2 Juan

1 Iñiqkunapi punta apaqmi* qillqamuni Diospa kuyasqan señoramanwan wawankunaman. Qamkunataqa anchatam kuyaykichik, manataqmi ñuqallachu, aswanqa chiqap yachachikuykunata yachaqkunapas kuyasunkichikmi. 2 Chiqap yachachikuykunaqa sunqunchikpim kachkan, chaymantapas wiñaypaqmi sunqunchikpiqa kanqa, chaymi kuyaykichik. 3 Taytanchik Diosmi hinaspa churin Jesucristom chay chiqap yachachikuykunata quwasunchik chaynataq kuyawasunchik. Paykunam anchata kuyawasunchik*, llakipayawasunchik hinaspa hawkayayta quwasunchik.

4 Ancha kusisqam kachkani wakin wawaykikuna chiqap yachachikuykunaman hina kawsasqankuta yachaspay,+ kasukuchkankuqa Dios taytanchikmanta kamachikuy chaskisqanchikman hinam. 5 Señora, kunanñataqmi ruegakamuyki, llapallanchikyá kuyanakusun. Kuyanakuymanta qillqamusqayqa manam musuq kamachikuychu, aswanqa qallariymantaraq chaskisqanchik kamachikuymi.+ 6 Kuyakuyqa Diospa kamachikuyninkunaman hina tukuy tiempo kawsakuymi, Diospa kamachikuyninqa kuyanakuspa kawsakuymi,+ chaytam qallariymantaraq uyarirqankichik. 7 Achkallaña pantachikuqkunam kay pachapi rikurirun,+ paykunaqa manam creenkuchu Jesucristo runayaruspan kay pachaman hamusqantaqa,+ chayna runakunaqa pantachikuqkunam chaynataq anticristokunam*.+

8 Llamkasqayku mana yanqa kananpaqyá cuidakuychik, chaynapim llapan premioykichikta chaskinkichik.+ 9 Pipas Cristopa* yachachikuyninman mana hapipakuspan pantaykunataña yachachiqqa manam Dioswanqa hukllachu.+ Pipas Cristopa yachachikuyninman hina kawsaqmi ichaqa Dios taytanchikwan hinaspa churinwan huklla kachkan.+ 10 Pipas hamuspa Jesucristopa yachachikuyninman hina mana yachachisuptikichikqa amayá wasikichikpipas+ chaskiychikchu nitaq rimakuykuychikpaschu. 11 Pipas chay runata rimaykuqqa chay runapa mana allinkuna ruwaqmasinmi rikurirun.

12 Achkam qamkunaman qillqamunayqa kachkan, ichaqa manam munanichu cartallawan nimuytaqa, chaymi piensachkani watukamuspay qamkunawan rimaykuyta, chaynapi anchata kusikunaykichikpaq.

13 Diospa kuyasqan ñañaykipa wawankunam saludamusunki.