Josuey

24 Chaymantam Josueyqa Sichem* llaqtaman qayachirqa Israelpa lliw mirayninkunata, punta apaqkunata, kamachiqkunata, juezkunata hinaspa akllasqa runakunata.+ Hinaptinmi paykunaqa Diospa qayllanman huñunakurqaku. 2 Chaypim llapallankuta Josuey nirqa: “Yupaychasqanchik* Jehova Diosmi nin: ‘Eufrates mayupa waklaw chimpanpim ñawpaq abueloykichikkuna+ yacharqaku*,+ paykunaqa taytacha-mamachakunatam yupaycharqaku.+ Hukninmi karqa Abrahanpa hinaspa Nacorpa taytan Tarey.

3 Qipakunamanñataqmi taytaykichik Abrahanta Efrautes mayupa waklaw chimpanmanta pusamurqani,+ hinaspam lliw Canaan allpapi purichirqani. Chaymantam payta achkaman mirachirqani+ churin Isaacta quspay.+ 4 Isaacmantañataqmi mirachirqani Jacobtawan Esauta.+ Chaymanta qipamanmi Esauman Seir urquta qurqani,+ Jacobwan churinkunañataqmi Egiptoman rirqaku.+ 5 Chaymantañataqmi Moisestawan Aaronta kamachirqani paykunata yanapananpaq,+ hinaspaymi Egipto nacionniyuq runakunata ñakarichispay+ tayta-mamaykichikta hurqumurqani. 6 Chaynata tayta-mamaykichikta Egiptomanta hurqumuptiymi+ Puka lamar quchapa patanman chayaramurqaku. Chaykamam Egipto runakunaqa peleanapaq carretakunawan hinaspa caballokunawan qatimurqaku.+ 7 Tayta-mamaykichikñataqmi ñuqa Jehova Diosta qayakamuwarqaku yanapanaypaq.+ Chaymi ñuqaqa tutayaywan Egipto runakunamanta rakirqani, hinaspaymi Egipto runakunataqa lamar quchawan pamparachirqani.+ Qamkunaqa kikikichikpunim qawarqankichik Egipto runakunata imam ruwasqayta.+ Chaymanta qipatam qamkunaqa chunniqpi unay wata yacharqankichik.+

8 Chaymantañataqmi Jordan mayupa waklaw chimpanpi* Amorreo runakunapa allpanman pusarqaykichik, paykunañataqmi qamkunawan pelearqaku.+ Ichaqa makikichikman churaspaymi llapankuta wañurachirqani,+ chaynapim allpankuqa qamkunapaqña karqa. 9 Chaymantam Ziporpa churin Moab llaqtata kamachiq Balacqa Israelpa mirayninkunawan pelearqa. Paymi Beorpa churin Balaamta qayachirqa ñakasunaykichikpaq.+ 10 Ichaqa manam Balaamtaqa uyarirqanichu,+ chaymi payqa achkakama bendecisurqankichik.+ Chaynatam ñuqaqa yanaparqaykichik.+

11 Chaymantam qamkunaqa Jordan mayuta chimpaspaykichik+ Jerico llaqtaman chayarqankichik.+ Hinaptinmi chay llaqtapi kamachiqkuna*, Amorreo runakuna, Perizita runakuna, Canaan runakuna, Het runakuna, Guirgas runakuna, Hev runakuna hinaspa Jebus runakuna qamkunawan pelearqaku. Ichaqa qamkunapa makikichikmanmi paykunatapas churarqani.+ 12 Ñuqam paykunataqa Amorreo runakunapa iskay kamachiqninkunata hina mancharirachirqani, hinaptinmi paykunaqa qamkunamanta ayqikurqaku.+ Ayqikurqakuqa manam espadaykichikraykuchu nitaq flechaykichikraykuchu.+ 13 Chaynapimá mana llamkasqaykichik chakrakunata hinaspa mana hatarichisqaykichik llaqtakunata qurqaykichik.+ Chaykunapi yachaspaykichikmi mana tarpusqaykichik uvaskunata hinaspa aceitunaskunata mikuchkankichik’, nispa.+

14 Chayraykuyá Jehova Diosta manchakuspa tukuy sunquwan yupaychaychik.+ Wischuychikyá ñawpaq abueloykichikkunapa yupaychasqan taytacha-mamachakunataqa, paykunaqa Eufrates mayupa waklaw chimpanpi hinaspa Egiptopi kaspankum chaykunata yupaychaqku.+ Qamkunaqa Jehova Diosllatayá yupaychaychik. 15 Jehova Diosta yupaychayta mana munaspaykichikqa kunanyá akllakuychik pim yupaychayta.+ Qamkunaqa, ¿Eufrates mayupa chimpanpi ñawpaq abueloykichikkunapa yupaychasqan taytacha-mamachakunatachu yupaychankichik,+ icha yachasqaykichik lawpi Amorreo runakunapa yupaychasqan taytacha-mamachakunatachu?+ Ñuqawan wasiypi kaqkunam ichaqa Jehova Diosllata yupaychasaqku”, nispa.

16 Hinaptinmi Israelpa mirayninkunaqa nirqaku: “Manamá haykapipas Jehova Diostaqa saqiymankuchu taytacha-mamachakunata yupaychanaykupaqqa. 17 Jehova Diosmi ñuqaykuta hinaspa tayta-mamaykutaqa Egiptomanta hurqumuwarqaku,+ chaypi sirviente kasqaykumantam hurqumuwarqaku+ milagrokunata ruwaspan.+ Payqa ñan hamusqaykupipas chaynataq llaqtakunapi runakunamantapas harkaykuwarqakum.+ 18 Jehova Diosqa ñuqaykumanta puntata kay allpapi yachaq runakunatapas Amorreo runakunatawan kuskatam qarqururqa. Chayraykum ñuqaykupas Jehova Diosllata yupaychasaqku, payllam yupaychasqayku Diosqa”, nispa.

19 Chaymi Josueyqa Israelpa mirayninkunata nirqa: “Qamkunaqa manam Jehova Diosta yupaychaytaqa atiwaqchikchu. Payqa chuyay-chuyay Diosmi,+ payqa munan payllatapuni yupaychanatam.+ Diosqa manam pampachasunkichikchu mana kasukuptikichikqa hinaspa mana allinta ruwaptikichikqa.+ 20 Jehova Diosta qipanchaspa taytacha-mamachakunata yupaychaptikichikqa piñakusunkichikmi, hinaspam ñawpaqta qamkunapaq allinkunata ruwachkaspapas wañurachisunkichik”, nispa.+

21 Israelpa mirayninkunañataqmi Josueyta nirqaku: “Ñuqaykuqa Jehova Diostamá yupaychasaqku”, nispa.+ 22 Chaymi Josueyqa paykunata nirqa: “Kikikichikmi nichkankichik Jehova Diosta yupaychanaykichikpaq akllakusqaykichikta”, nispa.+ Hinaptinmi nirqaku: “Arí, kikiykum nichkaniku”, nispa.

23 Josueyñataqmi nirqa: “Chayna kaptinqa, runakunapa yupaychasqan taytacha-mamachakunatayá wischuychik, hinaspayá Jehova Diosllata tukuy sunquykichikwan yupaychaychik, payqa Israelpa miraynin runakunapa yupaychasqan Diosmi”, nispa. 24 Chaymi runakunañataq Josueyta nirqaku: “¡Jehova Diosllatam yupaychasaqku! ¡Payllatam kasukusaqku!”, nispa.

25 Hinaptinmi Josueyqa huñunakusqanku Sichem llaqtapi kamachirqa contrato* ruwasqankuta mana qunqanankupaq. 26 Hinaspam Josueyqa chay kamachisqanta qillqarqa Diospa kamachikuyninkunamanta rimaq libropi,+ hinaspapas Jehova Diospaq sapaqchasqa hatun sachapa sikinpim hatu-hatun rumita+ sayachirqa.

27 Josueyqa nirqaraqmi: “Kay rumim yachan Jehova Diospa imapas niwasqanchikta.+ Kay rumim yuyarichisunkichik Diosta mana saqirunaykichikpaq”, nispa. 28 Chayta nispanmi Josueyqa lliw runakunata aviarurqa, hinaptinmi sapakama allpankuman kutikurqaku.+

29 Chaymantam Jehova Diosta yupaychaq Josueyqa 110 watanpi wañukurqa,+ Josueyqa Nunpa churinmi karqa. 30 Hinaptinmi chaskisqan Timnat-sera llaqtanpi pamparurqaku.+ Chay llaqtaqa karqa Efrain ayllupa urqunkunapim utaq Gaas urqupa chimpanpim. 31 Israelpa mirayninkunaqa Jehova Diostam yupaycharqaku Josueywan chay punchawkunapi punta apaqkuna kawsanankukama. Chay punta apaqkunaqa rikurqakum Israelpa mirayninkunapaq Jehova Diospa tukuy ima ruwasqanta.+

32 Israelpa mirayninkunam Jacobpa churin Joseypa tullunkunata+ Egiptomanta apamurqaku, hinaspankum Sichem llaqtapi taytan Jacobpa rantisqan allpapi pamparurqaku. Chay allpatam Jacob rantirqa Hamorpa churinkunamanta+ 100 qullqiwan*,+ Hamorqa karqa Sichempa taytanmi. Chay allpataqa Joseypa mirayninkunam chaskirqaku.+

33 Aaronpa churin Eleazarpas wañukurqam,+ hinaptinmi churin Fineaspa allpanpi kaq muqupi pamparurqaku.+ Chay allpataqa Fineasmanmi qurqaku Efrain ayllupa urqunkuna lawpi.