1 Samuel

11 Ammon runakunapa kamachiqninmi karqa Naas,+ paymi soldadonkunapiwan Galaad lawman rirqa Jabes llaqtayuq+ Israel runakunawan peleananpaq. Chaymi Jabes llaqtayuq runakunaqa Naasta nirqaku: “Amayá wañuchiwaykuchu, aswanqa qamta servinaykupaqyá contratota* ruwasunchik”, nispa. 2 Kamachiq Naasñataqmi nirqa: “Llapaykichikpa alliq* ñawikichikta hurqunay kaptinqa contratotayá ruwasunchik. Llapallan Israel runakunatam pinqayman churayta munani”, nispa. 3 Hinaptinmi Jabes llaqtapi punta apaqkuna nirqaku: “Qanchis punchawyá suyaykuwayku llapallan Israel runakunaman willakuqkunata kachanaykukama. Yanapawanankupaq pipas mana hamuptinqa makikipim kasaqku”, nispa. 4 Chaymi willakuqkunaqa Saulpa yachasqan* Guibea llaqtaman+ chayaruspanku chaypi yachaqkunaman Naaspa ima nisqanta willarqaku, chaymi runakunaqa waqakurqaku.

5 Saulqa chakramantam animalninkunata qatirikuspan llaqtaman kutichkarqa. Chaymi chaypi kaq runakunata nirqa: “¿Imanasqataq runakunaqa waqachkanku?”, nispa. Chaymi willarqaku willakuqkunapa nisqankuta. 6 Chayta uyariykuptinmi Diospa atiyninqa Saulman huntaykurqa,+ hinaptinmi llumpayta piñakururqa. 7 Chaymi Saulqa iskay torokunata wañurachispan achkaman partiparurqa, hinaspam llapallan Israel runakunaman apachirqa. Willachirqam: “Saultawan Samuelta mana yanapaq runapaqa animalninkunapas kayna partipasqam kanqa”, nispa. Chaywanmi runakunaqa Jehova Diosta manchakurqaku, chaymi huk sunqulla peleanankupaq lluqsirqaku. 8 Chay runakunatam Saulqa Bezec llaqtapi yuparqa. Juda ayllumantam karqaku 30.000 soldadokuna, wakin ayllukunamantañataqmi 300.000 soldadokuna. 9 Hinaspam willaqninku runakunaman nirqaku: “Galaad lawpi Jabes llaqtayuqkunaman kaynata willamuychik: ‘Paqarinmi yaqa chawpi punchawta yanapasqaykiku’”, nispa. Chaymi willakuqkunaqa kutispanku Jabes llaqtayuqkunaman chaynata willarqaku, hinaptinmi llaqtamasinkunaqa kusikurqaku. 10 Chaymi Jabes llaqtayuqkunaqa Ammon runakunata nirqaku: “Paqarinqa makikipim kasaqku, chaymi munasqaykichiktaña ruwawankiku”, nispa.+

11 Paqarintintam Saulqa soldadonkunata kimsaman rakirurqa. Paykunam manaraq achikyamuchkaptin* rispanku Ammon runakunapa carpankupa chawpinkama wañuchistin yaykurqaku,+ hinaspam yaqa chawpi punchawkama wañuchirqaku. Chaymi Ammon runakunamanta puchuqkunañataq chulla-chulla kayman-chayman ayqikurqaku. 12 Chaymantam Samuelta runakuna nirqaku: “¿Pikunataq mana munarqachu kamachiqninchik Saul kananta?+ Pusamuchunkuyá wañuchinanchikpaq”, nispanku. 13 Saulñataqmi nirqa: “Kunanqa manam pitapas wañuchisunchu,+ kunan punchawqa Jehova Diosmi Israel runakunataqa yanapaykuwanchik”, nispa.

14 Chaymantañataqmi Samuelqa runakunata nirqa: “Hakuchik Guilgal llaqtaman+ kamachiqninchik Saul kasqanta riqsikunanchikpaq”, nispa.+ 15 Chaymi llapallan runakuna Guilgal llaqtaman rirqaku, chaypim Jehova Diospa qayllanpi kamachiqninku kananpaq Saulta churarqaku. Chaymantam Jehova Dioswan hawka kasqankurayku animalta nakapurqaku,+ hinaspam Saulpas chaynataq llapallan Israel runakunapas anchata kusikurqaku.+