Jehovä alli kanqanta juk ishkëllata rikärishun. Jehoväqa alli karmi wananqantsikkunata faltatsimuntsu. Tsëmi mëtsikata mana bendicimarnintsikpis mikuyta, röpata y wayitaqa faltatsimuntsu (Sal. 4:8; Mat. 6:31-33; 1 Tim. 6:6-8). Peru ¿imanirtan Jehoväqa tsënö cuidamantsik? Yachakurishun Mateu 6:25 y 26 textuchö Jesus parlanqampita. Tsë versïculukunachömi Jesus parlarqan pishqukunapaq y kënömi nirqan: “Manam murukuyantsu ni cosechayantsu, y manam gränukunata guardayantsu, tsënö kaptimpis, ciëluchö Teytankunaqa pacha juntatam katsin”. Tsëpitanam kënö nirqan: “¿Manaku qamkunaqa pishqukunapitapis mas väliyanki?”. Tsënö nirqa Jesus entiendikätsimantsik, animalkunapitapis masqa sirweqninkunata Jehovä valoranqantam. Jehoväqa Teytantsikmi y kuyamantsikmi; manam wananqantsikkunata faltatsimuntsu (Sal. 145:16; Mat. 6:32). w24.09 pägk. 26, 27 pärrk. 4-6

Siervu ministerial kayänampaqqa, bautizakushqa ollqukunatam churayan. Pëkunataqa santu espïritu yanapaptinmi congregacionchö anciänukunata yanapayänampaq churayan. Siervu ministerialkunaqa Diospa amïgun këtam mas puntaman churayänan; Jehovätam kuyayänan, mandakunqannömi kawayänan y wawqi panikunatam llapan shonqunkunawan kuyayänan (Mat. 22:37-39). Peru ¿imatataq bautizakushqa wawqikuna rurayanman siervu ministerial kayänampaq? Siervu ministerial kayänampaq imakunata rurayänampaqqa, Bibliachömi willakuykan (1 Tim. 3:8-10, 12). ¿Imatataq rurankiman Biblia ninqannö kawanëkipaq? Siervu ministerialkunapaq Biblia ninqantam alli estudianëki y cumplinëki. Peru imanir siervu ministerial këta munanqëkimanmi puntataqa pensanëki. w24.11 päg. 15 pärrk. 4, 5

Wakin nunakunaqa niyan Bibliata mëtsika kuti leyishqa kayanqantam. Peru ¿Biblia ninqanmanqa creiyanku? ¿Biblia ninqannöku kawakuyan? Rasumpa kaqchöqa, cäsi llapan nunakunam Biblia ninqannötsu kawayan. Peru Jehoväpa sirweqninkunaqa, jukläyam kantsik. Tsëmi Biblia ninqannö kawakunapaq kallpachakuntsik. Bibliata leyi y ninqannö kawëqa, höraqa manam fäciltsu. Capazchi tiemputa tarinkimantsu Bibliata leyinëkipaq o leyirpis alläpa ras o sas leyirnin entiendinkimantsu. O capaz atska cambiukunata ruranëki pishinqanta cuentata qokur qelanäkurinkiman. Imanö kaptimpis, Jehovä Diosnintsikmi yanapashunki. Tsëmi yanapashunëkita permitinëki, ama Bibliata leyirinqëkillawanqa conformakuytsu. Tsëpa rantinqa, yachakunqëkinö kawëta procurë. Yarpë, Bibliata cada junaq leyir y mandakunqannö kawarqa, kushishqam kawakunki (Sant. 1:25). w24.09 päg. 7 pärrk. 15, 16