Mana imapaq valeq kasqaykita runakuna nisuptikiqa ama iskayrayaychu Dios kuyasusqaykimantaqa hinaspa valorasusqaykimantaqa. “Llumpay hukmanyasqa” kaspaykiqa yuyariy: Jehova Diosqa allin kaqkunata sunquykipi qawasqanraykum serviqnin kanaykipaq akllaykusurqanki (Juan 6:44). Payqa anchatam kuyasunki, chaymi haykapipas hichpallaykipi kanqa yanapaykusunaykipaq. Dios kuyawasqanchiktam astawan entiendechwan Jesuspa ruwasqankunata yuyarispa. Payqa kay pachapi kachkaspanmi hukkunapa mana allin qawasqan runakunata llakipayarqa (Mat. 9:​9-12). Huk warmim ñakarichiqnin unquyninmanta sanoyayta munaspan Jesuspa pachanta llapchaykurqa. Hinaptinmi payqa llakipayaykuspan allin iñiyniyuq kasqanmanta kallpanchaykurqa (Mar. 5:​25-34). Arí, Jesusqa taytan hinamá runakunata anchata kuyarqa (Juan 14:9). Chayraykum manapuni iskayrayawaqchu Dios valorasusqaykimantaqa. Iñiyniyuq kasqaykiraykum hinaspa payta kuyasqaykiraykum Diosninchikqa anchata kuyasunki. w24.10 7 parrs. 4-5

Davidqa tukuy ima sasachakuykunapi tarikuspanmi waqarqa. Paytaqa achkam chiqnirqaku, familiankunapas chaynataq confianzapaq hapisqan runakunapas traicionaruspanmi wañuchiyta munarqaku (1 Sam. 19:​10, 11; 2 Sam. 15:​10-14, 30). Huk kutipim David qillqarqa: “Llumpay llakiwanmi hukmanyarullaniña. Tukuy tuta waqaptiymi camaypas nuyuña kachkan. Wiqiywanmá puñunaypas nuyurunña”, nispan (Sal. 6:6). Davidqa llumpay sasachakuykunapi tarikuspanpas manapunim iskayrayarqachu Jehova Dios kuyasqanmantaqa. Chaymi qillqarqa: “Jehova Diosmi waqasqayta uyariykamuwanqa”, nispan (Sal. 6:8). Kunan punchawpaq textota leespam yachanchik Jehova Diosqa anchata kuyawasqanchikta hinaspa imayna tarikusqanchikta allinta entiendesqanta. Chaypim rikchanachispan David nirqa Diosqa odreman wiqinkunata chaskisqanmanta hinaspa libropi qillqasqanmanta. Payqa manapunim iskayrayarqachu tukuy ima sasachakuyninkunata Dios allinta yachasqanmantaqa hinaspa imayna tarikusqanta allinta entiendesqanmantaqa. w24.12 22 parrs. 11-12

Diosta serviyninchikpi yuyayniyuqña kaspapas, cuidakunanchikmi mana wichiykunapaq. Chaymi imapas yachasqallanchikwanqa mana contentakunanchikchu (1 Cor. 10:12). Chayraykum sapa kuti qawakunanchik iñiyninchikpi imayna kasqanchikta, hinaspam tapukunanchik: “¿Sutillachu qawakun Diosta astawan serviy munasqay?”, nispa. Colosas llaqtapi iñiqkunaman cartata apachispanpas apostol Pabloqa nirqataqmi Diosta serviyninkupi yuyayniyuqña kaspankupas hinalla cuidakunankupaq. Paykunaqa yuyayniyuq runakuna hinañam karqaku, chaywanpas hinallam cuidakunanku karqa pipas pantarachinanmanta (Col. 2:​6-10). Epafrasmi paykunata allinta riqsirqa, chaymi Diosta mañakuq hinalla “allin yuyayniyuq” kanankupaq (Col. 4:12). ¿Imatam paykunamanta yachachwan? Dios serviyninchikpi hinalla yuyayniyuq kanapaqqa Diosmi yanapawananchik hinaspapas kikinchikmi kallpanchakunanchik. Chaytam allinta yacharqaku Pablowan Epafraspas. Paykunaqa munarqakum ima sasachakuyña kaptinpas Diosta serviyninkupi hinalla yuyayniyuq kanankuta. w24.04 6-7 parrs. 16-17