Romanos

11 Chaynaqa, ¿runankunatachu Diosqa qipancharurqa?+ ¡Manam! Ñuqapas Abrahanpa miraynin Benjamin ayllumanta kaq Israel runam kani. 2 Diosqa manam puntataraq akllasqan runankunataqa qipancharqachu.+ ¿Manachu yachankichik Eliasmanta Diospa qillqan ima nisqanta? Israel runakuna mana allin ruwasqankumantam Eliasqa Diosman willakuspa 3 nirqa: “Jehova* Dioslláy, qanmanta willakuqkunatam wañurachinku, altartam* lliwta tuñirachinku, ñuqallañam kachkani. Ñuqatapas wañurachiwaytam munachkanku”, nispa.+ 4 Hinaptinqa, ¿ima nirqataq Diosqa? Eliastam nirqa: “Israel nacionpiqa kachkanraqmi 7.000 runaykuna. Paykunaqa manam Baal sutiyuq taytachapa ñawpaqninpiqa qunqurakurqakuchu”, nispan.+ 5 Chaynallataqmi kunanpas kachkan Diospa runankunamanta puchuqkuna,+ paykunatam Diosqa akllarqa ancha kuyakuq* kasqanrayku. 6 Ancha kuyakuq* kasqanrayku paykunata Dios akllachkaptinqa manañam kikinkupa ruwasqankuman hinachu akllasqaqa kanku,+ ruwasqankuman hina akllasqa kaptinkuqa+ manañachá nichwanchu Diospa ancha kuyakuyninpi akllasqa kasqankutaqa.

7 Hinaptinqa, ¿ima nisuntaq? Israel runakunaqa manam llapallankuchu tarirqaku tukuyta ruwaspa maskasqankutaqa, akllasqakunallam tarirqakuqa.+ Wakinkuñataqmi rumi sunqu rikurirurqaku.+ 8 Chayna kasqanmantam ñawpaq qillqakunapi nin: “Diosmi paykunaman kachaykamun miski-miski puñuyta,+ manaraqmi yanapanchu imapas qawasqankumanta utaq uyarisqankumanta imam kaqta yachanankupaqqa”, nispa.+ 9 Davidpas kaynatam nirqa: “Mikuy ruwasqallankuyá* paykunataqa tuqlla hina wichiykachichun urmachikuq rumi hina hinaspa ñakarichiqnin sasachakuy hina. 10 Ñawinku antayaruptinyá ama imatapas rikuchunkuchu, llasaq qipita qipichkanmankupas hinayá sapa kuti kurkuchunku”, nispa.+

11 Chaynaqa, ¿urmaruspachu judiokunaqa manaña sayariyta atirqaku? ¡Manam! Sayariytaqa atinmankum. Ichaqa paykuna pantarusqankuraykum huklaw nacionniyuq runakuna kunanqa salvasqa kanmanku, chayta yachasqankum judiokunataqa astawan kallpanchakunankupaq yanapanqa.+ 12 Pantarusqankuraykum llapa runakuna apuyachisqa hina kachkanku, asllayasqankuraykutaqmi huklaw nacionniyuq runakunapas apuyachisqa hina kachkanku.+ Hinaptinqa, ¡aswan allinraqchá kanqa llapallanku huñusqa kaptinkuqa!

13 Huklaw nacionniyuq runakuna, kunanñataqmi qamkunata rimapayaykichik. Ñuqaqa huklaw nacionniyuqkunapaq apostol kaspaymi+ Diospaq tukuy ima ruwasqayta anchata kuyani*.+ 14 Ñuqaqa munanim chayta ruwasqaywan llaqtamasiykunata imaynallatapas astawan kallpanchakunankupaq yanapayta, chaynapi wakillantapas salvanaypaq. 15 Llaqtamasiykuna qipanchasqa kasqanrayku+ huklaw nacionniyuq runakuna Dioswan allinyanakuptinqa, ¡imaynaraqchá kanqa llaqtamasiykuna yapamanta chaskisqa kaptinkuqa! Paykunaqa wañusqankumanta kawsarimuchkaq hinachá kanqaku. 16 Chaymantapas, tantapaq masamanta punta rakisqanku masa Diospaq sapaqchasqa kaptinqa llapallan masam Diospaq sapaqchasqaña, chaynallataqmi sachapa sapinpas sapaqchasqa kaptinqa kallmankunapas Diospaq sapaqchasqaña.

17 Aceitunas sachapa wakin kallmankunam Diospa kuchusqan karqa, qamñataqmi purun aceitunas sacha kachkaspaykipas chay aceitunas sachaman injertasqa karqanki, chaynapi puchuq kallmankunawan kuska kanaykipaq, hinaspam chay sachapa sapinmanta allinkunata chaskichkanki. 18 Amayá Diospa kuchusqan kallmakunamanta aswan allin kasqaykipaqqa hapikuychu,+ manam qamchu sachapa sapintaqa takyachinki, aswanqa qamtam sapin takyachisunki. 19 Hinaptinqa ichapas nichkanki: “Wakin kallmakunam kuchusqa karqaku ñuqa injertasqa kanaypaq”, nispa.+ 20 Chiqapña chayna kaptinpas paykunaqa Diospi mana iñisqankuraykum kuchusqaqa karqaku,+ qanmi ichaqa Diospi iñisqaykirayku hinalla sayachkanki.+ Chaywanqa amayá hatuntukuychu, aswanqa Diostayá manchakuy. 21 Sichum chay sachapa kikin kallmankunatapas Dios mana pampachachkaspanqa manamá qamtapas pampachasunkichu. 22 Chaynaqa amayá qunqaychu Dios kuyapayakuq*+ hinaspa piñakuq kasqantaqa. Qipanchaqnin runakunapaqmi Diosqa piñakun,+ qamtam ichaqa Diosqa kuyapayasuchkanki, chaypaqqa paywan kuyachikunaykipaqmi hinalla kallpanchakunayki, manachayqa qampas kuchusqam kanki. 23 Diospi iñiyta qallarispankuqa judiokunaqa injertasqam kanqaku,+ Diosqa kaqmantam injertayta atinman. 24 Qamqa kikillanmanta wiñaq purun aceitunas sachamantam kuchusqa karqanki, hinaspam mana injertana kachkaptinpas huertapi aceitunas sachaman injertasqa karqanki. Chaytapas Dios ruwachkaspanqa, aswanraqchá huertapi aceitunas sachapa kikin kallmantaqa chay sachaman injertaspa kutiykachinman.

25 Wawqi-panillaykuna, mana yachaysapapaq hapikunaykichikpaqmi Diospa pakasqan kaqmanta+ yachanaykichikta munani. Israel runakunamanta wakinmi mana uyariyta munankuchu huklaw nacionniyuq runakunamanta akllasqakuna llapanku kanankukama, 26 hinaptinmi lliw Israel+ runakuna salvasqa kanqaku. Chayna kananmantam ñawpaq qillqakunapi nirqa: “Sion+ muqumantam mana allinmanta salvaqninqa hamunqa, hinaspam Jacobpa mirayninkunata huchankumanta wanachinqa. 27 Huchankuta chinkachiptiyñam+ paykunawan contrato*+ ruwasqay tukunqa”, nispa. 28 Sumaq willakuyta qipanchasqankuraykum paykunaqa chiqaptapuni Diospa enemigon rikurirunku, chayna kasqankuqa qamkunapa allinnikichikpaqmi. Chaywanpas ñawpaq abuelonkuman Diospa nisqanman hinam chiqaptapuni wakinqa akllasqa karqaku kuyasqan runakuna kanankupaq.+ 29 Diosqa manam ñakakunqachu imapas qusqankunamantaqa hinaspa qayasqan runakunamantaqa. 30 Qamkunaqa ñawpaqtam Diosta mana kasukuq runakuna karqankichik,+ kunanmi ichaqa judiokunapa mana kasukusqankurayku+ Diospa llakipayasqan kachkankichik.+ 31 Kunanqa judiokunam mana kasukuq rikurirunku, qamkunañataqmi Diospa llakipayasqan kachkankichik. Chaywanpas qamkunata llakipayasusqaykichikman hinam judiokunatapas Diosqa llakipayaykunman. 32 Diospaqqa llapallankum mana kasukuq kasqankurayku+ presochasqa hina kachkanku, chaynapi llapallankuta llakipayananpaq.+

33 ¡Mayna sumaqmi allin kaqkunata achkanpi Diospa quwasqanchikqa! ¡Mayna sumaqmi Diospa ancha yachayniyuq hinaspa ancha yuyayniyuq kasqanqa! ¿Yaqachu pipas Diospa imapas tantiasqankunamanta lliwta yachanman? ¿Yaqachu pipas Diospa tukuy ima ruwasqankunamanta lliwta yachanman? 34 “¿Yaqachu pipas Jehova* Diospa yuyayninta riqsinman? ¿Yaqachu pipas ninman imam ruwananta?”.+ 35 “¿Pitaq imallatapas Diosman qurqa chaynapi qusqanmanta kutichipunanpaq?”.+ 36 Tukuy imapas Diosmantam hamun, tukuy imapas payraykum hinaspa paypaqmi. Diosyá wiña-wiñaypaq hatunchasqa kachun. Chaynayá kachun*.