¿Ima qolqewantaj Diospa Reinonmanta willakun?

1, 2. 1) ¿Imatataj hermano Russell kuticherqa Iglesia Reformada nisqata kamachejman? 2) ¿Imatataj kay yachaqanapi yachakusun?

UJ KUTIPI Iglesia Reformada nisqata kamachej, hermano Charles Taze Russellta taporqa, ima qolqewanchus Bibliamanta Yachaqajkuna imatapis ruwasqankuta.

Hermano Russellqa kayta kuticherqa: “Ni jaykʼaj qolqeta mañaykuchu”.

Chay runataj nerqa: “¿Chantá maymantataj qolqeta orqhonkichejri?”.

Hermano Russelltaj nerqa: “Willaykiman chayqa nichá creewankimanchu. Runas tantakuyniykuman jamojtinku, ni imatapis pasachiykuchu paykuna qolqeta churanankupaj. Chaywanpis paykuna reparanku ima ruwaypis qolqepaj kasqanta. Chayrayku ninku: ‘Kay jina wasi kananpajqa qolqe necesitakun [...]. ¿Imaynatataj yanapaykuman?’”, nispa.

Chay runaqa, hermano Russellpa nisqanta mana creerqachu.

Hermano Russelltaj nerqa: “Mana nishallaykichu. Runasqa kay jinata tapuwanku: ‘¿Nichu pisi qolqellawanpis kaypi yanapakuyman?’, nispa. Pillapis bendecisqa kaspa, atintaj chayqa Señorpaj qoyta munan. Mana kapojtintaj, mana qonanpaj tanqasunmanchu”.a

² Hermano Russellqa, maychus kajllata parlasharqa. Diospa llajtanqa, cheqa yupaychay kanallanpajpuni, runas munasqankuman jina qolqeta churasqankuwan yanapachikun. Kay yachaqanapeqa, imaynatachus ñaupa tiempopi, kay tiempopipis chayta ruwakusqanta yachakusun. Chantapis chaykunamanta parlarishaspaqa, allin kanman kayta tapurikunanchej: “¿Imaynamantataj Diospa Reinonta yanapasqayta rikuchiyman?”, nispa.

3, 4. 1) ¿Imatataj Jehová yachan kamachisninmanta? 2) ¿Imaynatataj israelitas Dioswan tinkukuna toldota ruwakunanpaj yanapakorqanku?

³ Jehovaqa kamachisninpi atienekun. Yachantaj, atispaqa tukuy sonqowan kapuyninkumanta qonankuta, Payta yupaychajkuna kasqankuta rikuchinankupaj. Kunanqa ñaupa tiempopi imaynatachus israelitas chayta ruwasqankumanta parlarina.

⁴ Jehovaqa israelitasta Egiptomanta orqhomuytawan, Dioswan tinkukuna toldota ruwanankuta kamacherqa, chaypi payta yupaychanankupaj. Chayta ruwanankupajtaj ashkha imas necesitakorqa. Jehovaqa, chaypi yanapakunankupaj Moisesnejta llajtanman kayta nerqa: “Tukuy sonqowan maytachus [Jehovaman] qoyta munasqankuman jina apamuchunku”, nispa (Éxo. 35:5-9). Aswan ñaupajta egipciosqa “maytapuni llakichispa, israelitasta trabajacherqanku [...] mayta jasutʼispa” (Éxo. 1:14). Jinapis israelitasqa, mana iskaychakuspa qolqeta, qorita, waj imastawan qorqanku, chay imastaqa casi tukuyninta egipciosmanta japʼerqanku (Éxo. 12:35, 36). Israelitasqa necesitakusqanmantapis aswan ashkhataraj qorqanku, chayraykutaj amaña apanankuta kamachikorqa (Éxo. 36:4-7).

 5. ¿Imatataj israelitas ruwarqanku David templota ruwakunanpaj kapuyninkuwan yanapanankuta nejtin?

⁵ Moisespa tiemponmanta 475 watasninman jina, Davidpis kapuyninmanta qollarqataj, Jallpʼapi llimphu yupaychay kanallanpajpuni ñaupaj kaj templota ruwakunanpaj. Chantá israelitasmanpis kayta nerqa: “Pitaj qankunamanta Tata Diosman imatapis jaywayta munan?”, nispa. Israelitastaj “tukuy imasta Tata Diosman tukuy sonqosninkuwan” qorqanku (1 Cró. 29:3-9). Chay qosqanku maymantachus jamusqanmanta David, Jehovaman kayta nerqa: “Tukuy imaspis qanmanta jamun. Qanmanqa qoyku, qanmanta japʼerqayku, chayllamantataj”, nispa (1 Cró. 29:14).

 6. ¿Imaspajtaj qolqe necesitakun, chantá imastá tapurikusunman?

⁶ Diospa llajtantaqa ni Moisespis ni Davidpis kapuyninkumanta qonankupaj tanqarqankuchu. Astawanpis israelitasqa tukuy sonqo qorqanku. ¿Imatá kay tiempomanta nisunman? Yachanchej jina, Diospa Reinonmanta willakunanpaj qolqe necesitakun. Chantapis Bibliasta, publicacionesta ima ruwakunanpaj, tukuynejman apachikunanpaj ima qolqe necesitakullantaj. Jinallataj tantakuna wasista, sucursalesta ruwakunanpaj, allinchakunanpaj chayri ima llakiy kajtinpis hermanosta yanapakunanpaj. Chayrayku kaykunata tapurikusunman: ¿Maymantataj qolqeta orqhokun? ¿Reinoj kamachiyninpi kajkunata churanankupaj tanqakunchu?

7, 8. ¿Imaraykutaj Jehovaj llajtan, ni jaykʼaj runasmanta mañakitus jina yanapata mañakonqankuchu?

⁷ Hermano Russell paywan khuska llankʼajkunapiwan, mana munarqankuchu cristiano nichikojkuna jina runasmanta qolqeta mañayta. Torremanta Qhawaj revistata orqhoyta qallarikushajtin, ujnin revistapi “¿Zionʼs Watch Tower nisqa revistata munankichu?” nisqa yachaqanapi, hermano Russell kayta nerqa: “[Kay revista] orqhokunanpaj JEHOVÁ yanapasqanta yuyayku, pay yanapajtintaj ni jaykʼaj runasmanta mañakitus jina yanapata mañakusunchu. ‘Qolqepis, qoripis noqajta’ nej manaña yanapawajtinchej yachasun niña kay revistata ruwakunanta”, nispa (Hageo 2:7-9). Kunankamaqa, 130 kuraj watasña pasajtinpis, Torremanta Qhawaj revista, Diospa llajtanpis kashallanpuni.

⁸ Jehovaj kamachisnenqa, mana qolqeta mañankuchu, mana qolqeta mañaspa tantakuyninkupi pasachinkuchu, nitaj pimanpis qolqeta mañaspa cartasta apachinkuchu. Mana qolqerayku pujllankuchu, mana qolqeta tantanankupaj imatapis vendenkuchu nitaj sorteostapis ruwankuchu. Astawanpis ñaupaj wataspi Torremanta Qhawaj revistapi nisqanman jina ruwanku, chaypi nerqa: “Ni jaykʼaj waj iglesias jinaqa Señorpaj qolqeta mañaykuchu [...]. Señorpa sutinpi qolqeta mañayqa mana allinchu kasqanta yuyayku, nitaj qojpis, nitaj chay qolqewan imata ruwaypis bendecisqachu”.b

9, 10. ¿Imaraykutaj munasqanchejman jina kapuyninchejmanta qonchej?

⁹ Kay tiempopi Diospa Reinonpa kamachiyninpi kajkunaqa, mana tanqasqa jinachu kapuyninchejmanta qonchej. Astawanpis tukuy sonqo qolqenchejmanta, kapuyninchejmanta ima qonchej, Diospa Reinonta yanapanapaj. ¿Imaraykú chayta ruwayta munanchej? Kinsamanta parlarina.

¹⁰ Uj kaj, Jehovata munakusqanchejrayku kapuyninchejmanta qonchej, chantapis “imachus payta kusichin” chayta ruwayta munanchej (1 Juan 3:22). Jehovaqa mayta kusikun payta yupaychajkuna tukuy sonqo qojtinku. Apóstol Pabloqa, cristianos ajinata ruwasqankumanta parlarqa (2 Corintios 9:7 leey). Uj cheqa cristianoqa mana kamachisqa jinallachu qon, manaqa kusiywan “sonqompi yuyasqanman jina”.c Nisunman imachus necesitakusqanta reparaspa imaynatachus yanapananpi tʼukurin, chayman jinataj ruwan. Chay jina runatamin Jehovaqa allinpaj qhawan, “imaraykuchus Diosqa munakun pichus kusiywan qojta”.

11. ¿Imaraykutaj kapuyninchejmanta Jehovaman aswan allin kajta qoyta munanchej?

¹¹ Iskay kaj, Jehovaman kapuyninchejmanta qonchej, bendeciwasqanchejmanta agradecekunapaj. Chay jinata ruwanapajtaj Moisespa Leyninpi uj yuyaychay tiyan, mayqenchus rikuchin sonqonchejpi imachus kasqanta (Deuteronomio 16:16, 17 leey). Tukuy israelita qharisqa, watapi kinsa kutita fiestata ruwasqankuman, sapa ujninku ofrendanku oqharisqa rinanku karqa, “ima kapuykunatachus Señorni[nku] Tata Dios qo[rqa], chayman jina”. Chaypajtaj ñaupajmantaña ima bendicionestachus japʼisqankupi tʼukurinanku karqa, sonqonkutataj waturinanku karqa. Jinamanta, ima ofrendatachus apanankuta ajllayta atinkuman karqa. Ajinallatataj noqanchejpis Jehová may chhika bendicionesta qowasqanchejpi tʼukurejtinchejqa, kapuwasqanchejmanta aswan allin kajta qoyta munanchej. Qolqenchejmantapis tukuy sonqo qosqanchejqa rikuchin, ashkha bendicionesta qowasqanchejmanta Jehovata agradecekusqanchejta (2 Cor. 8:12-15).

12, 13. ¿Imaynamantataj Rey Jesusta munakusqanchejta rikuchinchej? ¿Mashkhatataj sapa uj qonchej?

¹² Kinsa kaj, kapuwasqanchejmanta qospaqa, Rey Jesucristota munakusqanchejta rikuchinchej. ¿Imaynamantá? Chayta entiendenapajqa, Jesús wañupunanpaj ñaupaj chʼisinpi imatachus yachachisqasninman nisqanta qhawarina (Juan 14:23 leey). Jesús nerqa: “Noqata munakuwajqa nisqasniyta kasonqa”, nispa. Nisqasninmanta ujnenqa kashan Reinomanta sumaj willaykunata Jallpʼantinpi willakunanta nisqan (Mat. 24:14; 28:19, 20). Nisqantataj kasukunchej Diospa Reinonmanta willakunanpaj tukuy atisqanchejta yanapakuspa: nisunman tiemponchejta, kallpanchejta, kapuyninchejtawan churaspa. Ajinamanta rikuchinchej Rey Jesucristota munakusqanchejta.

¹³ Noqanchejqa Diospa Reinonta, tukuy sonqowan yanapayta munanchej qolqenchejmanta qospa. Sapa uj niyta atinchej mashkhatachus qonanchejta, kapuwasqanchejman jina. Chantapis ashkha hermanosninchejqa pisi kapuynillayoj kanku (Mat. 19:23, 24; Sant. 2:5). Jehovawan Jesuswantaj may pisillata qojtinkupis tukuy sonqo qojtinkoqa, may allinpaj qhawanku (Mar. 12:41-44).

14. ¿Imaynatataj ashkha watasta revistasta runasman saqej kanchej?

¹⁴ Jehovaj testigosnenqa ashkha watasta, publicacionesta runasman uj preciopi saqej kanchej. Chaytaj karqa pisi kapuyniyoj runaspis qoyta atinankupaj jinalla. Chaywanpis uj runa leeriyta munajtin nitaj qolqen kapojtenqa, saqellaj kanchej. ¿Imaraykú? Llampʼu sonqo runas Diosmanta yachanankuta munasqanchejrayku.

15, 16. 1) ¿Imatataj Diospa Llajtanta Kamachejkuna nerqanku 1990 watapi? 2) ¿Imaynatataj qolqeta churakun? (“¿Imaspajtaj churasqanchej qolqe?” nisqa recuadrotawan qhawariy.)

¹⁵ Kay 1990 watapi, Diospa Llajtanta Kamachejkunamanta kajkunaqa, publicacionesta niña uj preciopichu saqenata nerqanku. Chaytataj Estados Unidospi ruwayta qallarikorqa. Chaymanta parlaspa, chay suyumanta tukuy qotuchakuykunaman uj cartapi kayta nikorqa: “Revistasta, waj publicacionestapis jaywakonqa willajkunaman, leeyta munajkunaman mana imata mañaspa nitaj mashkhachus valenanta nispa. [...] Pillapis kay llankʼaypi yanapakuyta munajtenqa qoyta atin. Qolqeta qojtinpis chayri manapis publicacionta jaywakunallan tiyan”. Chaytaj rikucherqa, runas munasqankuman jinalla qonankuta, chantapis Diospa Palabranwan “mana waquincuna jinachu negociota” ruwasqanchejta (2 Cor. 2:17, Mosoj Testamento, 1985). Tiempowantaj Jallpʼantinpi sucursales kamacherqanku kikinta ruwakunanta.

¹⁶ ¿Imaynatá runas munasqankuman jina qonku? Sapa Tantakuna Wasipi cajitas tiyan, chayman munasqankuman jina qolqeta churanankupaj. Chantapis qolqeta qoyta atikullantaj, ima sutiwanchus Jehovaj testigosnin uj suyupi rejsisqa kanku chay sutiman churaspa. Torremanta Qhawaj revistapi sapa wata uj yachaqanapi sutʼinchakun, imaynasmantachus qolqeta churayta atikusqanta.

17-19. Sutʼinchay imaynatachus qolqeta apaykachakusqanta, 1) Jallpʼantinpi willakunanpaj, 2) Tantakuna Wasista ruwakunanpaj, 3) qotuchakuypaj.

¹⁷ Pachantinpi willakunanpaj. Churakusqanmanta wakin qolqeqa runasman willakunanpaj kashan. Nisunman publicacionesta orqhokunanpaj, sucursalesta ruwakunanpaj, allinchakunanpaj, Betel wasipi llankʼay mana sayarpananpaj, Diospa llajtanpi escuelas wakichikunanpaj ima. Chantapis chay qolqewanqa misionerosta, qotuchakuykunata waturejkunata, precursores especialesta ima yanapakun. Uj jatun llakiy rikhurejtintaj hermanosta yanapakun.d

¹⁸ Jallpʼantinpi Tantakuna Wasista ruwakusqan. Churakusqanmanta wakin qolqewanqa, qotuchakuykunata yanapakun Tantakuna Wasita ruwanankupaj chayri allinchanankupaj. Qolqeta astawan churakusqanman jina, waj qotuchakuykunatañataj chay qolqewan yanapakun.e

¹⁹ Qotuchakuypi gastakusqan. Chay qolqeta apaykachakullantaj Tantakuna Wasipi ni ima pisinanpaj, allinchasqa kananpajtaj. Ancianosqa wakin kuti ninku, qolqeta sucursalman apachikunanta Jallpʼantinpi willaypaj. Chaypajtaj ñaupajtaqa qotuchakuyman willakun mashkhatachus apachikunanta. Qotuchakuypi kajkuna chay allillan kasqanta nejtinkutaj apachikun. Qolqemanta cargoyoj hermanoqa, sapa killa imaspichus gastakusqanta anotan, chaytataj qotuchakuypi leekun.

20. ¿Imaynatataj Jehovata jatunchasunman tukuy kapuyninchejwan?

²⁰ Reinomanta willakunanpaj, yachachikunanpaj ima imastachus ruwakusqanta yachaspa, ¿manachu sonqoyki aysakun “tukuy kapuyniykiwan” Jehovata jatunchanaykipaj? (Pro. 3:9, 10.) Chayrayku Diospa Reinonta yanapakuyta munanchej imastachus ruwayta atisqanchejwan, yuyasqanchejwan, Diosta yupaychaypi imatachus ruwayta atisqanchejwan ima. Kapuyninchejwanpis yanapakuyta munallanchejtaj. Chayrayku tukuy atisqanchejta qonapaj kallpachakuna. Kapuyninchejmanta munasqanchejman jina qosqanchejqa Jehovata jatunchan, Rey Jesucristota yanapasqanchejtataj rikuchin.