Señorninchej Jesucristopi atienekuna

1, 2. ¿Josué ima ruwaytataj japʼisqa Moisés wañupusqantawan?

JEHOVÁ DIOSQA Josueman nerqa: “Moisés kamacheyqa wañupunña. Kunanqa qanñataj sayariy. Jordán Mayuta chimpay tukuynin israelitasta pusariykukuspa, maypichus noqaqa qankuna israelitasman jallpʼata qosqaykichej, chayman”, nispa (Jos. 1:1, 2). Josueqa israelitasta kamachinanta yachaspa maytachá mancharikorqa. Imajtinchus payqa casi 40 watasta Moisespa yanapajnillan karqa.

² Josueqa ichapis piensarqa israelitas mana valechinankuta. Imajtinchus Moisesqa unayta uj kamachej jina israelitasta ñaupajman pusarqa (Deu. 34:8, 10-12). Josué 1:1, 2 versiculosmanta parlaspa uj libro nin: “Unay tiempopi uj gobierno cambiakojtenqa nacionninpi ima chʼajwaspis kajpuni. Kay tiempopipis ajinallataj”, nispa.

3, 4. 1) ¿Imatataj Jehová Dios ruwasqa paypi Josué atienekusqanrayku? 2) ¿Imatataj ruwananchej kasqa Diospa llajtanpi ashkha cambios kasqanrayku?

³ Josueqa israelitasta kamachinanmanta manchachikuspapis Jehová Diospi atienekorqa, kamachiykunasnintapis kasukorqapacha (Jos. 1:9-11). Jehová Diosqa paypi Josué atienekusqanrayku, uj angelnejta Josueta yuyaycharqa israelitasta sumajta pusananpaj. Chay angelqa ichapis Palabra karqa. Palabraqa Diospa Wawan, tukuy ima ruwasqa kajmantataj ñaupaj kaj (Éxo. 23:20-23; Juan 1:1).

⁴ Jehová Diosqa Josueta kamachejta jina churashaspa, israelitasta yanaparqa mana chʼajwasta rikhurichinankupaj. Josuej tiempopi jinallataj kay tiempopipis Diospa llajtanpi ashkha cambios tiyan. Chay cambiosta rikuspaqa, Señorninchej Jesucristo Diospa llajtanta yachachishasqanpi, ñaupajman pusashasqanpi ima confiananchej tiyan (Mateo 23:10 leey). Chayrayku qhepan parrafospi yachakusunchej imaynatachus Jehová Dios israelitasta ñaupajman pusasqanta llakiykunapi kashajtinku.

 5. ¿Piwantaj Josué tinkusqa Jericó qayllapi kashaspa? (22 paginapi kaj dibujota qhawariy).

⁵ Israelitas Jordán mayuta pasasqankumanta pisi tiemponman Josueqa, Jericó qayllapi kashaspa ñaupaqenpi rikorqa uj runata makinpi espadayojta. Josuetaj qayllaykuspa, taporqa: “Qanqa noqaykojmantachu kanki, chayri enemigosniykojmantachu?”, nispa. Chay espadayojtaj nerqa: “Ni mayqenmanta; noqaqa jamuni Tata Diospa soldadosnimpa kamachejnin jina”, nispa. Chay espadayoj runaqa uj ángel karqa. Payqa wakichisqa kasharqa Diospa llajtanta enemigosninmanta jarkʼananpaj (Josué 5:13-15 leey). Wakin versiculospi Jehová Diospuni Josuewan parlasqanta nejtinpis uj angelnejtapuni parlarqa, imaynatachus waj kamachisninman uj angelnejta parlarqa, ajinata (Éxo. 3:2-4; Jos. 4:1, 15; 5:2, 9; Hech. 7:38; Gál. 3:19).

6-8. 1) ¿Israelita soldados imatataj ninkuman karqa Diospa kamachiykunasninta uyarispa? 2) ¿Diospa kamachiykunasnin israelitaspa allinninkupajchu kasqa?

⁶ Jehová Diosqa, uj angelnejta Josueman kamacherqa imaynatachus Jericó llajtata japʼikapunanta. Por ejemplo Josueman kamacherqa tukuy soldadosta circuncidananta, nisunman jispʼanitankoj puntitanmanta qaritanta khuchurparinanta. Soldadosqa circuncidasqa kaspa mana enemigosninkuwan maqanakuyta atinkumanchu karqa (Gén. 34:24, 25; Jos. 5:2, 8).

⁷ Chayrayku soldadosqa circuncidachikunankuta yachaspa ichapis nerqanku: “Circuncidachikuspa, ¿imaynatataj enemigosninchejmanta familianchejta jarkʼayta atisunchejri?”, nispa. Chaywanpis Jericomanta runasqa mana israelitaswan maqanakoj llojserqankuchu. Manaqa manchariymanta kharkatiterqanku. Chayrayku Biblia niwanchej: “Chaypacha mana pipis Jericoman yaykuyta aterqachu, imaraykuchus llajta punkustaqa sumajta wisqʼakamusqanku israelitasmanta jarkʼakunankupaj. Chayrayku ni pipis yaykojchu, nitaj llojsejchu”, nispa (Jos. 6:1). Chayta yachaspa israelitasqa astawanchá atienekorqanku Jehová Diospa kamachiykunasnin allinninkupaj kasqanpi.

⁸ Chantapis Jehová Diosqa uj angelnejta Josueman kamachillarqataj ama Jericó llajtata atacanankuta. Astawanpis nerqa: ‘Jericó llajtata uj kutita sapa pʼunchaypi muyuyninta muyurinkichej. Chaytaqa ruwankichej sojta pʼunchayta. Qanchis kaj pʼunchaypitaj qanchis kutita llajtata muyurinkichej’, nispa. Chayta uyarispa israelita soldadosqa ichapis nerqanku: “Chayta ruwaspaqa tiempollanchejta usuchisunchej, kallpanchejtapis qhasita tukuchisunchej”, nispa. Ajinata yuyankuman karqa chaypis, Jehová Diosqa chay kamachiykunata mana qhasipajchu qorqa. Imaraykuchus israelitasqa chay kamachiykunata kasukuspa mana maqanakuspalla Jericó llajtata japʼikaporqanku. Jinamantataj repararqanku Jehová Diosta kasukuy allinninkupaj kasqanta, paypitaj confianankupuni kasqanta (Jos. 6:2-5; Heb. 11:30).a

 9. ¿Imajtintaj Diospa llajtanpi kamachiykunata kasukunanchejpuni kasqa?

⁹ Jehová Diosqa mana yuyasqanchejman jinapunichu imatapis ruwan. Chayrayku llajtannejta wakin kamachiykunata qowanchej. A vecesqa imajtinchus wakin cambios kasqanta mana entiendeyta atillanchejchu. Por ejemplo ichapis mana allinpajchu qhawarqanchej predicanapaj, estudianapaj, reunionespaj ima celularta chayri tabletata apaykachana kasqanta. Chaywanpis kunanqa ichapis reparanchej chay aparatos sumajta yanapawasqanchejta. Chayrayku Diospa llajtanpi chay jina cambiosta rikuspa kasukunapacha, ajinamanta astawan Jehová Diospi atienekusunchej, aswan ujchasqastaj kasunchej.

10. ¿Pitaj ñaupa cristianosta yanapasqa?

¹⁰ Cornelio cristianoman tukusqanmanta 13 watasninman jina, Antioquía llajtapi wakin judío cristianosqa salvakunapaj circuncidakunapuni kasqanta nisharqanku (Hech. 15:1, 2). Pablowan Bernabewantaj chay hermanoswan churanakorqanku, sinchʼitataj siminakorqanku. Chayrayku ancianosqa kacharqanku Pablota, Bernabeta, wakin hermanostawan, Jerusalenman rispa chay imasmanta apostoleswan ancianoswan ima parlamunankupaj. Pablotaj chayman rerqa, ‘Señorninchej chayman rinanta nisqanrayku’. Chaytaj sutʼita rikuchin chay tiempopi Cristo Diospa llajtanta yanapashasqanta (Gál. 2:1-3).

11. 1) Manaña circuncidakunachu kasqanta sutʼinchakojtinñapis, ¿imatataj judío hermanos ruwallasqankupuni? 2) ¿Apóstol Pablo Jerusalenmanta ancianosta kasukusqachu? (Sutʼinchayninta qhawariy).

¹¹ Ancianoswan apostoleswanqa, Cristoj yanapayninwan sutʼincharqanku mana judío kajkuna mana circuncidakunankupunichu kasqanta (Hech. 15:19, 20). Chaywanpis judío hermanosqa watasninman wawasninkuta circuncidashallarqankupuni. Jerusalenmanta ancianostaj uyarisqanku runas parlashasqankuta Pablo Moisespa Leyninta pʼakishasqanta. Chayrayku ancianosqa Pablota nerqanku tawa qharista temploman pusaspa Leyman jina paykunawan khuska llimphuchakamunanta. Ajinamanta runas reparanankupaj Moisespa Leyninta juntʼashasqanta (Hech. 21:20-26).b Chayta uyarispa Pabloqa ichapis ninman karqa: “Pitaj chayta ruwashanqari. Manaña circuncidakunachu kasqantaqa judioslla mana entiendenkuchu. Qhasita chayta ruwanayta nishawanku”, nispa. Jinapis Pabloqa ancianosta tukuy sonqo kasukorqa. Imaraykuchus ancianos jinallataj munarqa tukuy cristianos ujchasqas kanankuta. Chaywanpis Cristoqa wañuyninwan Moisespa Leyninta chinkacherqaña. Chayrayku qhawarinachej, imajtinchus Jesús unayta saqesqanta cristianos circuncisionmanta chʼajwanankuta (Col. 2:13, 14).

12. ¿Imajtintaj judío cristianos Moisespa Leyninta kasukushallasqankupuni?

¹² Diospa Llajtanta Kamachejkuna uj versiculota waj jinamanta sutʼinchajtinkoqa, mana chay rato entiendeyta atillanchejchu, manaqa watasninmanraj entiendenchej. Judío cristianospis mana entiendeyta atillarqankuchu Moisespa Leyninta manaña kasukunankuchu kasqanta (Juan 16:12). Imaraykuchus paykunaqa Moisespa Leyninman jina circuncidakojpuni kanku. Chaytaj judiospaj uj señal karqa Dios paykunata allinpaj qhawasqanmanta (Gén. 17:9-12). Wakin cristiano judiostaj circuncidakushallarqankupuni comunidadesninkupi mana qhatiykachasqa kanankupaj (Gál. 6:12). Chaywanpis Jesucristoqa, pisimanta pisi apóstol Pabloj cartasninnejta sutʼincharqa manaña circuncidakunachu kasqanta (Rom. 2:28, 29; Gál. 3:23-25).

13. Diospa llajtanpi cambios kajtin, ¿imatataj yuyarikunanchej kasqa chay cambiosta mana entiendespa?

¹³ Diospa llajtanpi wakin cambios ruwakusqanta mana entiendespaqa, yuyarikunanchej tiyan imaynatachus unay tiempopi Jesús Diospa llajtanta ñaupajman pusasqanta. Imaraykuchus Cristollataj kay tiempopipis Diospa llajtanta ñaupajman pusashan. Cristoqa Josuej tiemponpi jinallataj apostolespa tiemponpi Diospa llajtanpi kajkunata jarkʼananpaj, creeyninkuta wiñachinanpaj, ujchasqas kanankupajtaj yachacherqa, kamachiykunatapis qorqa (Heb. 13:8).

14-16. ¿Imajtintaj nisunman Cristo Diospa Llajtanta Kamachejkunanejta sumaj cambiosta ruwashasqanta?

¹⁴ ‘Allin kamachi yuyayniyojqa’ tiemponpi sumajta yuyaychawanchej, yachachiwanchejtaj (Mat. 24:45). Chaytaj rikuchiwanchej Señorninchej Jesús noqanchejmanta llakikusqanta. Marc sutiyoj hermanomanta parlarina. Payqa tawa wawasniyoj nintaj: “Satanasqa congregacionesta tʼaqanachiyta munan. Chaypajtaj familiaspi chʼajwasta rikhurichishan. Chayrayku Diospa Llajtanta Kamachejkunaqa astawan yuyaychashawanchej sapa semana familiapi Diosta yupaychanapaj tantakunata. Chaywantaj sutʼita nishawanchej tukuy tatas familianchejta creeypi sumaj sayasqa kanankupaj yanapananchej kasqanta”, nispa.

¹⁵ Diospa llajtanpi wakin cambiosta rikuspaqa, reparanchej Señorninchej Jesucristo yanapashawasqanchejta Diospi atienekunallapajpuni. Hermanonchej Patrickmanta parlarina. Pay nin: “Sabadosta domingostawan grupospi llojsikunanta nikojtin, wakin hermanosqa llakisqa kasharqanku. Chaywanpis noqa repararqani chayta kamachikusqanqa allinpuni kasqanta. Imaraykuchus grupitospi llojsispaqa manchachikoj hermanospis mana faltakuspa predicacionman llojsiyta atinku. Ajinamantataj astawan Jehová Diospi atienekunku”, nispa.

¹⁶ Señorninchej Jesucristoqa yanapashallawanchejtaj predicacionta ñaupajman churanapaj (Marcos 13:10 leey). Hermanonchej Andremanta parlarina. Paytaqa kunallanraj ancianota jina churasqanku. Payqa Diospa llajtanpi kamachikusqanta kasukunanpajpacha mayta kallpachakun. Pay nin: “Betelpi pisi hermanosllaña llankʼanankuta kamachikusqanqa, reparachiwanchej qhepa pʼunchaykunapi kausakushasqanchejta, tukuy atisqanchejtataj predicamuna kasqanta”, nispa.

17, 18. ¿Imajtintaj Diospa Llajtanta Kamachejkuna imatapis niwasqanchej allinninchejpaj kasqanpi piensarinanchej kasqa?

¹⁷ Jesucristoj kamachiykunasninta kasukoyqa, kay tiempopi mayta yanapawanchej, aswan qhepamanpis yanapawasunchej. Chayrayku Diospa llajtanpi cambios kajtenqa, piensarinanchej tiyan imaynatachus chay cambios yanapanawanchejpi. Chayrayku familianchejwan Diosta yupaychashaspa qhawarisunman ima cambioschus ruwakusqanta tantakuykunapi, predicacionpipis. Qhawarillasunmantaj imaynatachus chay cambios yanapashawasqanchejta.

¹⁸ Diospa Llajtanta Kamachejkuna allinninchejpajpuni imatapis niwasqanchejta mana qonqasunchu chayqa, kamachiykunasninta kasukuyta atillasunchej, kusisqastaj kasunchej. Por ejemplo Diospa llajtanpi qolqeta sumajta apaykachakushasqanta rikuspaqa, mayta kusikunchej. Imaraykuchus ñaupajtaqa publicaciones imprimikunanpaj ashkha qolqeta gastakoj. Kunantajrí celularesnillanchejpiña chayri tabletasnillanchejpiña chay publicacionesta uraqachisqanchejrayku pisillataña publicacionesta imprimikun, qolqetapis pisillataña gastakun. Chantapis aswan karu lugarespi Diosmanta willayta atinchej celularespi publicacionesta uraqachiyta atikusqanrayku. Chayrayku tukuypis kallpachakuna videosta, grabacionesta, publicacionesta ima celularesninchejman chayri tabletasninchejman uraqachinapaj. Chayta ruwaspaqa rikuchisunchej Jesusta kasukushasqanchejta. Imaraykuchus payqa munan Diospa llajtanpi allinta qolqeta apaykachakunanta.

19. ¿Allinchu kasqa Diospa Llajtanta Kamachejkunata kasukunanchej?

¹⁹ Señorninchej Jesucristo Diospa Llajtanta Kamachejkunanejta imallatapis ruwananchejta niwajtinchejqa, tukuy sonqo kasukunanchej tiyan. Ajinamanta hermanosninchejwan aswan ujchasqas kasunchej, creeyninchejpis astawan wiñanqa. Chaymanta parlaspa hermanonchej André nin: “Ashkha Betel wasispi nikorqa pisi hermanosllaña trabajanankuta. Chayrayku ashkha hermanos Betelmanta llojsiporqanku. Chay llojsipoj hermanostaj kusisqa kashanku asignacionesninkupi. Paykunaqa cambios kajtinpis Jehová Diospa carretanwan khuska rishanku. Chayta rikoyqa yanapawan chay hermanosta jatunpaj qhawanaypaj, Diospitaj astawan atienekunaypaj”, nispa.

20, 21. 1) ¿Imatataj Señorninchej Jesucristo tumpamantawan ruwanqa? 2) ¿Imatataj qhepan semana yachakusunchej?

²⁰ Señorninchej Jesucristoqa tumpamantawan enemigonta atipanqa jatuchaj imasta ruwaspa (Apo. 6:2; Sal. 45:4). Chay día chayamunankamataj wakichishawanchej paraisopi tiyakunapaj, ruwanasninchejta sumajta juntʼanapaj, wañusqas kausarimojtinku yachachinapaj, kay jallpʼata paraisoman tukuchinapaj ima.

²¹ Jehová Dios jarkʼakunawanchejpi atienekuna, paytaj ima kajtinpis paraisoman pusaykuwasunchej (Salmo 46:1-3 leey). Chaywanpis problemasniyoj kashajtinchej Diospa Llajtanta Kamachejkuna imatapis waj jinamanta ruwananchejta niwajtinchejqa, ichapis mana kasukuyta atillasunmanchu. Chayrayku qhepan semana yachakusunchej problemasniyoj kaspapis sonqo tiyasqas kayta atisqanchejta, Jehová Diospitaj confiayta atisqanchejta.