1 Persiata kamachiq Ciro+ huk wata kamachichkaptinmi Jehova Diosqa payta kallpancharqa runankunaman kamachikuyta qunanpaq, chaynapi Jeremiaswan+ Jehova Diospa willachisqanman hina kananpaq. Chay kamachikuy qillqasqanmi+ nirqa:

2 “Persia nacionta kamachiq Cirom nini: ‘Hanaq pachapi kaq Jehova Diosmi llapallan kamachiqkunata quykuwan.+ Paytaqmi niykuwan Juda nacionpa Jerusalen llaqtanpi wasita ruwapunaypaqpas.+ 3 Chaynaqa, qamkuna ukupi pipas Diospa runan kaspanqa kutikuchunyá, paymi yanapanqa. Hinaspayá Israelpa yupaychasqan Jehova Diospa wasinta hatarichimuchun. Payllam kawsaq Diosqa. 4 Juda runakuna maypiña yachaptinkupas*+ muyuriqninpi yachaqkunayá yanapachunku. Quchunkutaqyá quritapas, qullqitapas, animalkunatapas chaynataq ima kapuqninkutapas. Quchunkutaqyá Jerusalenpi Diospa wasinpaq ima quy munasqankutapas’”, nispa.+