Salmos

143 Jehova Dioslláy mañakamusqaytayá uyariykullaway,+

yanapaykuwanaykipaq qayakamusqaytayá uyariykullaway,

nisqaykiman hina ruwaq kasqaykiraykuyá uyariykullaway, allin ruwaq kasqaykiraykuyá uyariykullaway.

 2 Kay yupaychaqnikitaqa amayá juzgallawaychu,

manam pipas allinlla ruwaqqa kanmanchu qampa qayllaykipiqa.+

 3 Chiqniwaqniykunam maskawachkan,

pampapim qalaypaqta saruparuwan.

 4 Sunquypim qalaypaq hukmanyasqa kallachkani,+

sunqullaypas susunkasqa hinam kachkan.+

 5 Ñawpaq watakunatam yuyarini,

tukuy ima ruwasqaykipim yuyaymanani,+

tukuy ima ruwasqaykikunapim suma-sumaqta yuyaymanani.

 6 Qanmanmi makillayta haywarimuyki,

yakumanta kaq chaki allpa hinam ñuqapas qanmanta kallachkani.+ (Samarinapaq).

 7 Jehova Dioslláy,+ chayllayá uyariykullaway,

qalaypaq mana kallpayuqñam kallachkani.+

Amayá ñuqamantaqa pakakuwaychu,+

pakakuruwaptikiqa wañukuq runakuna hinach ñuqapas kayman.+

 8 Achikyaqtayá imaña kaptinpas kuyakuqllaña kasqaykita uyariykachiway,

ñuqaqa qamllapim hapipakullani.

Mayninta purinaypaqyá ñanta riqsiykachillaway,+

ñuqaqa qanmanmi asuykamullayki.

 9 Jehova Dioslláy, chiqniwaqniykunamantayá harkaykullaway,

ñuqaqa waqaychaykuwanaykipaqmi qamta maskallayki.+

10 Munaynikita ruwanaypaqyá yachaykachillaway,+

qamqa Diosniymi kallanki.

Qamqa llampu sunqum kanki,

atiynikiwanyá allin allpanta pusaway.

11 Jehova Dioslláy, sutikiraykuyá wañuymanta harkaykullaway,

allin ruwaq kasqaykiraykuyá sasachakuymanta hurquykullaway.+

12 Imaña kaptinpas kuyakuq kasqaykiraykuyá chiqniwaqniykunata wañuchiy,+

manchachiwaqniy runakunatayá wañuchiy,+

ñuqaqa yupaychaqnikim kani.+