Exodo
25 Jehova Diosñataqmi Moisesta nirqa: 2 “Israelpa miraynin runakunatayá niy imapas kapuqninkumanta ñuqapaq huñunankupaq. Imatapas sunqumanta apamusqankutaqa chaskinkichikmi.+ 3 Kaykunatam chaskinaykichik: Qurita,+ qullqita,+ bronceta,+ 4 azul llañu qaytuta, morado qaytuta, puka llañu qaytuta, linaza llañu qaytuta, cabrapa pelonta, 5 carneropa pukayachisqa qalas qaranta, foca animalpa qalas qaranta, acacia sachamanta tablata,+ 6 achkikunapaq aceiteta,+ akllasqa runakunaman tallinapaqwan miski asnaq inciensopaq*+ miski asnaq aceiteta,+ 7 llipipipiq alaqa yana* rumikunata hinaspa llipipipiq alaqa huk rumikunatapas mandilman*+ chaynataq pecheraman*+ churanapaq. 8 Ñuqa chaypi kanaypaqmi yupaychawanaykichik carpata ruwankichik.+ 9 Chay carpataqa hinaspa chaypi imapas kaqkunataqa qawachisqayman hinam ruwankichik.+
10 Baultam ruwankichik acacia tablamanta, largonmi kanqa huk metro masnin*, anchonñataqmi kanqa parte metro masnin*, sayayninñataqmi kanqa parte metro masnin.+ 11 Hinaspam chay baulta hawantawan ukunta quriwan llusinki,+ hinaspapas muyuriq patanpim dibujoyuq qurita laqanki.+ 12 Chaymantapas tawan chakinpa hanayllanpim rinrinta churanki, kaylawninpim iskayta churanki, waklawninpipas chayna iskaytataqmi churanki. 13 Chaymantapas acacia sachamanta kaspikunata ruwaspam quriwan llusinki.+ 14 Chay kaspikunataqa baulpa rinrinmanmi ustuchinki baulta apanaykichikpaq. 15 Chay kaspikunaqa baulpa rinrinman ustuchisqam kanan, manam hurqunaykichikchu.+ 16 Chay baulmanñataqmi churanki qillqasqay tabla rumikunata.+
17 Chaymantapas baulpa tapantam qurimanta ruwanayki. Chay tapapa largonmi kanqa huk metro masnin*, anchonñataqmi kanqa parte metro masnin*.+ 18 Chaymantapas iskay querubin angelkunatam martillowan takaspa qurimanta ruwanki. Chay angelkunaqa baulpa tapanpim chimpa-chimpa kanan.+ 19 Chay angelkunaqa kaylaw patanpi hinaspa waklaw patanpim kanan. 20 Chay angelkunapa rapranqa hanayninpaman kichasqam kanan baulpa tapanta llantuchkaq hina.+ Chimpa-chimpa kaspam kumuykuspa baulpa tapanta qawananku. 21 Qanmi tapantaqa baulman churanki,+ baulmanñataqmi churanki qillqasqay tabla rumikunata. 22 Chay baulpa hawanpi rikurispaymi rimapayasqayki,+ chay baulpa hawanpi iskay querubin angelkunapa chawpinmantam lliw kamachikuykunata willasqayki, hinaptinmi chay kamachikuykunataqa Israelpa mirayninkunaman willanayki.
23 Ruwankitaqmi acacia sachamanta mesatapas,+ largonmi kanqa yaqa metro*, anchonñataqmi kanqa yaqa parte metro*, sayayninñataqmi kanqa parte metro masnin*.+ 24 Hawantawan ukuntam quriwan llusinki, hinaspapas muyuriq patantam quriwan laqanki. 25 Churankitaqmi muyuriq patanpiqa tawa dedo sayayniyuq* tablatapas, hinaspam chay muyuriq patanpi dibujoyuq qurita laqanki. 26 Chaymantapas tawan chakinpa hanayninpim qurimanta rinrinta churanki. 27 Chay qurimanta rinrinqa mesapa patanpa urayninpim kanan, rinrinqa kanan kaspita ustuchispa apanaykichikpaqmi. 28 Chay kaspikunaqa acacia sachamanta quriwan llusisqam kanan, chay kaspiwanmi mesataqa apankichik.
29 Chaymantapas ruwanaykim qurimanta platokunata, vasokunata, puyñukunata hinaspa Diosman quspa imapas tallina tazonkunata.+ 30 Mesapa hawanpiñataqmi ñawpaqniypi sapa kuti churanki ñuqapaq sapaqchasqa tantata.+
31 Ruwankitaqmi qurimanta candelabrotapas,+ chayqa martillowan takaspa ruwasqam kanan, hinaspapas huk piezallamanta ruwasqam kanan. Chay candelabropaqa kananmi tiyanan, kaspin hinaspa pallqankuna, kanantaqmi llaqllasqa waytankunapas, waytapa umpankunapas chaynataq umpapa sikinpi kaq llaqinkunapas*.+ 32 Chullallamanta ruwasqam kanan suqta pallqayuq, sapa waqtanpim kimsa pallqa kanan. 33 Huknin waqtanpim sapa kallmapi almendras wayta hina llaqikuna llaqllasqa kanan, llaqllasqataqmi kanan kimsa umpakunapas chaynataq kimsa waytakunapas, chaykunaqa lliwmi chullachisqa kanan. Chaynallataqmi huknin waqtanpipas kanan. Chaynam candelabropa suqtantin pallqankunaqa kanan. 34 Kaspinpipas almendras wayta hinam tawa llaqikuna llaqllasqa kanan, llaqllasqataqmi kanan tawa umpakunapas chaynataq tawa waytakunapas, chaykunaqa lliwmi chullachisqa kanan. 35 Qallariq iskay pallqakunapa urayninpim kanan huk umpa, qatiqnin iskay pallqakunapa urayninpipas kananmi huk umpa, chaynallataqmi hina qatiqnin pallqakunapa urayninpipas kanan huk umpa. Chayna ruwasqam kanan suqtantin pallqakuna. 36 Waytapa umpankunaqa, pallqakunaqa hinaspa candelabroqa huk piezallamantam qurimanta ruwasqa kanan, hinaspapas martillowan takaspa ruwasqam kanan.+ 37 Ruwankitaqmi qanchis mecheronkunatapas. Chay mecherokunaqa rataspanmi ñawpaqninta achkinqa.+ 38 Achki wañuchinakunapas chaynataq sansa apanakunapas qurimantam kanan.+ 39 Candelabrotaqa hinaspa servicionkunataqa 34 kilo masnin* qurimantam ruwanki. 40 Amam qunqankichu kay urqupi qawachisqayman hina ruwaytaqa”, nispa.+