Munakuywan chʼampaykunata allinchana

1, 2. 1) ¿Ima chʼampaykunamantataj Génesis libroj ñaupaj capitulosnin parlashan? 2) ¿Imaraykú Biblia chay chʼampaykunamanta parlan?

¿MAYKʼAJLLAPIS tʼukurerqankichu ñaupa tiempomanta runas ima chʼampaykunapichus rikukusqankupi? Sutʼincharinapaj, Génesis libroj ñaupaj capitulosnillanpi leenchej: Caín, Abelta wañuchisqanta (Gén. 4:3-8); Lamectaj uj waynata sajmasqanrayku wañuchisqanta (Gén. 4:23); Abrahampa uywasninta michejkunanwan, Lotpa uywasninta michejkunanwan maqanakusqankuta (Gén. 13:5-7); Agar, Saramanta nisqa aswan sumaj warmi kasqanta creekusqanta, Sarataj Abrahamwan phiñakusqanta (Gén. 16:3-6); Ismael tukuywan maqanakusqanta, paywanpis tukuy maqanakusqankuta ima (Gén. 16:12).

² ¿Imaraykú Biblia chay chʼampaykunamanta parlan? Chay runaspa chʼampayninkumanta yachakunanchejpaj. Noqanchejpis paykuna jinallataj pantaj runas kanchej. Kikin chʼampaykunasniyoj kaspataj, allin kajta ruwaj runas jina ruwananchej tiyan, nitaj sajra kajta ruwaj runas jinachu (Rom. 15:4). Ajinamanta wajkunawan allinta kausakuyta yachakusunchej.

 3. ¿Imatataj kay yachaqanapi yachakusunchej?

³ Kay yachaqanapi yachakusunchej imaraykuchus, chantá imaynatachus chʼampaykunasninchejta allinchana kasqanta. Chantapis chʼampaykunasninchejta allinchanapaj, Jehovawan, runa masinchejwan allinpi kanapaj ima Bibliaj ashkha yuyaychaykunasninta qhawarillasuntaj.

 4. 1) ¿Imaynatá kay pachamanta runas yuyanku? 2) ¿Imatataj chay jina yuyay apamun? Sutʼinchay.

⁴ Satanás juchayoj, runas tʼaqanakunankupaj, ashkha chʼampaykunasniyoj kanankupaj ima. Edén huertapi payqa, sapa ujninchej Diospa mana yanapaynillanwan imachus allin, imatajchus mana allin kasqanta ajllayta atinanchejta nerqa (Gén. 3:1-5). Chaywanpis imaynachus kay pacha kashasqanta qhawaspaqa, chay jina yuyayqa chʼampaykunallata apamusqanta rikunchej. Ashkha runasqa yuyanku paykuna kikinkumanta imachus allin, imatachus mana allinchu kasqanta ajllayta atisqankuta. Ajinata yuyaj runasqa jatunchakunku, paykunallapi yuyanku, atipanakupi jina kanku, imatachus ajllasqanku wajkunaj sonqonkuta nanachinanmantapis mana llakikunkuchu. Chay jina yuyayqa chʼampaykunata rikhurichin. Bibliaqa yuyarichiwanchej usqhayllata phiñakojtinchej, wajkunawan chʼampaykunallapi kananchejta, juchallikunanchejta ima (Pro. 29:22).

 5. ¿Imastá Jesús yuyaycharqa, chʼampaykunata allinchanapaj?

⁵ Jesusqa yachachisqasninman tukuywan allinta kausakuyta maskʼanankuta yachacherqa, chayta ruway wakin kutis mana allinninkupajchu kajtinpis. Orqopi yachachishaspataj wajkunawan allinta kausakunankupaj sumajta yuyaycharqa. Sutʼincharinapaj, nerqa kʼachas kanankuta, wajkunawan allin kausayta maskʼanankuta, mana phiñakunankuta, chʼampayninkuta usqhayllata allinchanankuta, enemigosninkuta munakunankuta ima (Mat. 5:5, 9, 22, 25, 44).

6, 7. 1) ¿Imaraykutaj usqhayllata wajkunawan chʼampayninchejta allinchananchej tiyan? 2) ¿Imastá tapurikunanchej tiyan?

⁶ Kay tiempopi Jehovata yupaychanchej paymanta mañakuspa, willamuspa, tantakuykunaman rispa ima. Hermanosninchejwan mana allinta kausakojtinchejqa, Jehovata yupaychasqanchej qhasilla kanqa (Mar. 11:25). Jehovaj amigosnin kayta munanchej chayqa, wajkuna pantajtinku perdonananchej tiyan (Lucas 11:4; Efesios 4:32 leey).

⁷ Jehovaqa munan noqanchejpura perdonanakunanchejta, allinta kausakunanchejta ima. Tapurikunataj: “¿Nichu hermanosta perdonayta atillani? ¿Paykunawan khuska kayta munanichu?”, nispa. Mana perdonayta atillanchejchu chayqa, Jehovamanta yanapata mañakuna. Imaraykuchus payqa mañakusqanchejta uyariwasunpuni (1 Juan 5:14, 15).

8, 9. ¿Imatataj ruwasunman pillapis sonqonchejta nanachiwajtinchej?

⁸ Pantaj runas kasqanchejrayku, ichá pillapis nenqa chayri ruwanqa sonqonchejta nanachinawanchejpaj jina (Ecl. 7:20; Mat. 18:7). ¿Imatá ruwasun ajinapi rikukuspa? Uj hermana iskay hermanoswan parlarisqanpi tʼukurina. Imaynatachus chay hermana parlasqanqa ujnin hermanota phiñacherqa. Chay hermanos iskaynillanku kashaspataj, phiñakoj hermanoqa hermanamanta quejakuyta qallarerqa. Ujnin hermanotaj yuyaricherqa chay hermana chʼampaykunapi rikukuspapis, Jehovata 40 watastaña cheqa sonqo sirvisqanta. Nitaj sonqonta nanachiyta munaspapunichu chayta parlasqanta. Phiñasqa hermanotaj tʼukurispa nerqa: “Razonniykipi kashanki”, nispa. Chayrayku chaymanta qonqaporqa.

⁹ ¿Imatataj chaymanta yachakunchej? Pillapis sonqonchejta nanachiwajtinchej, imatachus ruwayta ajllayta atinchej. Munakuyniyoj kasun chayqa perdonayta atillasun (Proverbios 10:12; 1 Pedro 4:8 leey). “Phiñakuyta qonqayman chura[jtinchej]” Jehovaqa chayta may allinpaj qhawan (Pro. 19:11; Ecl. 7:9). Chayrayku pillapis sonqonchejta nanachinawanchejpaj jina imatapis nejtin chayri ruwajtin, tapurikuna: “¿Chay niwasqanta qonqapuymanchu? ¿Allinchu kanman imatachus niwasqanpi tʼukurinallaypuni?”, nispa.

10. 1) ¿Imaynataj Lucy kasharqa wajkuna paymanta mana allintachu parlajtinku? 2) ¿Bibliamanta ima yuyaychaytaj yanaparqa sonqo tiyasqa kananpaj?

¹⁰ Pillapis mana allintachu noqanchejmanta parlajtin, ichá mana perdonayta, qonqayta ima atillanchejchu. Ajinapi rikukorqa Lucy sutiyoj uj precursora. Payqa sonqo nanasqa kasharqa wakin hermanos imaynatachus willasqanmanta, imaynatachus tiemponta apaykachasqanmanta ima, mana allintachu parlasqankurayku. Chayraykutaj wiñay tukusqa hermanospa yanapayninta mañakorqa. Lucy nin: “Paykunaqa Bibliawan hermanosmanta mana sajrata yuyanaypaj, astawanqa Jehová imatachus yuyasqanpi yuyanaypaj ima yanapawarqanku”, nispa. Payqa Mateo 6:1-4 (leey) versiculosta leespa, may kallpachasqa kasharqa. Kay versiculosqa yuyaricherqa Jehovata kusichiy, aswan sumaj kasqanta. Chayrayku paymanta imatachus parlasqankuta qonqaporqa. Pay nillantaj: “Wajkuna imaynatachus willasqaymanta mana allintachu parlajtinkupis, Jehovata kusichinaypaj tukuy atisqayta kallpachakushasqaymanta may kusisqa kashani”, nispa.

11, 12. 1) ¿Imatá ruwananchej tiyan mayqen hermanollapis sonqonchejta nanachiwajtinchej? 2) ¿Imatá yachakunchej Abraham imaynatachus uj chʼampayta allinchasqanmanta? (3 paginapi dibujota qhawariy.)

¹¹ Bibliaqa “tukuyninchej ashkha kutita panta[sqanchejta]” nin (Sant. 3:2). Uj hermano chayri uj hermana imatachus nisqanchejmanta, ruwasqanchejmanta phiñakusqanta yachasqanchejpi tʼukurina. ¿Imatá chay kutipi ruwasunman? Jesús nerqa: “Altarman jaywanaykita apashaspachus yuyarikuwaj wawqeyki qampaj phiñasqa kasqanta chayqa, altarpa ñawpaqenman jaywanaykita saqey. Ñawpajta wawqeykiwanraj allinyakamuy. Chaymanta kutimusparaj, apamusqaykita Diosman jaywayta atinki”, nispa (Mat. 5:23, 24). Jesuspa yuyaychasqanman jina ruwana, chay hermanowantaj chayri hermanawantaj parlarina. Chaywanpis mana qonqanachu tiyan imaraykuchus paywan parlariyta munasqanchejta. Parlarishaspaqa mana paypuni juchayoj kasqanta ninanchejchu tiyan, manaqa noqanchej pantaykusqanchejta ninanchej tiyan, allinyakuytataj maskʼananchej tiyan. Imaraykuchus hermanosninchejwan allinpi kay aswan sumaj imamantapis.

¹² Bibliaqa yachachiwanchej uj hermanowan chʼampayninchej kajtin, imaynatachus kʼachata kausakunallatapuni. Qhawarinachej Abrahampa, sobrinon Lotpa kausayninkuta. Paykunaqa ashkha uywasniyoj karqanku. Uywasninkuta michejkunasninkutaj mayta churanakuspa maqanakorqanku, maypichus kasharqanku chay cheqa pisilla kasqanrayku. Abraham, sobrinonwan allinta kausakuyta munasqanrayku, saqerqa sumaj jallpʼasta ajllakunanta (Gén. 13:1, 2, 5-9). Cheqamantapuni Abrahammanta, ¡mayta yachakusunman! Kʼacha kasqanrayku mana allin jallpʼaswan qhepakuspapis, payqa mana ñakʼarerqachu. Imaraykuchus Jehová chay ratopacha payman nerqa kapusqanmanta astawanraj qonanta (Gén. 13:14-17). ¿Imatataj Abrahammanta yachakusunman? Munakuywan ima chʼampaytapis allinchasun chayqa, kapuwasqanchejmanta astawanraj Jehová qowasun.^[1]

13. 1) ¿Imatá ruwarqa encargado hermano, uj hermano phiñarparikojtin? 2) ¿Imatá chaymanta yachakusunman?

¹³ Kunantaj imachus kay tiempopi rikukusqanta qhawarina. Sutʼincharinapaj, jatun tantakuypi uj llankʼaymanta encargado hermano, uj hermanota wajyarerqa chay llankʼaypi yanapakuyta atisqantachus manachus tapurinanpaj. Hermanotaj may phiñasqa kuticherqa, telefonontapis apagarparqa. Chay hermanoqa ajina kasharqa chay llankʼaymanta ñaupaj encargado hermanowan phiñasqallapuni kashasqanrayku. Wajyarej hermanotaj mana phiñakorqachu, imaraykuchus ajinata kutichisqantataj yachayta munarqa. Chayrayku uj horamanta jina watejmanta wajyarispa, paywan parlarinankupaj tinkunankuta nerqa. Uj semananmantaj Tantakuna Wasipi, Diosmanta mañakuytawan uj horatapuni parlarerqanku. Phiñasqa hermanoqa, ñaupaj encargadowan ima chʼampaychus kasqanmanta willarerqa. Chay wajyarej hermanotaj kʼachamanta uyarerqa, Bibliamanta wakin versiculostataj leeriporqa. Chayta ruwasqankurayku mana phiñanakorqankuchu, jatun tantakuypitaj khuska llankʼarqanku. Phiñakoj hermanoqa mayta agradecekun, encargado hermano kʼachamanta, mana phiñakuspa parlarisqanmanta ima.

14, 15. 1) ¿Maykʼajtaj Mateo 18:15-17 nisqanman jina ruwananchej tiyan? 2) ¿Imastataj Jesús ruwananchejta nerqa? 3) ¿Imapajtaj chaykunata ruwananchej tiyan?

¹⁴ Casi tukuy chʼampaykunasninchejtaqa contranchejpi juchallikojllawan allinchananchej tiyan. Jinapis wakin kutis chayta ruway mana atikullanchu. Chayrayku Jesús nerqa chʼampaykunata allinchanapaj wakin kutis hermanospa yanapayninta necesitakusqanta (Mateo 18:15-17 leey). Jesús nisqanman jina, ¿imataj kanman ‘juchallikoj’ mana uyariwajtinchej, testigospa nisqankuta mana uyarejtin, congregaciontapis mana kasojtin? “Mana creej runata jina, chayri impuesterota jinallaña qhawa[na]” tiyan. Kay tiempopi chayqa, ninayanman congregacionmanta qharqoywan. Chay ‘juchallikoyqa’ kanman chʼaukiyay, llullakuy ima. Jinapis kay juchallikuymanta parlaspaqa mana parlashanchejchu qhenchachakuymanta, qharipura chayri warmipura khuchichakuymanta, Diosta wasanchaymanta chayri santosta yupaychaymanta. Imaraykuchus chaykunataqa ancianospuni allinchananku tiyan.

¹⁵ ¿Imaynatá Jesuspa yuyaychasqanman jina ruwasunman? Ñaupajtaqa, hermanonchejwan allinyakuyta maskʼananchej tiyan, niraj ni piman willashaspa. Ichapis chaypajqa ashkha kutista paywan parlarinanchej kanqa. Manapuni allinyakuspataj, pikunachus chay chʼampaymanta yachanku chaykunawan khuska chay hermanowan parlananchej kanqa chayri wajkunawan khuska chay hermanowan parlarisunman ruwasqan juchapunichus manachus kasqanta sutʼinchanankupaj. Chay hermanowan allinyakuspataj Jesús nisqanman jina cheqan ñanman kutirichinchej. Ashkha kutistaña chay hermanowan parlaspa, nipuni allinyakunchejchu chayqa, ancianoswan parlarinanchej tiyan. ¿Imapajtaj chaykunata ruwananchej tiyan? Jesús yachachisqanman jina, hermanonchejta munakusqanchejrayku yanapananchejpaj (Mat. 18:12-14).

16. ¿Imaraykú Jesuspa yuyaychasqanman jina ruway may sumaj?

¹⁶ Wakin kutislla Mateo 18:15-17 versículos nisqanman jina chay kinsa imasta ruwana tiyan. Chayta yachaytaj mayta kallpachawanchej. Imaraykuchus casi tukuy juchallejkunaqa pantaykusqankuta reparanku, chʼampayninkuta allinchanku, nitaj congregacionmanta qharqochikunkuchu. Sonqo pʼakisqa kajpis, payta perdonanan tiyan, allinta kausakunankupaj. Jesuspa yuyaychasqanqa sutʼita rikuchiwanchej, pillapis sonqonchejta nanachiwajtinchej mana usqhayllata ancianosman willamunachu kasqanta. Manaqa Jesús nisqanman jina chay iskay imasta ruwaspalla, hermano pantakusqantapuni reparaspa imalla ancianosman willana.

17. Allinyakuyta maskʼasunchej chay, ¿imastataj japʼisunchej?

¹⁷ Juntʼa runa kananchejkama, ichá wajkunaj contranpi imatapis ruwasunchej. Santiago nerqa: “Pichus parlasqampi mana pantajqa, chaymá Cristopi sumaj wiñasqa runaqa, atillanmantaj tukuy cuerponwan kasuchikuyta”, nispa (Sant. 3:2). Chʼampayninchejta allinchanapajqa ‘tukuywan allinta kausakuyta maskʼana, chaytataj qhatina’ tiyan (Sal. 34:14). Wajkunawan allinyakullasunpuni chayqa, hermanosninchejwan sumaj amigos kasunchej, chaytaj ujchasqa kanapaj yanapawasunchej (Sal. 133:1-3). Astawanraj “sonqo tiyaykuyta qoj” Jehová Dioswan sumaj amigos kasunchej (Rom. 15:33). Munakuywan chʼampaykunata allinchasun chayqa, tukuy chaykunata japʼisunchej.