¿Imara Biblia nin tragu upinamanda?

Intiru mundui causaj runauna tragu upinamandaa caran tunu iyaira charinun. Huaquimbi paiguna amigogunahua upinun. Randi shujcuna ansallas tragu upinara mana munanun. Shujcuna machangagama upinun. ¿Imara Diospa Shimi nin tragu upinamanda?

1. ¿Tragu upina manalichu?

Biblia mana ninzhu tragu upina ucha an nisha. Maspas, Biblia nin Dios cuyashcaunamanda rimasha ‘vino upina runa shungura cushiyachin’ nisha (Salmo 104:14, 15). Astaumbas, Bibliai riman huaquin Diosta sirvij cari huarmiunas tragura upinuca nisha (1 Timoteo 5:23).

2. Biblia ¿imara camachin tragura upingaj ajllajcunara?

Jehová ninmi ama machaichu shinallara ama yapajta upichu (Gálatas 5:21). Biblia nin: “Ashca vinora upijcunahua ama tandarichu” (Proverbios 23:20). Chiraigu tragura sapalla o shujcunandi upingaj munasha mana upina anchi iyaira tucuchingagama o ima rurashcaras mana yachangagama. Shinallara mana yapajta upina anchi ungungagama. Ansallas upisha mana saquinara ushasha mana ima huras tragura upina anchi.

3. ¿Imasnara respetana anchi shujcuna tragu upina, mana upina munajpi?

Caran shuj ajllana an tragura upina o mana. Huaquinguna ansa tragura upingaj ajllashcara ricusha mana nina anchi manali raun nisha. Shinallara shujcuna mana upina munajpi mana aburichina anchi tragura upichingahua (Romanos 14:10). Shinajpi shujcunara mana pandachingahua tragura mana upina anchi (leai Romanos 14:21). Chiraigu ñucanchi ‘quiquin ali tucunara mana mascanchi, astaun shujpaj ali tucunara mascanchi’ (leai 1 Corintios 10:23, 24).

MAS YACHAI

4. Tragura upina mana upina ashcara ajllai

¿Imara Jesús iyaca tragu upinamanda? Caita yachangahua punda milagro rurashcara ricushun. Leaichi Juan 2:1-11, huasha catij tapuigunamanda rimaichi:

• Cai cuintashca ¿imara ricuchin Jesús ima iyashcara tragura upinamanda, upijcunamandas?

• Jesús mana nicachu tragu upina manalichu an nisha. Chiraigu tragura upiujta ricusha Diosta sirvij ¿imara iyana an?

Diosta sirvij tragura upina ushashas mana nisha ninzhu tucui huras casna rana ali angachu. Leaichi Proverbios 22:3, huasha catij tapuigunamanda rimaichi:

• ¿Autura o maquinara can manejangarausha tragura upinachu angui?

• ¿Shu huarmi icsayuj asha tragura upinachu an?

• ¿Tragura ama upichu doctor nijpi tragura upinachu angui?

• ¿Ansallas upisha mana saquinara ushasha tragura upinachu angui?

• Camba llactai ley ama upichu mandajpi ¿tragura upinachu angui?

• Ñaupa machaicara ashcamanda tragu upinara saquijhua asha ¿tragura upinachu angui?

Buraibi shuj tunu istaunais ¿tragura upichina anguichu? Ima rurana ashcara yachangahua cai VIDEORA ricuichi.

VIDEO: ¿Tragura upichina anichu? (2:41)

Leaichi Romanos 13:13; 1 Corintios 10:31, 32. Caran texto leashca huasha, catij tapuimanda rimaichi:

• ¿Imasnara cai Bibliamanda iyai canda yanapanga Jehová Diosta cushiyachingaj?

5. Masna tragu upinara ajllai

Tragura, cervezara o vinora upingaj can ajllasha Jehová ima nishcara iyarina angui. Pai saquin runauna tragura upichu shinashas chijninmi yapajta upisha machanara. ¿Imarasha? Leaichi Oseas 4:11, 18, huasha catij tapuimanda rimaichi:

• ¿Imara tucungairi shu runa tragura yapajta upijpi?

¿Imara ñucanchira yanapangairi ama yapajta upingaj? Mana machangahua ima tupulla upina ashcara yachana anchi. Leaichi Proverbios 11:2, huasha catij tapuimanda rimaichi:

• ¿Imarasha ali an ñaupajtara ajllana masna tupulla tragu upina ushashcara?

6. Ama yapajta upingaj ¿imara yanapana ushan?

VIDEO: “Ñuca causaira chijningaj callaricani” (6:32)

• ¿Imasnara causaca Dimitri tragu upishcamanda?

• ¿Dsaslla tragura upingaj saquina ushacachu?

• ¿Imasnara tragura shu rai saquica?

Leaichi 1 Corintios 6:10, 11, huasha catij tapuigunamanda rimaichi:

• ¿Machana yapa mana alichu? ¿Imarasha casna ningui?

• ¿Imasnara yachanchi yapa tragura upij runa tragura saquina ushashcara?

Leaichi Mateo 5:30, TNM, huasha catij tapuimanda rimaichi:

• Jesús nica: “Camba ali maqui canda urmachisha nijpi, pitisha ichui” nisha. Cai shimiunahua Jesús yachachina munaca Diospa ñaupai ali ricuringaj ashca ursarina rurana ashcara. Can tragu upinara saquingaj ursariusha ¿imara rurana angui?b

Leaichi 1 Corintios 15:33, huasha catij tapuimanda rimaichi:

• Ashca tragura upij runaunahua tandarisha ¿imara canda tucungaraun?

IMARA YACHASHCANGUI

Ñucanchira cushiyachingaj Jehová tragura upingaj cushca shinajpis machanara, yapajta upinaras pai chijninmi.

Iyaringaj

• ¿Imara Biblia nin tragu upinamanda?

• ¿Imara tucunma tragura yapajta upijpi?

• ¿Imasnara shujcunara respetashcara ricuchinchi paiguna tragu upina mana upina ajllanamanda?

RICUNGUI

¿Imara maltauna mana cungarina anun tragu upingarausha?

Ali iyari tragura manara upishcallaira (2:31)

Leangui imara riparana angui tragu upinara mana saquina ushasha.

“¿Imara rurana ushangui ama yapajta tragura upingaj?” (La Atalaya, 1 de enero de 2010)

¿Diosta sirvijcuna brindis rurana ushanunzhu?

“Leajcunamanda tapuiguna” (La Atalaya, 15 de febrero de 2007)

Yapajta upinara imasna saquishcamanda cuintashcara leai “Yapajta machaicara acani” nishca temai.

“Biblia paiguna causaira turcachica” (La Atalaya, 1 de mayo de 2012)