Exodo

1 Israelpa utaq Jacobpa churinkunam Egipto nacionman ripukurqaku, paykunawantaqmi rirqa taytanku Israelpas, sapakamam aylluntin rirqaku. Paykunapa sutinmi:+ 2 Ruben, Simeon, Leviy, Juda,+ 3 Isacar, Zabulon, Benjamin, 4 Dan, Neftaliy, Gad hinaspa Aser.+ 5 Jacobpa llapallan mirayninkunam karqa 70. Joseyqa ñam Egiptopiña karqa.+ 6 Watakuna pasaruptinmi Joseyqa wañukurqa,+ wañukurqataqmi wawqinkunapas chaynataq Joseyta riqsiq runakunapas. 7 Israelpa mirayninkunam churi-wawayuq kaspanku achkallay-achkaman mirarurqaku, chaymi yachasqanku* allpamanpas huntarurqaku. Paykunaqa manchakunapaq hinataqmi karqakupas.+

8 Watakuna risqanman hinam Egiptopiqa kamachiyta qallaykurqa Joseyta mana riqsiq runaña. 9 Chay kamachiqmi runankunata nirqa: “Israelpa mirayninkunaqa ñuqanchikmantaqa achkallay-achka hinaspa kallpasapakunam rikurirunku.+ 10 Yachaywanyá imatapas ruwasunchik amaña miranankupaq. Manachayqa huk llaqtayuqkuna ñuqanchikwan peleaq hamuptinkum paykunaman hukllawakuykuspa ñuqanchikwan peleanmanku, hinaspam kaymanta ripukunmanku”, nispa.

11 Chayraykum Israelpa mirayninkunataqa sasa llamkaykunapi llamkachirqaku,+ kamachiqninkupas mana llakipayakuq runakunam karqaku. Israelpa mirayninkunawanmi Egipto nacionta kamachiqpaq* ruwachirqaku iskay hawaqpi kawsay churana hatun wasikunata. Hukninpa sutinmi karqa Pitom, hukninpañataqmi Rameses.+ 12 Astawan ñakarichiptinkupas Israelpa mirayninkunaqa astawanraqmi mirarqaku. Chayta qawaspankum Egipto runakunaqa Israel runakunata manchakuyta qallaykurqaku.+ 13 Chaymi manaña miranankuta munasqankurayku Israel runakunataqa aswan sasa llamkaykunapiraq llamkachikurqaku.+ 14 Israel runakunataqa llumpaytam ñakarichirqaku. Llamkachikurqakum mitu ruwaypi, adobe chutaypi chaynataq chakrakunapipas. Maqa-maqarispam tukuy ima ruwaypi llumpayta llamkachikurqaku.+

15 Chaymantam Egiptota kamachiqqa Hebreo kasta Sifra hinaspa Pua sutiyuq warmikunata qayachirqa, chay warmikunam wiksayuq warmikunata unqukunankupaq yanapaqku. 16 Chay kamachiqmi chay warmikunata nirqa: “Hebreo warmikuna unqukuptin+ yanapaspaykichikqa kaytam ruwankichik: Qari wawa kaptinqa wañuchinkichikmi, warmi kaptinmi ichaqa ama imanankichikchu”, nispa. 17 Chay warmikunam ichaqa Diosta manchakusqankurayku Egiptota kamachiqpa nisqantaqa mana kasukurqakuchu, chaymi qari wawakunataqa mana wañuchirqakuchu.+ 18 Chaymantam Egiptota kamachiq runaqa chay warmikunata yapamanta qayachimuspan nirqa: “¿Imanasqataq qari wawakunata mana wañuchirqankichikchu?”, nispa. 19 Hinaptinmi chay warmikunaqa nirqaku: “Hebreo warmikunaqa manam Egipto warmikuna hinachu. Hebreo warmikunaqa mana ñakarispallam unqukunku, chaymi manaraqpas chayachkaptiykuqa unqukurunkuña”, nispa.

20 Unqukuqkunata yanapaq warmikunatam Diosqa bendecirqa, chaymi Israel runakunaqa astawan mirarqaku manchakuypaq kanankukama. 21 Chaymantam Diosqa chay warmikunata yanaparqa achka wawayuq kanankupaq, Diosta manchakuq kasqankurayku. 22 Chaymantam Egiptota kamachiqqa lliw runankunata nirqa: “Chayraq naceq Hebreo kasta qari wawakunataqa Nilo mayumanmi wischunkichik, warmi wawakunatam ichaqa ama imanankichikchu”, nispa.+