Diospa mosoj llajtan

1, 2. 1) ¿Imataj karqa Pentecostés 33 watapi? 2) ¿Pikunataj Diospa mosoj llajtanmanta karqanku? (Patapi kaj dibujota qhawariy.)

JEHOVAQA Pentecostés 33 watapi uj mosoj llajtata rikhuricherqa, chay llajtataj “Diospa nacionnin Israel” nisqa sutiwan rejsikun (Gál. 6:16). Jehovaqa chay mosoj llajtamanta kajkunata espíritu santonwan ajllarqa. Pablo qhelqasqanman jina chay mosoj llajtamanta kajkunaqa, mana necesitarqankuchu Abrahampa miraynin jina circuncidasqa kayta. Imaraykuchus paykunaqa ‘espíritu santonejta sonqonkupi circuncidasqa’ karqanku (Rom. 2:29).

² Diospa mosoj llajtan qallarishajtenqa apóstoles, pachajmanta astawan Jesuspa waj yachachisqasnin ima, Diospa llajtanpi karqanku. Paykunaqa Jerusalenpi uj wasipi tantasqa kasharqanku (Hech. 1:12-16). Chantá Diosqa espíritu santonnejta paykunata ajllarqa, ajinamantataj wawasninpaj rejsikaporqa (Rom. 8:15, 16; 2 Cor. 1:21). Chaytaj rikucherqa, Cristo kausayninta qosqanta Jehová allinpaj qhawasqanta, Leypa tratonpa cuentanmanta mosoj trato qallarisqanta ima (Luc. 22:20; Hebreos 9:15 leey). Ajinamanta Jesuspa yachachisqasnenqa Diospa mosoj llajtanmanta karqanku. Espíritu santoj yanapayninwantaj waj parlaykunata parlarqanku, chantapis “Diospa may jatuchaj ruwasqasninmanta” runasman yachacherqanku (Hech. 2:1-11).

3-5. 1) ¿Imatá Pedro judiosman Pentecostés pʼunchaypi nerqa? 2) ¿Imaynatataj Diospa mosoj llajtan yapakusharqa?

³ Jehovaqa apóstol Pedronejta judiosta, mana judío kajkunata ima chay mosoj llajtamanta nisunman qotuchakuymanta kanankupaj wajyarerqa. Pedroqa Pentecostés pʼunchaypi, mana manchachikuspa judiosman nerqa, Jesusta ‘Señorninkuta’ jina, Cristota jina qhawanankuta, pitachus wañucherqanku chayta. Chayta uyarispataj Pedrota taporqanku imatachus ruwananku kasqanta, Pedrotaj kuticherqa: “Diosman kutirikuychej sapa ujniykichej, bautizachikuychejtaj Jesuspa sutimpi, juchasniykichej pampachasqa kanankupaj. Diostaj Espíritu Santota qosonqachej”, nispa (Hech. 2:22, 23, 36-38). Chay pʼunchayllapitaj Diospa mosoj llajtanman kinsa waranqa jina yapakorqanku (Hech. 2:41). Chantá apostolesqa sonqo kʼajaywan willallarqankupuni, ashkhastaj cheqa kajta japʼikorqanku (Hech. 6:7). Arí, Diospa mosoj llajtanqa wiñashallarqapuni.

⁴ Jesuspa yachachisqasnenqa, aswan qhepaman Samariapipis willallarqankutaj. Chay lugarmanta ashkha runastaj cheqa kajta japʼikuspa bautizakorqanku. Chaywanpis paykunamantaqa ni mayqen espíritu santota japʼerqankurajchu. Jerusalenmanta Diospa Llajtanta Kamachejkunataj Pedrota, Juantawan Samariamanta hermanosta waturejta kacharqanku. Iskaynin apóstoles “creejkunaj umankuman makisninkuta churayko[jtinkukama]”, creejkunaqa espíritu santota japʼerqanku (Hech. 8:5, 6, 14-17). Ajinamanta Samariapi kaj hermanos Diospa mosoj llajtanman yaykorqanku.

⁵ Kay 36 watapi, Diosqa ujtawan Pedronejta uj qotu runasta mosoj llajtanmanta kanankupaj wajyarerqa. Chaytaj karqa Pedro Romapi Cornelioman, Cornelioj familiaresninman, amigosninman ima willashajtin (Hech. 10:22, 24, 34, 35). Biblia nin: “Pedro parlashajtillanraj, Espíritu Santoqa tukuynin uyarejkunaman [nisunman mana judío kajkunaman] uraykʼamorqa. Jopemanta Pedrowan jamoj, creejkuna judiostaj tʼukushaj qhepakorqanku, mana judío kajkunamampis Diosqa Espíritu Santota qosqanmanta”, nispa (Hech. 10:44, 45). Chay tiempomantapacha, mana judío kajkunapis Diospa mosoj llajtanmanta kayta aterqanku.

6, 7. ¿Imaynatataj cheqa cristianos Diospa mosoj llajtanmanta kasqankuta rikucherqanku?

⁶ Diospa Llajtanta Kamachejkuna 49 watapi tantakushajtinku, Santiago nerqa: “Ñapis Simón Pedro willawanchejña imaynatachus kay ñawpaj kutipi Diosqa mana judío kajkunata watukusqanta, paykuna ukhumantataj runasta ajllakusqanta paypata kanankupaj”, nispa (Hech. 15:13, 14). Diospa mosoj llajtanpeqa judíos, mana judíos ima kananku karqa (Rom. 11:25, 26). Aswan qhepamantaj Pedro qhelqarqa: “Ñawpataqa mana aylluchu karqankichej, kunanrí Diospa ayllunña kankichej”, nispa. Pedroqa imapajchus chay mosoj llajta rikhurisqanta sutʼincharqa kayta nispa: “Qankunaqa Diospa ajllakusqan ayllu kankichej, Reypa sacerdotesnin, juchamanta tʼaqasqa nación, Diospa rantikusqan ayllu, willanaykichejpaj tʼukuna may sumaj ruwasqasninmanta, pichus laqhamanta wajyasorqachej sumaj kʼanchayninman, chaypata”, nispa (1 Ped. 2:9, 10). Chay llajtamanta kajkunaqa Diospa mana manchachikoj testigosnin kananku karqa, tukuypa rikunankutataj Jehovata kamachejninkuta jina jatunchananku karqa.

⁷ Israel llajtamanta jina, Jehovaqa kay mosoj llajtamanta nin: “Ajllakusqay ayllu [...], mayqentachus noqapaj ruwarqani jatunchanawankupaj” nispa (Isa. 43:20, 21). Chay mosoj llajtamanta kajkunaqa mana manchachikuspa Jehová cheqa Dios kasqanta, runas yupaychasqanku lantis llulla dioskuna kasqankuta ima willarqanku (1 Tes. 1:9). Arí, paykunaqa Diospa, Jesuspa testigosnin karqanku “Jerusalenpi, tukuy Judea jallpʼapi, Samariapi, tukuy kay pachaj kʼuchusnin[pi ima]” (Hech. 1:8; Col. 1:23).

 8. ¿Imatataj Pablo ñaupa tiempomanta cristianosman nerqa?

⁸ Pabloqa mana manchachikuspa yachayniyoj runasman sutʼincharqa, Jehovalla cheqa Dios kasqanta. Chantapis rikuchillarqataj Jehová “kay pachata, tukuy imasnintawan ruwaj Dios[...], janaj pachajta, kay pachajtapis Señornin” kasqanta (Hech. 17:18, 23-25). Qotuchakuymanta cristianosmantaj nerqa: “Noqa yachani ripojtiykama chawpiykichejman wajkuna phiña atojkuna jina yaykumunankuta, tropata mana khuyaspa. Chay runasqa qankuna ukhullamantataj rikhurenqanku, cheqa kajta qʼewispa creejkunata paykunaj qhepankuta pusanankupaj”, nispa (Hech. 20:29, 30). Chaytaj jinapuni karqa. Imaraykuchus niraj 100 wata kashajtin, cheqa kajta qʼewispa llullata yachachejkuna rikhurerqankuña (1 Juan 2:18, 19).

 9. Apóstoles wañupusqankumanta qhepaman, ¿imataj qotuchakuypi karqa?

⁹ Apóstoles wañupusqankumanta qhepaman, cheqata qʼewejkuna qotuchakuypi llullata yachachiyta qallarerqanku, ajinamantataj cristiano nichikoj iglesias rikhurerqa. Paykuna Diospa sutinwan rejsichikunankumantaqa, Diospa sutinta orqhorqanku Bibliata waj qallusman tijrachishaspa. Chantapis waj imaspi Diosta pisipaj qhawachillarqankutaj. Imaraykuchus paykunaqa Dios juchachasqan imasta ruwarqanku, llulla yachachiykunata yachacherqanku, Diospa sutinpi maqanakorqanku, khuchichakuypi, sajra ruwaypi imataj chhapukorqanku. Chayrayku kay Jallpʼapi Jehovaj cheqa sonqo kamachisnenqa, pisilla karqanku, manataj uj sumaj wakichisqa llajta jinarajchu.

10, 11. 1) ¿Imatataj trigomantawan, cizañamantawan rijchʼanachinanpi Jesús nerqa? 2) ¿Imaynatá Jesuspa rijchʼanachinan juntʼakorqa 1914 watamanta aswan qhepaman?

¹⁰ Jesusqa trigomantawan, cizañamantawan rijchʼanachinanpi llulla yachachiykuna rikhurisqanrayku, cheqa cristianos pisilla kanankuta nerqa. Chantapis nillarqataj “tarpojkuna puñurparinankukama[...]”, Kuraj Supay jamuytawan, runaj Churinpa tarpusqanman cizaña qhorata tarpuykunanta. Trigowan cizaña qhorawan ‘kay tiempoj tukukuyninkama’ khuska wiñananku karqa. Jesús sutʼincharqa chay ‘sumaj mujoqa’ “janaj pacha reinoj wawasnin” kasqankuta, chay ‘cizaña qhorataj’ “Kuraj Supaypa wawasnin” kasqankuta. Chantá runaj Churenqa ‘ruthojkunata’ nisunman angelesta kachamunan karqa, chay trigowan ninakoj runasta, cizañawan ninakoj runasmanta tʼaqananpaj. Ajinamanta janaj pacha Reinoj wawasnenqa tantasqa kananku karqa (Mat. 13:24-30, 36-43). ¿Imaynatá kay juntʼakorqa? ¿Imaynamantá Jehová kay Jallpʼapi uj sumaj wakichisqa llajtayoj karqa?

¹¹ ‘Kay tiempoj tukukuynenqa’ 1914 watapi qallarerqa. Chay tiempopajqa ajllasqa cristianos manaraj ashkhachu karqanku. Chay wata guerra qallarishajtin chay ajllasqa cristianos nisunman “janaj pacha reinoj wawasnin”, Jatun Babiloniaj atiynillanpipuni kasharqanku. Kay 1919 watapitaj Jehová paykunata Jatun Babiloniaj atiyninmanta kacharicherqa, ajinamanta pikunachus cheqa cristianos kasqankuta, pikunatajchus llulla cristianos kasqankuta sutʼita rikucherqa. Profeta Isaías nerqa jinataj, chay ajllasqa cristianostaqa uj sumaj wakichisqa llajtata jina Jehová tantaykorqa. Isaías 66:8 versiculopi nin: “Uj reinoqa ajinatachu uj pʼunchayllapi ruwakunman? Uj nación ajinatachu ujllapi rikhurimunman? Chaywampis Sión llajtata ujllata nanay japʼejtinkama, wawasnintaqa nacechikumpacha”. Sionqa janaj pachapi Jehovaj llajtanwan ninakun, chaypitaj ángeles kashanku. “Nacechikun[...]”, nispataj, kay Jallpʼapi ajllasqa cristianosmanta uj llajta rikhurisqanmanta parlashan.

12. ¿Imaynatá “janaj pacha reinoj wawasnin” Diospa llajtan kasqankuta rikucherqanku?

¹² Ñaupa tiempomanta cristianos jina, “janaj pacha reinoj” wawasnenqa, Jehovaj testigosnin kanku (Isaías 43:1, 10, 11 leey). Paykunataj aswan rejsisqa kanku allinta kausakusqankurayku, Reinomanta sumaj willaykunata “tukuynejpi” willasqankurayku ima (Mat. 24:14; Fili. 2:14, 15). Ajinamanta paykunaqa, ashkha runasta yanaparqanku Jehovaman astawan qayllaykunankupaj (Daniel 12:3 leey).

13, 14. 1) Mana ajllasqa kajkuna, ¿imatataj ruwananku tiyan Dios yupaychayninkuta allinpaj qhawananpaj? 2) ¿Imatataj Biblia chaymanta nerqa?

¹³ Ñaupaj yachaqanapi yachakorqanchej jina, Jehovaqa saqerqa forasteros payta yupaychanankuta, jinapis chay forasterosqa Diospa llajtanwanpuni kananku karqa (1 Rey. 8:41-43). Kunanpis kikillantaj, pikunachus mana ajllasqa kajkunaqa, Jehovaj ajllasqa testigosninwan, nisunman ‘janaj pacha reinoj wawasninwan’ Diosta yupaychananku tiyan.

¹⁴ Iskay profetas nerqanku ashkha runas kay qhepa pʼunchaykunapi Jehovaj llajtanman ujchaykukunankuta. Profeta Isaías nerqa: “Ashkha runas jamuspa, nenqanku: Jakuchej, Tata Diospa orqonman wicharinachej, Jacobpa Diosnimpa wasinman; payqa ñankunanmanta yachachiwasunchej, chaki ñankunampi purinanchejpaj, nispa. Leyqa Sionmanta rikhurenqa; Tata Diospa palabrampis Jerusalenmanta rikhurillanqataj”, nispa (Isa. 2:2, 3). Profeta Zacariastaj nerqa: “Jerusalenman jamonqanku atiyniyoj nacionesmanta ashkha runas, Tukuy Atiyniyoj Tata Diosta maskʼaj bendicionninta mañakunankupaj”, nispa. Pay nisqanman jina “waj llajtasmanta chunka runas[qa]”, tukuy nacionesmanta, imaymana parlayniyojkunamanta ima kanku. Paykunaqa Diospa mosoj llajtanwan khuska Diosta yupaychayta atinku, ninkutaj: “Qankunawan riyta munayku, imaraykuchus uyariyku qankunawan Dios kasqanta”, nispa (Zac. 8:20-23).

15. ¿Imaraykutaj ninchej waj ovejasmanta kajkuna ajllasqa cristianoswan khuska ‘rinku’ nispa?

¹⁵ Waj ovejasmanta kajkunaqa, ajllasqa cristianoswan khuska ‘rinku’, imaraykuchus paykunawan Reinomanta sumaj willaykunata willamunku (Mar. 13:10). Ajinamanta paykunaqa Diospa llajtanman ujchaykukunku, ajllasqa kajkunawantaj “uj tropalla” kanku, Jesucristotaj “sumaj michej[ninku]” (Juan 10:14-16 leey).

16. ¿Imaynatataj Jehová “manchay ñakʼariy” tiempoj tukukuyninta qallarenqa?

¹⁶ Jatun Babilonia chinkachisqa kasqantawan, Diospa llajtantañataj chinkachiyta munanqanku. Mana wañunanchejpajtaj Jehová jarkʼanawanchejta necesitasun. Jehová maychus tiemponpi kay Jallpʼapi munayninta ruwanqa, chayraykutaj kay Jallpʼapi llajtanta chinkachiyta munanqanku. Ajinamanta “manchay ñakʼariy” tiempoj tukukuynin qallarenqa, chaytaj tukukonqa Armagedón maqanakuypi (Mat. 24:21; Eze. 38:1-4). Tiemponmanqa Gog “waj nacionesmanta orqhomusqa kanku” chaykunata, nisunman Diospa llajtanta chinkachiyta munanqa (Eze. 38:10-12). Chayraykutaj Jehovaqa Gogwan, soldadosninwan ima llajtanrayku maqanakonqa. Chaypitaj Jehovaqa Paylla Tukuyta Kamachej kasqanta rikuchenqa, sutintataj llimphuchanqa. Pay nin: “Sutʼinchasaj jatun kayniyta, may santo kaj Dios kasqayta ima. Rejsisqa kasaj tukuy runaspa ñawpaqenkupi, yachanqankutaj noqa [Jehová] kasqayta”, nispa (Eze. 38:18-23).

17, 18. 1) Diospa llajtanta Gog chinkachiyta munajtin, ¿imastataj Jehová kamachiwasun? 2) Jehová jarkʼanawanchejta munanchej chayqa, ¿imatataj ruwasunchej?

¹⁷ Diospa kamachisninta Gog chinkachiyta munajtin, Dios kamachisninman nenqa: “Kunanqa, aylluymanta kajkuna, rispa, wasiykichejman yaykuychej, punkuykichejtataj wisqʼakamuychej. Chaypi uj pisita pakakuychej [...] kʼajaj phiñakuyni[y] tukukunankama”, nispa (Isa. 26:20). Chay tiempo chayamojtintaj, Jehová imastachus salvakunapaj ruwananchej kasqanta kamachiwasunchej. Chantapis “wasiykichejman” nispaqa, ichá qotuchakuykunamanta parlashan.

¹⁸ Kay pachaj tukukuyninpi Jehová jarkʼanawanchejta munanchej chayqa, Jehová kay Jallpʼapi llajtayoj kasqanmanta, llajtantaj qotuchakuykunapi tʼaqasqa kasqanmanta ima mana iskayrayananchejchu tiyan. Chayrayku ama qotuchakuyninchejmanta karunchakunachu. Salmista jinataj, tukuy sonqo ninachej: “Salvacionqa Tata Diosmanta jamun. Bendeciy ari aylluykitaqa”, nispa (Sal. 3:8).