Genesis

41 Iskay wata qipatañataqmi Egiptota kamachiq* sueñokurqa+ Nilo mayupa patanpi kasqanta. 2 Chay sueñokusqanpim rikurqa mayumanta qanchis wiray-wiray vacakuna lluqsiramuspan Nilo mayupa patanpi mikuchkaqta.+ 3 Chaypa qipantam lluqsimurqa millakuypaq qanchis charki vacakuna, hinaspam qanchis wira vacakunapa kasqanman rispa kuska karqaku. 4 Hinaptinmi chay millakuypaq qanchis charki vacakunaqa qanchis wira vacakunata mikururqa. Chaynapim Egiptota kamachiqqa rikcharirurqa.

5 Ichaqa kaqmanta puñuykuspanmi huktawan sueñokururqa. Chay sueñokusqanpiqa rikurqa huk tullullamanta qanchis puqusqa espigakunatam.+ 6 Chaypa qipantañataqmi wiñaramurqa intipa qispimunan lawmanta quni wayrapa chakichisqan qanchis chusullaña espigakuna. 7 Hinaspam chay chusullaña espigakunaqa puqusqa espigakunata mikururqa. Hinaptinmi Egiptota kamachiq rikcharuptinqa sueñoylla kasqa.

8 Chaymi Egiptota kamachiqqa paqarintin llakisqallaña kaspan qayachimurqa sacerdotekunata hinaspa layqa ruwaqkunata. Hinaspam sueñokusqanta paykunaman willarqa, hinaptinmi mana pipas sueñoyninpa ima ninan kasqantaqa willayta atirqachu.

9 Chaymi vino haywaqkunapa kamachiqnin Egipto kamachiqta nirqa. “Kunanmi willasqayki ñawpaqmantaraq mana willasqayta. 10 Qanmi llumpayta ñuqawan hinaspa tanta ruwaqkunapa kamachiqninwan piñakururqanki, hinaspaykim soldadokunata kamachiqpa makinpi kaq carcelpi wichqaruwarqankiku.+ 11 Chaypim huk tuta iskayniyku sueñokurqaniku, ichaqa manam chaynallachu karqa sueñokusqaykuqa.+ 12 Chaypim ñuqaykuwan kuska karqa Hebreo kasta huk musu, payqa soldadokunata kamachiqpa serviqninmi karqa.+ Hinaptinmi sueñokusqaykuta willakuptiyku+ ima ninan kasqanta willawarqaku. 13 Chaymi willawasqankuman hina karqa. Ñuqatam kaqmanta vino haywaqkunapa kamachiqnin kanaypaq churaruwarqanki, tanta ruwaqkunapa kamachiqnintañataqmi warkurachirqanki”, nispa.+

14 Hinaptinmi Egiptota kamachiqqa chaylla carcelmanta Joseyta qayachimurqa.+ Chaymi Joseyqa barbanta qatqakurqa* hinaspa chukchantapas kachiy-kachiyta rutukurqa, hinaspam huk pachawan hinakuykuspan kamachiqpa kasqanman rirqa. 15 Hinaptinmi kamachiqqa Joseyta nirqa: “Sueñoyniypa ima ninan kasqantam mana pipas willawayta atinchu. Ichaqa uyarirqanim pipas sueñokusqanta willasuptiki ima ninan kasqanta willasqaykita”, nispa.+ 16 Chaymi Joseyqa kamachiqta nirqa: “Chayqa manam ñuqamantachu, Diosmi willasunki allinnikipaq kaqta”, nispa.+

17 Hinaptinmi Egiptota kamachiqqa Joseyman willarqa: “Sueñoyniypim Nilo mayu patanpi sayachkasqani. 18 Hinaptinmi Nilo mayumanta qanchis wira vacakuna lluqsiramuspan mayu patanpi mikuchkasqaku.+ 19 Chaypa qipantam lluqsiramurqa qanchis charki vacakuna. Manam haykapipas Egiptopiqa chayna vacakunataqa rikurqanichu. 20 Hinaptinmi chay qanchis charki vacakunaqa qanchis wira vacakunata mikururqa. 21 Mikuruspankupas hina charkillam karqaku mana mikusqa hina. Chaymi rikcharirurqani.

22 Chaymantam rikurqani huk tullullamanta qanchis puqusqa espigakunata.+ 23 Hina qipantam quni wayrapa chakichisqan qanchis chusu espigakuna wiñaramurqa. 24 Chaymi chay quni wayrapa chakichisqan chusu espigakunaqa puqusqa espigakunata mikururqa. Chay sueñokusqaytam willakurqani sacerdotekunaman hinaspa layqa ruwaqkunaman.+ Ichaqa manam pipas ima ninan kasqantaqa willawayta atirqachu”, nispa.+

25 Hinaptinmi Joseyqa Egiptota kamachiqta nirqa: “Chay sueñokusqaykikunaqa hina chayllam. Diosmi ima ruwananmanta willasuchkanki.+ 26 Qanchis wira vacakunaqa qanchis watam, puqusqa espigakunapas hina chay qanchis watam. Iskaynin sueñoynikikunapa ima ninanqa hina chaynallam. 27 Chay wira vacakunapa qipanta lluqsimuq qanchis charki vacakuna hinaspa quni wayrapa chakichisqan qanchis chusu espigakunaqa qanchis wata muchuymi*. 28 Kay willasqayman hinam Diosqa ima ruwananta qawachisuchkanki.

29 Qanchis watam Egipto allpapi achkallay-achka kawsaykuna qispinqa. 30 Chaymanta qipamanmi kanqa qanchis wata muchuy, hinaptinmi runakunaqa qunqarunqaku ñawpapi Egipto allpapi achkallay-achka kawsay qispisqanta. Allpa pachapim mana haykapipas rikusqanku muchuy kanqa.+ 31 Hinaptinmi runakunaqa qunqarunqaku Egipto allpapi achkallay-achka kawsay qispisqanta, chay muchuy llumpa-llumpay kasqanrayku. 32 Iskay kutikama sueñokusqaykim qawachin Diosqa chay tantiasqanta ruwanantapuni. Chaytaqa ñam Diosqa ruwanqaña.

33 Chaynaqa, maskayá allin yachayniyuq hinaspa yuyayniyuq runata, hinaspayá Egiptota kamachinanpaq churay. 34 Chaymantapas sapa llaqtapiyá kamachiqkunata churay, chaynapi qanchis watantin achkallay-achka kawsaykuna qispisqanmanta sapa pichqa wayqamanta huk wayqata huñunankupaq.+ 35 Chay kamachiqkunam hamuq watakunapi achka kawsaykuna qispiptin chay kawsaykunata huñunanku. Hinaspam llaqtakunapi chay kawsayta sumaqta waqaychananku. Chay huñusqanku kawsayqa qampam kanqa.+ 36 Hinaptinmi qanchis wata Egiptopi muchuy kaptin chay kawsay huñuchisqayki kanqa llaqtapi runakuna mikunanpaq. Chaynapi kay nacionpi runakuna yarqaymanta mana wañurunankupaq”, nispa.+

37 Joseypa chayna nisqanqa Egiptota kamachiqpaq hinaspa lliw yanapaqninkunapaqpas allinmi karqa. 38 Chaymi kamachiqqa yanapaqninkunata nirqa: “¿Maypitaq tarisun Diospa atiyninwan huntasqa kayna runataqa?”, nispa. 39 Hinaspanmi kamachiqqa Joseyta nirqa: “Manam kanchu pipas qam hina yachayniyuq hinaspa yuyayniyuq runaqa. Diosmi tukuy kaykunataqa willasurqanki. 40 Chaynaqa qanmi wasiypi nanachikunki. Llapallan llaqtapi runakunam kasusunki.+ Ichaqa qanmanta aswan munayniyuqqa ñuqallam kasaq kay Egiptota kamachiq kasqayrayku”, nispa. 41 Joseytaqa nirqaraqmi: “Kunanmi Egipto nacionta kamachinaykipaq churayki”, nispa.+ 42 Chaymi Egiptota kamachiqqa sellanan anillonta makinmanta hurquykuspan Joseypa makinman hinaykurqa. Hinaspam linomanta* ruwasqa sumaq pachawan pachaykachispan qurimanta collarta kunkanman churaykurqa. 43 Chaymantapas huknin sumaq carretanmanmi Joseytaqa qispichirqa, hinaptinmi runakunapas ñawpaqninta rispanku kaynata qayakurqaku: “¡Ñawpaqninpi qunqurakuychik*!”, nispa. Chaynata ruwaspanmi Joseyta churarqa Egiptota kamachiq kananpaq.

44 Egiptota kamachiqqa Joseytaqa nirqataqmi: “Ñuqa Egiptota kamachichkaptiypas, kay nacionpi runakunaqa qam kamachiptillaykim tukuy imata ruwanqaku”, nispa.+ 45 Chaymantam Joseyta suticharqa Zafenat-paneawan, hinaspam casarachirqa Asenat+ sutiyuq warmiwan, payqa karqa Potifera sutiyuq runapa churinmi. Potiferaqa karqa On* lawpi sacerdotem. Chaynapim Joseyqa lliw Egiptota kamachirqa.+ 46 Joseyqa 30 watanpim karqa+ Egiptota kamachiqpa qayllanman qayachisqa kaspanqa*.

Chaymantam Joseyqa Egiptota kamachiqpa qayllanmanta lluqsirqa, hinaspanmi Egiptopi llaqtakunata qawamurqa. 47 Chay watakunapim qanchis watapuni chakrakunapi achkallay-achka kawsaykuna qispirqa. 48 Chaymi Joseyqa chay qanchis watakunapi kawsayta huñuspa llaqtakunapi churarqa. Sapa llaqtapim huñuchirqa chakrakunapi qispiq kawsaykunata. 49 Achkallay-achka kawsaytam Joseyqa huñururqa lamar quchapa patanpi aquta hinaña. Achkallay-achkata huñusqankuraykum manaña yacharqakuchu mayna achka kasqantapas, chaymi manaña tupuyta atirqakuñachu.

50 Manaraq muchuy qallarichkaptinmi Joseypa warmin Asenatqa iskay churinkunata wachakurqa.+ Asenatqa karqa On lawpi sacerdote Potiferapa churinmi. 51 Piwi* churintam Joseyqa suticharqa Manaseswan*+ ‘Diosmi qunqarachiwan ñakarisqaykunata chaynataq aylluymanta llakikusqaytapas’ nisqanrayku. 52 Huknin churintañataqmi suticharqa Efrainwan*+ ‘Diosmi ñakarisqay allpapi churiykuna kananpaq yanapaykullawan’ nisqanrayku.+

53 Watakuna risqanman hinam Egiptopi achkallay-achka kawsaykunapa qispinan qanchis watakunaqa tukururqa.+ 54 Hinaptinmi Joseypa nisqanman hina qanchis watapuni muchuy qallaykurqa.+ Llapallan nacionkunapim qanchis wata muchuy karqa, Egiptopim ichaqa kawsaykuna* karqaraq mikunankupaq.+ 55 Chaymantam ichaqa Egiptopipas muchuy qallaykurqa, hinaptinmi runakunaqa Egipto kamachiqta mañakurqaku kawsayta qunanpaq.+ Chaymi payqa runankunata nirqa: “Joseyman riychik hinaspa tukuy ima nisusqaykichikta ruwaychik”, nispa.+ 56 Muchuyqa karqa tukuy hinastinpim.+ Chaymi Egiptopipas llumpay muchuy kasqanrayku Joseyqa kawsay waqaychasqan wasikunata kichachispan Egipto llaqtayuq runakunaman rantikurqa*.+ 57 Lliw llaqtakunamantam runakunaqa Egiptoman rirqaku Joseymanta kawsaykunata rantiq tukuy hinastinpi muchuy kasqanrayku.+