Politicoguna rimanun Armagedón ñalla shamunga nisha | Biblia caimanda ¿imara nin?

Lunes 10 de octubre 2022 tutamandai ruso suldaruuna maican misilgunara tujyachinuca maican Ucrania llactaunai. Chita ruranuca ishqui pasaj punzhaunai Crimeamanda Rusia llactama chimbangaj shu chacara tujyachinushcamanda. Maican punzhauna chita manara tucushcallaira huaquin politicoguna rimanuca Armagedón ñalla shamungaraun nisha.

• 6 de octubre 2022, Estados Unidosmanda presidente Joe Biden nica: “Cai llactamanda Kennedy ñaupa presidente hurasmanda shinallara Cuba llactai misilgunara tujyachinushca hurasmanda, Armagedón tucunamanda mana mayanlla ashcanchi cuna cuinta. [...] Cai bombagunara misilgunaras tujyachinujpi sirtu pacha Armagedón tucunara quirini”.

• 8 de octubre 2022, BBC News nishca noticiagunai Volodímir Zelenski Ucraniamanda presidentera bombaguna, misilgunas tujyachinamanda tapushcai nica: “Ñuca quirini chita rurana Armagedón ashcara, intiru mundura huajlichinga”.

¿Bombagunara misilgunaras tujyachinujpi Armagedón callaringa? Caimanda Biblia ¿imara nin?

Mana. Armagedón shimi Bibliai shu cutilla ricurin Apocalipsis 16:16​pi. Llactaunapura mana shu guerra an, maspas Yaya Dios ‘cai pacha rey apuunahua’ guerrami an (Apocalipsis 16:14). Yaya Dios chi guerrahua tucui runa gobiernogunara tucuchinga (Daniel 2:44).

Armagedón pactashcai cai allpahua ima tucungaraushcara yachangaj “¿Qué es el Armagedón?” nishca temara leangui.

Mana. Runa gobiernoguna bombagunara misilgunaras utilizanunga guerrara rangaj, shinajpi Yaya Dios mana saquingachu allpa tucuchishca saquirichu. Biblia nin:

• “Cai allpa huiñaigama tiangami” (Eclesiastés 1:4).

• “Alira rurajcuna cai allpara apinunga, chibi huiñai causaira charinunga” (Salmo 37:29).

Shinajpi Biblia rimashca profeciaguna, cuna mundui tucushcaunas ricuchin puchucai timpui causaushcara (Mateo 24:3-7; 2 Timoteo 3:1-5). Shamuj punzhaunai ima tucungaraushcamanda Biblia yachachinara yachangui gratis ñucanchihua Bibliara yachasha.