Exodo
9 Chaymi Jehova Diosqa Moisesta nirqa: “Egipto nacionta kamachiqman* rispaykiyá nimuy: ‘Hebreo runakunapa yupaychasqayku Jehova Diosmi nin: “Runaykunatayá yupaychawaqniy rinankupaq kachariy.+ 2 Mana kachariyta munaptikiqa, 3 ñuqa Jehova Diosmi atiyniywan mana hampiy atina unquywan animalnikikunata wañuchisaq.+ Hinaptinmi wañunqa caballokuna, asnokuna, camellokuna, vacakuna hinaspa ovejakuna.+ 4 Israelpa miraynin runaykunapa animalninkunatam ichaqa ñuqa Jehova Diosqa mana imanasaqchu, hinaptinmi Egipto runakunapa hinaqa mana chullapas wañunqachu”’”, nispa.+ 5 Chaymantapas haykapi kananmanta rimaspanmi Jehova Diosqa nirqa: “Ñuqa Jehova Diosmi chaytaqa paqarin ruwasaq”, nispa.
6 Hinaptinmi paqarinnintin punchawqa Jehova Diospa nisqanman hina karqa. Egiptopi lliw runakunapa animalninkunam wañuyta qallaykurqa,+ Israelpa miraynin runakunapam ichaqa mana hukllapas wañurqachu. 7 Chaymi Egiptota kamachiqqa runankunata kacharqa chayta qawamunankupaq, hinaptinmi Israelpa miraynin runakunapa animalninkunaqa mana chullapas wañusqachu. Chaywanpas kamachiqqa hinallam rumi sunqu karqa, chayraykum Israelpa mirayninkunataqa mana kacharirqachu.+
8 Chaymantam Jehova Diosqa Moisestawan Aaronta nirqa: “Uchpatayá putquynikichikpi hornomanta apaychik, hinaptinyá Moisesñataq maqchichun Egiptota kamachiq qawachkaptin. 9 Hinaptinmi maqchisqan uchpaqa lliw Egipto nacionpi qusnirinqa, chay qusnisqanñataqmi runakunapa hinaspa animalkunapa cuerponta pusllurachispa qiyayarachinqa, chayqa kanqa lliw Egipto nacionpim”, nispa.
10 Chaymi Moiseswan Aaronqa hornomanta uchpata hurquspa Egiptota kamachiqpa qayllanman rirqaku. Hinaptinmi Moisesqa uchpata maqchirqa, chay maqchisqan uchpañataqmi runakunatawan animalkunata pusllurachispa qiyayarachirqa. 11 Chaywanqa Egiptopi lliw runakunam ñakarirqa, demoniokunata qayaq runakunaqa manam Moisespa kasqanman riytaqa atirqakuchu cuerponku pusllusqallaña kasqanrayku.+ 12 Jehova Diosñataqmi hinallaraq saqirqa Egiptota kamachiqqa munasqan ruwananta. Egiptota kamachiqqa huktawanmi mana kasurqachu Moisestawan Aarontaqa, chayqa karqa Moisesta Jehova Diospa nisqanman hinam.+
13 Chaymi Jehova Diosqa Moisesta nirqa: “Paqarin tutapayta hatarispaykiyá Egiptota kamachiqman riy, hinaspayá nimuy: ‘Hebreo runakunapa yupaychasqayku Jehova Diosmi nin: “Israelpa miraynin runaykunatayá kachariy yupaychawaqniy rinankupaq. 14 Manachayqa hinallam ñakarichisqayki, ñakarichisaqtaqmi wasikipi llamkaqkunatawan llaqtaykipi runakunatapas. Chaynapim yachanki ñuqa hinaqa mana pipas kay pachapi kasqanta.+ 15 Kunankamaqa ñam mana hampiy atina unquywan qamtawan runaykikunataqa wañurachikichikmanña karqa, hinaptinmi qamqa kay pachamanta chinkaruwaqña karqa. 16 Ichaqa hinallaraqmi kawsachichkayki atiyniyuq kasqayta yachanaykipaq hinaspa kay pachapi runakuna sutiyta yachanankupaq.+ 17 ¿Imanasqataq runaykunataqa hatuntukuspayki kunankama mana kacharinkiraqchu? 18 Mana kachariptikiqa paqarinmi kay-kay horata manchakuypaq runtu para chayamunqa, chayna runtu paraqa manam Egiptopiqa haykapipas karqachu. 19 Chaynaqa kamachiyá runaykikunapas, animalnikikunapas hinaspa tukuy imaykikunapas wasi ukupi kananpaq. Manachayqa runapas utaq animalpas hawapi kaspaqa lliwmi runtu parawan wañunqa”’”, nispa.
20 Chaywanpas Egiptota kamachiqpa wasinpi wakin serviqkunallam Jehova Diostaqa kasukurqaku. Chaymi animalninkutapas waqaycharqaku hinaspa runankunamanpas willarqaku wasi ukupi kanankupaq. 21 Jehova Diospa kamachisqanta mana kasukuqkunam ichaqa runankutapas chaynataq animalninkutapas hina hawallapi saqirurqaku.
22 Chaymantam Jehova Diosqa Moisesta nirqa: “Makikipi tawnaykitayá altoman huqariy, hinaptinmi hanaq pachamanta lliw Egiptoman runtu para chayamunqa.+ Chay runtu param puramintita tukunqa runakunata, animalkunata, sachakunata hinaspa llapa imapas wiñaqkunata”, nispa.+ 23 Chaymi tawnanta Moises huqariptin Jehova Diosqa runtu parata chayachimurqa, hinaptinmi runtu paraqa manchakuypaq llipyantinkuna tunrururuyllaña kay pachaman chayamurqa. Jehova Diosqa mana usyaykachispanmi Egiptoman runtu parata chayachimurqa. 24 Chaymi runtu para chayamuptin llipyaykunapas nina hinaraq qawakurqa. Egiptopiqa manam chayna runtu paraqa haykapipas karqachu.+ 25 Chay runtu param tukururqa Egiptopi runakunata, animalkunata, sachakunata hinaspa imapas wiñaqkunata.+ 26 Israelpa miraynin runakunapa yachasqanku* Gosen allpamanmi ichaqa mana runtu paraqa chayarqachu.+
27 Chaymi Egiptota kamachiqqa Moisestawan Aaronta qayachispan nirqa: “Chayraqmi riqsikuni huchallikusqayta. Jehova Diosqa allin ruwaqmi kasqa, ñuqawan llaqtaypi runakunam ichaqa mana allinta ruwaruniku. 28 Jehova Diostayá mañakullaychik llipyantin runtu para usyananpaq. Hinaptinqa manañam harkasqaykichikchu kaymanta pasakunaykichiktaqa”, nispa. 29 Moisesñataqmi nirqa: “Kay llaqtamanta lluqsiruspallaymi makiyta huqarispay Jehova Diosta mañakusaq. Hinaptinmi Jehova Diosqa llipyantin runtu parata usyarachinqa, chaynapim yachanki kay pachaqa Diospa kasqanta.+ 30 Chaywanpas yachanim qamqa hinaspa wasikipi llamkaqkunaqa Jehova Diosta mana manchakunaykichikta”, nispa.
31 Chay runtu paraqa sisallaña linazatam hinaspa puqusqallaña cebadatam pasaypaqta tukururqa. 32 Trigotam* ichaqa mana imanarqachu unaypi puqusqanrayku. 33 Moisesqa kamachiqpa kasqanmanta lluqsiruspallanmi makinta huqarispan Jehova Diosta mañakurqa, hinaptinmi llipyantin runtu paraqa usyarurqa.+ 34 Chaynata llipyantin runtu para usyaruptinmi kamachiqqa hinalla rumi sunqu kasqanrayku kaqmanta mana kacharisqanwan huchallikururqa,+ chaynallamá karqaku wasinpi llamkaqkunapas. 35 Egiptota kamachiqqa hinalla rumi sunqu kaspanmi Israelpa miraynin runakunataqa mana kacharirqachu, chaytaqa ruwarqa Moisesta Jehova Diospa nisqanman hinam.+