isaías 11:9).

Naciones Unidas organizacionqa mana runasta ujchayta atinchu, nitaj yanapayta atinchu allinta kausakunankupaj. Jinapis Diospa Gobiernonpeqa tukuy ujchasqas, allintataj kausakusunchej. Biblia nin: “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku”, nispa (Salmo 37:11). Chaypeqa niña kanqachu suwas, guerras, ni wajchayay, kay jallpʼapis llimphu kanqa. Jinapis, ¿maykʼajtaj chay jina kausay kanqa? ¿Maykʼajtaj Diospa Gobiernon kay jallpʼapi kamachenqa? ¿Imaynatá kamachenqa? ¿Imaynatá chay Gobierno yanapawasun? Chayta qhepan yachaqanapi yachakusunchej.