Bibliata leyirnin llapan yachakunqëkita rurëta procuranëkipa rantin, rurëta puëdinëkipaq kaqkunallawanraq qallë. Capaz këta ruranqëki yanapashunki: imakunachö mas alliyänëki pishinqankunata juk listaman churë y tsë listapitana jukta o ishkëta akrë puntata cumplinëkipaq, y wakintaqa tsëpitanam cumplinki. Peru ¿imanötan qallankiman? Puntataqa, fäcil-lla cumplita puëdinëkipaq kaqkunawan o imachöpis alliyëta mas wananqëki kaqkunawan qallë. Tsëpitana Jehovä Diosnintsikman mañakuy ruranëkipaq gänasniki kanampaq y ruranëkipaq kaqkunachö yanapashunëkipaq (Filip. 2:13). Tsëpitana yachakunqëkinö kawar qallë. Cambiukunata rurëta puëdinqëkita cuentata qokurqa, mas cambiukunatapis ruranëkipaqmi gänasniki kanqa. Y cambiukunata ruranqëkikunanam yanapashunki listachö këkaq wakin pishinqankunatapis ruranëkipaq. w24.09 päg. 6 pärrk. 13, 14

Capazchi mana alli sientikunki jukkunata llakitsishqa karnin. Peru ¿imatataq rurankiman? Disculpatam mañakunëki, y llakitsinqëki wawqitam o panitam yanapëta procuranëki. Y Jehoväta mañakuy llakitsinqëki wawqita o panita yanapanampaq. Pëmi qamtapis y pëtapis yanapayäshunki sirwir sïguiyänëkipaq y kushishqa kayänëkipaq. Mana allikunata ruranqëkikunata yarparnin allillatana rurëta procurë y Jehovä utilizäshunëkita permiti. Jehoväpa willakoqnin Jonasta yarpärishun. Pëtaqa Nïnivi markata ëwanampaqmi Jehovä mandarqan, peru pëqa juk lädupam ëwakurqan. Tsëmi Jehovä corregirqan, y Jonasqa correginqanta chaskikurqanmi (Jon. 1:1-4, 15-17; 2:7-10). Jehoväqa manam Jonasta dejarirqantsu, tsëpa rantinqa yapëmi Nïnivi markata ëwanampaq mandarqan, y pëqa kë kutichöqa cäsukurqanmi. Jonasqa mana cäsukunqampita llakikurlla kanampa rantinmi, Jehovä mandanqanta kushishqa cumplirqan (Jon. 3:1-3). w24.10 pägk. 8, 9 pärrk. 10, 11

Jutsantsikpita Jehovä perdonamarnintsikqa manam “perdonaqmi” nimantsikllatsu, sinöqa chipyëpam borrarin. Tsëta maslla entiendinapaq këman pensarishun: ¿imatataq juk nuna ruran debinqëkita pagariptiki? Debinqëkita manana yarpänampaqmi apuntanqan cuadernuman X letrata jatunta churarin. Peru tsëta ruraptimpis, nümerukunaqa rikakuykanllam. Y ¿imataraq ruranman tsë nümerukuna mana rikakunampaq? Chipyëpam borrarinan. Tsënömi Jehoväpis perdonamarnintsikqa llapan jutsantsikta chipyëpa borrarin. Bibliata qellqayanqan tiempuchöqa, tintata utilizäyaq carbonwan, gömawan y yakuwan takushqatam. Tsëmi oqu träpuwan borrariyaptinqa, tintaqa chipyëpa borrakäreq y manam ni imapis rikakoqnatsu, y debikoq nunaqa imëpis mana debikushqanömi quedareq. Jehovä Diosnintsik perdonamarnintsik jutsantsikta tsënö borrarinqanta musyarqa, ¡alläpam kushikuntsik! (Sal. 51:9). w25.02 päg. 10 pärr. 11