¿Pitaj Diospa llajtanta kamachishan?

1, 2. Jesús cieloman ripusqantawan, ¿imatataj apóstoles ichá tapukorqanku?

APOSTOLESQA Olivos Orqopi kasharqanku. Qhawasharqankutaj patronninku, amigonkutaj Jesús, cieloman ripushasqanta, uj phuyutaj pʼampaykusqanta (Hech. 1:9, 10). Jesusqa iskay watasta jina paykunata yachacherqa, kallpacharqa, ñaupajmantaj pusarqa. Jinapis Jesús ripojtin, ¿imatá ruwankuman karqa?

² Jesusqa yachachisqasninman nerqa: “Noqamanta testigos jina willankichej Jerusalenpi, tukuy Judea jallpʼapi, Samariapi, tukuy kay pachaj kʼuchusninkama”, nispa (Hech. 1:8). ¿Imaynatá chayta ruwankuman karqa? Jesusqa Diospa atiyninwan yanapananta nerqa (Hech. 1:4, 5). Jinapis, ¿pitaj paykunata ñaupajman pusanman karqa? ¿Pitaj Jallpʼantinpi willayta ñaupajman apanman karqa? Jehovaqa israelitasta runasnejta pusaykacharqa. Apostolestaj chayta yacharqanku. Chayrayku ichá tapukorqanku: “¿Ujtawanchu Jehová uj kamachejta ajllapuwasun?”, nispa.

 3. 1) Jesús cieloman ripusqantawan, ¿imatataj apóstoles ruwarqanku? 2) ¿Ima tapuykunamantaj kay yachaqanapi kutichisun?

³ Jesús cieloman ripusqantawan, discipulosnenqa Matiasta Judas Iscariotej cuentanmanta ajllarqanku. Ajinamanta 12 apóstoles kanankupaj. Chaypajtaj Diosmanta mañakorqanku, Palabrantataj qhawaykorqanku (Hech. 1:15-26). ¿Imaraykú uj apostoltawan ajllarqanku? ¿Jehovaj munayninman jinachu karqa? Discipulosqa repararqanku 12 apostolespuni kanan kasqanta.a Jesusqa apostolesta ajllaspa, uj sumaj llankʼaypaj wakicherqa. ¿Imataj chay llankʼay karqa? ¿Imaynatá Jehovawan, Jesuswan apostolesta wakicherqanku? ¿Pitaj chay llankʼayta kunan ruwashan? ¿Imaynatá Diospa llajtanta ‘ñaupajman pusajkunamanta yuyarikusunman’, astawanqa ‘allin kamachi yuyayniyojmanta’? (Heb. 13:7; Mat. 24:45).

 4. Apóstoles, waj ancianos ima, ¿imatá ruwaj kanku?

⁴ Apostolesqa Pentecostés 33 watapi, Diospa llajtanta ñaupajman apayta qallarerqanku. Chay kutipi, “Pedro chunka ujniyoj apostoleswan khuska” sayarerqa, may chhika runasmantaj Diosmanta yachacherqa (Hech. 2:14, 15). Chay diaqa ashkha runas cristianosman tukorqanku. Paykunataj “apostolespa yachachisqankuta tukuy sonqo japʼikuspa, uj sonqolla kasharqanku” (Hech. 2:42). Apostolesqa Diospa llajtanpa qolqenmanta cuentayoj karqanku (Hech. 4:34, 35). Chantapis Diospa llajtanta yachachej kanku, Diosmantataj mañapoj kanku. Chayrayku nerqanku: “Diosmanta mañaspallapuni kasqayku, Palabranta willaspallapunitaj”, nispa (Hech. 6:4). Apostolesqa sumaj wakichisqa cristianosta, waj lugarespi predicanankupaj kacharqanku (Hech. 8:14, 15). Qhepamantaj congregacionesta ñaupajman pusanankupaj, waj ajllasqa ancianos apostolesman ujchaykukorqanku. Paykunataj ñaupa tiempomanta Diospa llajtanta kamacherqanku (Hech. 15:2).

5, 6. 1) ¿Imaynatá Dios llajtanta kamachejkunata atiyninwan yanaparqa? (23 paginapi dibujota qhawariy). 2) ¿Imaynatá Dios llajtanta kamachejkunata angelesnejta yanaparqa? 3) ¿Imaynatá Dios llajtanta kamachejkunata Palabrannejta yanaparqa?

⁵ Jehovaqa apostolesta, ancianosta ima Jesusnejta kamacherqa. Chaytataj ñaupa tiempomanta cristianosqa, sumajta yacharqanku. ¿Imaynatá? Uj kaj, Jehovaqa chay tiempopi llajtanta kamachejkunata atiyninwan yanaparqa (Juan 16:13). Diosqa tukuy ajllasqa cristianosman atiyninta qorqa. Jinapis Jerusalenpi apostolesman, ancianosman ima astawan atiyta qorqa, llankʼayninkuta juntʼanankupaj. Chayrayku paykunaqa 49 watapi cristianos manaña circuncidachikunankuchu kasqanta entienderqanku. Chaytataj cartasnejta congregacionesman willacherqanku. Congregacionestaj chayta kasukuspa, “creesqankupi kallpachakorqanku, sapa pʼunchaytaj astawan ashkhayarqanku” (Hech. 16:4, 5). Chay cartasqa sutʼita reparachiwanchej, Diosqa llajtanta kamachejkunata atiyninwan yanapasqanta. Imaraykuchus paykunaqa chay cartaspi rikucherqanku munakuyninkuta, creeyninkuta ima (Hech. 15:11, 25-29; Gál. 5:22, 23).

⁶ Iskay kaj, Diosqa llajtanta kamachejkunata angelesnejta yanaparqa. Sutʼincharinapaj, Corneliomanqa uj ángel nerqa Pedrota wajyachimunanta. Pedrotaj Cornelioman, familiaresninman ima Diosmanta willarqa. Chantá paykunaqa mana circuncidasqa kaspapis, Diospa atiyninta japʼerqanku. Ajinamanta Cornelioqa mana judío kajkunamanta ñaupaj cristiano karqa. Apostoleswan waj hermanoswanqa, chayta uyarispa yacharqanku chaypuni Diospa munaynin kasqanta, tukuy sonqotaj mana judío kajkunata congregacionpi japʼerqanku (Hech. 11:13-18). Rikunchej jina, angelesqa apostolesta, ancianosta ima willayta ñaupajman apanankupaj yanaparqanku (Hech. 5:19, 20). Kinsa kaj, Diosqa llajtanta kamachejkunata Palabrannejta yanaparqa. Apostoleswan ancianoswanqa, Diospa Palabranwan yanapachikorqanku imapichus cristianos creenankuta yachanankupaj, congregacionesta ñaupajman apanankupaj ima (Hech. 1:20-22; 15:15-20).

 7. ¿Imaraykú nisunman ñaupa cristianosta Jesús kamachisqanta?

⁷ Apostoleswan ancianoswan ñaupa cristianosta kamachejtinkupis, paykunaqa yacharqanku Jesús kamachejninku kasqanta. ¿Imaynatá? Pablo nerqa: “[Cristoqa] wakinkunaman atiyta qorqa apóstoles kanankupaj”, nispa. Chantá nillarqataj, Cristoqa ‘cuerpoj chayri congregacionpa uman’ kasqanta (Efe. 4:11, 15). Jesuspa yachachisqasnenqa mana uj apostolpa sutinwanchu rejsichikorqanku, manaqa Diospa munayninman jina “cristianos” nisqa karqanku (Hech. 11:26). Pabloqa yacharqa, Diospa llajtanta kamachejkunaj yachachisqankuta japʼikunanku kasqanta. Imaraykuchus Diospa Palabranmanta yachachisharqanku. Jinapis Pablo nerqa: “Munani yachanaykichejta Cristoqa sapa qharipajqa kamachej uma jina kasqanta”, nispa. Chayta nispaqa Diospa llajtanta kamachejkunamantawan parlasharqa. Chantá nerqa: “Diostaj Cristopajqa kamachej uma jina”, nispa (1 Cor. 11:2, 3). Sutʼi reparanchej, Jehovaqa llajtanta Jesucristonejta kamachisqanta.

8, 9. ¿Imastataj hermano Russell ruwarqa?

⁸ Kay 1870 wata qallariyta, Charles Taze Russell, paywan llankʼajkuna ima, Biblia nisqanman jina Diosta yupaychanankupaj kallpachakorqanku, wajkunatapis yanaparqanku. Bibliamanta waj parlaykunapi yachachinankupaj, Zionʼs Watch Tower Tract Society nisqata, 1884 watapi autoridadeswan registracherqanku.b Chayqa uj asociacionman rijchʼakorqa, hermano Russelltaj presidente karqa. Payqa Bibliata sumajta estudiarqa, nitaj manchikorqachu runasman niyta, iglesiaspi llullata yachachisqankuta. Imajtinchus yachachej kanku alma mana wañusqanta, Dios kinsa uyayoj kasqanta ima. Hermano Russellqa yachakorqa Jesuspa kutimuynin mana runaspa rikunantachu kananta, ‘mana judío kajkunaj pʼunchayninkupis’ 1914 watapi tukukunanta (Luc. 21:24). Payqa tiemponta, kallpanta, qolqenta ima churarqa yachakusqanta runasman willarinanpaj. Arí, hermano Russelltaqa Jehovawan Jesuswan yanaparqanku llajtanta ñaupajman pusananpaj.

⁹ Hermano Russellqa mana jatunchachikuyta munarqachu. Kay 1896 watapi qhelqarqa, ni paypis ni paywan kajkunapis, wajkunawan jatunpaj qhawachikuyta munasqankuta. Paykunaqa mana munarqankuchu sumaj sutista churanankuta, nitaj pipis sutisninkuwan rejsisqa kananta. Aswan qhepaman hermano Russell nerqa: “Kay llankʼayqa mana runaspatachu”, nispa.

10. 1) ¿Maykʼajtaj Jesús “allin kamachi, yuyayniyoj[ta]” churarqa? 2) Diospa Llajtanta Kamachejkuna, Watch Tower Bible and Tract Society nisqapi cargoyojkunawan, ¿ujllachu kanku? Sutʼinchay.

¹⁰ Jesusqa “allin kamachi, yuyayniyoj[ta]” 1919 watapi churarqa, hermano Russell wañupusqanmanta kinsa watanman. ¿Imapaj? “Kamachi masisninman horampi mikhunata jaywanampaj” (Mat. 24:45). Chay wataspeqa uj qotu ajllasqa cristianos, Diospa llajtanman cheqa yachachiyta mikhunata jina jaywasharqankuña. Paykunaqa Jehovaj testigosninpa centralninkupi kasharqanku, chaytaj Brooklyn, Nueva Yorkpi kashan. “Diospa llajtanta kamachejkuna” suteqa, 1940 watamantapacha publicacionespi rikhurerqa. Chay tiempopi, Diospa Llajtanta Kamachejkuna, Watch Tower Bible and Tract Society nisqapi cargoyoj kajkunawan ujlla karqanku. Jinapis 1971 watapi tʼaqakorqanku. Watch Tower Society nisqataj, gobiernoj leyesninman jina ima tramitetapis ruwanallapaj. Chaymantapacha, ajllasqa cristianosqa mana chay Watch Tower Society nisqapi cargoyoj kaspapis, Diospa Llajtanta Kamachejkunamanta kayta aterqanku. Kay qhepa wataspitaj, waj ovejasmanta kajkunapis Watch Tower Society nisqapi cargoyoj kanku, jinallataj Diospa llajtanpa waj corporacionesninpipis. Ajinamanta Diospa Llajtanta Kamachejkunaqa, hermanosta yachachinankupaj, ñaupajman pusanankupaj ima astawan tiempoyoj kanku (Juan 10:16; Hech. 6:4). Kay 15 de julio de 2013 Torremanta Qhawaj revista sutʼincharqa, allin kamachi yuyayniyojqa, Diospa Llajtanta Kamachejkuna kasqankuta. Paykunataj ajllasqa cristianosmanta uj juchʼuy qotu kanku.

11. ¿Imatá Diospa Llajtanta Kamachejkuna ruwanku?

¹¹ Diospa Llajtanta Kamachejkunaqa, sapa semana tantakuspa Diospa llajtanpaj wakin imasta ajllanku. Ajinata tantakuspa ujchasqa, uj yuyayllataj kanku (Pro. 20:18). Paykunamanta ni mayqenpis aswan kurajpaj qhawasqachu. Chayrayku sapa wata, paykuna ukhumanta waj hermanoñataj, sapa semana tantakuyninkuta ñaupajman apan (1 Ped. 5:1). Diospa Llajtanta Kamachejkunaj sojta comisionesninpipis, kikillantataj ruwakun. Ni mayqenninkutaj patrón kasqanta yuyakunchu. Astawanpis sapa ujninku ‘kamachislla’ kanku, allin kamachi yuyayniyojpa yachachisqanta, kamachisqantataj japʼikunku.

12. ¿Ima tapuykunamantaj kutichisun?

¹² Diospa Llajtanta Kamachejkunaqa mana ninkuchu mana pantasqankuta. Nillataj ninkuchu, Diospa atiynin paykunawan parlasqanta. Chayrayku Bibliata sutʼinchaspa chayri Diospa llajtanpaj imatapis ajllaspa pantankuman. Jehovaj testigosnin yachaqanasta maskʼanankupaj nisqa libropi, “Creencianchej astawan sutʼinchakusqanmanta” nisqa subtítulo tiyan. Chaypitaj uj lista kan Bibliaj wakin versiculosninta aswan sutʼita entiendesqanchejmanta. Jesusqa mana nerqachu, allin kamachi yuyayniyoj yachachisqanpi mana pantananta. Jina kajtin, ¿pimantataj Jesús parlasharqa “pitaj chay allin kamachi, yuyayniyojtaj” nispa? (Mat. 24:45). ¿Imastaj rikuchin Diospa Llajtanta Kamachejkuna, allin kamachi yuyayniyojwan ninakusqanta? Apostolesta, ancianostawan kinsa imas yanaparqa. Kay tiempopi Diospa Llajtanta Kamachejkunatapis, chaykunallataj yanapan. Chaytataj qhawarisun.

13. ¿Imaynatá Jehová Llajtanta Kamachejkunata atiyninwan yanaparqa?

¹³ Jehovaqa Llajtanta Kamachejkunata atiyninwan yanapan. Jehovaqa paykunata yanaparqa Bibliaj wakin yachachiykunasninta entiendenankupaj, mayqenkunachus ñaupajta mana entiendekojchu, chaykunata. Kay 12 parrafopitaj chaymanta uj lista kasqanta nerqanchej. Arí, ni pí runapis “taripay mana atina Diospa yachayninta[...]” sapallanmanta entiendeyta atinmanchu karqa (1 Corintios 2:10 leey). Diospa Llajtanta Kamachejkunaqa, Pablo jinallataj yuyanku. Pay nerqa: “Kay imasmantataj noqaykoqa parlayku, mana runaj yachachisqanman jinachu, astawanqa Espíritu yachachiwasqaykuman jina”, nispa (1 Cor. 2:13). May unayta llulla yachachiykuna juntʼa karqa, runastaj tuti laqhapi kasharqanku. ¿Imaraykú Bibliaj nisqanta 1919 watamantapacha aswan sumajta entiendekorqa? Jehová atiyninwan yanapasqanrayku.

14. Apocalipsis 14:6, 7 nisqanman jina, ¿imaynatá ángeles Diospa Llajtanta Kamachejkunata, noqanchejta ima yanapawanchej?

¹⁴ Jehovaqa Llajtanta Kamachejkunata angelesnejta yanapan. Paykunaqa Jallpʼantinpi willakunanpaj, 8 millones kuraj willajkunata yanapananku tiyan. Chaytaj juntʼakushan angelespa yanapayninkuwan (Apocalipsis 14:6, 7 leey). Ashkha kutispi, angelesqa hermanosta pusarqanku Diosmanta yanapata mañakoj runasman.c Autoridades churanakuwanchej chay lugarespipis willakushan, yachachikushan ima. Chaytaj angelespa yanapaynillanwan ruwakushan.

15. Diospa Llajtanta Kamachejkuna, waj iglesiasmanta pastoreswan, ¿imapitaj mana kikinchu kanku?

¹⁵ Jehovaqa Llajtanta Kamachejkunata Palabrannejta yanapan (Juan 17:17 leey). Kay 1973 watapi, 15 de octubremanta La Atalaya revista nerqa: “¿Atinchu bautizakuyta cigarro pitayta mana qonqaj runa?”, nispa. Chantá Biblia nisqanman jina sutʼincharqa mana bautizakuyta atisqanta. Ashkha versiculosta oqharispataj, sutʼincharqa cigarrota pitajkunata congregacionmanta qharqonata (1 Cor. 5:7; 2 Cor. 7:1). Chay revista nillarqataj, chay kamacheyqa mana runasmantachu kasqanta, manaqa “Diosmanta, pichus Palabrannejta willawanchej imatachus ruwananchejta”. Jehovaj testigosnillan tukuy imapi Bibliaj nisqanta kasukunapaj kallpachakunchej. Chaytataj ruwanchej wakin kamachiykuna mana kasukuyta atinapaj jina kajtinpis. Estados Unidospi religionesmanta parlaj libro, kunallanraj nerqa: “Ashkha pastoresqa iglesiankupi yachachisqankuta sapa kuti qhawarinku. Chaytataj ruwanku iglesiankuman rejkunata, waj runasta ima kusichinankupaj jina yachachinankupaj”, nispa. Diospa Llajtanta Kamachejkunatajrí, mana runaj yuyayninman jinachu imatapis ruwanku, manaqa Bibliaj nisqanman jina. Chaytaj rikuchiwanchej Jehová llajtanta kamachishasqanta.

16. ¿Imaynatá Diospa Llajtanta Kamachejkunamanta yuyarikusunman?

¹⁶ (Hebreos 13:7 leey). Biblia nin: “Yuyarikuychej [...] ñawpajman pusasorqachej, chaykunamanta”, nispa. Chayta ruwasunman Diospa Llajtanta Kamachejkunapaj Diosmanta mañapuspa (Efe. 6:18). Paykunaqa ashkha ruwanasniyoj kanku: Diospa llajtanman yachachinku, Jallpʼantinpi willakunanpaj qhawarinku, hermanospa churasqanku qolqetapis apaykachanku. Chayrayku Diosmanta mañapunapuni tiyan.

17, 18. 1) ¿Imata ruwaspataj Diospa Llajtanta Kamachejkunamanta yuyarikusunman? 2) ¿Imatawan ruwasunman Jesusta, Diospa Llajtanta Kamachejkunata ima yanapakunapaj?

¹⁷ Diospa Llajtanta Kamachejkunamanta yuyarikullasunmantaj, yachachiwasqanchejta japʼikuspa, kasukuspa ima. Paykunaqa publicacionesnejta, tantakuykunanejta, jatun tantakuykunanejta ima yachachiwanchej. Chantapis congregacionesta waturejkunata churanku, congregacionesta waturejkunataj ancianosta churanku. Tukuyninkutaj Diospa Llajtanta Kamachejkunata kasukuspa, paykunamanta yuyarikunku. Tukuyninchejtaj Kamachejninchej Jesusta jatunpaj qhawanchej, Diospa llajtanta ñaupajman apaj hermanosta kasukuspa (Heb. 13:17).

¹⁸ Diospa Llajtanta Kamachejkunamanta yuyarikullanchejtaj, tukuy atisqanchejta predicaspa. Hebreos 13:7 nin, congregacionta ñaupajman apajkuna jina Diospi creenata. Diospa Llajtanta Kamachejkunataj, sumaj willaykunata sonqo kʼajaywan willaspa may jatun creeyninkuta rikuchinku. ¿Chay llankʼaypi yanapakushanchejchu? Yanapakuspaqa kusisqa kasun. Jesustaj niwasun: “Imatachus chay mana kasuta ruwana ujnin kaj wawqeypaj ruwarqankichej, chaytaqa noqa kikiypaj ruwarqankichej”, nispa (Mat. 25:34-40).

19. ¿Imaraykutaj Kamachejninchej Jesusta kasukuyta munanki?

¹⁹ Jesusqa cieloman kutipuytawan, yachachisqasninta mana sapankutachu saqerparerqa (Mat. 28:20). Paytaqa Jallpʼapi kashajtin Diospa atiynin, Palabran, ángeles ima yanaparqanku. Kay tiempopitaj, Jesusqa allin kamachi yuyayniyojta chay imasllawantaj yanapashan. Diospa Llajtanta Kamachejkunaqa, “Corderoj qhepanta rinku mayllamampis rejtin” (Apo. 14:4). Paykunata kasukuspaqa, Kamachejninchej Jesusta kasukushanchej. Paytaj pisimantawan wiñay kausayta qowasun (Apo. 7:14-17). Chaytataj ni mayqen kamachejpis ruwayta atinmanchu.