Ama phutikuychu

BIBLIAJ YUYAYCHASQAN: “Ama phutikuychejchu kawsayniykichejmanta” (Mateo 6:25).

¿Ima niyta munan? Jesusqa chayta nerqa Orqopi yachachishaspa. Bibliamanta parlaj libro nisqanman jina, griego parlaypi ‘phutikuy’ palabrataqa “runa wajchayaymanta, mikhunamanta, sapa pʼunchay waj imasmantawan phutikusqanmanta parlanapaj” oqharikun. Wakin kuteqa astawan llakikunchej imachus aswan qhepaman kananmanta. Ni ima pisinawanchejmanta, familianchejmanpis ni ima pisinanmanta phutikunchejpuni (Filipenses 2:20). Chaywanpis Jesusqa “ama phutikuychejchu” nispa, ama llakiywan atipachikunamanta parlasharqa. Imajtinchus sinchʼita llakikuspaqa mana kusisqachu kausakusun (Mateo 6:31, 34).

¿Chay yuyaychay yanapawanchejchu? Jesuspa nisqanqa may sumajpuni. Wakin libros nisqanman jinaqa uj runa sinchʼita llakikojtin mana sonqo tiyasqachu, mancharisqa jinallataj kausakun. Chantapis chay librospi nillantaj, anchata llakikojkunaqa onqoykunkuman wijsankumanta, sonqonkumanta, manaña samaytapis allinta atinkumanchu.

Jesús nerqa sinchʼita phutikoyqa qhasilla kasqanta. Pay nerqa: “Astawan causayta munaspa, llaquicuspapis ¿uj chhicatawan causayta atiwajchejchu?”, nispa (Mateo 6:27, Dios Parlapawanchej). Phutiynillanchejpi yuyaspaqa mana kausayninchejta allinyachisunmanchu, nitaj uj chhikatawan kausayta atisunmanchu. Chantapis kausayqa mana ñaupajpi yuyasqanchejman jinapunichu. Uj yachayniyoj runa nerqa jinataj “aswan qhepaman imachus kananmanta llakikoyqa qhasillapaj, [...] wakin kutilla mana allinta yuyasqanchejman jinaqa”.

Mana sinchʼita phutikunapajqa, Diospi atienekuna. Diosqa pʼisqosta mikhuchin, tʼikastapis kʼachituta pʼachallichin, payta yupaychajkunapajtaj astawanraj ruwanqa (Mateo 6:25, 26, 28-30). Chantapis ama aswan qhepamanta phutikunachu. Jesús nerqa: “Ama phutikuychejchu ari, qʼaya pʼunchaymanta, imaraykuchus qʼaya pʼunchayqa pay kikinmanta llakiyniyoj”, nispa (Mateo 6:34).

Jesuspa yuyaychasqanman jina ruwaspaqa, mana anchata onqosunchu, Diostaj “sonqo tiyaykuyninta” qowasun allinta kausakunapaj (Filipenses 4:6, 7).