Exodo

32 Urquman risqanmanta Moises mana rikurimuptinñataqmi+ Israelpa mirayninkunaqa Aaronman asuykuspa nirqaku: “Maymi rinanchikman pusawananchikpaqyá taytachata ruwapuwayku,+ Egiptomanta pusamuwaqninchik chay Moisestaqa imachá pasarun”, nispa. 2 Hinaptinmi Aaronqa nirqa: “Warmikichikpa hinaspa churikichikpa qurimanta aritunkunatayá+ apamuychik”, nispa. 3 Chaymi llapallanku qurimanta aritunkuta hurqukuspanku Aaronman aparqaku. 4 Hinaptinmi Aaronqa llapallan quri apasqankuta chulluchirqa, hinaspam ruwarurqa malta toroman rikchakuq taytachata.+ Israelpa mirayninmanta wakinñataqmi nirqaku: “Yaw Israelpa miraynin runakuna, kaymi Egiptomanta hurqumuwaqninchik Diosninchikqa”, nispa.+

5 Ruwasqanta qawaykuspanmi Aaronqa ñawpaqninpi animalkunata kañananpaq altarta pirqarurqa, hinaspanmi runakunata nirqa: “Paqarinmi Jehova Diospaq kusikuspa tususun”, nispa. 6 Chaymi paqarintinta hatariruspanku animalkunata nakarqaku. Wakinmi kañanankupaq karqa, wakinñataqmi Dioswan hawkalla kasqankurayku mikunankupaq karqa. Chaymantam llapallanku mikurqaku hinaspa tomarqaku, hinaspañataqmi hatarispanku tususpa kusirikurqaku.+

7 Jehova Diosñataqmi Moisesta nirqa: “Kutiy, Egiptomanta pusamusqayki runaykikunam mana allinta ruwachkanku.+ 8 Kamachisqaykunata mana kasukuspankum+ qurimanta malta toroman rikchakuq taytachata ruwakurunku, hinaspam animalkunata kañapuspa ñawpaqninpi kumuykuchkanku kaynata nispa: ‘Yaw Israelpa miraynin runakuna, kaymi Egiptomanta hurqumuwaqninchik Diosninchikqa’”, nispa. 9 Jehova Diosqa Moisestaqa nirqataqmi: “Kay runakunaqa pasaypaq mana kasukuqmi kasqaku.+ 10 Paykunawanqa llumpay piñasqam kachkani, saqiykuway wañurachinayta, qanmantañam hatun nacionta rikurichisaq”, nispa.+

11 Hinaptinmi Moisesqa yupaychasqan Jehova Diosta+ nirqa: “Jehova Diosnilláy, amayá runaykikunataqa wañurachiychu. Qamqa Egipto nacionmantam tukuy atiynikiwan paykunataqa hurqumurqanki.+ 12 Wañurachiptikiqa Egipto runakunachiki ninqaku: ‘Diosninkuqa pusarurqa urqukunapi wañurachinanpaqmi hinaspa kay pachamanta chinkarachinanpaqmi’, nispa.+ Taytalláy, amañayá piñakuychu, amataqyá runaykikunataqa wañurachiychu. 13 Yupaychasuqniki Abrahanta, Isaacta hinaspa Israeltayá yuyariy. Paykunatam nirqanki: ‘Hanaq pachapi lucerokuna hinam miraynikikuna achka-achka kanqa,+ chay miraynikikunamanmi paykunapaqña kananpaq akllasqay allpata qusaq’”, nispa.+

14 Hinaptinmi Jehova Diospa sunqun tiyaykuptin Israelpa miraynin runakunataqa mana wañuchirqachu.+

15 Chaymantam Moisesqa urqumanta kutirqa Diospa qillqasqan iskay tabla rumikunata+ aparikuspan,+ chay tabla rumikunaqa iskay lawninpi qillqasqam karqa. 16 Chay tabla rumikunaqa Diospa ruwasqanmi karqa, chaypi qillqasqa kaqpas Diospa qillqasqanmi karqa.+ 17 Josueyñataqmi runakunapa qaparisqanta uyariruspan Moisesta nirqa: “Wañuchinakuypi kachkankumanpas hinam qapariy uyarikamuchkan”, nispa. 18 Moisesñataqmi nirqa:

Aswanqa hukmanmi uyarikamuchkan”, nispa.

19 Israelpa mirayninkunapa kasqanman chayaruspanmi Moisesqa rikururqa tususqankuta chaynataq malta toro ruwarusqankutapas.+ Chaymi apasqan tabla rumikunata ñutukunankama chamqarurqa urqupa sikinpi.+ 20 Chaymantam ruwasqanku malta torota kañaykuspa ñutuy-ñutuyta kutarurqa.+ Hinaspam kutasqanta yakuman hinaykuspa Israelpa mirayninkunaman chay yakuta tomachirqa.+ 21 Chaymantam Moisesqa Aaronta nirqa: “¿Imatataq kay runakunaqa ruwasurqanki kay huchata ruwanaykipaqqa?”, nispa. 22 Aaronñataqmi nirqa: “Amayá piñakuychu taytáy. Qamqa yachankim kay runakunaqa mana allin ruwaywan aysachikuqllaña kasqankuta.+ 23 Paykunam niwarqa: ‘Maymi rinanchikman pusawananchikpaqyá taytachata ruwapuwayku, Egiptomanta pusamuwaqninchik chay Moisestaqa imachá pasarun’, nispa.+ 24 Chaymi nirqani: ‘Pipapas qurimanta ima churakusqanpas kaptinqa ñuqamanyá apamuwachun’, nispay. Hinaptinmi chay apamusqanku qurita ninaman wischuykuptiy chay malta toro rikurirurqa”, nispa.

25 Moisesqa rikurqam runakunaqa muspaypi hina kasqankuta, chaynaqa karqaku Aaron mana harkakusqanraykum. Chaynapim Israelpa miraynin runakunaqa chiqniqnin runakunapa pinqasqan karqaku. 26 Chaymantam Moisesqa lliwpa rikunanku lawman* rispan nirqa: “Haykam Jehova Diosta kasukuqkunayá ñuqaman hamuychik”, nispa.+ Hinaptinmi Leviy ayllumanta kaqkuna llapallanku Moisespa kasqanman huñunakurqaku. 27 Moisesñataqmi paykunata nirqa: “Israelpa mirayninkunapa yupaychasqanchik Jehova Diosmi nin: ‘Sapakamayá espadaykichikta wiqawnikichikman watakuychik, hinaspayá cantomanta qallaykuspa wañuchiychik wawqikichikta, waqtaykichikpi yachaqta* hinaspa kuyasqaykichik kaqkunata’”, nispa.+ 28 Chaymi Leviy ayllumanta kaqkuna Moisespa kamachisqanman hina wañuchiptinku 3.000 qarikuna wañurqa. 29 Chaymantam Moisesqa nirqa: “Jehova Diospa kamachisusqaykichikta ruwanaykichikpaqmi sapaqchasqa kankichik, churikichiktawan wawqikichikta wañuchisqaykichikraykuyá+ Diospa yanapasqan kaychik”, nispa.+

30 Paqarintintañataqmi Moisesqa Israelpa mirayninkunata nirqa: “Qamkunaqa llumpay mana allintam ruwarunkichik. Chaymi urquman kutisaq qamkunarayku Jehova Dioswan rimanaypaq, icharaqpas pampachaykusunkichikman”, nispa.+ 31 Hinaspam Moisesqa urquman kutiruspan Jehova Diosta nirqa: “Taytáy, kay runakunaqa qurimanta taytachata ruwakuruspankum llumpayta huchallikurusqaku.+ 32 Chaywanpas pampachaykullayá,+ manachayqa sutiytayá libroykimanta* chinkarachiy”, nispa.+ 33 Chaymi Jehova Diosñataq Moisesta nirqa: “Libroymantaqa huchallikuqllatam chinkachisaq. 34 Chaynaqa kutispaykiyá Israelpa mirayninkunata qunay allpaman pusay. Angelniymi pusasunki.+ Qipa punchawkunatam huchankuman hina ñakariypi kanqaku”, nispa. 35 Jehova Diosqa Israelpa mirayninkunatam sasachakuyman churarqa malta torota Aaronwan ruwachisqankurayku.