Jehovalla Kamachiqninchikqa

“Patapi kaj Diosqa [...]; jatun Rey tukuy kay pachapi.” (SAL. 47:2.)

 1. Pablo, 1 Corintios 7:30, 31 pʼitispi, ¿imawantaq kay pachata kikinchachkanman karqa?

PABLOQA, jinata nirqa: “Kay pachaqa askamalla tukukaponqa”, nispa (1 Cor. 7:30, 31). Chay rimaykunawanqa, juk teatropi ruwakusqanta qhawaywanchá, kay pachata kikinchachkarqa. Kay tiempopiqa, juk teatropijina kʼacha runaspa, saqra runaspa ruwasqanku rikukun.

2, 3. a) Jehovap kamachiyninta iskaychachikusqanta, ¿imawantaq kikinchasunman? b) ¿Ima tapuykunamantaq kutichisun?

² Arí, juk teatropijina ruwakuchkan. Chaypitaq sapa jukninchik, Jehovap kamachiyninta jatunchasqanchikta rikuchinanchik tiyan. Chaytaqa, juk suyupi iskay qutus churanakusqankuwan kikinchasunman. Juk qutuqa, suyuta kamachiqkuna, mayqinkunachus mana chʼaqwas kananpaq llamkʼanku. Juknin qututaq saqra runas, paykunaqa chʼawkiyanku, maqanachinku, wañuchinku ima. Arí, chay saqra runasqa, kamachiqkuna kamachinankuta mana saqinkuchu, runastataq chay kamachiqkunap contranpi uqharikunankupaq tanqanku.

³ Kay pachapi, janaqpachapipis, ajinallataq kachkan. Imaraykuchus, juk kamachiqlla tiyan, arí “Jehová Kamachi[chkan]” (Sal. 71:5, NM). Kuraq Supaytaq kay pachamanta runaswan saqra ruwaykunata ruwachin (1 Juan 5:19). Chay runasqa, Diospa kamachiyninman churanakunku, achkha runastataq Jehovallata Kamachiqninkutajina mana qhawanankupaq tanqanku. ¿Imaynamantá chay ruwaykuna rikhurirqa? ¿Imaraykutaq Jehová chayta saqin? ¿Imatataq sapa jukninchik ruwasunman?

¿Imastaq rikukunan tiyan?

 4. ¿Imastaq kunan tiempo rikuchikuchkan?

⁴ Kay pachapi, janaqpachapi imaqa, Diospa kamachiyninmanta, runas chiqa sunqu kanankumanta ima, juk teatropijina rikuchikuchkan. Bibliapiqa, achkha kutista Jehová “patapi kaq Dios” kasqanta nin. Juk salmistaqa, jinata nirqa: “Patapi kaj Diosqa [...] jatun Rey tukuy kay pachapi”, nispa (Sal. 47:2). Arí, Jehovalla tukuy imamanta Aswan Patapiqa (Dan. 7:22).

 5. ¿Imaraykutaq Jehovap kamachiyninta jatunpaq qhawachinanchik tiyan?

⁵ Jehovalla tukuy imap Kamachiqninqa, imaptinchus pay tukuy imata ruwarqa (Apocalipsis 4:11, ñawiriy). Chantapis Jehovaqa, Juezninchik, Leyesta Churapuwaqninchik, Reyninchik ima (Isa. 33:22). Pay ruwawasqanchikrayku kawsanchik. Chayrayku, Kamachiqninchiktajina qhawananchik tiyan, may jatunpaqtaq qhawachinanchik tiyan. Chayta ruwanapaqtaq kay rimaykunata yuyarikunanchik tiyan: “[Jehovaqa] janaj pachapi kamachina tiyananta churan, Rey kasqanraykutaj tukuyninta kamachin” (Sal. 103:19; Hech. 4:24).

 6. ¿Imataq juntʼa sunqu kay niyta munan?

⁶ Jehovap kamachiyninta jatunpaq qhawachinapaqqa, payman juntʼa sunqullapuni kananchik tiyan. Chaywanpis, ¿imataq juntʼa sunqu kay niyta munan? Jobjina llimphu kawsayniyuq, mana juchachana, chiqan ruwaykunasniyuq ima, kay niyta munan (Job 1:1).

¿Imaynatataq qallarirqa?

7, 8. ¿Imaynamantataq Satanás, Jehovap kamachiyninta iskaychachirqa?

⁷ Suqta waranqa kuraq watas ñawpaqta, juk ángel Jehovap contranpi uqharikurqa. Nisqawan, ruwasqanwan ima, Jehovap kamachiyninta iskaychachirqa. Payllapaq tukuy imata munaspa yupaychachikuyta munarqa. Chayrayku Adanta, Evatawan, Kamachiqninchik Jehovata wasanchanankupaq tanqarqa. Chantapis, Jehovata llullamanta tumpaspa, sutinta chʼichichayta munarqa (Génesis 3:1-5, ñawiriy). Chay kʼullu angelqa, Diospa enemigonman tukurqa. Paytaqa, Satanás, Kuraq Supay, ñawpa katari, jatun sierpe, sutiswan riqsinchik. Chay sutistaq churanakuq, qhasimanta juchachaq, chʼawkiyaq, uquykuyta munaq ima, niyta munan (Apo. 12:9).

⁸ Satanasqa, churanakuq kamachiqjina, Diosman sayaykurqa. ¿Imatataq Jehová ruwanman karqa? ¿Kimsantin uqharikuqkunatachu chinkachinman karqa? Jehovaqa, paykunata chinkachiyta atinman karqa. Jinata ruwaspaqa, tukuy atiyniyuq kasqanta rikuchinman karqa. Chantapis, Adanta, Evatawan kamachisqanta mana kasuptinku wañunankuta nisqanta, juntʼanman karqa. Chantá, ¿imaraykutaq chayta mana ruwarqachu?

 9. ¿Imastataq Satanás iskaychachirqa?

⁹ Satanasqa, llullakuspa, Adanta, Evatawan Ruwaqninkumanta karunchachirqa. Ajinamanta, ni imata Dios kamachiyta atisqanta nichkarqa. Chantapis, ñawpa tatasninchik, Jehovap contranpi uqharikunankupaq tanqaspaqa, ángeles, runas ima, mana chiqa sunqu kayta atisqankuta nirqa. Aswan qhipamantaq Kuraq Supayqa, Jobpa kawsayninpi rikukunjina, pillatapis Diosmanta karunchachiyta atisqanta nirqa. Jobtaq Jehovap kamachiyninman chiqa sunqu karqa (Job 2:1-5).

10. Jehová, kamachiynin iskaychachikuptin mana usqhayllata allinchaspa, ¿imapaqtaq tiempo pasananta saqirqa?

¹⁰ Jehovaqa, chʼampay rikhuriptin mana usqhayllatachu allincharqa. Ajinamanta, Satanaspa nisqasnin chiqachus manachus kasqanta rikuchinanpaq, runas payman chiqa sunqu kayta akllanankupaq ima, tiempo pasananta saqirqa. ¿Imataq tiempo pasasqanmanjina karqa? Satanasqa, saqra ruwaqkunata sayarichirqa. Chaywanpis Diosqa, Satanasta, payjina ruwaqkunatajina ima, chinkachispa, Paylla Kamachiq kasqanta rikuchinqa. Jehovaqa, atipananmanta ni jaykʼaq iskaychakurqachu. Chayrayku, Edén huertapi uqharikuy rikhurisqanmantapacha, atipananta nirqa (Gén. 3:15).

11. ¿Imaynatataq achkha runas Jehovap kamachiyninta jatunchachirqanku?

¹¹ Achkha runas, iñiyniyuq, chiqa sunqus ima, kasqankuta rikuchirqanku. ¿Imaynamantá? Jehovap kamachiyninta jatunpaq qhawaspa, sutin llimphuchasqa kananpaq yanapaspa ima. Paykunataq Abel, Enoc, Noé, Abraham, Sara, Moisés, Rut, David, Jesús, ñawpa cristianos, tiemponchikmanta achkha chiqa sunqu cristianos ima, kanku. Paykunaqa, Jehovap kamachiyninta jatunpaq qhawachispa, Satanás llulla kasqanta rikuchirqanku. Chiqa sunqu kasqankuwantaq Diospa sutin llimphuchasqa kananpaq yanapanku. Imaptinchus Kuraq Supayqa, pillatapis Jehovamanta karunchachiyta atisqanta nispa, Diospa sutinta chʼichicharqa (Pro. 27:11).

Jehovaqa atipanqapuni

12. ¿Imaraykutaq Dios tumpamantawan saqra kaqta chinkachinanmanta mana iskaychakunchikchu?

¹² Jehovaqa, tumpamantawan paylla Kamachiq kasqanta rikuchinqa. Chaymantataq mana iskaychakunchikchu, imaptinchus Payqa, saqra kaqta chinkachinqa. Tukuy imataq qhipa pʼunchaykunapi kachkasqanchikta rikuchin. Chantapis Jehovaqa, achkha kutispiña saqra kaqta chinkachirqa. Ajinata ruwarqa, Jatun Parata parachimuspa. Chantá, Sodomata, Gomorrata, faraonta, soldadosninta ima, chinkachispa, Sisarap, Senaqueribpa soldadosninkutapis wañuchispa (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Arí, Jehovaqa, mana wiñaypaqchu saqinqa sutin pisipaq qhawasqa kananta, kamachisnin qhatiykachasqa kanankuta ima. Payqa, tumpamantawan saqra kaqta chinkachinqa, imaptinchus Cristop kutimuynin, kay saqra pachap tukukuynin ima, qayllapiña kachkan (Mat. 24:3).

13. Jehovap enemigosninwan khuska mana chinkachisqa kanapaq, ¿imatá ruwananchik tiyan?

¹³ Jehovap enemigosninwan khuska mana chinkachisqa kanapaqqa, Diospa kamachiyninman chiqa sunqu kananchik tiyan. ¿Imaynamantá? Satanaspa saqra qutunmanta karunchakuspa, kamachisninta mana manchachikuspa ima (Isa. 52:11; Juan 17:16; Hech. 5:29). Ajinallamanta janaq pachapi Tatanchikpa kamachiynin jatunchasqa kananpaq yanapasun. Chantapis, sutinta llimphuchachkaptin, tukuyman paylla Kamachiq kasqanta rikuchichkaptin ima, mana chinkachisqachu kasun.

14. ¿Imatataq Bibliap achkha tʼaqasnin sutʼinchan?

¹⁴ Bibliapiqa, runasmanta, Jehovap kamachiyninmanta ima, achkhata parlan. Ñawpa kimsa tʼaqasninpiqa, Dios tukuy imata ruwasqanmanta, jucha rikhurisqanmanta ima, parlan. Kimsa qhipa kaq tʼaqasninpitaq runas watiqmanta juntʼa runasman tukunankumanta. Wak tʼaqasninpitaq Kamachiqninchik Jehová, munayninta juntʼananpaq, imastachus ruwasqanmanta parlan. Génesis librop qallariyninpiqa, Satanás imaynatachus saqra kaqta rikhurichisqanmanta parlan. Apocalipsispa tukukuyninpitaq imaynatachus Dios, saqra kaqta, Kuraq Supayta ima, chinkachinanta, janaqpachapijina kay Jallpʼapipis munayninta juntʼananta ima, sutʼinchan. Arí, Bibliaqa, imaraykuchus jucha, wañuy ima, kasqanta sutʼinchan. Chantá, chiqa sunqu runas musuq pachapi wiñaypaq kawsanankupaq, jucha, wañuy ima, chinkananta sutʼinchan.

15. Jehová kamachiyninta jatunchaptin, bendicionesninta japʼinapaq, ¿imatataq ruwananchik tiyan?

¹⁵ Tumpamantawanqa, kay pacha askamalla tukukapunqa. Teatropi ruwakusqan tukukuptinqa, cortina wisqʼakun, ajinallatataq Jehovap kamachiynin unayta iskaychachikusqanpis, tukukapunqa. Satanasqa, manaña imatapis ruwayta atinqachu, chantataq wiñaypaq chinkachisqa kanqa. Ajinamanta Diosqa, munayninta juntʼanqa. Atipasqanmanta kusikunapaq, Bibliap nisqanmanjina bendicionesta japʼinapaq ima, Jehovap kamachiyninta ¡kunan jatunchachinanchik tiyan! Mana jinallaqa qhipakusunmanchu. Imaptinchus, paypa qayllanpi kaspalla “Tata Diosqa noqawan kashan” niyta atisunchik (Sal. 118:6, 7).

Chiqa sunqu kayta atisunman

16. ¿Imaraykutaq Diosman chiqa sunqu kayta atisqanchikta nisunman?

¹⁶ Arí, Jehovap kamachiyninta jatunchachiyta, chiqa sunqu kayta ima, atisunman. Apóstol Pablo qillqarqa: “Juchaman urmanapaj tanqasqa kankichej chaypis kallpaykichejman jinalla. Diosqa cheqamin, manataj saqesonqachejchu mana sayay atinata tanqasqa kanaykichejta. Astawanqa juchaman urmanapaj tanqasqa kashajtiykichej, Diosllataj yanapasonqachej imaynatachus chay juchaman urmanamanta lluspʼinaykichejpaj”, nispa (1 Cor. 10:13). Pablo nisqanmanjina, ¿imaynamantá juchaman tanqasqa kanchik, imaynatá Dios yanapawanchik?

17-19. a) ¿Ima juchapitaq israelitas chʼin pampapi kachkaspa urmarqanku? b) ¿Imaraykutaq Jehovaman juntʼa sunqu kay atinapaqjinalla?

¹⁷ Pablo nisqanmanjinaqa, —israelitas chʼin pampapi kachkaptinkujina— Diospa kamachiykunasninta pʼakinapaqjina rikukuspa, “juchaman urmanapaq tanqasqa” kasunman (1 Corintios 10:6-10, ñawiriy). Israelitasqa, juchaman tanqasqa kasqankuta atipayta atinkuman karqa, chaywanpis “sajra imasta” munapayayman urmarqanku. Juk kutiqa, Jehová milagroniqta, juk killata mikhunankupaqjina puna yuthusta qurqa. Aychata unaytaña mana mikhuptinkupis, Jehovaqa, paykunaman maná nisqa tʼantata qurqa. Chaywanpis paykunaqa, astawan munapayasqankurayku, manaña atispapis puna yuthusta japʼillarqankupuni (Núm. 11:19, 20, 31-35).

¹⁸ Israelitasqa chaymanta ñawpaqta, Moisés Sinaí urqupi Leyta japʼichkaptin, lanti yupaychayman urmarqanku. Arí, paykunaqa, waka uñaman rikchʼakuq lantita yupaycharqanku, khuchichakurqankutaq. Paykunaqa, Moisés mana chaypichu kasqanrayku chay juchapi urmarqanku (Éxo. 32:1, 6). Aswan qhipamantaq manaraq Sumaq Jallpʼaman yaykuchkaptinku, achkha qharis, Moabmanta warmiswan sunqunkuta suwachikuspa khuchichakurqanku. Chayrayku, wañuchisqa karqanku (Núm. 25:1, 9). Chantapis israelitasqa, uqharikurqanku, rimarqanku ima. Juk kutiqa, mana Moisesllapaqchu manaqa, Jehovapaq rimarqanku (Núm. 21:5). Chantapis Coré, Datán, Abiram, wak uqharikuq runas ima, qhasimanta wañuchisqa kasqankuta yuyaspa, mayta rimarqanku. Chayrayku Diosqa, 14.700 runasta wañuchirqa (Núm. 16:41, 49).

¹⁹ Israelitas juchaman tanqasqa kasqankuqa, atipanankupaqjinalla karqa. Chaywanpis, Jehovapi manaña iñisqankurayku, paykunarayku ruwasqanta, chiqan ñankunasninta ima, qunqapusqankurayku juchaman urmarqanku. Chantapis chʼampaykunasninkuqa, muchunankupaqjinalla karqa, kunanpis kikillantaq. Chayrayku, Jehovap yanapayninta maskʼaspa, atipanapaq kallpachakuptinchikqa, juntʼa sunqullapuni kayta atisun. Jehovaqa, yanapawasunpuni imaraykuchus, “cheqamin, manataj saqe[nqachu kamachisnin] mana sayay atinata tanqasqa kana[nku]ta”. Payqa, ni jaykʼaq saqirpawasunchu, nitaq munayninta manaña juntʼayta atinapaqjina chʼampaypi rikukunanchikta saqinqachu (Sal. 94:14).

20, 21. ¿Imaynamantataq Dios juchamanta lluspʼinapaq “yanapa[wanchik]”?

²⁰ Juchaman tanqasqa kaptinchikqa, Dios “yanapawasun imaynatachus chay juchaman urmanamanta lluspʼina[n]chijpaj”. Qhatiykachasqa kaypi tʼukurina. Ichapis enemigosninchikqa, Diosta manaña yupaychananchikpaq tukuy imata ruwawasunman. Ñuqanchiktaq ajinapi rikukuspa, ichá maqanawanchikta, ñakʼarichinawanchikta chayri wañuchinawanchikta manchachikuspa, nisqankumanjina ruwasunman. Chaywanpis, Pablo kay 1 Corintios 10:13 pʼitipi nisqanmanjinaqa, juchaman tanqasqa kasqanchik pisi tiempollapaq kanqa. Jehovaqa, ni jaykʼaq saqinqachu, mana muchuyta atinapaqjina chʼampaypi rikukunanchiktaqa. Payqa, juntʼa sunqullapuni kananchikpaq, iñiyninchikta, Paywan allinpi kasqanchikta ima, kallpachanqa.

²¹ Jehovaqa, espíritu santonwan yanapawanchik. Chantapis, juchaman tanqasqa kachkaptinchik, espíritu santonniqta Bibliap yuyaychaykunasninta yuyarichiwanchik (Juan 14:26). Ajinamanta, chiqan ñanllapipuni kasunchik. Yachanchikjina, Diospa kamachiyninta, runas chiqa sunqu kanankuta ima, iskaychachikurqa. Diospa kamachisninqa, chayta yachasqankurayku achkhas, wañunankukama juntʼa sunqu karqanku. Chaywanpis, mana wañuspachu juchamanta lluspʼirqanku. Astawanqa Jehová, wañunankukama juchaman mana urmanankupaq yanaparqa. Ñuqanchiktapis yanapallawanchiktaq. Arí, angelesninniqta yanapawanchik, paykunaqa “Diospa kachamusqasnin, salvacionta herenciapaj japʼejkunata yanapanankupaj” kanku (Heb. 1:14). Qhipan yachaqanapiqa, sapa jukninchik Diospa kamachiyninta wiñaypaq jatunchayta atisqanchikta qhawarisun. Chaywanpis, chayta ruwanapaqqa, juntʼa sunqullapuni kananchik tiyan, tukuy imapitaq Jehovallata Kamachiqninchiktajina qhawananchik tiyan.

¿Imatá kutichisunman?

• ¿Imaraykutaq Jehovallata Kamachiqninchiktajina qhawananchik tiyan?

• ¿Imataq juntʼa sunqu kay niyta munan?

• ¿Imaynatataq Jehová, kamachiyninta iskaychachikusqanta, tumpamantawan allinchananta yachanchik?

• ¿Imaynatá 1 Corintios 10:13 tukuyninchik juntʼa sunqu kayta atisqanchikta rikuchin?

[24 paginapi dibujo/foto]

Satanasqa, Adantawan Evatawan, Jehovata wasanchanankupaq tanqarqa

[26 paginapi dibujo/foto]

Jehovap kamachiyninta jatunchachinanchik tiyan