2 Samuel

15 Absalonmi carretata hinaspa caballokunata armakururqa, huñururqataqmi 50 runakunatapas ñawpaqninta kallpanankupaq.+ 2 Absalonqa tutapayta hatarispanmi llaqtaman yaykuna ñanpa patanpi sayaq.+ Pipas quejawan kamachiq Davidman riptinmi+ qayaykuspan tapuq: “¿Maymantataq kanki?”, nispa. Chay runañataqmi niq: “Israelpi huknin ayllumantam kani”, nispa. 3 Absalonñataqmi niq: “Mañakusqaykiqa allinmi, ichaqa manam pipas kanchu kamachiq Davidpa rantinpi yanapasunaykipaq”, nispa. 4 Hinaspam Absalonqa niqraq: “¡Amalaya ñuqata churaykuwanmanku kay llaqtapi juez kanaypaq! Hinaptinqa llapallan quejayuqkuna hamuptinchá yanapaykuyman”, nispa.

5 Chaymantapas, Absalonpa ñawpaqninpi qunqurakuykunanpaq pipas asuykuptinqa, makinta haywarispanmi hatarichispan Absalonqa muchaykuq.+ 6 Chaytam Absalonqa ruwaq pipas quejawan kamachiqman riptinqa. Chaynatam Absalonqa Israel runakunawan kuyachikuyta qallaykurqa.+

7 Tawa wata* pasaruptinmi Absalonqa kamachiq Davidta nirqa: “Hebron llaqtatayá rirusaq,+ Jehova Diosman nisqaytam ruwanay kachkan. 8 Siria runakunapa Guesur llaqtanpi+ kachkaspaymi nirqani:+ ‘Jerusalen llaqtaman Jehova Dios kutichiwaptinqa, Jehova Diospaqmi animalta nakapusaq’”, nispay. 9 Davidñataqmi nirqa: “Allinmi, riruyá”, nispa. Chaymi Absalonqa Hebron llaqtata rirqa.

10 Chaymantam Absalonqa Israel lliw ayllukunaman mana pipa yachasqallanta willachimurqa: “Waqra pukusqankuta uyarispaykichikmi ninkichik: ‘¡Absalonmi Hebron llaqtapi kamachichkan!’”, nispa.+ 11 Absalonqa 200 runakunapiwanmi Jerusalen llaqtamantaqa rirqa. Paykunaqa Absalon niykuptinmi mana yachastin rirqaku. 12 Chaymantapas, Absalonqa animalta nakaspanmi qayachirqa Aitofelta,+ payqa Guilo llaqtanpim+ kachkarqa. Aitofelqa karqa imatapas tantiananpaq Davidta yanapaqmi.+ Kamachiqta qipanchaqkunaqa aswan-aswan yapakuspankum Absalonman hukllawakurqaku.+

13 Chaymantam Davidman huk runa willaykurqa: “Israel runakunaqa Absalonmanñam hukllawakuchkanku”, nispa. 14 Hinaptinmi Jerusalenpi runankunata David nirqa: “¡Hakuchik kaymanta ayqikusun,+ manam Absalonmanta lluptiytaqa atisunchu! ¡Utqayman ayqikusunchik, yanqañataq hayparamuwaspanchik llaqtapi runakunatawan kuskata wañurachiwachwan!”, nispa.+ 15 Runankunañataqmi nirqaku: “Kamachiqllayku, qampa nisqaykitam kasukusaqku”, nispanku.+ 16 Chaynapim Davidqa wasinpi kaqkunapiwan lluqsirqaku. Saqirurqaqa chunka sapaq warminkunallatañam+ wasita cuidanankupaq. 17 Kamachiq David pasaptinmi llapallan runakuna qatirqaku hinaspam llaqtamanta lluqsinapiña* sayarurqaku.

18 Llapallan runankunam Davidwan rirqaku, rirqakutaqmi Keret runakunapas hinaspa Pelet runakunapas.+ Gat llaqtamantapas+ 600 runakunam qatirqaku. Llapallankum David qawachkaptin chimparqaku. 19 Davidmi Gat llaqtayuq Itaita+ nirqa: “¿Imanasqataq qamqa ñuqaykuwan riwaq? Kutispaykiyá chay huk kamachiqta yanapamuy, qamqa kanki llaqtaykimanta qarqumusqa forastero runam. 20 ¿Qayna punchawllaraq chayaramuchkaptikichu ñuqaykuwan maymanpas rinaykipaq nikiman? ¡Runaykikunawan kuskayá kutikuy, Jehova Diosyá llakipayaspa* ama qunqasunkichu!”, nispa.+ 21 Chaywanpas Itaiqa nirqam: “¡Kawsaq Jehova Diospa sutinpi hinaspa qampa qayllaykipim niki, maymanña riptikipas hinaspa wañunayña kaptinpas qanwanmi risaq kamachiqlláy!”, nispa.+ 22 Davidñataqmi Itaita nirqa:+ “Chaynaqa chimpayá”, nispa. Chaynapim Itaiqa runankunapiwan hinaspa churinkunapiwan chimparqa.

23 Jerusalenpi hinaspa hichpanpi yachaqkunam* qaparispa waqarqaku runakuna chimpaptinku. Kamachiq Davidqa Cedron wayqupim sayarqa.+ Llapallan runankunañataqmi chayninta chimparqaku chunniq lawman. 24 Sadocpas+ Leviy ayllukunawanmi+ rirqa Diospa baulninta*+ apastin. Paykunaqa sayaruspankum Diospa baulninta pampaman churaykurqaku.+ Runakuna chimpayta tukuruptinmi Abiatar+ chayaramurqa. 25 Sadoctam David nirqa: “Diospa baulninta llaqtaman kutichiy.+ Jehova Dios kuyawaspanqa kaqmantam kutichimuwanqa baulnintawan carpanta qawanaypaq.+ 26 Mana kuyawaspanqa munasqantayá ñuqawan ruwachun”, nispa. 27 Davidqa sacerdote Sadoctam nirqa: “¿Manachu qamqa Diospa munayninmanta allin yachaq kanki?+ Llaqtamanyá Abiatarpiwan kutikuychik, kutichuntaqyá churiki Aimaazpas hinaspa Abiatarpa churin Jonatanpas.+ 28 Ñuqaqa mayuta chimpana chunniqpim suyasqayki imapas pasakusqanta willamuwanaykichikkama”, nispa.+ 29 Chaymi Sadocwan Abiatarqa Diospa baulninta Jerusalenman kutichirqaku, hinaspam chaypiña qipakurqaku.

30 Davidqa Olivos muqu+ wichaytam qispirqa waqastin, qala chakilla hinaspa uman tapasqa. Paywan riq llapallan runakunapas umanku tapasqam waqastin qispirqaku. 31 Davidtam nirqaku: “Aitofelpas Absalonman+ sayapakuspanmi+ qipancharusunki”, nispa. Chaynata niykuptinkum Davidqa Diosta mañakurqa: “¡Jehova Dioslláy, Aitofelpa imapas tantiasqankunaqa mana umayuq runapa+ tantiasqan hinayá kachun!”, nispa.+

32 Diosta yupaychananku muquman David chayaruptinmi chaypi Husai+ kachkasqa llikipasqallaña pachayuq hinaspa allpallaña umayuq. Husaiqa Arki kastamantam+ karqa. 33 Paytam David nirqa: “Ñuqawan rispaykiqa manam yanapawankimanchu. 34 Aswanqa Jerusalen llaqtaman kutispaykiyá Aitofelpa tantiasqanta pantachimuy,+ hinaspayá Absalonta nimuy: ‘Kamachiqlláy, runayki kaytam munallani. Taytaykipa yanapaqninmi karqani, kunanmi ichaqa qamtaña yanapasqayki’, nispa.+ 35 Sacerdote Sadocwan Abiatarpas chaypim kachkanku. Wasipi imatapas uyarispaykiqa paykunamanmi willanki.+ 36 Chaypitaqmi kachkanku Sadocpa churin Aimaazpas+ chaynataq Abiatarpa churin Jonatanpas.+ Paykunawanmi willachimuwanki imapas uyarisqaykitaqa”, nispa. 37 Chaynapim Davidpa amistadnin+ Husaiqa Jerusalenman chayarurqa Absalon yaykuchkaptin.