‘Manchay ñakʼariypi’ amapuni Jehovamanta karunchakunachu

1, 2. 1) ¿Imatataj gobiernos tumpamantawan nenqanku? 2) ¿Ima tapuykunamantaj kutichisun?

GOBIERNOSQA tumpamantawan “tukuy imapis allillan, ni imamanta llakikuna kanchu” nispa nenqanku. Chay tiempo chayamusqanpiña piensarina. Paykunaqa ichapis nenqanku, mundontinpi ni jaykʼaj jina allin kausay kasqanta. Creechiytataj munawasun kay mundomanta problemasta allinchayta atisqankuta. Jinapis imachus chay qhepata jamunan kashan, chay chayamojtenqa ni imanakuyta atenqankuchu. ¿Imaraykutaj chayta ninchej? Imaraykuchus Bibliaqa nin: “Chaypacha paykunaj tukukuyninkoqa ujllata chayamonqa, [...]. Paykunataj manapuni ayqeyta atenqankuchu”, nispa (1 Tes. 5:3).

² Chayrayku may allinpuni kay tapuykunaman kutichinanchej: ¿Imataj kanqa “manchay ñakʼariy” tiempopi? ¿Imatataj Jehová Dios chay tiempopi ruwananchejta munanqa? Chay tiempopi sinchʼita sayanapaj, ¿imastataj kunanmantapacha ruwananchej tiyan? (Mat. 24:21).

 3. Apocalipsis 17:5, 15-18 nisqanman jina, ¿imaynatá Jehová Dios ‘Jatun Babiloniata’ chinkachenqa?

³ (Apocalipsis 17:5, 15-18 leey). ¡“Jatun Babilonia” chinkachisqa kanqa! ¿Imaynatá chinkanqa? Jehová Diosqa, gobiernospa “sonqonkuman churanqa paypa munayninta ruwanankupaj”. ¿Imataj chay munaynin? Tukuy llulla religiones, jinallataj cristiano nichikojkunapisb chinkachisqa kananku. Diosqa tukuy chay llulla religionesta “puka millay phiña animalpa” ‘chunka wajrasninwan’ chinkachenqa. “Millay phiña” animalqa, Naciones Unidas (ONU) nisqawan ninakun. ‘Chunka wajrasnintaj’, chay organizacionta yanapaj gobiernoswan ninakun (Apo. 17:3, 11-13; 18:8). Gobiernos llulla religionesta chinkachinankupaj oqharikojtinku, “manchay ñakʼariy” tiempo qallarenqa. Chay ruwasqankutaj tʼukunapaj jina, mancharinapaj jinataj kanqa.

 4. 1) ¿Ima nispataj gobiernos ‘Jatun Babiloniata’ chinkachinankupaj oqharikonqanku? 2) Pikunachus llulla religionespi karqanku chaykuna, ¿imatá niña yachayta munanqankuchu?

⁴ ¿Ima nispataj gobiernos ‘Jatun Babiloniata’ chinkachinankupaj oqharikonqanku? Mana yachanchejchu. Ichapis nenqanku: “Allin kausay mana kananpaj religiones juchayoj kanku. Politicamantaj anchata satʼikunku”, nispa. Chayrí nenqanku: “Paykunaqa manchayta qhapajyaykunku, tukuy imayojtaj kanku”, nispa (Apo. 18:3, 7). Gobiernos ‘Jatun Babiloniata’ chinkachishajtinku, ichapis llulla religionesllata chinkachenqanku, manataj chay religionespi kaj runastachu. Chayrayku nisunman llulla religiones chinkachisqa kajtinku, chay religionespi kajkunamanta ashkhas mana wañunankuta. Paykunataj reparanqanku pastoresninku, tata curasninkupis ni imapi yanapasqankuta. Chayrayku ichapis religionninkumanta niña yachayta munanqankuchu.

 5. ¿Imatataj Jehová Dios niwanchej manchay ñakʼariy tiempomanta?

⁵ Bibliaqa mana ninchu, “Jatun Babilonia” mashkha unaypichus chinkachisqa kananta. Jinapis pisi tiempollapi chinkachisqa kananta nisunman (Apo. 18:10, 21). Jehová Diosqa niwanchej, manchay ñakʼariy tiempota ‘ajllasqasninrayku’, llajtanta salvananrayku ima ‘pisiyachinanta’ (Mar. 13:19, 20). Jinapis “manchay ñakʼariy” qallarisqanmantapacha Armagedonkama, ¿imatá Jehová Dios ruwananchejta munanqa? Chayta qhepan parrafospi yachakusun.

 6. ¿Imata ruwananchejtataj Jehová Dios munan?

⁶ Ñaupaj yachaqanapi yachakorqanchej jina, Jehová Diosqa Jatun Babiloniamanta tʼaqakunanchejta munan. Jinapis mana chayllatachu ruwananchej tiyan, manaqa Jehová Diosta sirvinallanchejpuni tiyan. Qhepan parrafospi imaynatachus chayta ruwanata yachakusun.

 7. 1) ¿Imaynatá Jehová Dios llimphu kausayniyoj kanata kamachiwasqanchejta kasukusunman? 2) Hebreos 10:24, 25 nisqanman jina, ¿imaraykutaj hermanosninchejwan khuska tantakunapuni tiyan?

⁷ Ñaupajtaqa, Jehová Dios llimphu kausayniyoj kanata kamachiwasqanchejta kasukuna tiyan. Noqanchejqa kay mundomanta runaspa millay kausayninkuta, ni jaykʼaj allinpaj qhawasunmanchu. Chayrayku tukuy clase khuchichakuy juchata chejnikunchej. Chay millay juchas ukhupi kashan, warmipura chayri qharipura casarakuy, chayman rijchʼakoj ruwaykuna ima (Mat. 19:4, 5; Rom. 1:26, 27). Chantapis Jehová Diosta hermanoswan khuska yupaychanallapuni tiyan. Chaytataj ruwanchej Tantakuna Wasispi, hermanospa wasisninkupi, pakayllamanta waj lugarespiwan. Ima kajtinpis, Diosta yupaychanapaj tantakuytaqa manapuni saqenachu tiyan, astawanraj “Diospa pʼunchaynin qayllamushasqanta” yachasqanchejrayku (Hebreos 10:24, 25 leey).

 8. ¿Imatá manchay ñakʼariy tiempopi ichá willamusun?

⁸ Manchay ñakʼariy tiempopeqa, ichapis manaña Diospa Gobiernonmanta sumaj willaykunatachu willasun, niñataj runastapis Jesuspa yachachisqasninman tukuchimusunchu. Chay tiempopi willayninchejqa, ichapis runasta phiñachinanpaj jina kanqa. Bibliaqa chay willayta jatuchaj granizoswan kikinchan (Apo. 16:21). Ichapis willamusun, “Satanaspa mundon chinkachisqaña kanqa” nispa. Jinapis imatapunichus willananchejta, imaynatatajchus willananchejtaqa aswan qhepamanraj yachasun. Pasaj 100 wataspi imaynasmantachus willarqanchej, ¿ajinallatatajchu willasun? Chayta yachanapajqa suyakunanchejraj kanqa. Imayna kajtinpis, Jehová Diospa juchachana willaynintaqa mana manchachikuspa willamusun (Eze. 2:3-5).

 9. 1) ¿Imatataj gobiernos ruwayta munawasunchej? 2) ¿Imatataj Jehová Dios qowasunpuni?

⁹ Gobiernosqa ichapis juchachana willayta willasqanchejrayku chinkachiyta munawasun. Imaynatachus kay tiempopi predicanapaj Jehová Dios yanapanawanchejpi atienekunchej, ajinallatataj chaypacha atienekunanchej kanqa. Jehová Diosqa munayninta juntʼanapaj kallpata qowasunpuni (Miq. 3:8).

10. Lucas 21:25-28 nisqanman jina, ¿imaynataj runas manchay ñakʼariy tiempopi kashanqanku?

¹⁰ (Lucas 21:25-28 leey). Kay tiempopi runasqa politicospi, qolqepi, kay mundoj waj imasninpiwan atienekunku. Jinapis manchay ñakʼariy tiempopeqa, chaykuna paykunata ni imapi yanapanqachu. Chayta rikuspataj runasqa mancharikonqanku, maytataj phutikonqanku. Chay tiempoqa ni jaykʼaj jina manchay llakiypuni kanqa. Runastaj kausayninkumanta llakikonqanku (Sof. 1:14, 15). Ichapis kausayqa mana runasllapajchu aswan llakiy kanqa, manaqa noqanchejpajpis. Mana kay mundomanta runas jinachu kasqanchejrayku, ichapis ñakʼarisunchej. Mikhuna chayri waj imaspis ichá pisiwasun.

11. 1) ¿Imaraykutaj naciones chinkachiyta munawasun? 2) ¿Imaraykutaj manchay ñakʼariyta mana manchachikunanchejchu tiyan?

¹¹ Tukuy llulla religiones chinkachisqa kasqankutawan, noqallanchejña qhepakusun. Chayrayku chay religionesmanta runasqa, noqanchejpaj manchayta phiñakonqanku. Ichapis paykunaqa tukuynejpi noqanchejpaj chʼajwanqanku, Internetpipis. Naciones, kamachejninku Satanaspis, religionnillanchejña sayashasqanmanta manchayta chejnikuwasunchej. Paykunaqa tukuy religionesta chinkachisqankuta yuyaspapis, Jehovaj testigosninta mana chinkachisqankuta reparanqanku. Chayrayku noqanchejtañataj chinkachiyta munawasun. Chaypachataj nacionesqa Magogmanta Gogman tukonqanku.c Paykunaqa noqanchejta chinkachinawanchejpaj ujchaykukonqanku, tukuy atiyninkuwantaj contranchejpi oqharikonqanku (Eze. 38:2, 14-16). Chaypacha imaspunichus kananta mana yachasqanchejrayku, ichapis tumpata llakikunchej. Jinapis manchay ñakʼariytaqa mana manchachikunanchejchu tiyan. Imaraykuchus Jehová Diosninchej niwasun, salvakunanchejpaj imatachus ruwananchejta (Sal. 34:19). Chaypachaqa umanchejta oqharispa cheqanta sayaykusun. Imaraykuchus yachasun ‘kacharichisqa kananchejqa’ qayllapiña kasqanta.d

12. ¿Imaynatataj “allin kamachi yuyayniyoj” manchay ñakʼariy tiempopaj wakichishawanchej?

¹² ‘Allin kamachi yuyayniyojqa’, manchay ñakʼariy tiempopi sinchʼita sayananchejpaj wakichishawanchejña (Mat. 24:45). Chaytataj tukuy imaymanamanta ruwashan. Chaykunamanta ujqa kashan, 2016 watamanta 2018 watakama kinsa pʼunchaypaj jatun tantakuykuna. Chay tantakuykunapeqa, Jehovaj pʼunchayninpaj wakichikunapaj imastachus ruwanata yachakorqanchej. Qhepan parrafospitaj yachakusqanchejta uj chhikanta yuyarikusun.

13. 1) ¿Imatataj ruwasunman manchay ñakʼariy tiempopi sinchʼita sayanapaj? 2) ¿Imaraykutaj kunanña Jehovamanta sumajta japʼikunanchej tiyan?

¹³ Jehovamanta sumajta japʼikuna. 2016 watapi kinsa pʼunchaypaj jatun tantakoyqa sutikorqa: “Jehovata amapuni saqenachu”. Chay tantakuypi yachakorqanchej, Jehová Diospa qayllallanpipuni kaspaqa, sinchʼita sayananchejta. Yuyarichiwarqanchejtaj Jehovaman qayllaykusqanchejta, paymanta tukuy sonqo mañakuspa, Bibliata sapallanchejpi sumajta estudiaspa ima. Chayta ruwaspaqa ima problematapis, atipayta atisunchej. Satanaspa mundonpa tukukuynin qayllapiña kasqanrayku, runasqa tukuy imata ruwanqanku Jehová Diosta niña yupaychananchejpaj, Gobiernonta qhesachananchejpaj ima. Paykunaqa ichapis asipayallawasunpuni (2 Ped. 3:3, 4). Chaytataj ruwanqanku, mana kay mundoman satʼikusqanchejrayku. Manchay ñakʼariy tiempopi sinchʼita sayanapajqa, kunanña Jehovamanta sumajta japʼikunanchej tiyan.

14. 1) Manchay ñakʼariy tiempopi, ¿pikunataj Diospa llajtanta ñaupajman pusanqanku? 2) ¿Imaraykutaj Diospa llajtanta ñaupajman pusaj hermanosta kasukunanchej kanqa?

¹⁴ Manchay ñakʼariy tiempopeqa, waj hermanosñataj Diospa llajtanta ñaupajman pusanqanku. Imaraykuchus chay tiempopi, kay jallpʼallapiraj kaj ajllasqa cristianosqa, Armagedonpi maqanakunankupaj cieloman oqharisqa kanqanku. Jinapis mana yachanchejchu ima ratopunichus oqharisqa kanankuta (Mat. 24:31; Apo. 2:26, 27). Ajllasqa cristianos cieloman oqharisqa kajtinkutaj, Diospa Llajtanta Kamachejkunaqa manaña noqanchejwanchu kanqanku. Jinapis “may chhika” runasmanta kajkunaqa, sumaj organizasqallapuni kasunchej. Imaraykuchus waj ovejas ukhumanta sumaj wakichisqa hermanos, Diospa llajtanta ñaupajman pusanqanku. Paykunaqa Diospa kamachisqanta willawasunchej. Chay hermanosta yanapaspa, kasukuspataj, Jehová Diosta mana wasanchasqanchejta rikuchisun. Jatun ñakʼariymanta salvakunanchejqa, chay hermanosta kasukunanchejmanta kanqa.

15. ¿Imatataj ruwasunman manchay ñakʼariy tiempopi sinchʼita sayanapaj?

¹⁵ Sinchʼita sayana. 2017 watapi kinsa pʼunchaypaj jatun tantakoyqa sutikorqa: “Ama saykʼuychu”. Chay tantakoyqa imaymana llakiykunata aguantanapaj yanapawarqanchej. Yachakorqanchejtaj sinchʼita sayanapajqa, llakiykunasniyoj kaspapis chayri manapis Jehová Diospipuni atienekuna kasqanta (Rom. 12:12). Jesuspa nisqanta amapuni qonqanachu: “Pichus tukukuykama sinchʼita sayajrí, chaymá salvasqa kanqa” (Mat. 24:13). Chayrayku ima problema kajtinpis, sinchʼita sayananchej tiyan. Kay tiempopiña sinchʼita sayasunchej chayqa, creeyninchejqa manchay ñakʼariy tiempopaj sinchʼi kanqa.

16. 1) ¿Imamantataj kashan mana manchachikoj runas kananchej? 2) ¿Imatataj kunanña ruwasunman mana manchachikoj runas kanapaj?

¹⁶ Mana manchachikoj runas kana. 2018 watapi kinsa pʼunchaypaj jatun tantakoyqa sutikorqa: “Ama manchachikuychu”. Chay tantakuypi yachakorqanchej, mana manchachikoj kayqa, mana noqanchejmantachu kasqanta, manaqa Jehová Diospi atienekuymanta. Sinchʼita sayanapajpis chayllatataj ruwananchej karqa. ¿Imatá ruwasunman Jehová Diospi astawan atienekunapaj? Bibliata sapa día leena, tʼukurinataj Jehová Dios imaynatachus ñaupa tiempo kamachisninta yanapasqanpi (Sal. 68:20; 2 Ped. 2:9). Manchay ñakʼariy tiempopi, naciones chinkachinawanchejpaj wakiykuwajtinchej, mana manchachikunanchejchu kanqa. Chantapis Jehová Diospi ni jaykʼaj jina atienekunanchej kanqa (Sal. 112:7, 8; Heb. 13:6). Kunanña Jehová Diospi tukuy sonqo atienekusun chayqa, Gog chinkachiyta munawajtinchej mana manchachikusunchu.e

17. ¿Imaraykutaj Armagedón guerrata mana manchachikunanchejchu tiyan? (Tapapi kaj dibujota qhawariy).

¹⁷ Ñaupaj yachaqanapi yachakorqanchej jina, casi tukuyninchej nacekusqanchejmantapacha ‘qhepa pʼunchaykunapi’ kausashanchej. Chantapis manchay ñakʼariymanta salvakuyta suyashanchej. Armagedón guerraqa, kay sajra mundota chinkachenqa. Jinapis noqanchejqa, chay guerrata mana manchachikunanchejchu tiyan. Imaraykuchus chay guerrapeqa Jehová Dios maqanakonqa, nitaj noqanchejchu (Pro. 1:33; Eze. 38:18-20; Zac. 14:3). Jehová Dios nejtinkama, Jesucristoqa soldadosninta guerraman pusanqa, nisunman tukuy ajllasqa cristianosta, waranqa waranqa angelestawan. Tukuyninkutaj Satanaswan, supaykunasninwan, kay jallpʼapi soldadosninwan ima maqanakonqanku (Dan. 12:1; Apo. 6:2; 17:14).

18. 1) ¿Imatataj Jehová Dios niwanchej? 2) ¿Imaynatataj Apocalipsis 7:9, 13-17 nisqan salvakunanchejpi creenapaj kallpachawanchej?

¹⁸ Jehová Diosninchejqa kayta niwanchej: “Mana mayqen arma ruwasqankupis qanta chinkachisunampaj jina kanqachu”, nispa (Isa. 54:17). Diosta kasukoj “may chhika” runas, “manchay ñakʼariymanta” kausashaj llojsenqanku, Diostataj sirvillanqankupuni (Apocalipsis 7:9, 13-17 leey). Bibliaqa salvakunanchejpi creenapaj mayta kallpachawanchej. Imaraykuchus “cheqan sonqoyojkunata Tata Diosqa waqaychan” (Sal. 31:23). Jehová Diosqa tumpamantawan santo sutinta llimphuchanqa. Chayta ruwajtintaj, pikunachus payta munakunchej, jatunpajtaj qhawanchej chaykuna, mayta kusikusunchej (Eze. 38:23).

19. ¿Imayna kausaytataj suyakushanchej?

¹⁹ Satanás manaña kajtin, mosoj jallpʼapi runas imaynachus kanankupi piensarina. ¿Imatataj 2 Timoteo 3:2-5 paykunamanta ninman? (“¿Imaynataj runas kanqanku?” nisqa recuadrota leeriy). Hermanonchej George Gangasqaf Diospa Llajtanta Kamachejkunamanta ujnin karqa. Payqa jamoj tiempomanta nerqa: “Tukuypis hermanos, hermanas kajtinku, ¡kay mundoqa may sumajpuni kanqa! Pisimantawan tukuy runas, uj mosoj mundopi kausakonqanku. Jehová Diosninchej jinataj wiñaypaj kausasun”, nispa. Chay sumaj kausaytataj suyakushanchej.