Suyakuyninchejpi kusikuna

“Wiñay kawsayta suyaku[nchej], mayqentachus mana jaykʼaj llullakoj Diosqa qonanta nerqa manaraj kay pacha ruwasqa kashajtin, chaypi.” (TITO 1:2.)

YUYARINAPAJ

Uj ajllasqa cristiano wañupunankama cheqa sonqo kajtin, ¿imaynamantá janaj pachapi aswan kusiy kasqanta yachanchej?

¿Imaynamantá waj ovejasmanta kajkunaj suyakuyninku, ajllasqa cristianospa suyakuyninkuwan khuskachasqa kashan?

Suyakuyninchejta juntʼakojta rikunapaj, ¿imastá “juchamanta tʼaqasqa” kanapaj, “cheqan kajman jina kawsana[paj]” ima ruwananchej tiyan?

 1. ¿Imaynatá Jehová suyakuyta qowasqanchej, ima kajtinpis aguantanapaj yanapawasunman?

APÓSTOL Pabloqa cristianosman qhelqarqa: “Suyakuyta qoj Dios tukuy kusiywan, sonqo tiyaykuywan creesqaykichejrayku qankunata juntʼachichun, Espíritu Santoj atiyninwan Diospi mayta suyakunaykichejpaj” (Rom. 15:13). Jehová qowasqanchej suyakuy yuyayninchejpi sutʼi chayqa, kusikuywan, sonqo tiyaykuywan ima juntʼasqa kasun, chantá imapis rikhurejtin aguantayta atillasun. Ajllasqa cristianosmanta kajtinchejpis manapis, chay suyakoyqa “ancla nisqa barco sayachina gancho jina creesqanchejpi mana iskayrayachisqa sinchʼita sayananchejpaj” kanqa (Heb. 6:18-20). Arí, suyakuyninchejmanta chʼipakusun chayqa, ima kajtinpis mana karunchakusunchu. Astawanpis creeyninchej kallpachasqa kananpaj, mana iskayrayanapaj ima yanapawasun (Hebreos 2:1; 6:11 leey).

 2. Kay qhepa pʼunchaykunapi kausaj cristianospaj, ¿ima iskay suyakuytaj tiyan? ¿Imaraykutaj “waj ovejas[manta]” kajkuna, ajllasqa cristianospa suyakuyninkumanta interesakunku?

² Kay qhepa pʼunchaykunapi kausaj cristianospajqa, iskay suyakuy tiyan. Jallpʼapiraj kausaj “juchʼuy tropa ovejas[manta]” ajllasqa cristianosqa, janaj pachaman ripuyta suyanku, maypichus mana wañuspa, Cristowan khuskataj reinonpi reyes jina, sacerdotes jinataj sirvenqanku (Luc. 12:32; Apo. 5:9, 10). “Waj ovejas[manta]” “may chhika runas[taj]”, Jesuspa kamachiyninpi paraisoman tukusqa Jallpʼapi, wiñaypaj kausayta suyakunku (Apo. 7:9, 10; Juan 10:16). Waj ovejasmanta kajkunaqa salvasqa kananku, Cristoj “wawqe[sninta]” mayta yanapanankumanta kasqanta yuyarikunankupuni tiyan (Mat. 25:34-40). Ajllasqa cristianosqa tʼinkankuta japʼenqankupuni, waj ovejaspa suyakuyninkupis juntʼakullanqataj (Hebreos 11:39, 40 leey). Ñaupajtaqa, ajllasqa cristianospa suyakuyninkumanta ukhuncharina.

AJLLASQA CRISTIANOSPA “WIÑAY KUSIY KAUSAYTA” SUYAKUYNINKU

3, 4. ¿Imaynatá ajllasqa cristianos “watejmanta nace[nku]”, ima “wiñay kusiy kawsayta[taj]” suyanku?

³ Apóstol Pedroqa, Diospa “ajllaku[sqasninman]” iskay cartasta qhelqarqa (1 Ped. 1:1, 2). Chay cartaspeqa, juchʼuy tropaj may sumaj suyakuyninkumanta astawan sutʼincharqa. Ñaupaj kaj cartanpi, jinata qhelqarqa: “Yupaychasqa kachun Dios, Señorninchej Jesucristoj Tatan. Payqa jatun khuyakuyninrayku watejmanta nacechiwarqanchej, Jesucristota wañusqakunamanta kawsarichisqannejta, wiñay kusiy kawsayta suyananchejpaj. Payqa churallawanchejtaj mana ismoj, mana chʼichichasqa, nitaj chinkapoj herenciata japʼinanchejpaj. Chayqa janaj pachapi qankunapaj waqaychasqa kashan. Creesqaykichejrayku qankunapis Diospa atiyninwan waqaychasqallataj kankichej, chay jamoj salvacionta taripanaykichejpaj, mayqenchus wakichisqa kashan qhepa pʼunchaykunapi rikuchisqa kanampaj, chayta. Chayrayku, qankunaqa mayta kusikunkichej” (1 Ped. 1:3-6).

⁴ Rikunchej jina, Jehovaj ajllasqasnin cristianosqa, Cristowan khuska janaj pachapi kamachinankupaj, “watejmanta nace[nku]” Diospa wawasnin jina. Paykunaqa, espíritu santowan ajllasqas kanku, Cristowan khuska reyes, sacerdotes ima kanankupaj (Apo. 20:6). Pedro sutʼinchasqanman jina, “watejmanta nace[sqankoqa]” “wiñay kusiy kawsayta” suyakunankupaj yanapan, “mana ismoj, mana chʼichichasqa, nitaj chinkapoj herenciata japʼinan[ku]paj”, chaytaj “janaj pachapi” waqaychasqa kashan. ¡Chayraykuchá “mayta kusikunk[u]”! Suyakuyninku juntʼakunanpajtaj, cheqa sonqosllapuni kananku tiyan.

5, 6. ¿Imaraykutaj ajllasqa cristianos “wajyasqas, ajllasqastaj kasqa[nkuta]” allinta japʼinanku tiyan?

⁵ Pedroqa ajllasqa cristianosman yuyaychaspa, iskay kaj cartanpi nerqa: “May kʼuchi kaychej wajyasqas, ajllasqastaj kasqaykichejpi sumajta sayanaykichejpaj”, nispa (2 Ped. 1:10). Arí, cristianos jina creeyta, munakuyta, Diosta cheqan kajman jina yupaychayta, hermanospura allinta kausakuyta ima rikuchinankupaj, mayta kallpachakunanku tiyan. Pay nillarqataj: “Chay imaschus qankunapi kashanku, ashkhayashankutaj chayqa, yanapasonqanku kawsayniykichej ama qhasilla kanampaj, [...] mana jinalla kanaykichejpaj[taj]” (2 Pedro 1:5-8 leey).

⁶ Cristoqa, Filadelfia (Asia Menor) qotuchakuymanta ajllasqa ancianosman kayta willacherqa: “Qanqa nisqayman jina pacienciawan suyasqaykirayku, noqapis qanta waqaychasqayki ñakʼariy pʼunchaypi, mayqenchus kay pachapi kaj chhika runasman jamonqa imayna sonqosniyojchus kasqanku yachakunampaj, chay. Usqhayta jamusaj. Chay kapususqanta allinta japʼiy, ama pipis pilluykita qhechusunampaj” (Apo. 3:10, 11). Uj ajllasqa cristiano Diosta wasanchajtenqa, “mana tukukoj jatunchana pilluta” mana japʼinmanchu, imajtinchus chaytaqa wañuykama cheqa sonqos kajkunallaman qokunanta nikorqa (1 Ped. 5:4; Apo. 2:10).

REINOMAN YAYKUNANKUMANTA

 7. ¿Ima sumaj suyakuymantataj Judas cartanpi parlarqa?

⁷ Judasqa, mamanmanta Jesuspa hermanon, 65 wata chaynejpi “Diospa wajyasqasninman”, nisunman ajllasqa cristianosman uj cartata qhelqarqa (Jud. 1; Hebreos 3:1, kikinchay). Payqa, Diospa Reinonpi kamachinankupaj ajllasqa kajkunaman, may sumaj suyakusqanku salvacionmanta qhelqayta munarqa (Jud. 3). Chay cartanpi waj imasta usqhayta ruwanankumantawan parlajtinpis, tukukuyninpi chay sumaj suyakuymanta parlarqa: “Pay kʼatalla qankunata waqaychayta atin mana urmajta, mana kʼaminata rikhurichisunaykichejpaj may jatun kaynimpa ñawpaqempi, jatun kusiywan. Yachayniyoj uj kʼata Dios Salvawajninchejman kachun jatunchasqa kay, yupaychay, atiyniyoj kamachej kay ima Señor Jesucristonejta” (Jud. 24, 25).

 8. Judas 24 nisqanman jina, uj ajllasqa cristiano wañunankama cheqa sonqo kajtin, janaj pachapi aswan kusiy kasqanta, ¿imaynatá yachanchej?

⁸ Arí, tukuy ajllasqa cristianos sapa ujninku, cheqa sonqo kanankupaj kallpachakunku, mana chinkachisqa kanankupajtaj, miskʼaymanta jarkʼakunku. Biblia nisqanman jina paykunaqa, Jesucristo mana juchayoj espiritusta jina kausarichinanta, Diospa ñaupaqenpitaj kusisqa kayta suyanku. Uj ajllasqa cristiano cheqa sonqo wañojtenqa, kausarichisqa kaspa “ni jaykʼaj ujtawan wañonqañachu”, arí “may allimpi qhawasqa”, “janaj pachapaj wakichisqa cuerpoyojta[j]” kanqa (1 Cor. 15:42-44). Kaypi tʼukurina: sichus uj juchasapa runa “Diosman kutirikojtin” janaj pachapi aswan kusiy tiyan chay, astawanrajchá Cristoj hermanon wañuykama cheqa sonqollapuni kajtenqa (Luc. 15:7). Chaypacha, Jehová, janaj pachapi kajkuna ima, ajllasqa cristianowan khuska kusikonqanku “jatun kusiywan” tʼinkanta japʼejtin (1 Juan 3:2 leey).

 9. ¿Imaynamantataj ajllasqa cristianos, Reinoman “may kusiypi pusaykusqa” kanqanku? ¿Imata ruwanankupajtaj chay suyakuy Jallpʼapiraj kajkunata tanqan?

⁹ Pedropis, ajllasqa cristianos juntʼa sonqo kajtinku, “Señor Jesucristo Salvawajninchejpa wiñay reinonman may kusiypi pusaykusqa kan[ankuta]” nerqa (2 Ped. 1:10, 11). ¿Imaynamantataj “may kusiypi pusaykusqa” kanqanku? Ichapis chayta nispaqa, yaykusqanku may sumaj kananta niyta munan, imajtinchus kʼacha kaykunata kʼanchayta jina rikuchenqanku. Chantá, wañunankukama cheqa sonqo kajkuna, ichapis may chhika bendicionesta japʼispa mayta kusikunankumanta parlasharqa. Paykunaqa, kausayninkupi cheqa sonqo kasqankuta yuyarispa may kusisqas, agradecesqas ima sientekonqanku. Arí, kay suyakoyqa, ajllasqa cristianosta Jallpʼapiraj kausashajtinku, “allinta yuyayni[nku]ta wakichi[spa]” ruwanankupaj tanqan (1 Ped. 1:13).

WAJ OVEJASPA SUYAKUYNINKU

10, 11. a) ¿Ima suyakuytaj waj ovejasmanta kajkunapaj tiyan? b) Jallpʼapi suyakuy juntʼakunan, Cristowan, “Diospa wawasnin rejsichisqa kanan[kuwan]” ima, ¿imaynamantá khuskachasqa kashan?

¹⁰ Apóstol Pabloqa, “Diospa wawasnin[pa]” may sumaj suyakuyninkumanta qhelqarqa, paykunaqa espíritu santonejta ajllasqa kanku, “Cristowan khuska[taj] herenciata” japʼenqanku. Chantapis mana yupay atina waj ovejasmanta kajkunaman, Jehová ima sumaj suyakuytachus qonanmanta jinata nerqa: “Tukuy kay pacha [nisunman runa] anchatapuni suyashan Diospa wawasnin rejsichisqa kananchejta. Chayrayku kay pachapis mana imapajchus karqa, chaypaj jinañachu, chaytaj mana payllamantachu, manachayqa Diospa munayninrayku. Chaywampis kay suyakuy tiyan. Tukuy kay pachapis ismuypa atiyninmanta kacharichisqa kanqa, Diospa kacharichisqa wawasninwan khuska jatun kusiypi kanampaj”, nispa (Rom. 8:14-21).

¹¹ Jehovaqa, uj “miray”, “ñawpa katari” Satanasmanta kacharichinanta nispa, runasman uj suyakuyta qorqa (Apo. 12:9; Gén. 3:15). Ñaupaj kaj “mirayqa” Jesucristo karqa (Gál. 3:16). Pay wañusqanrayku, kausarisqanrayku ima, runas juchamanta, wañuymanta ima kacharichisqa kayta suyakunku. Chay juntʼakunantaj, “Diospa wawasnin rejsichisqa kanan[kuwan]” khuskachasqa kashan. Ajllasqa cristianosqa, iskay kaj “miray” kanku. ¿Maykʼajtaj “rejsichisqa” kanqanku? Cristowan khuska Satanaspa sajra pachanta chinkachishajtinku (Apo. 2:26, 27). Chayta ruwajtinkutaj waj ovejasmanta kajkuna salvasqa kanqanku, paykunaqa jatun ñakʼariymanta kausashaj llojsenqanku (Apo. 7:9, 10, 14).

12. ¿Ima sumaj bendicionestataj “Diospa wawasnin rejsichisqa ka[sqanku]” runasman apamonqa?

¹² Jesucristo Waranqa Watasta Kamachishajtin, “kay pacha[pi]” runas may samarichisqas kanqanku. Chay tiempopitaj, waj jinamanta “Diospa wawasnin rejsichisqa kan[qanku]”. Paykunaqa, sacerdotes jina Cristowan khuska, Jesuspa wañuyninrayku bendiciones kasqanta runasman qonqanku. Diospa Reinon kamachishajtin, kasukoj runas imaschus wañuyrayku, jucharayku ima kasqanta qhepapi saqeponqanku. Pisimanta pisitaj, “ismuypa atiyninmanta kacharichisqa” kanqanku. Waranqa watas tukukuyninkama cheqa sonqollapuni kajtinkutaj, jatun pruebatapis pasajtinku, “kawsay libro[pi]” sutisninku wiñaypaj qhelqasqa kanqa. Chantá “Diospa kacharichisqa wawasninwan khuska jatun kusiypi” kayta taripanqanku (Apo. 20:7, 8, 11, 12). ¡Chaymá may sumaj suyakoyqa!

SUYAKUYNINCHEJ YUYAYNINCHEJPI SUTʼI KANAN TIYAN

13. ¿Imapitaj suyakuyninchej sayasqa kashan, maykʼajtaj “Jesuspa rikhurimuyni[n]” kanqa?

¹³ Pedro, Diospa yuyaychasqanman jina iskay cartasta qhelqasqanqa, ajllasqa cristianosta, waj ovejasmanta kajkunata ima, suyakuyninku yuyayninkupi sutʼi kananpaj mayta yanapan. Pedroqa, chay suyakuy mana ruwasqasninkuraykuchu, manaqa Diospa qhasilla kʼacha yanapayninrayku kasqanta sutʼincharqa: “Allinta yuyayniykichejta wakichiychej, aychaykichejpa munaynintataj atipaychej. Diospa qhasilla kʼacha yanapayninta tukuy sonqo suyaychej, mana iskayrayaspa, mayqentachus qankunaman qosqa kanqa Jesuspa rikhurimuynimpi” (1 Ped. 1:13). ¿Maykʼajtaj “Jesuspa rikhurimuyni[n]” kanqa? Cheqa sonqo discipulosninta tʼinkaj, sajra runastataj Jehová nisqanman jina chinkachej jamojtin (2 Tesalonicenses 1:6-10 leey).

14, 15. a) ¿Imatataj yuyayninchejpi suyakuyninchej sutʼi kananpaj ruwananchej tiyan? b) ¿Imatá Pedro yuyaycharqa?

¹⁴ Suyakuyninchej yuyayninchejpi sutʼi kanallanpajpuni, Jehovaj “jamunan pʼunchayta” mayta suyaspa kausananchej tiyan. Chay “pʼunchayqa” “cielopis”, “cay pachapis” chinkachisqa kanqanku, nisunman kay tiempomanta gobiernos, sajra runas, tukuy ima “ruwasqa cajkuna[snintin]”. Chayraykuchá Pedro nerqa: “¿Imayna runastaj canayquichej tiyanrí? [...] Diospa pʼunchaynin chayamunanta mayta suyaspa mayta munaspataj causacunayquichej tiyan. Chay pʼunchaypi cieloka ninawan tucuchiska canka. Chaypi caj imaspis ruphaycuspa unuyaponkancu” (2 Ped. 3:10-12, Dios Parlapawanchej).

¹⁵ Chaypachaqa, “mosoj cielota mosoj jallpʼa[tawan” sayachikonqa. Nisunman gobiernospa, tukuy sajra runaspa ima cuentanmanta, Cristoj gobiernon, cheqan runas ima kanqa (2 Ped. 3:13). Chantataj mosoj pachapi suyakuymanta parlaspa, Pedro yuyaycharqa: “Munasqa hermanosníy, chay imasta suyaspaqa, atisqaykichejta kallpakuychej Diospa ñawpaqempi mana juchayoj, mana kʼamina, paywan allimpi kawsakushaj tarisqa kanaykichejpaj”, nispa (2 Ped. 3:14).

SUYAKUYNINCHEJMAN JINA KAUSANA

16, 17. a) ¿Imastá “juchamanta tʼaqasqa” kanapaj, “cheqan kajman jina kawsana[paj]” ima ruwana? b) ¿Imatataj suyakuyninchejta juntʼakojta rikunapaj ruwananchej tiyan?

¹⁶ Chantapis, suyakuyninchej mana yuyaynillanchejpichu sutʼi kanan tiyan, manaqa chayman jina kausana. Pedro nerqa jina, Diosta yupaychaypi imayna runaschus kasqanchejta qhawarikunanchej tiyan. Ñaupajtaqa, “juchamanta tʼaqasqa” kananchej tiyan, nisunman llimphu kausayniyoj, allintataj kausakunanchej tiyan “mana creejkuna ukhupi” (2 Ped. 3:11; 1 Ped. 2:12). Chantapis, purajmanta munanakunanchej tiyan, chaypajtaj Jallpʼantinpi, qotuchakuyninchejpi ima ujchasqa kanapaj mayta kallpachakuna (Juan 13:35). Jinallataj “cheqan kajman jina kawsana[n]chej tiyan”, nisunman Jehovaman astawan qayllachinawanchejpaj jina ruwaykunata ruwana: tukuy sonqo Diosmanta mañakuna, Bibliata sapa pʼunchay leerina, sapallanchejpi sumajta ukhuncharina, familiapi Diosta yupaychana, sonqo kʼajaywantaj “reinomanta evangelio[ta]” willana (Mat. 24:14).

¹⁷ Jehová allinpaj qhawanawanchejpaj jina, kay sajra pachata chinkachishajtin salvanawanchejpaj jinataj imatapis ruwayta munanchej. Ajinata ruwajtinchejqa, “wiñay kawsayta suyaku[sqanchejta juntʼakojta rikusun], mayqentachus mana jaykʼaj llullakoj Diosqa qonanta nerqa manaraj kay pacha ruwasqa kashajtin” (Tito 1:2).

[22 paginapi dibujo/foto]

Ajllasqa cristianosqa “watejmanta nace[nku]”, “wiñay kusiy kawsayta suya[kunankupaj]”

[24 paginapi dibujo/foto]

Familianchejpi, suyakuyninchej sutʼi kananpaj kallpachakuna