Satanaspa trampanpi ama urmanachu

ISRAELITASQA Sumaj Jallpʼaman yaykunankupajña kasharqanku. Paykunaqa Jordán mayuta chimpaspa, Jehová Dios nisqanman jina chay jallpʼata japʼinanku karqa. Chay lugarpi kashajtinku, waj llajtasmanta warmisqa israelita qharista uj fiestaman wajyarerqanku. Chay israelitasqa ichapis sonqonkupi nerqanku: “Kusa kanman rinayqa, waj runaswan rejsinakamuyman, tusurikamuyman, mikhurimuymantaj”, nispa. Jinapis chay warmisqa mana Diospa Leyesninman jinachu kausaj kanku, astawanqa millay costumbresniyoj, millay kausayniyojtaj karqanku. Israelitasmanta wakin qharisqa ichapis nerqanku: “Noqaqa má juchapi urmasajchu”, nispa.

¿Jinachu karqa? Biblia niwanchej: “Qharisqa Moabmanta warmiswan khuchichakuyta qallarerqanku”, nispa. Chay warmisqa, israelitas llulla dioskunata yupaychanankuta munarqanku. Israelita qharistaj chaytapuni ruwarqanku. Chayrayku Jehová “Diosqa maytapuni israelitaspaj phiñakorqa” (Núm. 25:1-3).

Chay israelitasqa, Jehová Diospa Leyninta iskaynejmanta pʼakerqanku: llulla dioskunata yupaychaspa, khuchichakuy juchapi urmaspataj. Diosta mana kasukusqankurayku, may chhika runas wañorqanku (Éxo. 20:4, 5, 14; Deu. 13:6-9). ¿Imaraykutaj israelitaspa ruwasqanku may llakiy karqa? Imaraykuchus paykunaqa, Sumaj Jallpʼaman yaykunankupajña kasharqanku. Jehová Diospa Leyninta kasukunkuman karqa chayqa, israelitasqa chay Sumaj Jallpʼaman yaykunkuman karqa (Núm. 25:5, 9).

Apóstol Pabloqa chay israelitasmanta nerqa: “Chay tukuy imas paykunata qhatirerqa, noqanchej yachakunanchejpaj. Qhelqakorqataj kay tiempoj tukukuyninpi kausajkuna, ama paykuna jina ruwananchejpaj”, nispa (1 Cor. 10:7-11). Satanasqa mayta kusikorqa israelitas juchallikusqankurayku, Sumaj Jallpʼaman mana yaykusqankumanta. Kay tiempopipis Satanasqa, chay israelitasta jinallataj urmachiyta munawanchej, paraisoman mana yaykunanchejpaj. Chayrayku ama paykuna jina pantanapaj kallpachakuna.

Satanasqa ima tojllaswanchus may chhika runasta urmacherqa, chayllawantaj kay tiempopi runasta urmachishan. Yachakorqanchej jina, israelitastaqa khuchichakuy juchapi urmacherqa. Kay tiempopipis cristianosta chayllawantaj urmachiyta munashan. ¿Ima tojllawantaj Satanás khuchichakuy juchapi urmachiyta munawanchej? Pornografía nisqawan, nisunman khuchichakuymanta chayri qʼala runasmanta videoswan, fotoswan, grabacioneswan ima.

Kay tiempopi runasqa, pakayllamanta pornografiata qhawanku. Pasaj wataspi, chay millay imasta qhawayta munajqa, cineman rinan karqa, manachayrí pornografiamanta revistasta chayri librosta rantikunan karqa. Ichapis wakenqa, wajkuna rikunankuta manchachikuspa, mana chay lugaresman rejchu kanku. Jinapis kay tiempopeqa, pillapis Internetniyoj kaspa pornografiata qhawayta atinman, ichapis trabajonpi chayri autonpi kashaspa. Ashkha suyuspitaj, qharispis warmispis wasinkupi pornografiata qhawanku.

Astawanqa kay tiempopi imaymana aparatos kasqanrayku, astawan runas pornografiata qhawanku. Uj runaqa calleta purishaspa, autopi chayri trenpi rishaspa, celularninpi chayri tabletanpi millay fotosta qhawashanman.

Pornografiata pakayllapi qhaway aswan fácil kasqanrayku, astawan runas mana allinman chayanku. Ashkhas qhariwarmi kausayninkupi problemasniyoj kanku, pisipaj qhawakunku, nitaj sonqo tiyasqachu kanku. Mana pesachikojtinkutaj, Jehová Diosqa paykunata niña allinpajchu qhawanqa. Rikunchej jina, pornografiaqa runata manapuni allinmanchu chayachin. Pornografiata qhawayqa, cuchillowan khuchuykukuy jina. Nanasqanchej tiempowan sanoyapojtinpis, tʼireqa kallanqapuni.

Pornografiaqa Satanaspa ujnin trampan. Jehová Diosninchejtaj, chay trampapi mana urmananchejpaj yanapayta munawanchej. Yanapanawanchejta munanchej chayqa, mana israelitas jinachu kananchej tiyan. Paykunaqa Jehová Diospa nisqasninta mana kasukorqankuchu. Noqanchejtajrí kasukunanchej tiyan (Éxo. 19:5). Jehová Diosninchej pornografiata millachikusqanta entiendenanchej tiyan. Qhawarina imaraykuchus chayta nisqanchejta.

Jehová Dios israelitasman qosqan kamachiykunaqa, allinninkupaj karqa. Chay kamachiykunaqa, israelitasta muyuyninkupi kaj llajtaspa millay ruwaykunasninmanta jarkʼaj (Deu. 4:6-8). Chay kamachiykunaqa sutʼita rikucherqa, Jehová Dios khuchichakuy juchata millachikusqanta.

Jehová Diosqa israelitaspa muyuyninkupi kaj nacionespa millay ruwaykunasninkumanta parlaytawan, paykunaman nerqa: “Canaán sutiyoj jallpʼaj ususnintapis amallataj ruwankichejchu, [...] chay jallpʼaqa millay chʼichichasqa qhepakorqa. Noqatajrí chay juchasninkumanta cuentata mañarqani”, nispa. Jehová Dios may santo kasqanrayku, payqa cananeospa kausayninkuta millaypaj qhawarqa. Chayrayku chay jallpʼa millay chʼichichasqa kasqanta nerqa (Lev. 18:3, 25).

Jehová Dios cananeosta castigajtinpis, runasqa khuchichakullajpuni kanku. Chaymanta mil quinientos watasninman, apóstol Pabloqa cristianospa llajta masisninkumanta parlarqa. Pay nerqa: “Paykunaqa manaña imamanta pʼenqakuspa, millay kausaypi puriyman qokunku. Ajinamanta tukuy imaymana millay imasta ruwanankupaj, chaykunawan mana sajsayta atispa”, nispa (Efe. 4:17-19). Kay tiempopipis, ashkha runasqa mana pʼenqakuspa khuchichakunku. Cristianosqa tukuy atisqanchejta ruwanchej, kay mundo rikuchin chay millay imasta mana qhawanapaj.

Pornografiaqa Diosta pisipaj qhawachin. Jehová Diosqa payman rijchʼakojta ruwawarqanchej. Chayrayku imachus allin, imatajchus mana allin kasqanta reparayta atinchej. Jehová Diosninchejqa, qhariwarmi jina puñuykuymanta leyesta churarqa. Chaytaj casarasqa kajkuna puñuykuspa kusisqa kanankupaj karqa (Gén. 1:26-28; Pro. 5:18, 19). Pornografiata ruwajkuna, chayta qhawanankupaj wajkunata tanqajkunapis, Diospa kamachiykunasninta mana valechinkuchu. Paykunaqa Jehová Diosta mana respetankuchu. Chayrayku Jehovaqa chay runasta juzganqa (Rom. 1:24-27).

¿Imatá nisunman munasqankuraykupuni pornografiata qhawajkunamanta? Ichapis wakin ninku: “Kusirikunallapaj qhawani”, nispa. Ajinata yuyaj runasqa, Jehovaj kamachiykunasninta pisipaj qhawallankutaj. Pornografiata qhawayta qallarishajtinkoqa, ichapis mana munarqankuchu Diospa kamachiykunasninta pisipaj qhawayta. Jehová Diosta sirvejkunaqa, pornografiata mayta millachikunanchej tiyan. Biblia nin: “Tata Diosta munakojkunaqa sajra kajta chejnichunku”, nispa (Sal. 97:10).

Pornografiata mana qhawayta munajkunapis, chaypi urmayta atinkuman. Pantaj runas kasqanchejrayku, ichapis sajra munayninchejwan mana atipachikunapaj kallpachakushanchej. Chantapis sonqonchej chʼaukiyawasunman, Jehovaj kamachiykunasninta mana kasukunapaj (Jer. 17:9). Jinapis ashkhas pornografiata qhawayta saqespa, cristianosman tukunku. Chayta yachayqa, pornografiata niña qhawanankupaj kallpachakojkunata, mayta yanapanman. Chayrayku Supaypa trampanpi mana urmanapaj, imaynatachus Diospa Palabran yanapawasqanchejta yachakusun.

Qallariypi yachakorqanchej jina, israelitasqa sajra munayninkuwan atipachikusqankurayku, juchallikorqanku, wañorqankutaj. Noqanchejpis kikillantataj urmasunman. Jesuspa hermanon Santiago nerqa: ‘Sapa runa munayninwan sonqonta aysachikun, suwachikuntaj. Chantá chay runaj munaynin sinchʼiyajtin, payta juchallichinʼ, nispa (Sant. 1:14, 15). Sajra munayninchej sonqonchejpi saphichakunanta saqejtinchejqa, juchapi urmasunman. Chayrayku ama millay imaspi yuyanallapunichu. Astawanqa chay millay imasta yuyayninchejmanta usqhayta orqhona.

Sichus millay imasta yuyashallanchejpuni chayqa, chay rato chinkachinapaj kallpachakuna. Jesús nerqa: “Makiykichus chayri chakiykichus pantachisunki chayqa, khuchukuspa wijchʼuy. [...] Sichus ñawiyki pantachisunki chayqa, sikʼispa wijchʼuy”, nispa (Mat. 18:8, 9). Jesusqa mana makinchejta chayri chakinchejta khuchunamantapunichu parlasharqa, nitaj ñawinchejta sikʼinamantapunichu. Astawanpis imaschus pantachinawanchejpaj jina kanku, chaykunata usqhayta wijchʼunamanta parlasharqa. Jesuspa nisqan, ¿imaynatá pornografiata mana qhawanapaj yanapawasunman?

Telepi, computadorapi chayri celularpi, millay fotos chayri videos rikhuriwanchej chayqa, ama ninachu: “Uj kutita qhawajteyqa ni imapis kanqachu”, nispa. Astawanqa usqhayllata waj ladota qhawana, chay ratotaj apagana. Chantá allin imaspi yuyana. Chayta ruwaspaqa, mana allin yuyaykunata umanchejmanta orqhosun, nitaj sajra munayninchejwan atipachikusunchu.

Sichus pornografiata qhawarqanchej chayqa, chay millay imasqa watasta yuyayninchejpi qhepakunman. Mana suyashajtillanchejtaj yuyaninchejman kutirimunman. Chay kajtenqa, ichapis masturbakuyta munasunman, nisunman jispʼananchejta llujchikusunman. Ichapis pornografiata qhawayta saqenchejña. Jinapis imastachus rikusqanchejqa yuyayninchejman kutimunman. Chayta yachayqa wakichisqa kanapaj yanapawasun.

Diospa munayninman jina yuyanapaj, ruwanapaj ima kallpachakuna. Apóstol Pablo jina ruwana. Pay nerqa: “Cuerpoyta ni imarayku munayninta ruwajta saqenichu, uj esclavota jinataj kamachini”, nispa (1 Cor. 9:27). Ama saqenachu sajra munayninchej esclavota jina japʼinawanchejta. Astawanqa Romanos 12:2 nisqanta ruwana. Chaypi nin: “Yuyayniykichejta mosojyachispa, mosoj runaman tukuychej. Ajinamanta qankunallataj sutʼita reparankichej, Diospa munaynenqa kʼacha, cheqan, payta kusichejtaj kasqanta”, nispa. Sajra munayninchejta kasuspaqa, mana kusisqachu kasun. Diospa munayninman jina yuyaspa, ruwaspataj, kusisqa kasun.

Bibliaj wakin versiculosninta umanchejpi japʼina. Yuyayninchejman millay imas jamojtintaj, chay versiculospi tʼukurinapaj kallpachakuna. Wakin versículos kaykuna kankuman: Salmo 119:37, Isaías 52:11, Mateo 5:28, Efesios 5:3, Colosenses 3:5, 1 Tesalonicenses 4:4-8 ima. Chayta ruwaspaqa pornografiata Jehová jina millachikusunchej, imatachus munasqantataj ruwasunchej.

Millay imasta qhawayta munasqanchej atipanawanchejpaj jina kashan chay, ¿imatá ruwasunman? Jesús jina ruwanapaj kallpachakuna (1 Ped. 2:21). Jesús bautizakusqantawan, Satanasqa Jesusta kutin kutita juchaman urmachiyta munarqa. ¿Imatá Jesús ruwarqa? Mana Supayta kasorqachu. Astawanpis Diospa Palabranmanta valekuspa, Supaypa nisqanta qhesacharqa. Jesús nerqa: “¡Riy kaymanta Satanás!”, nispa. Supaytaj riporqa. Imaynatachus Jesús Supaypa contranpi sinchʼita sayarqa, ajinallatataj noqanchejpis ruwana (Mat. 4:1-11). Satanaswan mundonwanqa millay imaspi yuyanapaj tanqawasunpuni. Jinapis Jehová Diospa yanapayninwanqa, enemigonchejta atipayta atisunman. Ajinamanta pornografiata qhawayta qonqasun.

Jehová Diosmanta yanapata mañakunallapuni. Apóstol Pablo nerqa: “Paymantaqa tukuy sonqo mañakuychej [...]. Diostaj sonqo tiyaykuyta qosonqachej, mayqentachus runas mana entiendeyta atinkuchu, chayta. Ajinamanta payqa sonqoykichejta, yuyayniykichejtawan, Cristo Jesusnejta waqaychanqa”, nispa (Fili. 4:6, 7). Jehová Diosqa juchapi mana urmananchejpaj sonqo tiyaykuyninta qowasunchej. Payman qayllaykusunchej chayqa, paypis qayllaykamuwasunchej (Sant. 4:8).

Jehová Diospa qayllanpi kasunchej chayqa, sajra kajmanta jarkʼasqa kasun. Jesusqa Supaymanta nerqa: “Kay mundota kamachejqa jamushanña. Paytaj contraypi ni imata ruwayta atinchu”, nispa (Juan 14:30). ¿Imaraykutaj Jesús chayta nerqa? Payllataj nerqa: “Kachamuwajneyqa noqawan kashan, manataj sapallaytaqa saqerpawanchu, imaraykuchus noqaqa imatachus munasqantapuni ruwani”, nispa (Juan 8:29). Jehovata imaschus kusichin chayta ruwasun chayqa, payqa ni jaykʼaj saqerpariwasunchu. Pornografiata qhesachanapaj kallpachakuna, Satanastaj mana trampanpi urmachiwasunchu.