Job
8 Sua+ lawmanta Bildadñataqmi+ Jobta nirqa:
2 “¿Haykapikamataq chaynata rimanki?+
¡Rimasqaykikunaqa llumpay wayrapa pukusqan hinam!
3 Tukuy atiyniyuq Diosqa, ¿yaqachu haykapipas mana allinta ruwanman?
¿Yaqachu haykapipas allin ruwayta qipanchanman?
4 Diosta mana kasukuspankuch churikikunaqa huchallikurunku,
chaychá Dios castigaruptin wañurunku.
5 Sichu tukuy atiyniyuq Diosta maskaptikiqa
tukuy sunquykiwan payta mañakuptikiqa,+
6 munasqanman hina kawsakuptikiqa
hinaspa allin ruwaq kaptikiqa+ payqa uyariykusunkimanmi,
hinaspapas tukuy imaykitam imam kaqta kutichipusunkiman.
7 Ñawpaq kapusuqnikikunamantaqa
qipa kapusuqnikikunam aswan allinqa kanman.+
8 Chaynaqa tapurikuyá ñawpaq runakunata,
hinaspayá tukuy ima yachasqankuta umaykiman churay.+
9 Ñuqanchikqa qipa wiñaymi kanchik, chaymi mana imatapas yachanchikchu,
kawsakuyninchikpas llantuy hinallam.
10 Ñawpaq runakunaqa tukuy imamantam yachachisunki*,
paykunaqa imakunamantapas willasunkim.
11 ¿Wiñanmanchu tutura pukyupa mana kasqanpi?
¿Wiñanmanchu suqus yakupa mana kasqanpi?
12 Chaykunaqa manaraq ikllichkaspanmi* chakirunqa, manaraq chutachkaptinkum chakirunqa,
ima quramantapas puntataraqmi chakirunqa.
13 Chaynam Diosta qunqaruq runakunapas tukunqa,
Diosta qipanchaqpaqqa manam ima allinpas kanqachu.
14 Imapas hapipakusqanqa yanqallam,
arañapa llikan hina tipikuruqllam.
15 Chay hapipakusqanqa tipikuruqllam,
maynataña hapipakuptinpas manam takyanqachu.
16 Chayna runaqa rupaypi sumaqllaña planta hinam,
kallmankunapas huertapim mastarikun.+
17 Ranra rumipim sapinkunapas arwinakurun,
rumikunapa chawpinman usturuspanraqmi wankukurun.
18 Chaypi kasqanmanta chutaruptinkuqa ninqakum:
‘Manam haykapipas rikurqaykikuchu’, nispa.+
19 Chaynatamá chinkanqa,+
hinaptinmi rantinpi hukña allpamanta wiñamunqa.
20 Diosqa manam qipanchanqachu payman sunqu kaqkunataqa,
mana allin runakunatam ichaqa qipanchanqa.
21 Diosqa kaqmantam asirichisunki,
payqa kaqmantam kusirichisunki.
22 Chiqnisuqnikikunaqa pinqayman churasqam kanqaku,
mana allin ruwaqkunapa carpanpas chinkachisqam kanqa”, nispa.