Jehová qowasqanchej imasta valorniyojpaj qhawana

1, 2. 1) ¿Imastataj may valorniyojpaj qhawananchej tiyan? 2) ¿Imatá kay yachaqanapi yachakusunchej?

JALLPʼAPI, cielopipis tukuy ima kajqa Diosllapata (1 Cró. 29:11, 12). Payqa may kʼacha Tata, imaraykuchus tukuy ima valorniyoj kajta qowanchej. Chaykunamanta wakintaj kanku: Diospa Gobiernon, Gobiernonmanta willasqanchej, Palabranmanta cheqa yachachiykunapiwan. Chaymanta mayta agradecekunchej, ¿icharí? Jinapis mana allinta qhawarikojtinchejqa, chaykunata pisipaj qhawayta qallarisunman. Chayrayku chay imasta valorniyojpaj qhawanallapajpuni mayta kallpachakuna. Jesús nerqa: “Maypichá valorniyoj imasniykichej kashan, chayllapitaj sonqoykichejpis kanqa”, nispa (Luc. 12:34).

² Yachakunachej imatachus ruwana kasqanta Diospa Gobiernonta, Gobiernonmanta willayta, cheqa yachachiykunatawan valorniyojpaj qhawanallanchejpajpuni. Chaykunamanta yachakushaspa tʼukurina imatachus sapa uj ruwananchej kasqanpi.

 3. Jesús parlasqanman jina, ¿imatataj uj ranqhero ruwarqa uj sumaj perlata tariytawan? (9 paginapi dibujota qhawariy).

³ (Mateo 13:45, 46 leey). Uj kuti Jesusqa, perlasta maskʼaj ranqheromanta parlarqa. Chay ranqheroqa ashkha kutistachá perlasta ranterqa, venderqataj. Jinapis uj pacha, uj sumaj perlata tarisqa. Chayta rantinanpajtaj tukuy imasninta vendemusqa. Ajinata ruwananpaj, chay perlaqa may valorniyojpunichá kanman karqa.

 4. Diospa Gobiernonta may valorniyojpaj qhawasunchej chay, ¿imatá ruwayta atillasunchej?

⁴ Diospa Gobiernonqa chay sumaj perla jina. Ranqheroqa chay perlata may valorniyojpaj qhawarqa. Noqanchejpis Diospa Gobiernonta may valorniyojpaj qhawasunchej chayqa, kamachiyninpi tiyakunapaj tukuy imasninchejta saqepuyta atillasunchej (Marcos 10:28-30 leey). Chaytataj iskay runas ruwarqanku, paykunamanta parlarina.

 5. ¿Imatataj Zaqueo ruwarqa Diospa Gobiernonrayku?

⁵ Zaqueoqa impuestosta cobrajkunaj kurajninku karqa. Runasta chʼaukiyaspataj qhapajyarqa (Luc. 19:1-9). Zaqueoqa Jesusta uyarerqa Diospa Gobiernonmanta yachachejta. Chay ratotaj repararqa Diospa Gobiernon may valorniyoj kasqanta. Chayrayku chʼaukiyaspa runasmanta orqhosqanta kutichiporqa, niñataj chʼaukiyarqachu. Zaqueo nerqa: “Señor, tukuy kapuwasqanmanta khuskanta wajchasman qopusaj. Sichus pimantapis chʼaukiyaspa qolqenta suwarqani chayqa, tawa jinastawanraj kutichipusaj”, nispa.

 6. ¿Imatataj Rose ruwarqa Diospa Gobiernonrayku?

⁶ Rose sutiyoj warmimanta parlarina. Payqa lesbiana karqa, nisunman uj warmillawantaj casarakunanpaj llojsisharqa. Chantapis uj organizacionmanta presidenta karqa. Chay organizacionqa warmipura chayri qharipura casarakuyta munajkunaj derechosninkuta valechinanpaj kasharqa. Bibliamanta yachakojtintaj Roseqa, repararqa Diospa Gobiernon may valorniyoj kasqanta, kausaynintataj cambianan kasqanta (1 Cor. 6:9, 10). Chayrayku chay organizacionmanta llojsiporqa, llojsisharqa chay warmitapis saqeporqa. Bautizakorqa 2009 watapi, watanmantaj precursora regular karqa. Jehovata mayta munakorqa, Gobiernontataj may valorniyojpaj qhawarqa. Chaytaj yanaparqa aychaj sajra munayninta atipananpaj (Mar. 12:29, 30).

 7. ¿Imamantá qhawarikunanchej tiyan?

⁷ Tukuyninchej Diospa Gobiernonrayku ñaupa kausayninchejta saqeporqanchej (Rom. 12:2). Jinapis qhapajyayta munapayaymanta, aychaj sajra munayninmantapis allinta qhawarikunanchej tiyan. Imaraykuchus chaykunaqa tanqawasunman Diospa Gobiernonta niña valorniyojta jinachu qhawanapaj (Pro. 4:23; Mat. 5:27-29). Diospa Gobiernonta valorniyojpaj qhawanallapajpuneqa, Jehová uj sumaj ruwayta qowarqanchej.

 8. 1) ¿Imaraykutaj Pablo nerqa Diospa Gobiernonmanta willay uj ‘sumaj llankʼay’ kasqanta? 2) ¿Imatataj Pablo ruwarqa Diospa Gobiernonta valorniyojpaj qhawasqanrayku?

⁸ Jesusqa kamachiwarqanchej, Diospa Gobiernonmanta willamunanchejta, yachachimunanchejtataj (Mat. 28:19, 20). Apóstol Pabloqa “tʼuru vasos jinalla” kajtinchejpis, Diospa Gobiernonmanta willayta, uj “sumaj llankʼayta” jina japʼisqanchejta nerqa (2 Cor. 4:7; 1 Tim. 1:12). Arí, Diospa Gobiernonmanta willamusqanchejqa, runasta yanapan salvakunankupaj, jinallataj noqanchejtapis. Chayrayku Pablo nerqa: “Sumaj willaykunarayku tukuy imata ruwani, ajinamanta wajkunaman willanaypaj”, nispa (1 Cor. 9:23). Payqa Diosmanta willamuyta may valorniyojpaj qhawarqa. Chayrayku sonqo kʼajaywan willamorqa, runas Jesuspa yachachisqasninman tukunankupaj (Romanos 1:14, 15; 2 Timoteo 4:2 leey). Chantapis Pabloqa ñakʼarichisqa kashaspa mayta aguantarqa, sumaj willaykunata may valorniyojpaj qhawasqanrayku (1 Tes. 2:2). Imaynatachus Pablo jina ruwananchejta qhawarina.

 9. Diosmanta willayta valorniyojpaj qhawasqanchejrayku, ¿imastá ruwasunman?

⁹ Pabloqa Diospa Gobiernonmanta willayta, may valorniyojpaj qhawasqanrayku mayllapipis kashaspa runasman willarqa. Ñaupa cristianos jina noqanchejpis wasimanta wasi chayri mayllapipis willanchejpuni (Hech. 5:42; 20:20). Tukuy imaymanamanta Diosmanta willamunallapuni. Atejtinchejqa precursores auxiliares jina chayri regulares jina llankʼana, waj parlaytapis yachakuna. Chayri suyunchej ukhupi waj lugarman willaj rina, manachayri waj suyuman (Hech. 16:9, 10).

10. ¿Ima bendicionestataj Irene japʼerqa sonqo kʼajaywan willamusqanrayku?

¹⁰ Irene sutiyoj hermanamanta parlarina. Payqa soltera, Estados Unidospitaj tiyakun. Ireneqa 1993 watapi ruso parlajkunaman Diosmanta willayta qallarerqa. Chay wata Nueva York llajtapi 20 hermanos jinalla ruso parlajkunaman willasharqanku. Chaymantapacha 20 watata jinaña mayta willajtinpis, Ireneqa nirajpuni sutʼitachu rusota parlasqanta nerqa. Irenewan hermanoswan sonqo kʼajaywan willamusqankurayku, Jehová ruwasqankuta bendicerqa. Chayrayku Nueva York llajtapi sojta congregacionesña ruso parlaypi tiyan. Irenewanqa 15 runaspuni Bibliata estudiaytawan bautizakorqanku. Chaykunamanta wakintaj betelitas, precursores, ancianos ima kanku. Irene nin: “Ichapis kausayniypi waj imasta ruwayman karqa. Jinapis Diosmanta willay jinaqa, ni imapis kusichiwanmanchu karqa”, nispa. Arí, Irenepajqa Diosmanta willay, may valorniyoj.

11. ¿Imaraykú qhatiykachasqa kajtinchejpis willamusqanchej may sumaj karqa?

¹¹ Diosmanta willayta valorniyojpaj qhawanchej chayqa, qhatiykachasqa kajtinchejpis Pablo jina willamullasunpuni (Hech. 14:19-22). Estados Unidospi 1930 watamanta 1940 watakama, hermanosninchej qhatiykachasqa karqanku. Jinapis apóstol Pablo jina, sinchʼita sayaspa willamullarqankupuni. Derechosninkuta valechinankupajtaj ashkha kutispi juecespaman chayarqanku. Nathan Knorr hermanoqa 1943 watapi, Tribunal Supremo de Estados Unidos nisqapi, juiciopi atipasqankumanta nerqa: “Hermanosníy mana saqespa willamusqanchejrayku, Tribunal Supremo nisqakama chayarqanchej, chay juiciopitaj atiparqanchej. Kunanqa niña qhatiykachasqachu kasunchej, qankuna, mundontinpi hermanoswan mana saqespa willamusqaykichejrayku. Arí, chaytaj Diospa llajtan sinchʼita sayasqanrayku karqa”, nispa. Diospa llajtan sinchʼita sayasqanrayku waj suyuspipis juiciospi atiparqanchej. Arí, sonqo kʼajaywan Diosmanta willasqanchejrayku, mana willayninchejta sayachiyta atinkuchu.

12. ¿Imatataj sonqo kʼajaywan ruwasunchej?

¹² Diospa Gobiernonmanta willayta valorniyoj perlata jina qhawasunchej chayqa, mana horasta ruwananchejraykullachu predicaj llojsisun. Astawanqa sonqo kʼajaywan “sumaj willaykunata allinta” sutʼinchasunchej (Hech. 20:24; 2 Tim. 4:5). Kunanqa predicacionpi imasmantachus yachachinamanta parlarina.

13, 14. 1) ¿Imamantataj Jesús Mateo 13:52 versiculopi parlarqa? 2) ¿Imastá ruwasunman mosoj imasta yachakunallapajpuni?

¹³ Jehovaqa ‘cheqa Dios’. Payqa may kʼacha tata jina, payta kasukojkunaman cheqa yachachiykunata yachachin. Chay yachachiykunapis may valorniyojllataj kanku (2 Sam. 7:28; Sal. 31:5). Cheqa kajmanta willariwasqanchejmantapacha Bibliata, publicacionestawan leespa astawan cheqa yachachiykunata yachakorqanchej. Jinallataj tantakuykunaman, jatun tantakuykunaman rispapis. Tiemponmantaj ashkha imasta yachakorqanchej. Jesús nerqa jinataj maukʼa imasta mosoj imastawan (Mateo 13:52 leey). Jehovaqa mosoj imasta yachakunanchejpaj yanapallawasunpuni, qolqe pʼampasqata jina maskʼasunchej chayqa (Proverbios 2:4-7 leey). ¿Imaynatá chayta ruwasunman?

¹⁴ Bibliata, publicacionestapis sumajta estudiaspa. Ajinamanta mosoj imasta yachakusunchej (Jos. 1:8, 9; Sal. 1:2, 3). Torremanta Qhawaj revista inglés parlaypi julio de 1879 watapi llojsishajtin, nerqa: “Cheqa kajqa chʼin pampapi uj tʼikita jina. Llulla yachachiykunataj qhora jina, chay tʼikitata pʼampaykunayashan. Chay tʼikitata tarinapajqa, allinta maskʼananchej tiyan; [...] pallayta munanchej chayqa kʼumuykukunanchej tiyan. Mana uj tʼikitallatachu pallakuna. [...] Manaqa astawan astawan maskʼanallapuni”, nispa. Arí, cheqa kajmanta astawan astawan yachakuyta munanallapuni.

15. 1) ¿Ima yachachiykunataj “maukʼa” yachachiykuna jina kankuman? 2) ¿Mayqen yachachiykunatataj aswan valorniyojpaj qhawanki?

¹⁵ Bibliamanta yachakusqanchejmantapacha, valorniyoj yachachiykunata yachakorqanchej. Jehová tukuy imata ruwasqanta yachakorqanchej, runas wiñaypaj kausanankuta munasqantapis. Yachakullarqanchejtaj Jehová mayta munakuwasqanchejrayku Wawanta qosqanta, juchamanta, wañuymantawan kacharichinawanchejpaj. Chantapis Diospa Gobiernon tukuy llakiykunata chinkachinanta, allin kausaytataj apamunanta yachakorqanchej (Juan 3:16; Apo. 4:11; 21:3, 4). Chaykunata qallariypi yachakusqanchejrayku “maukʼa” yachachiykuna jina kankuman, jinapis may valorniyojllapuni kanku.

16. ¿Imatá ruwananchej tiyan ima yachachiypis waj jinamanta sutʼinchakojtin?

¹⁶ Publicacionespi wakin kuti, uj profeciata chayri Bibliamanta uj versiculota imaynatachus entiendesqanchejta waj jinamanta sutʼinchakorqa. Ajinallatataj waj versículos waj jinamanta sutʼinchakamojtenqa, tiempochakunanchej tiyan chayta sumajta estudianapaj, tʼukurinapajpis (Hech. 17:11; 1 Tim. 4:15). Chantapis sutʼita sumajtataj entiendenanchej tiyan, imaynatachus chay profecía ñaupajta sutʼinchakusqanta, imaynatatajchus kunan sutʼinchakushasqantapis. Ajinata ruwasun chayqa, chay yachakusqanchejqa may valorniyoj noqanchejpaj kanqa, nitaj qhasipajchu kanqa.

17, 18. ¿Imaynatá Jehová atiyninwan yanapawanchej?

¹⁷ Jesusqa nerqa, Diospa atiynin imatachus yachakusqanchejta yuyarichiyta atiwasqanchejta (Juan 14:25, 26). ¿Imaynatá Dios atiyninwan predicacionpi yanapawasunman? Peter hermanomanta parlarina. Payqa 1970 watapi 19 watasniyoj kasharqa, chaypachallarajtaj Gran Bretaña suyupi Betelman sirvej yaykorqa. Pay nerqa: “Uj kuti, wasimanta wasi predicashajtiy, barbasniyoj runa llojsimorqa, 50 watasniyoj jinataj karqa. Tapurerqanitaj, ‘¿Bibliamanta yachakuyta munawajchu?’, nispa. Chay runaqa yachachej judío kasqa. Tʼukusharqataj noqa Bibliata yachachiyta munasqaymanta. Chayrayku niwarqa: ‘A ver niway, ¿ima parlaypitaj Daniel libro qhelqakorqa?’, nispa. Noqataj nerqani: ‘Wakin partesqa arameo parlaypi qhelqakorqa’, nispa. Chay judioqa allinta kutichisqaymanta tʼukushaj qhepakorqa, noqapis yuyarikusqaymanta. Maypichus chayta leesqayta ni yuyarikorqanichu. Wasiyman kutejtiytaj, chay kutillaraj llojsimoj Torremanta Qhawaj, ¡Despertad! revistasta qhawaykorqani, tarerqanitaj uj yachaqanata maypichus sutʼinchasharqa Daniel libro arameo parlaypi qhelqakusqanta”, nispa (Dan. 2:4). Jehovaqa atiyninwan yanapawasunman, imastachus leesqanchejta yuyarikunapaj (Luc. 12:11, 12; 21:13-15).

¹⁸ Jehová yachachiwasqanchejta sonqonchejpi waqaychasun chayqa, sonqollanchejtaj aysawasunchej paymanta astawan yachakunapaj. Chantapis Jehová yachachiwasqanchejmanta agradecesqa kasunchej, aswan valorniyojpajtaj qhawasunchej. Wajkunaman yachachinapajtaj allin wakichisqa kasunchej.

19. ¿Imaraykú Jehová yachachiwasqanchejta may valorniyojpaj qhawanallanchejpuni tiyan?

¹⁹ Kuraj Supay, sajra mundon ima, tukuy imata ruwashanku Diospa Gobiernonta, Gobiernonmanta willayta, Palabranmanta cheqa yachachiykunatawan manaña valorniyojpaj qhawananchejpaj. Mana allinta qhawarikojtinchejqa qolqeta munapayaypi, ñawispa rikusqanta munapayaypi, kapuyninchejmanta runaykachaypi ima urmasunman. Apóstol Juan nerqa kay mundo tukukapushasqanta, jinallataj sajra munayninpis (1 Juan 2:15-17). Chayrayku mayta kallpachakunanchej tiyan, imastachus Jehová qowasqanchejta may valorniyojpaj qhawanallapajpuni.

20. ¿Imatá ruwananchej tiyan Jehová qowasqanchej imasta may valorniyojllapajpuni qhawanapaj?

²⁰ Imaschus Diospa Gobiernonta pisipaj qhawanapaj tanqawasunman chaykunata qhesachana. Sonqo kʼajaywan willamunallapuni, willayninchejtataj may valorniyojpaj qhawana. Chantapis Bibliamanta astawan yachakunallapuni. Ajinamanta cielopi “valorniyoj imasta” tantashasunman jina kanqa, maymanchus mana ‘suwa chayanchu, nitaj thutapis kʼutunchu’. Jesús nerqa jinataj, ‘maypichá valorniyoj imasninchej kashan, chayllapitaj sonqonchejpis kanqa’ (Luc. 12:33, 34).