Jóvenes creeyniykichejta kallpachaychej

1, 2. 1) ¿Imatataj Diosta yupaychaj jóvenes wakin kuti tapukunkuman? 2) ¿Imatataj Biblia nin?

GRAN BRETAÑA suyupi, uj sipas uj hermanaman nerqa: “Sumaj yuyayniyoj kasqaykita yuyarqani, Diospi creej kasqankeqa”, nispa. Alemaniamanta uj hermanotaj qhelqarqa: “Profesoresneyqa Biblia imaynatachus kausay qallarisqanta willasqan, cuentolla kasqanta ninku. Yuyayninkuman jinataj, tukuy yachakojkuna kausay jinallamanta rikhurisqanpi creenku”, nispa. Franciamanta uj sipas hermanataj nerqa: “Colegioymanta profesoresqa, wakin yachakojkuna Bibliapi creesqankumanta tʼukunku”, nispa.

² Kay tiempopi, ashkha runas mana creenkuchu Dios ruwawasqanchejta. Jehovata yupaychaj joven kanki chay, chayri paymanta yachakushanki chayqa, ichá wakin kuti tapukunki: “¿Imaynatá rikuchiyman Diospuni tukuy imata ruwasqanta?”, nispa. Bibliaqa imatachus uyarisqanchejpi, leesqanchejpi ima allinta tʼukurinapaj yanapawanchej. Biblia nin: “Tanteyayqa allinta qhawasonqa”, nispa. Chayqa yanapasonqa, llulla yachachiykunata qhesanaykipaj, Jehovapi creesqaykita kallpachanaykipaj ima (Proverbios 2:10-12 leey).

 3. ¿Imatá kay yachaqanapi yachakusun?

³ Jehovapi creeyninchej sinchʼi kananpajqa, payta astawan rejsinanchej tiyan (1 Tim. 2:4). Chayrayku Bibliata chayri publicacionesta leerishaspaqa, imatachus nishasqanpi tʼukurinayki tiyan. Leesqaykita entiendenaykipaj kallpachakuy (Mat. 13:23). Ajinata ruwaspaqa, Jehová Diospuni tukuy imata ruwasqanta, Bibliata yuyaychasqanta ima yachanki. Kay yachaqanapitaj chayta yachakusun (Heb. 11:1).

 4. 1) Kausay jinallamanta rikhurisqanpi creejkuna, Diospi creejkunawan, ¿imapi rijchʼakunku? 2) ¿Imatataj tukuyninchej ruwananchej tiyan?

⁴ Ichá pipis nisunkiman: “Noqaqa kausay jinallamanta rikhurisqanta creeni, científicos chayta nisqankurayku. ¡Imaynatá Diospi creenkiri! Manaqa pi runapis payta rikunchu”, nispa. Ashkha runas ajinata yuyanku. Ajinapunitaj, Diostaqa mana pipis rikunchu, nillataj imata ruwajtapis (Juan 1:18). Chaywanpis kausay jinallamanta rikhurisqanta nejkunaqa, mana rikusqanku imasllapitaj creenku. ¿Imaraykú chayta ninchej? Imaraykuchus ni mayqen cientificopis, nitaj waj runapis uj katarita waj animalman tukushajta rikunchu (Job 38:1, 4). Chayrayku tukuyninchej, imaschus Dios kasqanta rikuchisqanta ukhuncharina. Chantá chay imaspi sumajta tʼukurina, yachakusqanchejman jinataj imapichus creenata ajllana. Apóstol Pabloqa chaymanta parlaspa qhelqarqa: “Diospa mana rikukoj imasnenqa sutʼita rikuchikunku paypa ruwasqasninnejta, kay pacha ruwakusqanmantapacha. Chaykunaqa kanku: Wiñay atiynin, Dios kasqan ima. Chayrayku mana niyta atinkuchu mana yachasqankutaqa”, nispa (Rom. 1:20).

 5. ¿Imastaj yanapawasunman Diospa ruwasqasninmanta astawan yachakunapaj?

⁵ Cielopi, Jallpʼapi ima tukuy kaj chhikata qhawarispa sumajta tʼukurinchej chayqa, tukuy chaykuna tʼukunapaj jina ruwasqa kasqankuta reparanchej. “Creesqanchejrayku yachanchej” tukuy chay imasta Dios ruwasqanta, payta mana rikojtinchejpis. Reparanchejtaj Diosqa may kʼacha, jatun yachayniyojtaj kasqanta (Heb. 11:3, 27). Científicos imastachus yachakusqankumanta leespa, Diospa ruwasqasninmanta astawan yachakusunman. Chaykunamanta wakintataj tarisunman: Diospa ruwasqasnenqa jatun kayninta rikuchin videopi, Obra de un Creador, chantá El origen de la vida nisqa folletospi, ¿Existe un Creador que se interese por nosotros? nisqa libropi ima. ¡Despertad! revistaqa, wakin cientificospa chayri waj runaspa kausayninkumanta parlan. Chay runastaj imaraykuchus Diospi creeyta qallarisqankuta sutʼinchanku. Chay revistapeqa “¿Casualidad o diseño?” nisqa yachaqana llojsillantaj. Chaypitaj wakin animalitos chayri waj imas imatachus ruwayta atisqankuta sutʼinchan. Willantaj imaynatachus científicos kikin imasta ruwayta munasqankuta.

 6. ¿Imaynatá publicacionesninchej yanapasunkiman?

⁶ Estados Unidosmanta 19 watasniyoj hermano, 5 kaj parrafopi parlarqanchej chay folletosmanta nin: “Chay folletosta kutin kutita estudiarqani, maytataj yanapawarqa”, nispa. Franciamanta uj hermana nin: “‘¿Casualidad o diseño?’ nisqa yachaqanaqa mayta tʼukuchiwan. May yachayniyoj ingenierospis, cielopi, Jallpʼapi kaj imasta qhawarispa kikinta ruwayta munanku. Jinapis manapuni kikinta ruwayta atenqankuchu”, nispa. Sudafricamanta 15 watasniyoj sipaspa tatasnintaj nerqanku: “Wawaykoqa ¡Despertad! revista llojsimojtin, ‘Entrevista’ nisqa yachaqanata ñaupajta leen”, nispa. Chay publicacionesqa qantapis yanapasunkiman. ¿Imaynatá? Diospuni tukuy imata ruwasqanta reparachisonqa, llulla yachachiykunata qhesachanapajtaj yanapasonqa. Creeyniykitaj astawan sinchʼiyanqa. Ajinamanta sumaj saphichasqa sachʼa jina kanki, mayqentachus sinchʼi wayrapis mana urmachiyta atinchu (Jer. 17:5-8).

 7. ¿Imaraykú Dios munan “imachus allin, imatajchus mana allin kasqanta” reparanaykita?

⁷ “¿Imaraykú Bibliaj nisqanpi creeni?”, nispa tapukoyqa allillan. Jehovaqa mana munanchu, wajkuna creesqankuraykulla imapipis creenaykita. Astawanpis payqa “imachus allin, imatajchus mana allin kasqanta” reparanaykita munan. Ajinamanta Bibliata sumajta rejsispa, Diospa Palabranpuni kasqanta sutʼita yachanaykipaj. Bibliata astawan rejsejtiykeqa, creeyniyki astawan sinchʼiyanqa (1 Timoteo 2:4; Hebreos 5:14 leey). Chaypajqa, imamantachus yachayta munasqaykita estudiawaj.

8, 9. 1) ¿Imasta estudiaytaj wakinman gustan? 2) ¿Imaynatá wakinta yanaparqa leesqankupi sumajta tʼukuriy?

⁸ Wakinmanqa Bibliaj profeciasninta estudiay gustan. Wakintaj Bibliaj nisqanta kikinchanku, unay tiempomanta qhelqajkuna, científicos chayri waj yachayniyoj runas nisqankuwan. Sutʼinchanapaj, Génesis 3:15 nisqanpi tʼukurina. Jehovaqa ñaupaj profeciata willarqa, Adanwan Evawan kamachiyninpa contranta oqharikusqankutawan. Chay profeciaqa entiendechiwanchej, imaynatachus Diospa Gobiernon Paylla sumajta kamachiyta atisqanta rikuchinanta, tukuy ñakʼariykunata tukuchinanta ima. ¿Imaynatá Génesis 3:15 estudiawaj? Ima versiculoschus chay profeciata astawan sutʼinchan, chaykunamanta uj listata ruway. Chantá sapa uj maykʼajchus qhelqakusqanta maskʼay, chay fechasman jinataj listapi churay. Ajinapi Bibliata qhelqajkuna mana kikin tiempopichu kausasqankuta reparanki. Jinapis sapa ujpa qhelqasqankoqa, chay profeciata astawan sutʼinchan. Ajinamanta rikuchinki, Bibliata qhelqajkunaqa Jehovaj atiyninwan qhelqasqankuta (2 Ped. 1:21).

⁹ Alemaniamanta uj hermano, imaynatachus Bibliaj sapa libron Diospa Gobiernonmanta uj imata sutʼinchasqanpi tʼukurerqa. Pay nerqa: “Chayqa ajina, 40 runas Bibliata qhelqajtinkupis. Paykunamanta ashkhasqa, mana kikin tiempopichu kausakorqanku, nitaj rejsinakorqankuchu”, nispa. Australiamanta uj hermanaqa, Torremanta Qhawaj revistata estudiashaspa, Pascua fiesta, Génesis 3:15 versiculowan, Mesiaswan ima ujchasqa kasqanta repararqa. [1] Pay qhelqarqa: “Chayta estudiaspa Jehová manchay yachayniyoj kasqanta repararqani. Payqa israelitasta Pascuata ruwanankuta kamacherqa, tukuy chay wakichisqantaj Jesuspi juntʼakorqa. Chay ruwasqanqa mayta tʼukuchiwarqa. Allinta entiendenaypaj sumajta tʼukurerqani”, nispa. ¿Imaraykú chay hermana ajina kasharqa? Imaraykuchus payqa leesqanpi, entiendesqanpi ima, sumajta tʼukurerqa. Chay ruwasqanqa creeyninta sinchʼiyachinanpaj yanaparqa, Jehovaman astawan qayllaykunanpaj ima (Mat. 13:23).

10. ¿Imataj Bibliapi astawan atienekunaykipaj yanapasonqa?

¹⁰ Tʼukurillaytaj Bibliata qhelqajkunapi. Paykunaqa mana manchachikuspa cheqanta qhelqarqanku. Chay tiempopi qhelqaj runasqa, llajtankumanta, reyesninkumantapis, allin kajllata qhelqarqanku. Jehovaj profetasninrí, israelitasmanta, reyesninkumanta ima tukuy imata qhelqarqanku, sajra ruwayninkutapis (2 Cró. 16:9, 10; 24:18-22). Paykunaqa pantasqasninkutapis mana pakarqankuchu, nillataj Diospa waj kamachisninpatapis (2 Sam. 12:1-14; Mar. 14:50). Gran Bretañamanta uj joven hermano nerqa: “Mana pipis ajina cheqanta parlallanchu. Chayrayku Biblia Jehovaj yuyaychasqanpuni kasqanmanta mana iskayrayanichu”, nispa.

11. ¿Imataj yanapawasunman Biblia Diospa yuyaychasqanpuni kasqanta creenapaj?

¹¹ Bibliaj yuyaychasqanman jina kausakojtinchejqa, sumajta yanapawasqanchejta reparasun. Chaytaj Biblia Diospa Palabranpuni kasqanta rikuchiwasun (Salmo 19:7-11 leey). Japonmanta uj sipas hermana nerqa: “Familiaypi Bibliaj nisqanman jina kausakusqaykurayku may kusisqas kayku. Aswan allinta kausakuyku, ujchasqas kayku, munanakuykutaj”, nispa. Bibliaqa ashkha runasta reparachin, imapichus creesqanku mana cheqachu kasqanta (Sal. 115:3-8). Chantapis tukuy atiyniyoj Jehová Diospi atienekunankupaj yanapan. Pikunachus Dios mana kasqanta nejkunarí, paypa ruwasqaninta diosninkupaj qhawanku. Wakintaj runas sumaj kausayta apamunankuta ninku. Jinapis imastachus ruwasqankoqa, chʼampaykunata kunankama mana tukuchiyta atinchu. Biblialla aswan qhepaman sumaj kausay kananta nin (Sal. 146:3, 4).

12, 13. ¿Imaynatá runaswan parlarisunman Diospa ruwasqasninmanta chayri Bibliamanta?

¹² Diospa ruwasqasninmanta chayri Bibliamanta runaswan parlarishaspa, imatachus creesqankutaraj tapurina. Wakenqa kausay jinallamanta rikhurisqanta creespapis, Diospi creellankutaj. Paykuna yuyasqankuman jina, Diosqa tukuy imata wakicherqa, kausay jinallamanta rikhurinanpaj. Wakintaj escuelaspi yachachikusqanrayku, kausay jinallamanta rikhurisqanta creenku. Wakinrí religionespi sajra imasta rikusqankurayku, Diospi niña creenkuchu. Chayrayku piwanpis parlarishaspa, ñaupajta tapuriy imapichus creesqanta, imaraykuchus chaypi creesqanta ima. Chantá kutichisqanta sumajta uyariy. Chayta ruwajtiyki ichá uyarisonqa (Tito 3:2).

¹³ Diospi creesqaykirayku pillapis asipayasojtin, ¿imatá niwaj? Chay runata respetowan tapuriy: “Yuyasqaykiman jina, ¿imaynatá kausay qallarerqa?”, nispa. Chantá niwaj: “Kausay jinallamanta rikhurinman karqa chayqa, imachus ñaupajta kausajqa mirananpaj atiyniyoj kanan karqa”, nispa. Chaypajtaj quimicata yachachej profesor nisqanman jina, chay kausaj imitaqa kaykunata necesitan: 1) Jarkʼakunanpaj uj qaritata jina, 2) atiyniyoj kayta, chayta apaykachayta ima, 3) imaynachus kananta, wiñananta ima kamachinanpaj yachayta, 4) chay yachayta wajman qoyta ima. Chay profesor nerqa: “Kausayniyojkunamanta aswan juchʼuy kaj imitaspis, tʼukunapaj jina ruwasqa kashanku”, nispa.

14. Diospa ruwasqasninmanta parlashaspa, ¿imaynatá sutʼinchariwaj?

¹⁴ Diospa ruwasqasninmanta parlarishaspa, Pablo jina sutʼinchawaj. Pay qhelqarqa: “Sapa waseqa runaj wasichasqampuni; tukuy imata ruwajrí, Diospuni”, nispa (Heb. 3:4). Uj waseqa mana jinallamantachu rikhurin, manaqa pipis chayta imaynatachus ruwananpi tʼukurerqa, chantataj wasicharqa. Kausayniyoj imastaj, uj wasimanta nisqa aswan tʼukunaraj kanku. Chayrayku chaykunapis ruwajniyojpuni kanku. Diospa ruwasqasninmanta parlanapaj, publicacioneswan yanapachikullawajtaj. Uj hermana Diospi mana creej jovenwan parlarerqa. Chay jovenman 5 parrafopi parlarqanchej chay folletosta jaywarqa. Semananmantaj chay joven nerqa: “Kunanqa Diospi creeni”, nispa. Chantá Bibliamanta yachakuyta qallarerqa, kunantaj hermanonchej.

15, 16. 1) Uj runaman Biblia Diospa yuyaychasqan kasqanta niraj rikuchishaspa, ¿imatá ruwanayki tiyan? 2) ¿Imatá yuyarikunayki tiyan?

¹⁵ Pillapis Bibliamanta iskayrayajtin, ¿imaynatá paykunata tʼukurichiwaj? Nerqanchej jina, ñaupajtaqa imapichus creesqanta tapuriy. Chantá imastachus yachayta munasqanta reparay (Pro. 18:13). Ciencia nisqamanta yachay gustajtenqa, Biblia cienciamanta parlaspa mana pantasqanta rikuchiy. Ñaupa tiempomanta yachay gustajtintaj, unay tiempomanta parlaj librospa nisqankuta oqhariwaj. Chantá rikuchiwaj, Bibliaqa imachus kananta ashkha watas ñaupajtaña willasqanta. Wakintaj Biblia kausayninpi yanapayta atisqanta rikuchejtiyki, uyariyta munasonqanku. Paykunamantaj Jesús Orqopi yachachishaspa imastachus yuyaychasqanta yachachiwaj.

¹⁶ Yuyarikuy, noqanchejqa mana runawan chʼajwaytachu munanchej. Astawanqa noqanchejwan parlarinankuta, Bibliamanta yachakunankuta ima munanchej. Chayrayku imatapis respetowan tapuriy, kutichisusqantataj sumajta uyariy. Imapichus creesqaykita kʼachamanta sutʼinchariy, astawanraj kurajniykiwan parlashanki chayqa. Wajkunata jatunpaj qhawajtiykeqa, paykunapis kikillantataj ruwanqanku. Jovenllaraj kaspapis imapichus creesqaykita sumajta sutʼinchajtiyki, paykunaqa tʼukonqanku. Jinapis chʼajwayta chayri asipayasuyta munaspalla parlasunku chayqa, mana kutichinaykipunichu tiyan (Pro. 26:4).

17, 18. 1) ¿Imataj yanapasonqa Bibliapi creeyniyki sinchʼi kananpaj? 2) ¿Imatataj qhepan yachaqanapi yachakusun?

¹⁷ Creeyniyki sinchʼi kananpajqa, mana Bibliaj wakin yachachiykunasnillantachu yachanayki tiyan. Bibliaj ukhu yachachiykunasnitapis yachanapaj kallpachakunayki tiyan, qolqe pʼampasqatapis maskʼashawaj jina (Pro. 2:3-6). Creeyniykita kallpachanaykipaj, tukuynin Bibliata leeriy. Ichapis uj watapi leeyta tukunaykipaj kallpachakuwaj. Congregacionesta waturej uj hermano, joven kashajtin chayta ruwaspa Jehovaman astawan qayllaykorqa. Pay nin: “Biblia Diospa Palabranpuni kasqanta yachanaypaj, tukuynin Bibliata leesqay yanapawarqa. Wawa kashaspa imatachus Bibliamanta yachakusqayta, chaypiraj sumajta entienderqani”, nispa. Chantapis Bibliata entiendenapaj ima yanapaschus kasqanwan yanapachikuwaj. Kaykunawan jina: Watchtower Library DVD nisqa, INTERNETPI BIBLIOTECA, Índice de las publicaciones Watch Tower nisqa, Jehovaj testigosnin yachaqanasta maskʼanankupaj nisqa libro ima.

¹⁸ Tatas, mamas, qankunaqa ni pi jina wawasniykichejman Jehovamanta yachachiyta atiwajchej. ¿Imaynatá wawasniykichejta yanapawajchej creeyninku sinchʼi kananpaj? Qhepan yachaqanapi chayta yachakusun.