1 Corintios

12 Wawqi-panillaykuna, Diospa yanapakuyninwan imakuna ruway atisqaykichikmanta+ yachanaykichiktam munani. 2 Qamkunaqa yachankichikmi manaraq iñikuchkaspaykichik mana rimaq taytacha-mamachakunata+ yupaychasqaykichikta hinaspa chaykunapa tukuy ima munasqanta ruwasqaykichikta. 3 Chaynaqa kayta yachanaykichiktam munani: Manam pipas Diospa atiyninpa yanapakuyninwan rimaqqa ninmanchu: “¡Jesusqa ñakasqam!”, nispanqa. Manataqmi Diospa atiynin mana yanapaptinqa pipas ninmanchu: “¡Jesusqa señormi!”, nispanqa.+

4 Diospa atiyninwanqa imakuna ruwaytapas atichwanmi, ichaqa hukllam chay atiyninqa,+ 5 Dios serviypipas tukuy ima ruwaykunam kan+ ichaqa señorllanchikpaqmi, 6 tukuy imaymanatam Diospa atiyninqa runakunata yanapan tukuy imata ruwanankupaq, ichaqa kikin Diosmi runakunawan tukuy chaykunata ruwachin.+ 7 Diospa atiyninqa sapakamatam yanapan allin kaqkunata ruwananpaq, chayqa sutillam qawakun.+ 8 Wakintam Diospa atiyninqa yanapan yachaywan rimanankupaq, wakintañataqmi yanapan hukkunapa mana yachay atisqanta rimanankupaq, 9 hina Diospa atiynillanmi wakinta yanapan Diospi anchata hapipakunankupaq,+ wakintañataqmi yanapan unquqkunata sanoyachinankupaq,+ 10 wakintañataqmi milagrokunata ruwanankupaq,+ wakintañataqmi hamuq tiempomanta willakunankupaq, wakintañataqmi ima willakuypas Diosmanta utaq mana Diosmanta kasqanta yachanankupaq,+ wakintañataqmi huk rimaykunata rimanankupaq,+ wakintañataqmi huk rimaypi rimasqankuta entiendechinankupaq.+ 11 Tukuy chaykunaqa Diospa atiyninwanmi ruwakun, Diosmi tantiasqanman hina chaykunataqa sapakamaman qun.

12 Cuerpoqa huklla kachkaspanpas achka parteyuqmi, chayna achka parteyuq kachkaspanpas huk cuerpollam,+ chaynam Cristopas*. 13 Ñuqanchikqa judio kaspapas, mana judio* kaspapas, runata servispapas utaq runata mana servispapas Diospa atiyninwanmi llapallanchik bautizasqa karqanchik chullalla cuerpo kananchikpaq, llapallanchikmi Diospa atiyninta chaskirqanchik.

14 Cuerpoqa manam huk parteyuqllachu aswanqa achka parteyuqmi.+ 15 Sichu chaki ninman: “Ñuqaqa manam makichu kani, chaymi mana cuerpopa partenchu kani”, nispa. Hinaspaqa manamá chayraykuchu cuerpopa parten kasqanmantaqa rakikurun. 16 Sichu rinri ninman: “Ñuqaqa manam ñawichu kani, chaymi mana cuerpopa partenchu kani”, nispa. Hinaspaqa manamá chayraykuchu cuerpopa parten kasqanmantaqa rakikurun. 17 Sichu enteron cuerpo ñawilla kanman hinaptinqa, ¿maypitaq rinriqa kanman? Sichu enteron cuerpo rinrilla kanman hinaptinqa, ¿maypitaq sinqaqa kanman? 18 Diosqa cuerpopa sapa partenkunatam munasqanman hina maymi kananpi churarqa.

19 Sichu cuerpopa partenkuna llapallanku kanmanku huknin parten hinalla hinaptinqa, ¿maypitaq cuerpoqa kanman? 20 Cuerpopa partenkuna achka kaptinpas cuerpoqa hukllam. 21 Ñawiqa manam makita ninmanchu: “Manam necesitaykichu”, nispaqa. Manataqmi umapas chakita ninmanchu: “Manam necesitaykichu”, nispaqa. 22 Aswanqa mana servichikunapaq hina rikchakuq cuerpopa partenkunapas necesitakunmi. 23 Cuerpopi mana kaqpaqpas hapisqanchik partenkunataraqmi suma-sumaqta cuidanchik,+ chaynapim pinqakunapaq kaq partekunaqa suma-sumaq cuidasqa kanku. 24 Cuerponchikpi mana pinqakunapaq kaq partekunam ichaqa mana imatapas necesitanchu. Chaynatam Diosqa cuerpota ruwarqa mana kaqpaqpas hapisqa partenkunapas suma-sumaq cuidasqa kananpaq, 25 chaynapi cuerpo mana rakinasqa kananpaq, aswanqa cuerpopa partenkuna sapakama yanapanakunankupaq.+ 26 Cuerpopa mayqin partenpas ñakariptinqa chay partewan kuskam wakin partenkunapas ñakarin,+ chaynallataqmi cuerpopa mayqin partenpas hatunchasqa kaptinqa chay partewan kuska wakin partenkunapas kusikun.+

27 Arí, qamkunaqa Cristopa cuerponmi kankichik,+ sapakamataqmi cuerponpa huknin parten kankichik.+ 28 Diosmi iñiqkuna ukupi runakunata churarun puntata apostolkunata,+ chaymanta Diosmanta willakuqkunata*,+ hinaspañataq yachachiqkunata,+ chaymantañataq milagrokuna ruwaqkunata,+ unquqkuna sanoyachiy atiqkunata,+ hukkuna yanapaqkunata, allin kamachiy yachaqkunata+ hinaspa huk rimaykuna rimaqkunata.+ 29 Ichaqa manamá llapallankuchu apostolkunaqa kanku, manataqmi llapallankuchu Diosmanta willakuqkunapas kanku, chaymantapas manamá llapallankutaqchu yachachiqkunapas kanku, manataqmi llapallankuchu milagrokunata ruwanku ¿aw? 30 Manamá llapallankuchu unquqkunata sanoyachinankupaq atiyniyuqqa kanku ¿aw? Manamá llapallankuchu huk rimaykunata rimaqkunaqa kanku+ ¿aw? Manamá llapallankutaqchu huk rimaykunapi rimasqankutapas entiendechinku+ ¿aw? 31 Ichaqa hinallayá kallpanchakuychik Diospa mana imallapaq qusqankunamanta allin kaqkunataraq chaskinaykichikpaq.+ Chaywanpas qawachisqaykichikraqmi imayna aswan allin kawsakunapaq ñanta.+