Milagrosta ruwajtinpis, Nazaretpi qhesachanku

Jesusqa Decapolismanta Capernaum llajtaman kutiytawan, uj diallapi ashkha imasta ruwarqa. Yawar apayniyoj warmita sanoyacherqa, Jairoj imillitantapis kausaricherqa. Chantá Jairoj wasinmanta ripushajtin, iskay ciegos qhaparispa, qhepanta rerqanku: “Davidpa Wawan, khuyarikuwayku ari”, nispa (Mateo 9:27).

Paykunaqa yacharqanku Jesús Davidpa cuentanmanta kamachinanta, Mesiastaj kasqanta. Chayrayku Jesusta “Davidpa Wawan” nerqanku. Jesustajrí paykunata mana kasorqachu. Imaraykuchus yachayta munarqa creeyniyojchus manachus kasqankuta. Jesús uj wasiman yaykojtintaj, chay ciegosqa Jesuspa qhepanta yaykorqanku. Chaypitaj Jesús paykunata taporqa: “¿Creenkichejchu, qankunata sanoyachiyta atinayta?”, nispa. Paykunataj mana iskayrayaspa kuticherqanku: “Arí Señor”, nispa. Chantá Jesusqa ñawisninkuta llankharispa nerqa: “Creesqaykichejman jina ruwasqa kachun”, nispa (Mateo 9:28, 29).

Chay ciegospa ñawisninkutaj kicharikorqa. Chantá Jesusqa paykunata nerqa: “Amapuni pipis kayta yachachunchu”, nispa. Jesusqa pikunatachus sanoyachej chay runasman ajinatapuni nej. Chay ciegostajrí, may kusisqa kasqankurayku tukuy chay qaylla llajtaspi Jesusmanta willarqanku.

Chay iskay ciegos sanoyapuytawan ripushajtinkutaj, runasqa uj supayniyoj opitata Jesusman pusamorqanku. Jesús chay runamanta supayta qharqojtintaj, opitaqa parlarerqa. Runastaj chayta rikuspa tʼukusharqanku: “Ni jaykʼaj Israelpi kay jinaqa rikukorqachu”, nispa. Fariseospis chayllapitaj kasharqanku. Paykunaqa Jesuspa milagrosninta mana negayta atispa nerqanku: “Kay runaqa supaykunata qharqon supaykunaj kamachejninkoj atiyninwan”, nispa (Mateo 9:33, 34).

Chaymanta qhepaman, Jesusqa Nazaret llajtanman yachachisqasninwan khuska kuterqa. Payqa llajta masisninta watejmanta yanapariyta munarqa. Imajtinchus uj wata ñaupajta Nazaret sinagogapi yachacherqaña. Chay kutipi, runasqa yachachisqanmanta tʼukorqanku, jinapis phiñarikuytawan Jesusta wañuchiyta munarqanku.

Jesusqa Nazaretman kutispa Samarikuna Pʼunchaypi sinagogaman rerqa. Chaypitaj yachacherqa. Runasqa mayta tʼukuspa nerqanku: “¿Maypitaj kay runa chay jina yachayta tarimorqari? ¿Pitaj atiyta qorqa kay milagrosta ruwananpajri? ¿Manachu kayqa carpinteroj wawan? ¿Manachu mamanpis María sutikun? ¿Manachu hermanosninpis Santiago, José, Simón, Judas ima kanku? ¿Manachu hermanasninpis kay llajtapi tiyakunku? Chantá, ¿imaynapitaj kay runa chay imasta ruwayta atinri?”, nispa (Mateo 13:54-56).

Chay runasqa Jesusta mana Diospa Wawanta jinachu qhawarqanku. Jesús milagrosta ruwajtinpis, sumaj yachayniyoj kajtinpis, paykunaqa yuyarqanku: “Rejsisqa runallaqa. ¿Imaynapitaj Mesías kanmanri?”, nispa. Chayta nispataj Jesusta qhesachasharqanku. Chantapis Jesustaqa familiaresninpis qhesachallarqankutaj. Chayrayku pay nerqa: “Uj profetaqa tukuynejpi allinpaj qhawasqa, llajtallanpi, wasillanpi mana”, nispa (Mateo 13:57).

Jesusqa tʼukorqa llajta masisnin mana creesqankumanta. Chayrayku wakin onqosqasllata Nazaretpi “sanoyacherqa paykunaman makisninta churaykuspa” (Marcos 6:5, 6).